Amaganya

א [Alefu]

1 Mbega ngo umugi wahoze ufite abaturage benshi+ urasigaramo ubusa!+

Mbega ngo umugi wahoze utuwe cyane mu mahanga+ urasigara umeze nk’umupfakazi!+

Mbega ngo uwahoze ari umwamikazi mu ntara zose arakoreshwa imirimo y’agahato!+

ב [Beti]

 2 Nijoro ararira agahogora,+ amarira agatemba ku matama.+

Mu bakunzi be bose ntagira n’umwe umuhumuriza.+

Incuti ze zose zaramuriganyije;+ zahindutse abanzi be.+

ג [Gimeli]

 3 Yuda yajyanywe mu bunyage bitewe n’imibabaro+ n’uburetwa bwinshi.+

Yagiye gutura mu mahanga.+ Ntiyabonye uburuhukiro.

Abamutotezaga bose bamufashe ageze mu makuba.+

ד [Daleti]

 4 Inzira za Siyoni ziraboroga kuko nta wukizinyuramo ajya mu minsi mikuru.+

Amarembo yaho yose yarasenyutse;+ abatambyi baho barasuhuza umutima.+

Abari baho bishwe n’agahinda, kandi na yo ifite intimba.+

ה [He]

 5 Abanzi bayo barayiganje.+ Abanzi bayo ntibahangayitse.+

Kuko Yehova ubwe yateje Siyoni agahinda bitewe n’ibicumuro byabo byinshi,+

Abana bayo bajyanywe ari imbohe bashorewe n’umwanzi.+

ו [Wawu]

 6 Ubwiza bwose bw’umukobwa w’i Siyoni bwarayoyotse.+

Abatware baho babaye nk’impala zabuze urwuri;+

Bakomeza kugenda nta rutege imbere y’ubakurikiye.+

ז [Zayini]

 7 Igihe Yerusalemu yari mu mibabaro n’abaturage bayo batagira aho baba, yibutse

Ibyiza byose yahoranye mu bihe bya kera.+

Igihe abaturage bayo bagwaga mu maboko y’umwanzi batagira gitabara,+

Abanzi bayo barayibonye, baseka bishimira kurimbuka kwayo.+

ח [Heti]

 8 Yerusalemu yakoze icyaha gikabije.+ Ni cyo cyatumye iba ikintu giteye ishozi.+

Abayubahaga bose barayisuzuguye+ kuko babonye ubwambure bwayo.+

Kandi isuhuza umutima+ igasubira inyuma.

ט [Teti]

 9 Guhumana kwayo kuri mu binyita by’imyambaro yayo.+ Ntiyibutse iherezo ryayo,+

Yaguye mu buryo bukojeje isoni. Ntifite uyihumuriza.+

Yehova, reba imibabaro yanjye,+ kuko abanzi bishyira hejuru.+

י [Yodi]

10 Umwanzi yaramburiye ukuboko ku bintu byiza byayo byose.+

Kuko yabonye amahanga yinjira mu rusengero rwayo,+

Ayo wategetse ko atagomba kwinjira mu iteraniro ryawe.

כ [Kafu]

11 Abaturage bayo bose barasuhuza umutima; barashaka umugati.+

Batanze ibintu byiza byabo kugira ngo babone icyo kurya, bahumurize ubugingo bwabo.+

Yehova, birebe kandi witegereze uko nabaye nk’umugore utagira umumaro.+

ל [Lamedi]

12 Mbese nta cyo bibabwiye mwa bahisi n’abagenzi mwese mwe? Nimurebe kandi mwitegereze.+

Mbese hari undi mubabaro uhwanye n’uyu mubabaro ukabije natejwe,+

Ari ko gahinda Yehova yanteje ku munsi w’uburakari bwe bugurumana?+

מ [Memu]

13 Yohereje umuriro mu magufwa yanjye uturutse hejuru,+ ayigarurira yose.

Yateze ibirenge byanjye urushundura,+ ansubiza inyuma.

Yangize nk’umugore w’intabwa. Umunsi wose mba ndwaye.+

נ [Nuni]

14 Yakomeje kuba maso kugira ngo arebe ibicumuro byanjye.+ Bisobekeranye mu kiganza cye.

Byarazamutse bigera mu ijosi ryanjye.+ Imbaraga zanjye zaracogoye.

Yehova yampanye mu maboko y’abo ntashobora guhagarara imbere.+

ס [Sameki]

15 Yehova yankuyemo abanyambaraga abata kure.+

Yandemeshereje inama kugira ngo amenagure abasore banjye.+

Yehova yanyukanyutse urwengero+ rw’umwari w’i Buyuda.+

ע [Ayini]

16 Ibyo byose ni byo bituma ndira nk’umugore.+ Ijisho ryanjye, ijisho ryanjye ritemba amazi.+

Kuko umpumuriza, uhumuriza ubugingo bwanjye, ari kure yanjye.

Abana banjye bararimbutse,+ kuko abanzi bishyira hejuru.+

פ [Pe]

17 Siyoni yateze amaboko.+ Ntifite uwo kuyihumuriza.+

Yehova yatanze itegeko ku birebana na Yakobo kugira ngo abamukikije bose bamwange.+

Yerusalemu yabaye igiteye ishozi muri bo.+

צ [Tsade]

18 Yehova arakiranuka,+ kuko nigometse ku byavuye mu kanwa ke.+

Mutege amatwi mwese kandi mwitegereze akababaro kanjye.

Abasore n’inkumi banjye bajyanywe mu bunyage.+

ק [Kofu]

19 Nahamagaye abankundaga cyane,+ ariko barandiganyije.

Abatambyi banjye n’abakuru baguye mu mugi,+

Bashakisha icyo kurya kugira ngo bahumurize ubugingo bwabo.+

ר [Reshi]

20 Yehova, reba ukuntu ndi mu makuba akomeye. Amara yanjye aribirindura.+

Umutima wanjye uradihaguza,+ kuko nigometse cyane.+

Hanze inkota yahekuye ababyeyi.+ Mu nzu imbere na ho urupfu rurabicikiriza.+

ש [Shini]

21 Abantu bumvise uko nsuhuza umutima nk’umugore.+ Simfite umpumuriza.+

Abanzi banjye bose bumvise ibyago byanjye+ barishima kubera ko ari wowe wabikoze.+

Ntuzabura kuzana umunsi watangaje+ kugira ngo babe nkanjye.+

ת [Tawu]

22 Ibibi bakoze byose bigere imbere yawe maze ubahane bikomeye,+

Nk’uko wampannye cyane bitewe n’ibicumuro byanjye byose.+

Kuko amaganya yanjye ari menshi,+ kandi umutima wanjye urarwaye.+