Amahoro mu kiringo c’imyaka igihumbi n’inyuma y’aho!

1. Ni ikintu giteye umunezero ikihe kirindiriye “isinzi rinini”?

WOBA ushobora kwiha ishusho y’ibintu vyiza vyose intwaro ikomeye irongowe n’umutegetsi agororotse kandi w’umunyempuhwe yoshobora gukorera abo itwara mu kiringo c’imyaka igihumbi? Ivyo bintu vy’akaroruhore ni vyo birindiriye rya “sinzi rinini” ridaharurika, ni ukuvuga abazorokoka ya “makuba akomeye” azokuraho buhere ivy’iyi si.​—Ivyah. 7:9, 14.

2. Ni ibiki vyashikiye abantu mu myaka 6.000 iheze?

² Mu myaka 6.000 ihaciye kuva abantu batanguye kubaho, ukwigenga n’ukwitegeka vyatumye abantu bashikirwa n’imibabaro myinshi be n’ingorane nyinshi. Haraciye igihe kirekire Bibiliya ivuze iti: “Umuntu yaganje uwundi mu kumugirira nabi.” (Umus. 8:9) Ni ibiki tubona muri iki gihe? Uretse intambara n’imigumuko, hariho ingorane zikomeye z’ubukene, indwara, uguhonya ibidukikije, ihindagurika ry’ibihe n’ibindi n’ibindi. Abakuru mu vy’intwaro batugabisha yuko tudahinduye ivyo dusanzwe dukora ku bijanye n’ibidukikije, ingaruka zizoba agahomerabunwa.

3. Ni ibiki ya Ngoma y’imyaka igihumbi izoshitsa?

³ Mu gihe ca ya ngoma ya Yezu Kristu we Mwami Mesiya hamwe na bamwe 144.000 bazofadikanya na we kuganza, Ubwami bw’Imana buzogenda burakuraho ibintu bibi vyose vyakorewe abantu n’isi babako. Iyo Ngoma y’imyaka igihumbi izoshitsa umuhango weza umutima Yehova Imana yatanze ugira uti: “Ndiko ndema amajuru mashasha n’isi nshasha; kandi ivya kera ntibizokwibukwa, eka mbere ntibizoza mu mutima.” (Yes. 65:17) Ni ibintu vyiza igitangaza mugabo bitaraboneka ibihe biturindiriye? Tubifashijwemwo n’Ijambo ry’Imana ry’ubuhanuzi, nimuze dutereze akajisho ku bintu vyiza igitangaza “bita[ra]boneka.”​—2 Kor. 4:18.

‘BAZOKWUBAKA AMAZU BONGERE BATERE IMIRIMA Y’IMIZABIBU’

4. Ni ingorane zijanye n’uburaro izihe zihanze abantu benshi muri iki gihe?

⁴ Ni nde atoshima kuronka inzu yiwe bwite, ahantu we n’umuryango wiwe bashobora kwumva batekaniwe? Ariko rero, mw’isi ya none biragoye cane kuronka uburaro bubereye. Usanga abantu barundaniye mu bisagara. Benshi babwirizwa kuba mu tururi no mu tuzu tw’ivyondo dushaje. Usanga badashobora kuronka inzu yabo bwite.

5, 6. (a) Muri Yesaya 65:21 no muri Mika 4:4 hazoranguka gute? (b) Tworonka gute iyo mihezagiro?

⁵ Igihe Ubwami buzoba buganza, icipfuzo umuntu wese afise co kuronka inzu yiwe bwite kizoranguka, kuko Yehova yabivuze abicishije kuri Yesaya ati: “Emwe, bazokwubaka amazu bayiberemwo; emwe, bazotera imirima y’imizabibu birire ivyamwa vyayo.” (Yes. 65:21) Yamara, kuronka inzu yabo bwite, si co kintu conyene biteze. Nakare, muri iki gihe hari ababa mu nzu yabo bwite, bamwebamwe mbere ugasanga baba mu ruzu amahero canke ugasanga bafise urupangu runini. Mugabo bama bafise ubwoba bw’uko bashobora gutakaza iyo nzu bitumwe n’uko ivy’ubutunzi vyifashe nabi canke bagatinya ba rumenanzugi. Ese ukuntu ibintu bizoba bitandukanye n’ivyo igihe Ubwami buzoba buganza! Umuhanuzi Mika yanditse ati: “Bazokwicara umwe wese munsi y’umuzabibu wiwe no munsi y’igiti ciwe c’umusukoni, kandi nta n’umwe azobajugumiza.”​—Mika. 4:4.

