Buri musi woba ubaza uti: “Yehova ari hehe?”

1, 2. (a) Abayuda bo mu gihe ca Yeremiya bari bamerewe gute mu vy’impwemu? (b) Ni igiki none bari bakwiye gukora?

YEREMIYA umwosori wari wamurenze. Yari ababajwe n’ukuntu abantu bo mu gihe ciwe bari bamerewe be n’ivyago Imana yari yaravuze ko vyobashikiye. Yipfuza ko umutwe wiwe woba nk’isôko ry’amazi, amaso yiwe na yo akaba nk’umugezi kugira ngo agume arira. Yeremiya yari afise imvo yumvikana yo kuririra ihanga ryiwe kubera ukuntu ryari rimerewe. (Yer. 9:1-3; soma Yeremiya 8:20, 21.) Kubera ko Abayuda baguma biyamiriza itegeko ry’Imana kandi ntibagamburuke ijwi rya Yehova, icago cobateye.​—Yer. 6:19; 9:13.

² Abo Bayuda, abikundira gusa kwumva ivyo indongozi zabo zo mu vy’idini zaguma zibabwira yuko ngo ibintu vyariko bigenda neza, ntibari barajwe ishinga n’ico Yehova yiyumvira ku bijanye n’inyifato yabo. (Yer. 5:31; 6:14) Bari bameze nk’abantu barwaye bariko barondera umuganga yobabwira ko bakomeye, mugabo yirengagije ibimenyetso bikomeye vy’indwara barwaye. Hamwe woba uremvye, ntiwokwipfuza none kwisuzumisha neza kugira ngo uvurwe amazi atararenga ikombe? Abo Bayuda bari bakwiye gusuzuma batibesha ukuntu bari bamerewe mu vy’impwemu. Bari bakwiye kubaza bati: “Yehova ari hehe?”​—Yer. 2:6, 8.

3. (a) Ni igiki Abayuda bari gukora, gutyo bakaba bariko barabaza bati: “Yehova ari hehe”? (b) Abayuda bari kurondera Yehova mu buryo bumwe ubuhe?

³ Mu gihe Abayuda bobanje kurondera kuyoborwa n’Imana imbere yo gufata ingingo, izihambaye n’izidahambaye, ni ho bobaye bariko barabaza bati: “Yehova ari hehe?” Ico gihe, Abayuda ntibabigira. Ariko rero, inyuma y’isangangurwa rya Yeruzalemu be n’igihe bobaye bagarutse bavuye i Babiloni, bobwirijwe ‘kurondera Yehova’ kandi ‘bomurondeye koko.’ Mu kubigenza gutyo, bomuronse kandi bomenye inzira ziwe. (Soma Yeremiya 29:13, 14.) None ivyo bobigize gute? Ubwa mbere, bobigize mu kwiyegereza Imana biciye ku masengesho avuye ku mutima boyituye bayisaba ko yobayobora. Ako ni ko gatima Umwami Dawidi yari afise. Yasavye Imana ati: “Numenyeshe inzira zawe, ewe Yehova; nyigisha iminyuro yawe.” (Zab. 25:4) Raba akamo Umwe yumva amasengesho yabateye biciye kuri Yeremiya mu mwaka ugira cumi Umwami Zedekiya ari ku ngoma. Yavuze ati: “Mpamagara, nanje ndakwitaba, ndakubwire n’umutima ukunze ibintu bihambaye kandi bidatahurika utari uzi.” (Yer. 33:3) Iyo uwo mwami be n’iryo hanga ry’irihemu baza kugaruka ku Mana, na yo yari kubahishurira ibintu ‘batatahura,’ ni ukuvuga ugusangangurwa kwa Yeruzalemu be n’ugusubira kuhubaka haheze imyaka 70.

4, 5. Abasavyi b’Imana bari kurondera Yehova mu bundi buryo ubuhe butandukanye?

