Jya ukora umurimo wo kubwiriza mu buryo bunonosoye—Ugaragariza umuntu ko umwitayeho

Impamvu ari iby’ingenzi: Yesu yitaga kuri buri muntu ku giti cye kandi akagaragariza abantu bose ko abitaho abigiranye urukundo. Urugero, igihe kimwe Yesu yari agiye gukiza umuntu utumva, ariko abonye ko biri bumubangamire, amujyana ahantu hiherereye abona kumukiza (Mar 7:31-35). Yagaragarizaga abigishwa be ko abitayeho, akazirikana aho ubushobozi bwabo bugarukira kandi akirinda kubabwira ibintu byinshi batari gusobanukirwa (Yoh 16:12). N’igihe Yesu yari afite umwanya ukomeye mu ijuru, yagaragaje ko yita ku bantu (2 Tim 4:17). Kubera ko turi abigishwa ba Kristo, natwe twifuza kumwigana (1 Pet 2:21; 1 Yoh 3:16, 18). Nitwita kuri nyir’inzu, tukazirikana imimerere yihariye arimo, ibimushishikaza n’ibimuhangayikishije tuzagira icyo tugeraho mu murimo wo kubwiriza. Nabona ko tutazanywe gusa no kumubwiriza cyangwa kumusigira ibitabo ahubwo akabona ko tumwitayeho by’umwihariko, azarushaho kudutega amatwi.

Uko twabigenza:

Jya witegura neza. Jya umuvugisha wisanzuye, umwenyura kandi mu buryo bwa gicuti.
Jya witegereza. Ese hari ibintu wabonye bigaragaza ko uwo muntu yaba afite abana? Ese akunda kwita ku busitani cyangwa ku matungo ye? Ese afite imyizerere y’idini akomeyeho? Ibyo bishobora gutuma ugira icyo uhindura ku buryo bwo gutangiza ibiganiro kugira ngo uhuze n’imimerere arimo.
Jya umubaza uko abona ibintu, umutege amatwi witonze kandi ntukamuce mu ijambo bitari ngombwa. Jya umwitegereza kugira ngo abone ko umuteze amatwi. Nasubiza ujye umushimira niba wumva wabikora ubikuye ku mutima. Ujye wirinda kujya impaka na we.
Jya uhuza n’imimerere. Niba ari ngombwa jya uhindura uburyo bwo gutangiza ibiganiro kugira ngo uvuge ibimuhangayikishije. Ibyo bishobora kukorohera kuruta uko ubitekereza kubera ko inkuru z’Ubwami, udutabo n’amagazeti dukoresha birimo ingingo zivuga ibintu bitandukanye. Niba wagiye kumureba mu gihe kidakwiriye, wenda nk’igihe ahuze, ujye umusaba imbabazi kandi uvuge amagambo make.

Icyo wakora muri uku kwezi:

Mu mugoroba w’iby’umwuka mu muryango mushobora kwitoza uko umubwiriza yahindura uburyo bwo gutangiza ibiganiro kugira ngo ahuze n’icyo nyir’inzu avuze.
Rimwe na rimwe umuvandimwe uyoboye iteraniro ry’umurimo wo kubwiriza ashobora kuvuga uko twagaragariza umuntu ko tumwitayeho cyangwa bigatangwamo icyerekanwa.