⁶ Dufise ico cizigiro ciza igitangaza mu muzirikanyi, dukwiye gukora iki? Ni ivy’ukuri yuko twese dukeneye uburaro bubereye. Ariko rero, aho kwita ku rutare turondera inzu tudashobora kuronka muri iki gihe, kumbure mu gusaba amadeni arenze urugero, ntivyoba biranga ubukerebutsi none dushize umutima ku vyo Yehova yasezeranye? Niwibuke ivyo Yezu yavuze ku bimwerekeye ati: “Imbwebwe zirafise imyobo n’inyoni zo mu kirere zikagira ubwikingo, mugabo Umwana w’umuntu we ntagira aho arambika umutwe.” (Luka 9:58) Yezu yari afise ubushobozi n’ububasha bwo kwubaka canke kugura inzu nziza kuruta iyindi iyo ari yo yose umuntu ashobora kuronka. Ni kubera iki none atabigize? Biragaragara ko yipfuza kwirinda ikintu ico ari co cose cari kumubuza gushira ivy’Ubwami mu kibanza ca mbere. Twoba dushobora kumwigana maze tukaguma dufise ijisho riremuruye, ni ukuvuga tukirinda gushira imbere amaronko yotuma tugira amaganya?​—Mat. 6:33, 34.

“IBINGIRA N’UMWAGAZI W’INTAMA BIZORISHANYA”

7. Yehova yategetse iki ku bijanye n’imigenderanire yobaye hagati y’abantu n’ibikoko?

⁷ Igihe Yehova yarema ibintu vyo kw’isi, abantu ni bo yaremye ubwa nyuma. Yehova yarabwiye wa Mukozi wiwe w’umuhanga, ari we Mwana wiwe w’imfura, umugambi utomoye yari afise, ati: “Tureme umuntu mw’ishusho yacu, nk’uko dusa, aganze amafi yo mu kiyaga, n’ibiremwa biguruka vyo mu kirere, n’ibitungwa, n’isi yose, n’igikoko kigendagenda cose kigendagenda kw’isi.” (Ita. 1:26) Ni co gituma Adamu na Eva, be n’abantu bose bobayeho mu nyuma, bategetswe kuganza ibikoko.

8. Ni inyifato y’ibikoko iyihe yigaragaza cane muri iki gihe?

⁸ Vyoba vy’ukuri bishoboka yuko abantu baganza ibikoko vyose kandi bakabana na vyo mu mahoro? Abantu benshi usanga bakunda cane ibikoko batunze, nk’akarorero imbwa n’utuyabu. Ariko none tuvuge iki ku bijanye n’ibikoko vyo mw’ishamba? Raporo imwe ivuga iti: “Abanyasiyansi babaye hafi y’ibikoko bakongera bakiga ibivyerekeye, basanze ibikoko vyose vyonsa bifise inyiyumvo.” Ego ni ko, turabona ko ibikoko bigira ubwoba canke bigakara igihe bigeramiwe, ariko none vyoba bishobora kugira ico bamwe bokwita ikibabarwe? Iyo raporo ibandanya iti: “Igihe ibikoko vyonsa biba biriko birarera abana bavyo ni ho bihishura kamere yavyo ihambaye kuruta izindi zose, iyo na yo ikaba ari ubushobozi budasanzwe bifise bwo kugaragaza igishika.”