⁴ Ubugira kabiri, abo Bayuda borondeye Yehova mu kugira ubushakashatsi ku bijanye n’ivyari vyarabaye muri kahise bakongera bakazirikana ku kuntu yafata abasavyi biwe. Gutyo, bokwibutse ivyari vyatumye Imana ibashima be n’ivyari vyatumye ishavu ryayo ribarurumbira. Bari basanzwe bafise ivyo Musa yanditse be n’inkuru zitari nke zahumetswe hamwe n’inyandiko zigana kahise k’abami ba Isirayeli be n’abami ba Yuda. Biciye ku kuzirikana kuri ivyo bintu no ku kwumvira abahanuzi nyakuri b’Imana, abo Bayuda bo mu gihe ca Yeremiya bari kumenya koko aho Yehova ari.

⁵ Ubugira gatatu, umwe wese muri abo Bayuda yari kurondera Yehova mu gukura icigwa ku vyamushikiye we ubwiwe no ku vyashikiye abandi. Ivyo ntibisobanura ko bari kuza barigerezako, ahubwo bari kwungukira ku kurimbura ivyo bo ubwabo bari barakoze muri kahise be n’ukuntu Yehova yavyakiriye. Iyo baza kuba ari abantu bazirikana, bari gutahura ukuntu Imana yabona ingene bigenza.​—Imig. 17:10.

6. Ni indemesho iyihe wokura ku vyashikiye Yobu?

⁶ Reka ubu na ho ivyo tubihuze no mu gihe cacu. Igihe ugire ufate ingingo canke uhitemwo ingendo yinaka, woba uhora ubaza uti: “Yehova ari hehe”? Hari abovuga yuko akenshi batama bibuka kubaza ico kibazo. Niba na wewe hari ukuntu ubona ko utama uvyibuka, rema ntiwihebure. N’umwe sekuruza w’imiryango w’umwizigirwa Yobu, ivyo vyaramushikiye. Igihe yari mu mikazo, vyarashitse aribanda cane ku bimwerekeye. Vyabaye ngombwa ko Elihu amwibutsa impengamiro twebwe abantu usanga dufise, ati: “Nta wavuze ngo: ‘Imana yo Muremyi wanje Ahambaye iri hehe?’” (Yobu 35:10) Elihu yaremesheje Yobu ati: “[Zirikana] ibikorwa vy’agatangaza vy’Imana.” (Yobu 37:14) Yobu yari akeneye kuzirikana ku bikorwa vy’ububasha bigaragarira mu vyo Yehova Imana yaremye no mu vyo yagiriye abantu. Biciye ku vyamushikiye, Yobu yahavuye atahura inzira za Yehova. Inyuma y’aho Yobu yihanganiye amarushwa yiwe akongera akibonera ingene Yehova ayamukiza, yavuze ati: “Naravuze, ariko ntategera ibintu vy’agatangaza bindengeye ntazi. Numvise ivyawe ku matwi, ariko ubu ijisho ryanje rirakubonye koko.”​—Yobu 42:3, 5.

7. Nk’uko ishusho yo ku rupapuro rwa 116 ivyerekana, tugiye kurimbura iki?

⁷ Bite ho kuri Yeremiya? Uwo muhanuzi yagumye arondera Yehova kandi yaramuronse. Yeremiya ntiyari ameze nk’abantu b’iwabo kubera ko wewe, mu myaka mirongo yamaze arangura igikorwa ciwe adahemuka, yagumye abaza ati: “Yehova ari hehe?” Muri iki kiganiro turaza kubona ingene dushobora kurondera Yehova kandi tukamuronka, biciye kw’isengesho, ku kwiyigisha no ku vyo twibonera mu buzima bwacu bwite.​—1 Ngo. 28:9.

YEREMIYA YARITURA YEHOVA MW’ISENGESHO

8. Ni mu bihe bitandukanye ibihe Yeremiya yituye Imana mw’isengesho?

⁸ Mu myaka yose Yeremiya yamaze ari umuvugizi w’Imana imbere y’ihanga rya Yuda, yagumye arondera Yehova biciye ku masengesho avuye ku mutima yamutura. Yararondeye gufashwa n’Imana igihe yabwirizwa gutangaza ubutumwa butashimwa na benshi, igihe yiyumvamwo ko atobandanije ico gikorwa, be n’igihe yibaza igituma ibintu binaka vyariko birashika. Imana yaramwishuye yongera iramuronsa ubuyobozi bw’ingene yari kuvyifatamwo. Reka turabe uburorero bumwebumwe.

