Nuhere amazinda ko Yehova yakubabariye

1-2. Iyo abantu bigaye ibicumuro vyabo maze bakababarirwa, baca bumva bamerewe gute? (Raba n’ifoto.)

UMWAMI DAWIDI yari azi umubabaro uva ku kwiyagiriza. (Zab. 40:12; 51:3; akajambo k’intangamarara) Mu buzima bwiwe vyarashitse arakora amakosa akomeye. Ariko mu nyuma yarigaye vy’ukuri maze Yehova aramubabarira. (2 Sam. 12:13) Ico gihe yaciye atahura n’umunezero umuntu agira iyo Yehova amubabariye.—Zab. 32:1.

² Igihe na twebwe dutahuye ko Yehova yatubabariye, turagira umunezero nk’ukwo kwa Dawidi. Ntiworaba ingene turuhurirwa iyo tumenye ko Yehova yiteguriye kutubabarira ibicumuro vyacu, mbere naho vyoba bikomeye. Dukira gusa kwigaya bivuye ku mutima, tukavyatura, kandi tukihatira kudasubira kubikora. (Imig. 28:13; Ivyak. 26:20; 1 Yoh. 1:9) Vyongeye, biraduhumuriza kumenya ko iyo atubabariye ibicumuro vyacu aherezako, nk’aho umengo nta vyo twigeze dukora.—Ezk. 33:16.

3-4. Mushiki wacu umwe yiyumva gute n’inyuma y’aho abatirijwe, kandi twihweza ibiki muri iki kiganiro?

³ Ariko rero, rimwe na rimwe hari abo bigora kwemera ko Yehova yabahariye. Raba akarorero ka mushiki wacu umwe yitwa Jennifer yakuriye mu kuri. Igihe yagera mu buyabaga, yaratanguye kwigenza nabi, abaho ubuzima burimwo tubiri. Mu myaka yakurikiye, yahavuye agaruka kuri Yehova maze aratera imbere arabatizwa. Avuga ati: «Nari naratwawe no kwiruka inyuma y’amaronko, gukora ubusambanyi, kuborerwa, kandi nari umuntu akaza ishavu. Nari nsanzwe nzi ko nsavye imbabazi Yehova kandi nkigaya, yombabariye yisunze incungu ya Kristu. Naho ari ukwo, n’igihe nari maze kwigaya nagumye nkekeranya ko yambabariye.»

⁴ Vyoba nawe bihora bikugora kwemera ko Yehova yakubabariye? Yehova yipfuza ko tujijuka ko yatubabariye, tukaruhurirwa mu mutima nka kumwe kwa Dawidi. Muri iki kiganiro, tugiye kwihweza igituma dukwiye guhera amazinda ko Yehova yatubabariye, tubone n’icobidufashamwo.

KUBERA IKI TWOHERA AMAZINDA KO YEHOVA YATUBABARIYE?

5. Shetani yipfuza ko twemera iki? Tanga akarorero.

⁵ Twemeye ko Yehova yatubabariye, hariho umutego wa Shetani tudashobora kugwamwo. Niwibuke ko Shetani aca ku biti no ku mabuye kugira ngo atume duhagarika gukorera Yehova. Kugira ngo ivyo abishikeko, yoshobora gutuma twiyumvira ko ibicumuro vyacu bidashobora kubabarirwa. Raba akarorero ka wa mugabo w’i Korinto yakurwa mw’ishengero kubera ubusambanyi. (1 Kor. 5:​1, 5, 13) Amaze kwigaya, Shetani yashaka ko abo mw’ishengero batomubabarira, ngo basubire kumuha ikaze. Ico gihe nyene, Shetani yashaka ko uwo mugabo na we yumva ko adashobora kubabarirwa, bigatuma «yicwa n’umubabaro urenze urugero» maze agaca ahagarika gukorera Yehova. N’ubu Shetani aracakora ukwo nyene, ntarahindura umukenyuro. Ariko rero natwe «[ntitu]yobewe amayeri yiwe.»—2 Kor. 2:​5-11.