9. Ni amahinduka ayahe dushobora kwitega ku bijanye n’ibikoko?

⁹ Ntidukwiye rero gutangara igihe dusomye muri Bibiliya yuko hazoba amahoro hagati y’abantu n’ibikoko. (Soma Yesaya 11:6-9; 65:25.) Kubera iki? Niwibuke yuko igihe Nowa n’umuryango wiwe bava mu bwato inyuma ya rya Segenya, Yehova yamubwiye ati: “Ikinyabuzima cose co kw’isi . . . [k]izobandanya kubatinya no gucika ivutu kubera mwebwe.” Ukwo kwari ukugira ngo ibikoko vyikingire. (Ita. 9:2, 3) None Yehova ntiyoshobora gukuraho ukwo gutinya n’ukwo gucika ivutu kugira ngo iryo yavumereye mu ntango riranguke? (Hos. 2:18) Ese ikiringo giteye umunezero kirindiriye abo bose bazorokoka bakaba kw’isi ico gihe!

“IZOHANAGURA AMOSOZI YOSE”

10. Ni kubera iki gukorora amosozi ari ikintu gikunda gushikira abantu?

¹⁰ Igihe Salomo yabona “ibikorwa vy’agahahazo vyose bikorerwa munsi y’izuba,” yavuze ababaye cane ati: “Ehe amosozi y’abahahazwa, mugabo nta muhoza bari bafise.” (Umus. 4:1) Ukwo ni ko ibintu vyifashe muri iki gihe canke mbere vyarunyutse. Ni nde muri twebwe atarakorora amosozi bitumwe n’imvo kanaka? Ego ni ko, vyoshobora gushika tugakorora amosozi y’umunezero. Ariko rero, muri rusangi dukorora amosozi kubera ko tuba dufise intuntu mu mutima.

11. Ni inkuru yo muri Bibiliya iyihe igukora ku mutima cane?

¹¹ Niwibuke inkuru nyinshi dusoma muri Bibiliya zikora ku mutima zijanye n’abantu baseruye inyiyumvo zabo. Igihe Sara yapfa afise imyaka 127, “Aburahamu [yarinjiye] kuborogera Sara no kumuririra.” (Ita. 23:1, 2) Igihe Nawomi yasezera abakazana biwe babiri, “[barashize] amajwi hejuru, bararira” hanyuma amaze kuvugana na bo kandi gatoyi “bashira amajwi hejuru bongera kurira.” (Rusi 1:9, 14) Igihe Umwami Hezekiya yari ahanzwe n’indwara bikaba kandi vyaboneka ko ashobora gupfa, yarasenze Imana maze “atangura kurira cane,” bikaba bigaragara ko ivyo vyakoze ku mutima Yehova. (2 Abm. 20:1-5) Vyongeye, ni nde adakorwa ku mutima na ya nkuru ijanye n’igihe intumwa Petero yihakana Yezu? Igihe Petero yumva isake ibitse, “[yarasohotse] hanze, ararira arabogoza.”​—Mat. 26:75.

12. Ubutegetsi bw’Ubwami buzozanira gute abantu ukuruhurirwa nyakuri?

¹² Kubera ibintu bibabaje bidushikira, vyaba bito canke binini, abantu barakeneye cane guhozwa no kuruhurirwa. Ivyo ni vyo ya Ngoma y’imyaka igihumbi izogirira abatwarwa bayo: “[Imana] izohanagura amosozi yose ku maso yabo, kandi urupfu ntiruzoba rukiriho, eka n’ikigandaro canke amaborogo canke ububabare ntibizoba bikiriho.” (Ivyah. 21:4) Nk’uko nyene ari ikintu ciza igitangaza kuba ikigandaro, amaborogo n’ububabare bitazoba bikiriho, ni na ko birushiriza kumera kuba mu vyo Imana yasezeranye harimwo no gukuraho umwansi wa nyuma w’abantu, ari we rupfu. None ivyo bizogenda gute?