9. (a) Ni gute Yeremiya yaseruye akari ku mutima muri Yeremiya 15:15, 16, kandi Yehova yavyakiriye gute? (b) Ni kubera iki wewe ubona ko guserura inyiyumvo zawe mw’isengesho ari ikintu gihambaye?

⁹ Igihe Yeremiya yahabwa itegeko ryo gutangaza ubutumwa bwerekeye urubanza, yumvise umengo uwo ari we wese yamwipfuriza inabi. Uwo muhanuzi yaciye asaba Imana ngo imwibuke. Zirikana kw’isengesho yatuye riboneka muri Yeremiya 15:15, 16, aho avuga ukuntu yumvise amerewe igihe Imana yamwishura. (Soma ico canditswe.) Muri iryo sengesho, Yeremiya yaraseruye umubabaro mwinshi yari afise. Yamara, aho aronkeye amajambo y’Imana akongera akayarya, tubivuze mu buryo bw’ikigereranyo, yaranezerewe cane! Yehova yaramufashije guha agaciro agateka yari yaratewe ko kwitirirwa izina ry’Imana no gutangaza ubutumwa bwayo. Yeremiya yaramenye neza aho Yehova yari ahagaze mu vyariko biramushikira. Ni igiki none ivyo dushobora kuvyigirako?

10. Ni mu buryo ki Yehova Imana yishuye Yeremiya igihe uwo muhanuzi yavuga yuko atosubiriye kuvuga mw’izina ryiwe?

¹⁰ Ikindi gihe, inyuma y’aho umuherezi Pashuri mwene Imeri akubitiye Yeremiya, Yeremiya yavuze yuko atosubiye kuvuga mw’izina rya Yehova. Ni mu buryo ki Imana yishuye isengesho Yeremiya yayituye? (Soma Yeremiya 20:8, 9.) Nta na hamwe Bibiliya itubwira yuko Imana yishuye Yeremiya mu kwivuganira na we imbonankubone. Ariko Bibiliya ivuga yuko ijambo ry’Imana ryacitse nk’umuriro ururumba wugaraniwe mu magufa yiwe ku buryo vyanse ko aryigumizamwo. Nkako, kubera ko Yeremiya yaseruriye Imana akari ku mutima kandi akemera akayoborwa n’ivyo yari amaze kumenya ku vyerekeye igomba ryayo, yaravyuriwe umutima wo kubandanya akora ivyo Imana igomba.

11, 12. Ni gute Yeremiya yaronse inyishu y’ikibazo yari afise ku bijanye n’ukuba ababisha basa n’abaroraniwe?

¹¹ Yeremiya yarataye umutwe igihe yitegereza ukuntu ababisha baroranirwa. (Soma Yeremiya 12:1, 3.) Ivyo ntibisobanura ko uwo muhanuzi yariko akekeranya ku bugororotsi bwa Yehova, ahubwo riho yariko asaba ko “ikirego” ciwe cumvirwa. Ukudakikiriza kwiwe kwarerekanye neza ko yari afitaniye n’Imana ubucuti bukomeye cane, nka burya umwana agiranira na se wiwe akunda. Ico Yeremiya atatahura ni ingene Abayuda batari bake babandanya gusagamba, kandi bari ababisha. Yoba yararonse inyishu imara akanyota? Yehova yaramukuye amazinda ko yari agiye kurandura abo babisha. (Yer. 12:14) Yeremiya ategerezwa kuba yarizigiye ubutungane bw’Imana bimwe bigera kure, igihe yibonera iranguka ry’ivyo yari yarayituye mw’isengesho. Ivyo bitegerezwa kuba vyaratumye Yeremiya arushiriza kwitura Imana mw’isengesho, agaserurira uwo Se wiwe inyiyumvo ziwe.

¹² Ingoma ya Zedekiya iri hafi kurangira, igihe Abanyababiloni bari basugereje Yeruzalemu, Yeremiya yavuze yuko Yehova ari Umwe “[a]gumiza amaso ku nzira zose z’abana b’abantu, kugira ngo [a]he umwe wese nk’uko inzira ziwe ziri, kandi nk’uko ivyamwa vy’ibikorwa vyiwe biri.” (Yer. 32:19) Yeremiya yaratahura aho Yehova ahagaze ku bijanye n’ubutungane, ko mu vy’ukuri Imana ibona ivyo umuntu wese akora be n’uko yumviriza amasengesho abasavyi bayo baturana ubwira. Muri ubwo buryo nyene, abasavyi bayo borushirije kubona ibimenyamenya vy’uko iha “umwe wese nk’uko inzira ziwe ziri kandi nk’uko ivyamwa vy’ibikorwa vyiwe biri.”