6. Ni igiki cotuma tureka kwiyagiriza?

⁶ Twemeye ko Yehova yatubabariye, turashobora kureka kwiyagiriza. Iyo dukoze igicumuro, mu bisanzwe turiyagiriza. (Zab. 51:17) Ico kintu ni ciza, kuko gishobora gutuma ijwi ryacu ryo mu mutima ridusunikira guhindura ingendo. (2 Kor. 7:​10, 11) Ariko rero, tugumye twiyagiriza kandi twaramaze kwigaya vyoshobora gutuma duheba gukorera Yehova. Iyo twemeye ko Yehova yatubabariye, duca tureka kwiyagiriza. Duca tumukorera dufise ijwi ryo mu mutima ryiza be n’umunezero mwinshi, nk’uko nyene abishaka. (Kol. 1:​10, 11; 2 Tim. 1:3) None twojijura gute umutima wacu ko Yehova yatubabariye?

IVYODUFASHA GUHERA AMAZINDA KO YEHOVA YATUBABARIYE

7-8. Yehova yidondoye gute kuri Musa, kandi ivyo biduhumuriza gute? (Kuvayo 34:​6, 7)

⁷ Zirikana ku kuntu Yehova yidondoye ubwiwe. Raba nk’akarorero ivyo Yehova yabwiye Musa ku musozi Sinayi.a (Soma Kuvayo 34:​6, 7.) Naho Yehova afise kamere nziza nyinshi, yahisemwo gushimika ko ari «Imana y’imbabazi n’impuhwe.» None wumva Imana nk’iyo yoreka kubabarira umusavyi wayo yigaya vy’ukuri? Habe namba. Kubigenza gutyo kwoba ari ukubura impuhwe n’ikigongwe, ivyo na vyo bikaba bitoshoboka kuri Yehova.

⁸ Kubera ko Yehova ari Imana y’ukuri, ntiyari kwidondora muri ubwo buryo yibeshera. (Zab. 31:5) Nta cotubuza rero kwizigira ukwo kuntu yidondoye. Nivyashika rero ukaguma wiyagiriza kubera bicumuro wakoze muri kahise, uraca wibaza uti: «Noba nemera vy’ukuri ko Yehova ari Imana y’imbabazi n’impuhwe be n’uko atazokwigera areka kubabarira umucumuzi wese yigaya? Nobuzwa n’iki none kwemera ko yambabariye?»

9. Guharirwa ibicumuro vyacu bisobanura iki? (Zaburi 32:5)

⁹ Zirikana ku vyo abanditsi ba Bibiliya bavuze ku bijanye n’imbabazi za Yehova. Raba nk’akarorero ingene umwe mu banditse Bibiliya ari we Dawidi yadondoye imbabazi za Yehova. (Soma Zaburi 32:5.) Yavuze ati: «Warahariye ikosa ryanje n’ibicumuro vyanje.» Ijambo ry’igiheburayo ryahinduwe ngo «guharira», rirashobora gusobanura «guterura», «gukuraho» canke «gutwara.» Igihe Yehova yaharira Dawidi ibicumuro vyiwe, ni nk’aho yabiteruye aca arabitwara. Dawidi rero yaciye yumva aruhutse kubera ko umuzigo wo kwiyagiriza yari yikoreye wari umuvuyeko. (Zab. 32:​2-4) Na twebwe turashobora kuruhurirwa nk’ukwo kwa Dawidi. Tumaze kwigaya vy’ukuri ibicumuro vyacu, ntidukwiye kubandanya twikoreye umuzigo wo kwiyagiriza, kandi Yehova yamaze kuturuhurira mu guterura ibicumuro vyacu akabitwara.

10-11. Imvugo ngo «witeguriye kubabarira» itwereka iki ku bijanye na Yehova? (Zaburi 86:5)