‘ABARI MU MVA BOSE BAZOZIVAMWO’

13. Urupfu rwagize ico rukoze gute ku bantu kuva Adamu acumuye?

¹³ Kuva aho Adamu acumuriye, urupfu rwaraganje abantu nk’umwami. Rwarabaye umwansi adatsindwa, ikintu gitegerezwa gushikira abantu bose b’abacumuzi, ikintu gituma bagira agahinda n’intuntu bitagira uko bingana. (Rom. 5:12, 14) Nkako, “kubera ugutinya urupfu,” abantu amamiliyoni “bari mu buja ubuzima bwabo bwose.”​—Heb. 2:15.

14. Bizogenda gute urupfu nirwakurwaho?

¹⁴ Bibiliya iravuga ibijanye n’igihe “urupfu [ari] we mwansi wa nyuma azokurwaho.” (1 Kor. 15:26) Hari imigwi ibiri y’abantu bazokwungukira kuri ivyo. “Isinzi rinini” ririho ubu rizoshobora kurokoka maze ryinjire mw’isi nshasha yasezeranywe ryiteze kubaho ibihe bidahera. Abantu amamiliyoni bamaze gupfa bazoshobora kuzuka. Woba ushobora kwiyumvira umunezero n’akamwemwe bizoba bihari igihe abo bazoba barokotse bazoba bariko barakira abo bazutse? Kwihweza twitonze inkuru zimwezimwe zerekeye izuka zo muri Bibiliya birashobora kudufasha kubona imbere y’igihe ukuntu ibintu bizoba bimeze.​—Soma Mariko 5:38-42; Luka 7:11-17.

15. Wovyifatamwo gute ubonye uwawe asubiye kuba muzima?

¹⁵ Zirikana izi mvugo ngo “bagwa mu gahundwe bikugura cane” na “batangura kuninahaza Imana.” Iyo uza kuba uhari muri ivyo biringo, hari aho wari kwumva umerewe gutyo nyene. Nkako, kubona abacu bapfuye basubiye kuba bazima biciye kw’izuka bizotuma tugira umunezero mwinshi cane. Yezu yavuze ati: “Isaha igira igere, aho abari mu mva bose bazokwumva ijwi ryiwe bakazivamwo.” (Yoh. 5:28, 29) Nta n’umwe muri twebwe arigera abona ikintu nk’ico; nta gukeka ko kizoba ari kimwe mu bintu bihambaye kuruta ibindi vyose “bitaboneka.”

IMANA IZOBA “VYOSE KU MUNTU WESE”

16. (a) Ni kubera iki dukwiye kuvugana igishika ibijanye n’imihezagiro itaraboneka? (b) Ni ibiki Paulo yavuze kugira ngo aremeshe abakirisu b’Abakorinto?

¹⁶ Egome, kazoza keza igitangaza kararindiriye abaguma ari abizigirwa kuri Yehova muri ibi bihe bitoroshe! Naho iyo mihezagiro ihambaye itaraboneka, kuyigumiza mu mizirikanyi yacu mu buryo butomoye bizodufasha kugumiza umutima ku bintu bihambaye vy’ukuri no kwirinda gusamazwa n’ibintu bikwegera vy’igihe gito vyo muri iyi si. (Luka 21:34; 1 Tim. 6:17-19) Mu gihe co kwiga no gusenga mu muryango, mu biganiro tugiranira n’abo dusangiye ukwemera no mu biyago tugiranira n’abo twigisha Bibiliya hamwe n’abashimishijwe, nimuze tuvugane igishika ibijanye n’icizigiro cacu ciza igitangaza. Ivyo bizodufasha gutuma ico cizigiro kiguma ari kizima mu muzirikanyi wacu no mu mutima wacu. Ivyo ni vyo nyene intumwa Paulo yagize kugira ngo aremeshe abakirisu bagenziwe. Ni nk’aho yaberetse ukuntu ibintu bizoba bimeze ku mpera ya ya Ngoma ya Kristu y’imyaka igihumbi. Nugerageze kwiyumvira insobanuro yuzuye y’amajambo ya Paulo ari mu 1 Abakorinto 15:24, 25, 28.​—Soma.