13. Ni kubera iki wizigira udakeka ko ivyo Imana igomba bizoranguka?

¹³ Dushobora kuba ata makenga na makeyi dufise ku bijanye n’ubutungane bw’Imana be n’ubukerebutsi bwayo, zino zikaba ari kamere yama nantaryo ikoresha mu gushitsa ivyo igomba. Naho biri ukwo, turashobora kwungukira ku kuzirikana ku vyo Yeremiya yaciyemwo no mu guserura inyiyumvo zacu mu masengesho dutura. Guserura akatubakiye muri ubwo buryo birashobora gutuma turushiriza kwizigira Yehova, tukizigira ko ivyo agomba bigiye ata kabuza kuranguka. Naho nyene muri iki gihe tutoba dutahura neza igituma ibintu biriko bikorwa uku canke kuriya, kibure igituma ivyo Imana igomba biriko bikorwa kuri uru rugero canke ruriya, turashobora kuyiserurira mw’isengesho ko twizigira yuko ibintu vyose ari yo ibifise mu minwe. Ivyo igomba biriko biranguka mu buryo be no ku rugero yo ubwayo ibona ko ari vyo bibereye kuruta. Ivyo ni ntakekeranywa. Nitwaguma turondera gutahura ivyo Yehova agomba tubicishije mw’isengesho kandi tukaguma twihweza ibimenyamenya vyerekana ko ivyo agomba biriko biraranguka, ico gihe tuzoba turiko turabaza duti: “Yehova ari hehe?”​—Yobu 36:5-7, 26.

YEREMIYA YAGABURIYE UMUTIMA WIWE UBUMENYI

14. Ni igiki kitwereka ko Yeremiya yagize ubushakashatsi ku bijanye na kahise k’abasavyi b’Imana?

¹⁴ Yeremiya yari azi neza yuko kugira ngo arinde abaza ati: “Yehova ari hehe?”, vyari ngombwa ko abanza ‘kumumenya.’ (Yer. 9:24) Ategerezwa kuba yarasuzumye neza kahise k’abasavyi b’Imana igihe yatunganya vya bitabu bibiri ubu vyitwa Abami ba mbere be n’Abami ba kabiri. Yaravuze “igitabu c’ivya Salomo,” “igitabu c’ivyo mu misi y’abami ba Isirayeli,” be n’“igitabu c’ivyo mu misi y’abami ba Yuda.” (1 Abm. 11:41; 14:19; 15:7) Ku bw’ivyo, yahavuye atahura ukuntu Yehova yavyifashemwo mu bintu vyinshi bitandukanye. Yeremiya yaramenye ibihimbara Yehova ivyo ari vyo, yongera aramenya ukuntu abona ingingo abantu bafata. Ashobora kandi kuba yarasuzumye ivyanditswe vyahumetswe vyaboneka ico gihe, nk’ivyari vyanditswe na Musa, Yosuwa, Samweli, Dawidi be na Salomo. Nta gukeka ko yari azi abahanuzi, baba abari baramwitangiye imbere canke abo mu gihe ciwe. Ni gute none Yeremiya yungukiye ku kwiyigisha?