¹⁰ Soma Zaburi 86:5. Muri ico canditswe, Dawidi avuga ko Yehova ‘yiteguriye kubabarira.’ Ku bijanye n’iyo mvugo, igitabu kimwe gisigura ivya Bibiliya kivuga ko ‘kubabarira ari ko kameremere’ ka Yehova. Kubera iki none Yehova ameze gutyo? Igice gikurikira c’uwo murongo gica kibisigura giti: «Urukundo ufitiye abo bose bakwambaza ni rwinshi.» Nk’uko twabibonye mu kiganiro giheruka, urukundo rudahemuka rutuma Yehova yumira ku basavyi biwe b’intahemuka, ntabavirire. Urwo rukundo rudahemuka rutuma ‘ababarira ata gahigihigi’ abacumuzi bose bigaya. (Yes. 55:​7, akajambo k’epfo) Nivyashika bikakugora kwemera ko Imana yakubabariye, uraca wibaza uti: «Noba nemera ko Yehova ari Imana ibabarira, ko aharira n’umutima ukunze abacumuzi bose bigaya, bamutakambira bamusaba kubabarirwa? Nimba ndavyemera, mbuzwa n’iki none kwemera ko na jewe yambabariye igihe namutakambira ndamusaba kungirira imbabazi?»

¹¹ Kumenya ko Yehova atahura neza ko turi abacumuzi biraduhumuriza. (Zab. 139:​1, 2) Ivyo turabibonera no mu yindi zaburi Dawidi yanditse, na yo nyene ikaba idufasha guhera amazinda ko Yehova ari Imana ibabarira.

NTIWIBAGIRE IVYO YEHOVA YIBUKA

12-13. Twisunze Zaburi 103:​14, Yehova yama yibuka iki ku bitwerekeye, kandi ivyo bituma akora iki?

¹² Soma Zaburi 103:14. Dawidi avuga ko Yehova «[yi]buka ko turi umukungugu.» Ayo majambo arerekana imwe mu mvo zituma Yehova yama yiteguriye kubabarira abasavyi biwe baba bigaye. Arazi neza ko turi abacumuzi. Kugira ngo turushirize kubitahura, reka twinjire mu mizi ayo majambo Dawidi yavuze.

¹³ Dawidi avuga ko Yehova «azi neza ingene turemwe.» Yabumvye Adamu «mu mukungugu», akaba rero azi neza ko naho umuntu yoba atunganye, hariho ibintu akenera, nko gufungura, kuryama, no guhumeka. (Ita. 2:7) Ariko rero igihe Adamu na Eva bacumura, kuba umukungugu vyaciye bisigura n’ibindi. Kubera ko twabakomotseko, tuvuka turi abacumuzi, ivyo bikaba bituma twama duhengamiye ku gukora ikibi. Yehova ntazi gusa ko turi abacumuzi, ahubwo Dawidi avuga ko ‘anavyibuka.’ Ijambo ry’igiheburayo ryahinduwe ngo «kwibuka», ritekeye iciyumviro co kugira ico ukoze. Muri make rero, Dawidi yashatse kuvuga ati: «Yehova aratahura ko bishika tugacumura, kandi iyo bishitse maze tukigaya bivuye ku mutima, aba yiteguriye kugira ico akoze, akatubabarira.»—Zab. 78:​38, 39.

14. (a) Dawidi avuga ko Yehova ababarira ku rugero rungana gute? (Zaburi 103:12) (b) Akarorero ka Dawidi kerekana gute ko Yehova ababarira agaherezako? (Raba uruzitiro ruvuga ngo «Yehova arababarira kandi akibagira.»)

¹⁴ None Yehova ababarira ku rugero rungana gute? (Soma Zaburi 103:12.) Dawidi avuga ko Yehova atubabariye, aca ashira ibicumuro vyacu kure cane «nk’uko ubuseruko buri kure cane y’uburengero.» Mu bisanzwe, ubuseruko buri kure cane y’uburengero ku buryo bitigera bihura. None ivyo bitwereka iki ku bijanye n’ibicumuro Yehova aba yababariye? Igitabu kimwe kivuga ko «nimba ibicumuro vyacu bijanwa kure ukuraho, duca twizigira ko ata n’akamoto canke agasigarira kavyo kaba kagisigaye. Emwe, nta na kimwe gishobora gutuma bisubira kwibukwa.» Mu bisanzwe, akamoto karashobora kugira ivyo kibukije umuntu. Ariko iyo Yehova atubabariye ibicumuro vyacu, ni nk’aho ata n’igisigarira c’akamoto kavyo gisigara cohava gituma avyibuka maze akabiduhanira.—Ezk. 18:​21, 22; Ivyak. 3:19.

