Néndoo ge 9

Ngannjékishije le Allah lé ro dee a kàr ngat-ngat

See mba ribba ro ci a kàr ngat-ngat dann nèje’d lai wa. (1)

See ribba to ro kàr ngat-ngat ge kan ndil wa. (2)

kula ra ci’d wa. (3) ta-kenji’d le ci wa . (4) daro’d wa. (5)

See taje ge ràm ge bann bba j’askem mbatje wa. (6)

1. Allah Jéhovah lé rea àr ngat-ngat né ge ràm goto rea’d. Yeen ndigi kàr ngannjékishije lea kârâ ro dee àr ngat-ngat ndil’d lem, kula ra dee’d lem, takenji’d le dee, daro dee’d lem to. (1 Pierre 1:16) Shi qe ro kàr ngat tâ kem Allah’d lé deji k’unda tög do maree’d. Mbata j’ishije dann duniya’d ge ràm yaan. Lem bba jeen j’a röje se daro ci ge aou os ci bboin-bboin’g majal’d lem to. Nê j’askem kuba k’yän el.

2. Ro kàr ngat-ngat ge kan ndil: Boo lee jeen ndigije raje kula le Jéhovah ndaà, jeen jaskem k’aouje kem ci’d ketté do nétwojije esé néjibbeeje le ta-allah ge ngom el. Jeen j’a korje ro ci dann ta-allah’d ge ngom lem j’a k’osje gelee kara kârâ el lem to. (2 Corinthienje 6:​14-18; Lookillaréa 18:⁠4) Loo ge jeen ndooje ta ge togero ge wöji do Allah ndaà, maji kàr ci j’undaje kemkàr do ro ci’d j’yänje ro ci j’àrje njétwoji ta ngomje d’er ci el.​—⁠2 Jean 10, 11.

3. Ro kàr ngat-ngat ge kula ra ci’d: Jéhovah ndigi kàr njépôleeje lé kula ra dee ge ndoje lai aou nan’d qe Chrétienje ge togero’d. (1 Pierre 2:12) Néje lai ge j’aou raje lé Yeen oo, loo ngein’d kârâ yeen oo. (Hébreuje 4:13) Jeen j’a kosje modkaiya reou ge rang lem qe néraje ge nanje ge to ràm duniya’d nee lem to.​—⁠1 Corinthienje 6:​9-11.

4. Ro kàr ngat-ngat ge takenji’d: Boo lee j’àrje takenjije ge àr ngat-ngat bba rôso do ci ndaà, kula ra ci kârâ a to bèe lem to. (Philippienje 4:⁠8) Nê boo lee jeen j’enjije do néje’d ge ràm ndaà, kula ra cije kârâ d’a majel bèe lem to. (Matthieu 15:​18-20) Kalroje ge a ree qe takenjije ge majel do ci lé maji kàr ci jeen mbatje. Nê jeen j’àrje takenjije ge maji bba rôso do ci mbol do ndoo Ta le Allah.

5. Ro kàr ngat-ngat ge daro’d: To ge deen to njékainkulaje le Allah lé, Chrétienje lé daro dee lem kubuje le dee a kàr ngat-ngat lem to. Maji kàr ci jeen togoje ji ci loo ge j’inje tâ bwa-cin’d lem, ketté bba kàr ci j’usaje né esé kàr ci j’odje ro néso lem to. Boo lee aouje’d bwa-cin ge maji el ndaà, maji kàr si dubuje cin si nang. (Godndu 23:​12, 13) Loo ge àr ngat-ngat ge daro’d lé to kuman kos moei ngereng. Kei le Chrétien lé a kàr ngat-ngat yiro a goto méee’d lem giree’d lem to. Yee bba d’a pa taree: to kei ge àr rang-rang unda mareeje mee bbee’d.

6. Ta pa ge àr ngat-ngat: Ngannjékishije le Allah lé d’askem pa ta ge togero’d qe ndoje lai. Njetangomje lé d’a kula do dee Bbeekon’d le Allah pai el. (Ephésienje 4:​25; Lookillaréa 21:⁠8) Chrétienje lé pa ta ge erm el. Deen lel mbi dee d’oo ne ta ndamje ge to ngeen el lem qe sôr ge minan el lema, deen d’or sôr ge bèe pai el lem to. Loo kula’d, l’ékole’d esé mee kudubbee’d kârâ deouje ger dee qe mba ta pa dee ge àr ngat-ngat.​—Ephésienje 4:​29, 31; 5:⁠3.

[Foto ge to mee mbeteʼg 18, 19]

Ngannjékshije le Allah lé ro dee a àr ngat-ngat dann néje’d lai