15. Yeremiya yungukiye gute ku bushakashatsi yagize mu buhanuzi bwavuzwe na Eliya?

¹⁵ Yeremiya yaranditse inkuru yerekeye Yezebeli, wa mugore w’umubisha w’Umwami Ahabu wa Samariya. Iyo nkuru yiwe iravugwamwo ubuhanuzi Eliya yatangaje buvuga yuko imbwa zoririye Yezebeli mu gihimba c’itongo c’i Yezireyeli. (1 Abm. 21:23) Kandi urazi yuko nk’uko Yeremiya yavyanditse, haciye imyaka nka 18 ubwo buhanuzi buvuzwe, Yezebeli yakororewe hasi acishijwe mw’idirisha, arahonyangwa n’amafarasi ya Yehu yongera aribwa n’imbwa. (2 Abm. 9:31-37) Kugira ubushakashatsi mu buhanuzi bwavuzwe na Eliya be no mw’iranguka ryabwo, mbere n’iryabaye mu tuntu dutoduto twari tubugize, bitegerezwa kuba vyararushirije gutuma Yeremiya yizera Ijambo ry’Imana. Mu vy’ukuri, uretse ko ukwiyigisha ku bijanye n’ivyo Yehova yakoze muri kahise vyafashije uwo muhanuzi kwumira kw’ibanga, vyaranakomeje ukwizera kwiwe.

16, 17. Wewe wibaza ko ari igiki cafashije Yeremiya kuguma aburira abami b’ababisha bo mu gihe ciwe?

¹⁶ Reka turimbure akandi karorero. Naho Yeremiya yahamwa, wewe wibaza ko ari igiki camufashije kuguma aburira abami b’ababisha ari bo Yehoyakimu na Zedekiya? Ikintu gihambaye cafashije Yeremiya ni uko kuri abo bami ba Yuda, Yehova yari yamugize ‘igisagara gikingijwe ibihome, inkingi y’icuma be n’impome z’umujumbu.’ (Yer. 1:18, 19) Ariko rero, ntitwirengagize ivy’uko Yeremiya yari yaragize ubushakashatsi bwimbitse ku bijanye n’ukuntu abami ba Yuda be n’abami ba Isirayeli b’imbere y’aho baganza. Yaranditse ko Manase yari yarubakiye “ibicaniro ingabo zose zo mu majuru mu bigo bibiri vy’inzu ya Yehova,” ko yari yaratanzeko ikimazi umwana wiwe amucishije mu muriro, be n’uko yari yarasheshe amaraso menshi cane y’intungane. (2 Abm. 21:1-7, 16; soma Yeremiya 15:4.) Yamara rero, Yeremiya ategerezwa kuba yaramenye ko igihe Manase yicisha bugufi, akaguma asenga Imana Yehova, na yo “yemeye ko ayinginga,” maze irasubiza uwo mwami ku ngoma.​—Soma 2 Ngoma 33:12, 13.

¹⁷ Mu vyo Yeremiya yanditse, ntiyavuze ibijanye n’imbabazi Yehova yagiriye Manase. Manase yapfuye hagisigaye nk’imyaka 15 gusa ngo Yeremiya atangure igikorwa ciwe co kuvuga ubuhanuzi. Ariko rero, uwo muhanuzi ategerezwa kuba yarumvise ivyashikiye uwo mwami igihe yigaya ibikorwa vy’ububisha yari yarakoze. Ubushakashatsi Yeremiya yagize ku bijanye n’ingeso zononekaye Manase yari afise be n’ivyahavuye bimushikira, butegerezwa kuba bwaramufashije kubona yuko vyari bihambaye cane ko ahimiriza abami nka Zedekiya kurondera imbabazi za Yehova be n’ubuntu bwiwe bwuzuye urukundo. Mbere n’umwami yari karuhariwe mu vyo gusenga ibigirwamana no mu vyo gusesa amaraso, yarashoboye kwigaya maze aragirirwa ikigongwe. Iyo uza kuba wari Yeremiya, ivyashikiye Manase vyoba vyari kukuremesha, bigatuma wumira kw’ibanga mu gihe c’abandi bami babi?