17, 18. (a) Ni mu buryo ubuhe Yehova yari “vyose ku muntu wese” abantu bagitangura kubaho? (b) Yezu azokora iki kugira ngo asubizeho ubumwe n’uguhuza?

¹⁷ Nta yandi majambo yodondora ukuntu ibintu bizoba vyifashe muri ico gihe c’agaheta yoruta aya avuga ngo: kugira “ngo Imana ibe vyose ku muntu wese.” Ivyo none bisobanura iki? Niwibuke ivyabaye muri Edeni igihe ba bantu batagira agasembwa Adamu na Eva bari mu bagize umuryango wa Yehova wo mw’ijuru no kw’isi urangwa amahoro n’uguhuza. Yehova, we Segaba w’ibiriho vyose, ni we ubwiwe yategeka ibiremwa vyiwe vyose, baba abamarayika canke abantu. Barashobora kuganira na we, bakamusenga kandi akabahezagira. Yari “vyose ku muntu wese.”

¹⁸ Iyo migenderanire myiza yahagaze igihe abantu bagarariza ubusegaba bwa Yehova bohejwe na Shetani. Ariko rero kuva mu 1914, Ubwami bwa Mesiya buriko buragira ico bukoze kugira ngo busubizeho ubwo bumwe n’ukwo guhuza. (Ef. 1:9, 10) Mu gihe ca ya Ngoma y’imyaka igihumbi, ibintu vy’agatangaza “bitaboneka” ubu, bizokwibonekeza. Hazoca haza “iherezo,” ni ukuvuga iherezo ry’Ingoma ya Kristu y’imyaka igihumbi. Ni igiki none kizoca gishika? Naho Yezu yahawe “ububasha bwose . . . mw’ijuru no kw’isi,” ntahahamira ubukuru. Nta cipfuzo afise co kunyaga ikibanza Yehova afise. Abigiranye ukwicisha bugufi, “azoshikiriza ubwami Imana yiwe ari yo Se.” Ikibanza n’ubukuru bidasanzwe afise azobikoresha “ku bw’ubuninahazwa bw’Imana.”​—Mat. 28:18; Flp. 2:9-11.

19, 20. (a) Abatwarwa b’Ubwami bose bazokwerekana gute ko bemera ubusegaba bwa Yehova? (b) Ni ikintu c’akaroruhore ikihe kiturindiriye?

¹⁹ Ico gihe, abatwarwa b’Ubwami bo kw’isi bazoba bagizwe abatagira agasembwa. Bazokurikiza akarorero ka Yezu maze bemere ubusegaba bwa Yehova babigiranye umutima ukunze n’ukwicisha bugufi. Bazoronka akaryo ko kwerekana ko bipfuza kugira ico kintu mu gutsinda ikigeragezo ca nyuma. (Ivyah. 20:7-10) Inyuma y’ivyo, abagarariji bose, baba abantu canke ibiremwa vy’impwemu, bazotikizwa ubutagisubira kubaho. Ese ukuntu ico kizoba ari igihe giteye umunezero! Umuryango wa Yehova wo kw’isi no mw’ijuru wose uko ungana uzomushemeza uhimbawe, akazoba ari “vyose ku muntu wese.”​—Soma Zaburi 99:1-3.

²⁰ Ivyo bintu vyiza igitangaza Ubwami bugiye kuzana, vyoba bizotuma ushira umutima ku gukora ivyo Imana igomba kandi ukihatira kubikora? Woba ushobora kwirinda gusamazwa n’icizigiro be n’uruhoza bitari vyo bitangwa n’isi ya Shetani? Woba uzokomeza umwiyemezo ufise wo gushigikira ubusegaba bwa Yehova? Ese ivyo ukora vyokwerekana yuko wipfuza kubigenza gutyo ibihe vyose! Uzoheza uterwe agateka ko kwibera mu mahoro no gutunganirwa muri iyo myaka igihumbi be n’inyuma y’aho!