NUGUME URI MASO!

Bibiliya ivuga iki ku bijanye n’ibitero vy’abitwaje ibirwanisho biriko biraba kw’isi?

VYASHIZWE KU GIHE ku wa 27 Ndamukiza 2023

Ibitero biteye ubwoba vy’abitwaje ibirwanisho biguma bihitana abantu benshi hirya no hino kw’isi. Raba ibiheruka kuba.

“Muri Amerika, uko umwaka utashe, ibitero bihitana abantu benshi birushiriza kwongerekana. Ubu bikaba bivugwa ko buri ndwi, haba nk’igitero kimwe.”—Vyavuzwe n’ikinyamakuru citwa The Guardian ku wa 21 Ndamukiza 2023.
“Muri Afrika y’Epfo, abantu cumi bo mu muryango umwe barishwe n’umugwi w’abitwaje ibirwanisho ubasanze ku muhana. Muri bo, hakaba harimwo abakobwa 7 n’akana k’agahungu k’imyaka 13.”—Vyavuzwe n’ikinyamakuru citwa AP News ku wa 21 Ndamukiza 2023.
“Umugabo yitwaje ibirwanisho wo mu Budagi yarishe abantu batandatu abasanze aho Ivyabona vya Yehova basengera i Hamburg, mu nyuma nawe aca ariyica.”—Vyavuzwe n’ikinyamakuru citwa Reuters ku wa 10 Ntwarante 2023.

Bibiliya irahumuriza abariko barashikirwa n’ivyago mwene ivyo. Kugira urabe abo vyashikiye, raba ividewo ivuga ngo DeJanerio Brown: Yaratuntuye ariko ntiyatanye n’akabando.

Bibiliya iradufasha kandi gutahura igituma ivyago bikomeye mwene ivyo biriko birashika. Imbere yuko utangura gusoma ibiri muri iki kiganiro, raba ividewo ivuga ngo Kubera iki Imana ireka tugashikirwa n’ingorane?

Mu kwezi kwa Mukakaro 2022, harabaye ibitero vy’abitwaje ibirwanisho biteye ubwoba hirya no hino kw’isi:

“Urupfu rw’umunyapolitike azwi cane wo mu Buyapani [Shinzo Abe, uwahoze ari umushikiranganji wa mbere] rwarateje uruhagarara muri ico gihugu be no kw’isi yose, na canecane kubera ko muri ico gihugu hatagwiriye ubukozi bw’ikibi be n’uko hari amategeko akomeye ku bijanye n’ibirwanisho.”—Vyavuzwe n’ikinyamakuru citwa The Japan Times, ku wa 10 Mukakaro 2022.
“Abanyagihugu bo muri Danemarke baratekewe n’ubwoba kubera ko hari umugabo yitwaje ibirwanisho yishe abantu batatu mw’iduka i Copenhague.”—Vyavuzwe n’ikinyamakuru citwa Reuters, ku wa 4 Mukakaro 2022.
“Afrika y’Epfo: Abantu 15 barishwe n’umuntu yitwaje ibirwanisho yateye akabare ko mu gisagara ca Soweto.”—Vyavuzwe n’ikinyamakuru citwa The Guardian, ku wa 10 Mukakaro 2022.
“Muri Amerika, abarenga 220 barishwe n’abantu bitwaje ibirwanisho mu kiringo c’akaruhuko kiba mu matariki yo ku wa 4 Mukakaro.”—Vyavuzwe n’ikinyamakuru citwa CBS News, ku wa 5 Mukakaro 2022.

Hoba hari icizigiro ko ubukozi bw’ikibi nk’ubwo buzohera? Bibiliya ibivugako iki?

Ubukozi bw’ikibi bugiye guhera

Bibiliya ivuga yuko iki gihe tubayemwo ari “imisi ya nyuma”, aho abantu bobaye ari inkazi kandi bigenza bunyamaswa. (2 Timoteyo 3:1, 3) Ubukozi bw’ikibi nk’ubwo buratuma abantu babaho bafise ubwoba. (Luka 21:11) Ariko, Bibiliya isezerana ko hazogera igihe ubukozi bw’ikibi bukarangira maze “abantu bakibera ahantu h’amahoro no mu bigo bitekanye rwose n’ahantu h’ukuruhukira hatagira inkomanzi.” (Yesaya 32:18) None, ubukozi bw’ikibi buzohera gute?

Imana izokuraho inkozi z’ikibi n’ibirwanisho vyose.

“Nayo ababisha, bazokurwaho bave kw’isi; nayo abahemu, bazorandurwa kuri yo.”—Imigani 2:22.
“Imana ihagarika intambara gushika ku mpera y’isi. Umuheto iravunagura, emwe, icumu igahimbagura; imikogote iyituririra mu muriro.”—Zaburi 46:9.

Imana izokuraho ubukozi bw’ikibi bwose mu kwigisha abantu kubana mu mahoro.

“Ku musozi mweranda wanje wose, nta kizokora inabi canke ngo kigire ico cononye; kuko isi izokwuzura koko ubumenyi bwa Yehova nk’uko amazi apfutse ikiyaga.”—Yesaya 11:9
No muri iki gihe, Imana iriko irigisha abantu bo hirya no hino kw’isi kwanka ubukozi bw’ikibi no kwirinda gukoresha ibirwanisho maze “inkota zabo bakabwirizwa kuzicuramwo ibirimisho, n’amacumu yabo bakayacuramwo imihoro yo gututūra.”—Mika 4:3.

Kugira ubone n’ibindi ku bijanye n’ingene Bibiliya isezerana ko hazogera igihe abantu babe kw’isi ata bwoba, soma ikiganiro kivuga ngo “ Vyoba bishoboka kubaho ata bwoba?” (kiraboneka mu gifaransa)

Kugira ubone ukuntu ubukozi bw’ikibi buzovaho buhere, nusome ikiganiro kivuga ngo “Amahoro agiye kuza kw’isi!” (kiraboneka mu gifaransa)