YARIGIYE KU VYO YIBONEYE

18. Ni igiki Yeremiya ashobora kuba yarigiye kuri Uriya, kandi ni kubera iki wishuye gutyo?

¹⁸ Nta gukeka ko igihe Yeremiya yari umuhanuzi, yigiye ku vyo abahanuzi bo mu gihe ciwe bakora mu bihe kanaka. Umwe muri abo ni umuhanuzi Uriya, uwavuze ku ngoma ya Yehoyakimu ubuhanuzi bujanye n’ivyoshikiye Yeruzalemu be n’ubwami bwa Yuda. Ariko rero, kubera ko Uriya yatinya Umwami Yehoyakimu, yarahungiye mu Misiri. Mu nyuma, uwo mwami yararungitse abagabo gukura Uriya mu Misiri, maze aramwica. (Yer. 26:20-23) Woba wibaza ko Yeremiya yakuye icigwa ku vyashikiye Uriya? Ivyo biremezwa n’uko yagumye aburira Abayuda ku cago cari kiraririye kubashikira, mbere akaba yarabivugiye no mu rusengero. Yeremiya yagumanye umutima rugabo, kandi Yehova ntiyamuhevye. Imana itegerezwa kuba yaravyuriye umutima Ahikamu, mwene Shafani kugira ngo akingire uwo mugabo w’intatinyurukamvye, ari we Yeremiya.​—Yer. 26:24.

19. Ni igiki Yeremiya ashobora kuba yaratahuye ku bijanye n’uko Yehova atahengeshanya kurungika abahanuzi ku basavyi biwe?

¹⁹ N’ikindi kandi, Yeremiya yaragize ico yigiye ku vyamushikiye igihe yariko akoreshwa na Yehova kugira ngo aburire abasavyi biwe. Mu mwaka ugira kane Umwami Yehoyakimu ari ku ngoma, Yehova yabwiye Yeremiya kwandika amajambo yose yari amaze kumubwira kuva ku ngoma ya Yosiya gushika ico gihe. Kubera iki Imana yamusavye ico kintu? Kwari ukugira aremeshe abantu ngo bavavanure n’ibibi bakora, baheze bababarirwe. (Soma Yeremiya 36:1-3.) Yeremiya, uwazinduka kugira ngo ashikirize abantu ubutumwa bwo kubaburira bwava ku Mana, yaranabinginga ngo bareke ibintu biteye ishishi bakora. (Yer. 44:4) Si ivyumvikana none ko Yeremiya, afatiye ku vyo yiboneye, ategerezwa kuba yaratahuye ko impuhwe Imana yari ifitiye abasavyi bayo ari zo zatumye iza irabarungikira abahanuzi bayo? Vyongeye, ivyo ntivyatumye none Yeremiya na we nyene yumva abagiriye impuhwe? (2 Ngo. 36:15) Uca ubona rero igituma igihe Yeremiya yarokoka isangangurwa rya Yeruzalemu, yavuze ati: “Ibikorwa vy’ubuntu bwuzuye urukundo vya Yehova ni vyo vyatumye tudaherengetera, kuko imbabazi ziwe zitazogenda ziheze. Zama ari nshasha buri gitondo.”​—Int. 3:22, 23.

WEWE WOBA BURI MUSI UBAZA UTI: “YEHOVA ARI HEHE”?

20. Ushobora gute kwigana Yeremiya mu bijanye no kurondera Yehova?

²⁰ Ku bijanye n’ingingo ubwirizwa gufata ku musi ku musi, woba wihatira kurondera kumenya ivyo Yehova agomba, mu kwibaza uti: “Yehova ari hehe?” (Yer. 2:6-8) Yeremiya ntiyari ameze nk’Abayuda bo mu gihe ciwe, wewe yama nantaryo arondera gufashwa na Mushoboravyose kugira ngo amenye neza inzira yari akwiye kujana. Nta gukeka ko vyoba biranga ubukerebutsi umwe wese muri twebwe yiganye Yeremiya, akama nantaryo arondera kumenya ukuntu Yehova abona ibintu, imbere y’uko afata ingingo.

