ICIGWA CA 2

Kuvuga nk’uwuyaga

2 Abakorinto 2:17

INCAMAKE: Nuvuge nk’uwuganira, uvuge ibivuye ku mutima ku buryo bigaragara ko wiyumvamwo ivyo uriko uravuga n’abo uriko urabwira.

Nusenge kandi utegure witonze. Nusabe Yehova agufashe gushira umutima ku butumwa ushikiriza, ntuwushire kuri wewe. Nutahure neza ivyiyumviro nyamukuru wipfuza gushikiriza. Nubivuge mu majambo yawe bwite; ntuze urasubiramwo gusa amajambo nk’uko ari ku rupapuro.

Nimba utegekanye gusoma muri Bibiliya canke mu kindi gitabu, niwimenyereze neza ku buryo utazodidinganya. Nimba uzosubiramwo amajambo yavuzwe n’abandi bantu, nuyasome n’inyiyumvo ariko nturenze urugero.
Nuvuge ibivuye ku mutima. Nuzirikane igituma abakwumviriza bakeneye ubutumwa ushikiriza. Nushire umutima kuri bo. Gutyo, ibimenyetso ugira, mu maso hawe hamwe n’ukuntu wifata bizogaragaza ko ubiyumvamwo be n’uko uvuga ibivuye ku mutima.

Kuvuga nk’uwuyaga ntibisigura kutavugana urupfasoni. Nutume ubutumwa ushikiriza buguma buteye iteka mu gukoresha imvugo itomoye n’amajambo abereye.
Nurabe abakwumviriza. Nurabe abakwumviriza nimba ata co bitwaye. Igihe utanga insiguro, nuze uracishamwo urabe umwe mu bakwumviriza, aho kubaraba muri rusangi ucisha hejuru.