See a raje ban bba a remje per ge ro Allahˈg wa

1. See Allah lé mbia to tag mba koo né tamajije lai wa

Allah bbar deouje lai kar dee rem per ge reaˈg mbol do tamaji (Pakosje 65:2). Nê yeen ur mbia oo né tamajije lai el mbata tamajije lai lé taa kemee el. Gosota kara to nee: Dingam ge aou ula kem denne lea ndôo lé, Allah a kˈur mbia koo tamaji lea el (1 Pierre 3:7). To tana qe kan Israëlje ge ra tamajije yaan ya nê, tel dˈula ro dee dann néraje gé majelˈg mbiriri lé, yeen oo tamajije le dee el to. Nê bbo lee deouje ra kaiyaje ge to bbel yaan kârâ, Allah ur mbia oo né tamajije le njékaiyaje ge dˈwa ndôo ro dee. Tamaji to né nonkàr ge Allah ar ci.​—Turaje Ésaïe 1:15; 55:7.

2. See tamaji lé a raje ban wa

Tamaji to nékwa Allah meen ciˈg. To maji kar ci jeen raje tamaji jˈar Jehova ge to njekunda ci ya qe karee ba (Matthieu 4:10; 6:9). Tobei to ge jeen to njekairjaje ndaà to maji mba ra tamaji qe ri Jesu mbata yeen wei mba kaiyaje le ci (Jean 14:6). Jehova ndigi kar ci jeen pa ta budu-budu mba tura ne tamajije ge deouje ndang mee mbétéjeˈg el lem, yee ge dˈaou ndoo mba tura ge do dee el lem to. Yeen ndigi kar tamaji ge jeen ra lé, in do bbengere ciˈg.​—Turaje Matthieu 6:7; Njé ge Philippes 4:6, 7.

Njekunda ci lé, tamaji ge jeen ra qe ta ci ge mundu ya kârâ yeen oo (1 Samuel 1:12, 13). Yeen bbar ci kar ci jeen ra tamaji qe kàr ge rara kârâ: loo ge jeen teen ge ndo rad lem, loo ge kàr ur nang lem, loo ge jˈa qe kusa né lem, loo ge némeekonje teen do ciˈg lem to.​—Turaje Pakosje 55:23; Matthieu 15:36.

3. Mba ri bba njétaamee-kristije dˈaou dˈwa do nan wa

Rem per ge ro Allahˈg lé to kedere yaan mbata jeen jˈishi mbuna deouje ge dˈunn meen dee dˈar Allah el lem, dˈaou dˈula sul do ndukunn le Allah ge woji do meelom ge a to do nang nee bei lé (2 Timothée 3:1, 4; 2 Pierre 3:3, 13). Jeen jˈaou ndôo kar njéboakulaje le ci dˈula dingam meen ciˈg lem, deen kârâ dˈaou ndôo ci jeen lem to​—Turaje Hébreuje 10:24, 25.

Kor kura ge njéboalookaouje ge ndigi Allah lé, a la se ci kar ci jeen rem per ge reaˈg. Loo kwadonan le Témoinje le Jehova lé or reou ar ci mba kar singa ci to kogero mbol do meekunn le marcije.​—Turaje Njé ge Rome 1:11, 12.

4. See a raje ban bba a remje per ge ro Allahˈg wa

Asjekem rem per ge ro Jehovaˈg loo ge né ge sein aou ndooje mee Bibleˈg lé, sein lanjije tôree meen ciˈg bba. Enjije ta do néje ge Allah ra lem, do ta kwojije lea lem qe do ndukunnje lea lem to. Lanji tôr tar meenˈg neelé ôreje qe tamaji ndaà oiyo ge sein a raje Allah lé, a kin do mareeˈg ge ketté mba meenoji lea lem qe kemkàr lea lem to.​—Turaje Josué 1:8; Pakosje 1:1-3.

Mba kar si ishije eou ro Allahˈg el ndaà maji kar si omje meen si deaˈg jeb-jeb lem, unnje meen ci areeje lem to. Meekunn to tana to ge kan né ge deou dubu. Bee ndaà yeen a kom mann geleeˈg ta-ta. Meekunn le si kârâ sein a raje kula doˈg ta ta. Maji kar si tennje ginn néndooje ge ar si unnje né meen ci lé ta-ta lem to.​—Turaje Matthieu 4:4; Hébreuje 11:1, 6.

5. Loo ge sein a remje per ge ro Allahˈg lé majee to ri wa

Jehova aou enji do deouje ge ndigee. Yeen askem kaa do si mba néje ge dˈa tuji meekunn le si lem, tuji meekundayel le si ge woji do shi ge kheme ge qe non lem to (Pakosje 91:1, 2, 7-10). Yeen ar ci undaje meen ci do ro siˈg woji do néraje ge dˈa tuji laphia ge daro siˈg lem, rolel le si lem to. Yeen ndoo si goso le shi maji ge dum.​—Turaje Pakosje 73:27, 28; Jacques 4:4, 8.