21. Ni isengesho bwoko ki ryogufasha mu bijanye n’ubusuku urangura, nk’igihe hari umuntu abwakiriye nabi cane?

²¹ Si ngombwa ngo ingingo uba ugira ufate ibe ari iyerekeye ikibazo gihambaye canke ihinduka rihambaye ryo mu buzima. Nk’akarorero, igihe ugire ufate ingingo ku bijanye no kuja mu busuku bwo mu ndimiro ku musi munaka wateguye, woba ukwiye kubaza uti: “Yehova ari hehe”? Kumbure uravyutse mu gitondo maze usanze ikirere cifashe nabi ku buryo bitokworohera kuja mu murimo wo ndimiro. Icibare ugomba kuja kwamamazamwo inzu ku nzu gishobora kuba kimaze guheturwa akatari gake. Canke na ho wibutse yuko hari abatakwakiriye babigiranye urupfasoni, kibure bakaba baragufashe nabi bimwe vyeruye. Ubona gute utanguye uwo musi mu gutura isengesho ubaza uti: “Yehova ari hehe”? Ivyo vyoshobora kugufasha kubona yuko ubutumwa ugiye gushikiriza ari bwiza igitangaza, ukongera ukarushiriza gutahura ko kuba uriko uratangaza ubwo butumwa ari vyo Imana igomba. Woshobora rero kwibonera ingene ijambo rya Yehova rikubera isôko ry’umunezero n’umwigino, nk’uko vyagenze kuri Yeremiya. (Yer. 15:16, 20) Niba mu gihe c’ubusuku uhuye n’umuntu akagufata nabi cane canke mbere akagutera ubwoba, urashobora gusubira guserurira Imana inyiyumvo zawe mw’isengesho. Woba none uzobigira? Ntiwibagire yuko ishobora kukuronsa impwemu yayo nyeranda kugira ngo igufashe kuvyifatamwo neza, kandi icipfuzo ufise co kuvuga ubutumwa buva ku Mana kizonesha inyiyumvo zitabereye wogira.​—Luka 12:11, 12.

22. Ni kubera iki amasengesho amwamwe ashobora gutangīrwa?

²² Ni vyiza ko tumenya neza yuko amasengesho amwamwe ashobora gutangīrwa. (Soma Gucura intimba 3:44.) Yehova ntiyumvirije amasengesho y’Abayuda b’abagarariji kubera ko ‘bica amatwi ngo ntibamwumve,’ kandi bakaguma bahonyanga amategeko yiwe. (Imig. 28:9) Yeremiya ategerezwa kuba yarahakuye icigwa gitomoye na twebwe dukwiye kuhakura, na co kikaba ari iki: Igihe umuntu adakoze mu buryo buhuye n’amasengesho atura, ivyo biraheza bikababaza Imana kandi irashobora kureka kuyumviriza. Nta gukeka ko ico ari ikintu dukwiye kwirinda uko vyogenda kwose.

23, 24. (a) Ni ikintu nyamukuru ikihe kidufasha kumenya ivyo Yehova agomba? (b) Ushobora gute gutuma ukwiyigisha kwawe kurushiriza kuba ngirakamaro?

²³ Uretse gusenga Yehova bimwe bivuye ku mutima kugira ngo aturonse ubuyobozi, turakwiye no kubandanya twiyigisha, ubwo bukaba ari uburyo nyamukuru budufasha kumenya ivyo Yehova agomba. Mu bijanye n’ukwiyigisha, twebwe turorohewe kuruta Yeremiya. Turafise Bibiliya yuzuye. Nka kumwe kwa Yeremiya, uwagize ubushakashatsi bwimbitse kugira ngo atororokanye ivyo yanditse mu nkuru yiwe yahumetswe yigana ivya kahise, turashobora kugira ubushakashatsi mw’Ijambo ry’Imana turondera kuyoborwa na yo, gutyo tukaba ari nk’aho twoba turiko turabaza duti: “Yehova ari hehe?” Niwarondera kumenya ivyo Yehova agomba, uzoba werekanye ko umwizigira, kandi “uzoba vy’ukuri nk’igiti gitewe iruhande y’amazi, gishora imizi yaco iruhande y’umugende w’amazi.”​—Soma Yeremiya 17:5-8.

²⁴ Uko usoma Ivyanditswe Vyeranda wongera ubizirikanako, nuze uragerageza gutahura neza ivyo Yehova ashaka ko ukora mu bihe bitandukanye. Nufate nka nkama ingingo ngenderwako wipfuza gushira mu ngingo mu buzima bwawe. Igihe uba uriko urasoma ibijanye n’inkuru zigana ivya kahise, amategeko y’Imana, ingingo ngenderwako zayo be n’amajambo arimwo ubukerebutsi dusanga mw’Ijambo ryayo, nuze urazirikana ku kuntu ivyo usomye bikwiye kugira ico bikoze ku ngingo ufata buri musi. Niwabaza uti: “Yehova ari hehe?”, arashobora kuhaguhishurira mu kukwereka abicishije kw’Ijambo ryiwe ukuntu wovyifatamwo no mu bintu bigoye cane vyogushikira. Emwe, Bibiliya yoshobora gutuma umenya neza ‘ibintu bidatahurika utari uzi,’ canke utatahura!​—Yer. 33:3.

