Mba ri bba Allah yan meeyèr qe nékemndôoje ar dee to wa

1. Meeyèr lé ginnee in ra wa

Meeyèr unn kudee do nang nee loo ge Cheitan pa tar ngom ge dotar. Ketté dotar lé, Cheitan to kura ge dara ge maji or njorong nê, “yeen wa ne bwa ge kankemta el.” (Jean 8:44). Yeen ndigi kar deouje dˈwa yeen ba ya meen deeˈg bbó Allah el. Yeen ula Eve denné ge dotar lé tar ngom, éere né mba kar illa ngonnkoji dea yeen ge ba ya bbó, illa ngonnkoji do Allahˈg el. Adam unn goo Eve. Yeen kârâ al ta tâ Allahˈg. Kalta lea lé, ree ge nékemndôoje lem qe yoo lem to.​—Turaje Loo-Kunda-Ginn-Néje 3:1-6, 19.

Loo ge Cheitan sula Eve aree al ta tâ Allahˈg ndaà yeen unda ginn kosta reou ge woji do kurdoloo le Allah ge to Njeshisèmdaraˈg. Deouje bula dˈoso gel Cheitanˈg, dˈos né Allah reou ndigi karee to Mbai le dee el. Gelee ge nee bba Cheitan tel to né “Mbai ge nang neelé.”​—Turaje Jean 14:30; 1 Jean 5:19.

2. See ginn né kunda le Allah lé maji or njorong ya wa

Néraje le Allah lai lé maji or njorong. Deouje qe kuraje ge dara ge yeen unda dee lé dˈaskem killa ngonnkoji deaˈg karee maji or njal (Tel-Tura-Godndu 32:4, 5). Yeen ar ci takenji ge kar ci jeen ya jˈor né kem néje ge maji ésé néje ge majel mba ra. Néra ge jeen ya jˈaskem ra qe meendakain neelé or reou ar ci jeen twoji Allah meenoji le ci.​—Turaje Jacques 1:13-15; 1 Jean 5:3.

3. See mba ri bba Allah yan nékemndôoje ar dee to saar bacinè wa

Jehova yan goo kosta reou ge woji do kurdoloo lea lé ar kuree eou waga ba ya .éMba ri wa. Mba twoji to ge konbbee le deouje mba kos ne kurdoloo le Allah reou lé majee goto (Njekillambér 7:29; 8:9). As lebjee 6 000 ge deouje dˈon bbee do nang neelé twoji to ge deen dˈas ra né kar rö, gaïm, néra kori-kori qe rokon goto el saar.​—Turaje Jérémie 10:23; Njé ge Rome 9:17.

Dum do loo le Allah lé to tana ge kan deouje el. Deouje ge taa ta ge woji dum do loo le Allah ge meen dee lé, majee to mba dee (Ésaïe 48:17, 18). Nai deb kar Jehova tuji konbbee le deouje lai. Deouje ge ndigi kar Jehova bba on dee lé, deen ba ya dˈa kishi do nang nee.—Ésaïe 11:9; Turaje Daniel 2:44.

4. Mekilla le Allah or reou ar ci jeen ra ri wa

Cheitan esta to ge deou kara kârâ askem ra kula le Allah ge meendakain el. See sein ndigi tegje ginn tar ngom neelé ge raga wa. Sein asje ya. Mekilla le Allah or reou ar ci jeen lai mba kar ci jeen twoji see jeen ndigi dum do loo lea yeen ése kan deou wa. Néra ci ge maji bba a twoji to ge jeen ndigi dum do loo le Allah. Turaje Job 1:8-12; Gosota-Kemkàrje 27:11.

5. See ban bba jˈaskem twoji to ge Allah to Mbai le ci wa

Jeen ndigi kar Allah to Mbai le ci yee bba jeen sang loo mba ra kula lea ge ged qe goo Ta lea ge to mee Bibleˈg (Jean 4:23). Jeen jˈos Cheitan reou, yee bba jeen sa ne ro ci do politiqueˈg, qe do röˈg to go Jesu ra ne bee to.​—Turaje Jean 17:14.

Cheitan unn gososingamong lea aou os né gel néraje ge to minan lem, néraje ge aou tuji deouje lem to. Boo lee jeen jˈos néje neelé reou ndaà kuramacije, njénojije le ci dˈa kogo ci lem, dˈa kos ci reou lem to (1 Pierre 4:3, 4). Maji kor kem néje: See jeen jˈa kor kura ge deouje ge ndigi Allah wa. See jeen jˈa kôré kem ci do godndu kemkàr qe meenoji ge maji dum ge in ro Allahˈg wa. Boo lé bee ndaà jeen jˈa twoji to ge Cheitan pa tar ngom loo ge yeen esta to ge deou kara kârâ, boo lé né naa mee ndaà, as killa ngonnkoji do Allahˈg el.​—Turaje 1 Njé ge Corinthe 6:9, 10; 15:33.

Meenoji le Allah ge woji do deouje lai do nang neelé to njang, twoji to ge meeyèr qe nékemndôoje dˈa goto bei. Deen ge dˈom mee dee doˈg ndaà dˈa kishi saar qe non do nang nee.​—Turaje Jean 3:16.