Igice ca 7: Kurongora inyigisho za Bibiliya zitera imbere

Gutura isengesho mu gihe c’inyigisho

1. (a) Ni kubera iki bibereye ko inyigisho ya Bibiliya tuyitanguza tukongera tukayisozera n’isengesho? (b) Twokora iki kugira ngo dutangure kuza turasenga mu gihe c’inyigisho ya Bibiliya?

¹ Kugira ngo abatohoji ba Bibiliya batere imbere mu vy’impwemu, umuhezagiro wa Yehova ni ntahara (1 Kor. 3:6). Ni co gituma bibereye ko inyigisho imaze gushinga imizi tuyitanguza tukongera tukayisozera n’isengesho. Ivyo akenshi turashobora kubigira ari ho tugitangura kwiga n’abantu bakunda ivy’ugusenga. Ku bandi na ho, hari aho twokenera kubanza kuraba igihe kibereye co gutangura kuza turasenga mu gihe c’inyigisho. Woshobora gukoresha Zaburi 25:4, 5 na 1 Yohana 5:14 kugira ufashe umutohoji gutahura igituma isengesho rikwiye guturwa, ugakoresha kandi na Yohana 15:16 kugira usigure igituma bihambaye gusenga Yehova biciye kuri Yezu Kirisitu.

2. Mu gihe umuvukanyikazi yaherekejwe n’umuvukanyi yabatijwe ku nyigisho ya Bibiliya, canke yaherekejwe n’umwamamaji w’igitsina gabo atarabatizwa, ni nde yotura isengesho?

² Ni nde akwiye gutura isengesho mu gihe c’inyigisho ya Bibiliya? Mu gihe umuvukanyi yabatijwe yaherekeje umuvukanyikazi ku nyigisho, uwo muvukanyi ni we yotura isengesho, naho uwo muvukanyikazi ari we yoshobora kurongora iyo nyigisho, mugabo akayirongora yitwikiriye umutwe (1 Kor. 11:5, 10). Ariko rero, niba umuvukanyikazi yaherekejwe ku nyigisho n’umwamamaji w’Ubwami w’igitsina gabo atarabatizwa, uwo muvukanyikazi ni we yotura isengesho. Muri ico gihe, akwiye kuba yitwikiriye umutwe igihe atura isengesho be n’igihe arongora iyo nyigisho ya Bibiliya.

3. Ni ibiki bibereye gushirwa mu masengesho dutura mu gihe c’inyigisho ya Bibiliya?

³ Iryo sengesho ryoba ririmwo ibiki: Amasengesho aturwa mu gihe c’inyigisho ya Bibiliya ntakeneye kuba maremare, ariko akwiye kuba ari ayadomako. Turetse ukurondera ko Imana ihezagira iyo nyigisho be no kuyikengurukira ku kuri mwiga, birabereye gushemeza Yehova nka we Sôko ry’ivyo mwiga (Yes. 54:13). Turashobora no gushiramwo amajambo agaragaza ko twitwararika vy’ukuri nya mutohoji be n’uko dukenguruka ishirahamwe Yehova ariko arakoresha (1 Tes. 1:2, 3; 2:7, 8). Gusaba ko Yehova ahezagira utwigoro tw’uwo mutohoji kugira ashire mu ngiro ivyo ariko yiga, birashobora gufasha uwo mutohoji kubona akamaro ko kuba ‘uwukora ivy’iryo jambo’.—Yak. 1:22.

4. Ni ivyiza ibihe biva ku gutanguza no gusozera inyigisho ya Bibiliya n’isengesho?

⁴ Isengesho riturwa mu gihe c’inyigisho ya Bibiliya riravamwo ivyiza vyinshi. Rirazana umuhezagiro w’Imana (Luka 11:13). Rirashimika ku kuntu kwiga Ijambo ry’Imana ari ikintu co gufatana uburemere. Uko umutohoji yumviriza amasengesho dutura, aba ariko ariga ukuntu yosenga (Luka 6:40). Ikigeretseko, amasengesho aba avuye ku mutima wuzuye urukundo dukunda Imana be n’ugukenguruka kamere zayo ntangere, arashobora gufasha nya mutohoji kugiriranira ubucuti na Yehova.

Ico twovuga ku vyerekeye ibinyamakuru

Umunara w’Inderetsi utangaza Ubwami bwa Yehova 1 Ruhuh.

“Si ikintu kibabaje none kubona abantu benshi muri iki gihe bahahazwa bakongera bakagirirwa ibintu biranga ubukazi? [Tanga akarorero kazwi aho iwanyu k’ibiherutse kuba hanyuma urindire yishure.] Iki kinyamakuru kiravuga ukuntu Imana ibona ubuzima bw’umuntu. Kirasigura kandi ukuntu izodukura muri uku gucumukura kuriho muri iki gihe”. Soma Zaburi 72:12-14.

Réveillez-vous! 8 Ruhuh.

“Kimwe mu bintu bitoroshe biduhanze muri kino gihe bikomeye kuruta ibindi, ni ukwihanganira ingorane zo mu buzima, si ko none? [Rindira yishure.] Bibiliya yari yarabuye ata kwihenda yuko ivyo ari ko vyogenze. [Soma 2 Timoteyo 3:1.] Iki kinyamakuru kiratanga inama ngirakamaro zishobora kubafasha mwe n’umuryango wanyu kwihanganira izo ngorane”.

Umunara w’Inderetsi utangaza Ubwami bwa Yehova 15 Ruhuh.

“Rimwe na rimwe turumva amakuru avugwamwo ivy’uko ngo hari igitangaro cabaye. [Tanga akarorero.] Abantu bamwebamwe baremera ayo makuru. Abandi usanga bagira amakenga. Iki kinyamakuru kiraca irya n’ino ivy’uko ibitangaro bivugwa muri Bibiliya vyoba vyarabaye koko, kikanavuga nimba mwene ivyo bitangaro vyoba bibaho muri iki gihe”. Soma Yeremiya 32:21.

Réveillez-vous! 22 Ruhuh.

“Mu bihe vya kera, Imana yategetse abana kwubaha ba se na ba nyina. [Soma Kuvayo 20:12.] Ku bwawe none, ubona ba inabibondo bubahwa nk’uko bibereye koko muri iki gihe? [Rindira yishure.] Iki kinyamakuru kiraca irya n’ino ingorane zitoroshe ba inabibondo bo mu bihugu bitandukanye bariko barahura na zo be n’ukuntu bariko barazifatamwo”.