25, 26. Ni kubera iki dushobora kwungukira ku vyadushikiye be no ku vyashikiye abandi?

²⁵ Ikigeretse kuri ivyo, urashobora kuzirikana ku vyagushikiye canke ku vyashikiye abandi. Nk’akarorero, woshobora kubona yuko hariho abareka kuguma bihetse kuri Yehova, nka kumwe vyashikira Uriya. (2 Tim. 4:10) Urashobora kugira ico wigiye ku ngendo yabo maze ukirinda kwikwegera akarambaraye nka bo. Nuze uriyibutsa ubuntu bwuzuye urukundo Yehova yama akugaragariza, ivyo ubigire ufise ku muzirikanyi yuko Yeremiya na we nyene yaha agaciro imbabazi z’Imana be n’impuhwe zayo. Naho ivyawe vyoba vyifashe nabi gute, ntiwiyumvire yuko Musumbavyose atakubabaye. Arakwitayeho nk’uko yabigize kuri Yeremiya.

²⁶ Niwazirikana ku vyo Yehova agirira abantu muri iki gihe, uzotahura yuko yama buri musi abaronsa ubuyobozi mu buryo butandukanye. Mushiki wacu umwe akiri muto yitwa Aki wo mu Buyapani, yabona ko atabereye kwitwa umukirisu. Umusi umwe, igihe Aki yariko akora umurimo wo ndimiro ari kumwe n’umukenyezi w’umucungezi w’umuzunguruko, yaraseruye akari ku mutima ati: “Jewe mbona ko hasigaye gatoyi ngo Yehova andahwe. Ariko nguma ndamwumiyeko, ndamusaba ngo atenyenye kandi gatoyi.” Uwo mukenyezi w’umucungezi yaramwitegereje maze avuga ati: “Sindigera nkubonako ikintu cerekana ko uri umukirisu w’akazuyazi!” Mu nyuma, Aki yagumye azirikana kuri ayo majambo asubiriza umutima mu nda. Nkako, nta kintu na kimwe cerekana vy’ukuri yuko Yehova yari bwigere amubona ko ari akazuyazi. Inyuma y’ivyo, Aki yarasenze Yehova amusaba ati: “Ndungika aho ushaka hose. Nzokora ico ushaka ko nkora cose.” Nko muri ico gihe nyene, yaragiye gutembera mu kindi gihugu carimwo umugwi mutoyi ukoresha ururimi rw’ikiyapani, abawugize bakaba bari bakeneye umuntu avuga urwo rurimi yogumanye na bo kugira ngo akorane na bo. Aki ashobora kuba yari yavukiye muri ico gihugu, ivyo bikaba rero vyari kumworohera kucimukiramwo kugira ngo agire ico afashije. Ariko none yari kuba hehe? Mushiki wacu umwe, uno umukobwa wiwe akaba yari aherutse kwimukira ahandi, yaremeye guha indaro Aki. Aki yasozereye ati: “Ni nk’aho ibintu vyari vyikoze; Yehova ni we yariko aranyereka inzira nocamwo.”

27. Imbere yo gukora ikintu ico ari co cose, ni kubera iki dukwiye kubanza kubaza duti: “Yehova ari hehe”?

²⁷ Abavukanyi be na bashiki bacu batari bake barashobora kwigana ibintu vyabaye bituma bibonera ko Imana iriko irabayobora, kumbure ivyo bakaba babibonye igihe bariko barasoma Bibiliya canke igihe bariko bariyigisha. Na wewe ushobora kuba warashikiwe n’ibintu nk’ivyo. Ivyo bikwiye gukomeza ubucuti ufitaniye na Yehova bikongera bikakuvyurira umutima wo kumwiyegereza mw’isengesho kenshi kuruta kandi ubigiranye ubwira kuruta. Niwemere udakeka ko nitwaguma buri musi tubaza duti: “Yehova ari hehe?”, na we azoheza akatwereka inzira twocamwo.​—Yes. 30:21.