Ukwihangana kuravamwo impera

¹ “Ukwihangana kwanyu ni kwo kuzotuma mukiza ubugingo bganyu” (Luka 21:19). Ayo majambo ari mu yagize ubuhanuzi bwa Yezu bwerekeye “umuhero w’isi”, aratomora yuko kugira tugume turi intadohoka, dutegerezwa kuba twiteguriye guhangana n’ibigeragezo vyinshi. Ariko rero, bivuye ku nkomezi za Yehova, umwumwe wese muri twebwe arashobora ‘kwihangana gushitsa kw’iherezo’ maze ‘agakira’.—Mat. 24:3, 13; Flp. 4:13.

² Uruhamo, ingorane z’amagara, ingorane z’ubutunzi be n’intuntu yo mu mutima birashobora gutuma umusi umwumwe wose utoroha. Naho ari ukwo, ntidukwiye kwigera twibagira ko Shetani ariko aragerageza gusenyura ukutadohoka kwacu kuri Yehova. Umusi uwo ari wose tumara turi intadohoka kuri Data wa twese, uba ari uwundi musi wiyongereye tuba dutanze inyishu ku kibazo ca wa Mutukanyi. Ese ingene bihimbaye kumenya yuko “amosozi” dukorora igihe turi mu bigeragezo atibagirwa! Amosozi yacu ni ay’igiciro kuri Yehova kandi ukutadohoka kwacu kuranezereza umutima wiwe!—Zab. 56:8; Imig. 27:11.

³ Ibigeragezo biradukuramwo inkamba: Amakuba arashobora guhishura ubugoyagoye bw’ukwizera canke akanenge umuntu afise, nk’ubwibone canke ukutihangana. Aho kugerageza guhunga ivyo bigeragezo canke kubihagarika dukoresheje uburyo buteye kubiri n’Ivyanditswe, dutegerezwa gushira mu ngiro iyi mpanuro iri mw’Ijambo ry’Imana ivuga yuko “ukwihangana gukwiye guhīngūra igikorwa cakwo”. Kubera iki? Kubera yuko kwihanganira ibigeragezo tudahemuka bituma ‘dutungana rwose duhinguwe, tudahajije na kamwe’ (Yak. 1:2-4). Ukwihangana kurashobora kudufasha gutsimbataza kamere z’agaciro ntangere, nk’ukugira ibitegereka, kugira impuhwe be n’ikigongwe.—Rom. 12:15.

⁴ Ukwizera kuramuye: Igihe twihanganiye ibigeragezo, turaronka ukwizera kuramuye gufise agaciro kanini mu nyonga z’Imana (1 Pet. 1:6, 7). Ukwizera nk’ukwo kuraturonsa ivyangombwa kugira tuzogume dushikamye mu bigeragezo biri imbere. Vyongeye, turashobora kumenya ko twemerwa n’Imana, ivyo na vyo bigakomeza icizigiro cacu kandi bigatuma kirushiriza kutaba umugani kuri twebwe.—Rom. 5:3-5.

⁵ Impera ntangere ibaho dushobora kuronka kubera ukwihangana irerekanwa muri Yakobo 1:12, ahagira hati: “Hahirwa umuntu yihanganira ibimugerageza, kuko ni yamara kurama azohabga igitsibo c’ubugingo”. Ku bw’ivyo, nimuze tugume dushikamye mu kuyobokera Yehova kwacu, twizigiye tudakeka yuko azoha impera nyinshi ‘abamukunda’.

Igice ca 2: Kurongora inyigisho za Bibiliya zitera imbere

Kwitegurira kurongora inyigisho

¹ Kwigisha mu buryo ngirakamaro igihe turongora inyigisho ya Bibiliya, ntibisaba gusa kuganira ku mayagwa no gusoma ivyanditswe vyatanzwe mugabo bitasubiwemwo mu majambo. Turakeneye gushikiriza ayo mayagwa mu buryo bukora ku mutima uwo mutohoji. Ivyo bisaba ko twitegura mu buryo bunogangije tuzirikana nya mutohoji.—Imig. 15:28.

² Ingene twitegura: Nutangurire ku gusenga Yehova ku biraba uwo mutohoji be n’ivyo akeneye. Nusabe Yehova agufashe gukora ku mutima uwo mutohoji (Kol. 1:9, 10). Kugira ngo umutwe-shimikiro ugutomokere mu bwenge, nufate akanya ko gusuzuma umutwe w’ico kigabane canke w’ico cigwa, udutwe dutoduto, be n’ivyo ari vyo vyose umuntu ashobora kubona vyo gufasha inyigisho. Niwibaze uti: ‘Intumbero nyamukuru y’aya mayagwa ni iyihe?’. Ivyo bizogufasha gushimika ku vyiyumviro bikurubikuru igihe urongora iyo nyigisho.

³ Nusubiremwo witonze ayo mayagwa ingingo ku yindi. Nurabe inyishu z’ibibazo vyanditswe, ushire akamenyetso gusa kw’ijambo canke ku majambo nyamukuru. Niwihweze ingene ivyanditswe vyatanzwe bitasubiwemwo mu majambo bifitaniye isano n’iciyumviro nyamukuru kiri mu ngingo, wongere uhitemwo ivyo mwosoma mu kiringo c’inyigisho. Woshobora gusanga ari ngirakamaro kugira utwo wanditse ku mubari w’ico gisohokayandikiro. Nya mutohoji akwiye kubona neza yuko ivyo ariko ariga biva mw’Ijambo ry’Imana.—1 Tes. 2:13.

⁴ Nuhuze icigwa n’ivyo umutohoji akeneye: Ubukurikira, nurimbure ico cigwa ufise uwo mutohoji mu bwenge. Nugerageze kwiyumvira imbere y’igihe ibibazo yoshobora kubaza hamwe n’ivyiyumviro vyohava bimugora gutahura canke kwemera. Niwibaze uti: ‘Ni ibiki akeneye gutahura no kuryohora kugira atere imbere mu vy’impwemu? Noshobora gute kumukora ku mutima?’. Nuce rero ubifatirako mu kumwigisha. Rimwe na rimwe, ushobora gusanga bikenewe ko utegura ikigereranirizo, insobanuro yinaka, canke urukurikirane rw’ibibazo kugira umufashe gutahura insobanuro y’iciyumviro kinaka canke y’icanditswe kinaka (Neh. 8:8). Ariko uririnda gushiramwo ayandi makuru ata kintu kinini aterera ku mutwe-shimikiro. Kugira isubiramwo rigufi muhejeje kwiga, bizomufasha kwibuka ivyiyumviro nyamukuru.

⁵ Urazi ukuntu akamwemwe kadusya iyo abashasha bamye ivyamwa vy’ubugororotsi, bigatuma Yehova ashemezwa (Flp. 1:11)! Kugira ubafashe gushikira iyo ntumbero, niwitegure neza igihe cose ugiye kurongora inyigisho ya Bibiliya.