15. Twokora iki igihe tuguma twiyagiriza ku bw’amakosa twakoze muri kahise?

¹⁵ None ayo majambo Dawidi yavuze dusanga muri Zaburi ya 103, adufasha gute kwemera ko Yehova yatubabariye? Nimba tuguma twiyagiriza kubera ibicumuro twakoze muri kahise, twokwibaza duti: «Noba ndiko ndibagira ivyo Yehova wewe yibuka, yuko ndi umunyabicumuro be n’uko aharira umucumuzi wese yigaya? Ku rundi ruhande, noba ndiko ndibuka ivyo Yehova yahisemwo kwibagira, ni ukuvuga ibicumuro yambabariye kandi ko atazokwigera abimpanira?» Yehova ntashira umutima ku bicumuro twakoze muri kahise, akaba ari co gituma natwe tudakwiye kubishirako umutima. (Zab. 130:3) Iyo twemeye ko Yehova yatubabariye amakosa twakoze muri kahise, bica bituma na twe twibabarira maze ubuzima bukabandanya.

16. Tanga akarorero kerekana igituma kuguma twiyagiriza ku bicumuro twakoze muri kahise biteye akaga. (Raba n’ifoto.)

¹⁶ Zirikana kuri aka karorero. Kuguma twiyagiriza kubera ibicumuro twakoze muri kahise bimeze nko gutwara umuduga ariko ukaguma uraba muri ca kiyo cerekana ibiri inyuma. Ugiye uratereza akajisho muri ico kiyo, birashobora kugufasha kwirinda ingeramizi zoguturuka inyuma. Ariko rero kugira ngo wirinde amasanganya, utegerezwa kuguma uraba imbere. Na twebwe nyene kuza turibuka rimwe na rimwe amakosa twakoze muri kahise, birashobora kudufasha kugira ico tuyigiyeko maze tukiyemeza kutazosubira kuyakora. Ariko rero tuyagumijeko umutima, birashobora gutuma tuguma twiyagiriza maze ntidukore vyinshi mu murimo wa Yehova. Aho kubigenza gutyo, dukwiye kuguma turaba imbere. Turi mu nzira ijana mw’isi nshasha Imana yadusezeraniye, aho ‘tutazosubira kwibuka’ ibintu bibi.—Yes. 65:17; Imig. 4:25.

NUBANDANYE KUJIJURA UMUTIMA WAWE

17. Kubera iki dukwiye kubandanya tujijura umutima wacu ko Yehova adukunda be n’uko yatubabariye?

¹⁷ Turakwiye kubandanya tujijura umutima wacu ko Yehova adukunda be n’uko yatubabariye. (1 Yoh. 3:​19, akajambo k’epfo) Uti kubera iki? Kubera ko Shetani azoguma aca ku biti no ku mabuye kugira ngo atujijure ko tutabereye gukundwa canke kubabarirwa. Wewe ico arondera gusa, ni ugutuma duheba gukorera Yehova. Turiteze ko Shetani azoguma yongereza umwete muri ivyo, kuko azi yuko asigaranye igihe gito. (Ivyah. 12:12) Dukwiye rero kumurwanya twivuye inyuma.

18. Wokora ibiki kugira ngo ujijure umutima wawe ko Yehova agukunda be n’uko yakubabariye?

¹⁸ Kugira ngo urushirize kujijuka ko Yehova agukunda, nukurikize ivyiyumviro vyatanzwe mu kiganiro c’imbere y’iki. Kugira na ho urushirize kujijuka ko Yehova yakubabariye, nuzirikane ku kuntu yidondoye ubwiwe. Zirikana kandi ku vyo abanditsi ba Bibiliya bavuze ku bijanye n’ingene ari Imana ibabarira. Ntiwibagire ko azi neza ko uri umucumuzi kandi ko yiteguriye kuguharira. Ikigeretseko, niwibuke ko iyo ababariye aherezako. Niwabigira, na wewe uzohera amazinda nka Dawidi ku bijanye n’imbabazi za Yehova, maze uvuge uti: «Warakoze Yehova, kubona warahariye ‘ikosa ryanje n’ibicumuro vyanje’.»—Zab. 32:5.