IZAIYA
1 Masomphenya analonga pya Yuda na Yerusalemu adaona Izaiya*+ mwana wa Amoji mu ntsiku za Uziya,+ Yotamu,+ Ahazi+ na Ezekiya,+ amambo a ku Yuda:+
2 Bveserani imwe munakhala kudzulu, pontho bveserani mwadidi imwe munakhala pa dziko yapantsi,+
Thangwi Yahova alonga tenepa:
3 Ngʼombe imuna isadziwa mwanaciro wace,
Buru isadziwa mbuto inadyeserwa iyo na mwanaciro wace;
Mbwenye Izraeli nkhabe kundidziwa,*+
Mbumba yanga nee isacita pinthu mwandzeru.”
4 Dzedze kuna dzindza yakudawa,+
Mbumba yakulemerwa na madodo,
Dzindza ya anyakucita pyakuipa, ana akuipa akuti asacita madawo!
Imwe mwasiya Yahova;+
Imwe mwatsalakana Wakucena wa Izraeli mwakusowa cilemedzo;
Imwe mwampasira nkhodolo.
5 Ndinakumenyani papi pontho, imwe akuti musapitiriza kundisandukira?+
Misolo yanu yonsene ikupha,
Pontho mitima yanu yonsene ikubva kupha.+
6 Kutomera kunsolo mpaka kumanyalo, nkhabe khundu yakuti iri mwadidi.
Manungo anu amala phekeka, amala kubzwimba, pontho ali na pironda pyakunyeka.
Ipyo nee pyakondzwa,* nee kumangwa, nee kuikhwa mafuta toera pifewe.+
7 Dziko yanu yasala madembe.
Mizinda yanu yamala kupiswa na moto.
Anthu a dziko inango akudya pinthu pidalima imwe.+
Pyonsene pyamala kufudzika, ninga dziko yakutapatwa na anyamalwa.+
8 Mwana wankazi wa Sioni asiyiwa ninga khumbi* mʼmunda wa mauva,
Ninga nsasa mʼmunda wa makaka,
Ninga nzinda udazungulirwa na anyamalwa.+
9 Yahova wa anyankhondo mbadakhonda kusiya anango a ife na umaso,
Ife mbatidakhala ninga Sodhoma,
Pontho mbatidakhala sawasawa na Gomora.+
10 Bveserani mafala a Yahova, imwe atongi akunentsa a ku Sodhoma.+
Bveserani mwambo wa* Mulungu wathu, imwe mbumba ya ku Gomora.+
11 Yahova alonga: “Ntsembe zizinji zinapereka imwe ziri na basa yanji kuna ine?+
Ine ndaneta na ntsembe zanu zakupiswa za mabira+ na mafuta a pinyama pyakununa,+
Pontho ine nkhabe kukomerwa na ciropa+ ca ngʼombe zingʼono zimuna,+ ciropa ca anamabira na ca mbuzi.+
12 Imwe mungabwera kuna ine,+
Mbani adakupangani toera kucita pyenepi,
Kubwera kudzaponda-ponda pa kintalo panga?+
13 Lekanibve kubweresa ntsembe za pyakudya zakusowa basa.
Insenso yanu ndi yakunyanyasa kuna ine.+
Imwe musakumbuka ntsiku za kubalwa kwa mwezi+ na masabudu,+ pontho musakhunganya misonkhano mikulu.+
Mbwenye ine ndaneta kukuonani mbamukaphatisira misanganiko+ mʼmisonkhano yanu yakupambulika.
14 Ine ndisaida pinacita imwe pa ntsiku zakubalwa kwa mwezi na maphwando anu.
Ipyo pyadzakhala ntolo wakulemera kuna ine;
Ndaneta kupithukula.
15 Pontho imwe mungathukula manja anu,
Ine ndisakubisirani maso anga.+
17 Pfundzani kucita pinthu pyadidi, sakani ulungami,+
Sandikani ule anaponderera andzace,
Tsidzikizani ufulu wa mwana waumphawi,*
Pontho tongani mwadidi nseru wankazi adaferwa na mamunace.”+
18 Yahova alonga:+ “Bwerani titongesane toera timalise nseru uli pakati pathu.
Maseze madawo anu akhale akufuira,
Iwo anadzacena kakamwe ninga neve;*+
Maseze akhale akufuira kakamwe,
Iwo anadzacena kakamwe ninga thonje.
19 Imwe mungakhala dzololo toera kundibvera,
Munadzadya pinthu pyadidi pya dziko ino.+
20 Mbwenye mungakhonda kundibvera mbamundisandukira,
Munadzafudzwa na supada,+
Thangwi adalonga pyenepi ndi Yahova.”
21 Nzinda wakukhulupirika+ wadzakhala nkazi waupombo!+
Iwo ukhadadzala na ulungami;+
Ulungami ukhali mu nzinda unoyu,+
Mbwenye cincino muli na mapanga basi.+
22 Parata yako yadzakhala yakusowa basa,+
Pontho pyakumwa pyako pyakuledzeresa* pyabvungazwa na madzi.
23 Atsogoleri ako ndi akuuma ntima, pontho asacita uxamwali na mambava.+
Mʼbodzi na mʼbodzi wa iwo asafuna kakamwe kudyekerwa na kupaswa miyoni.+
Iwo nkhabe kucitira ulungami amphawi,
Pontho miseru ya akazi adaferwa na amunawo nkhabe fika kuna iwo.+
24 Natenepa, Mbuya wandimomwene, Yahova wa anyankhondo,
Wamphambvu Kakamwe wa Izraeli, alonga:
“Ine ndinadzathamangisa anyamalwa anga,
Pontho ndinadzatcunyusa anyamalwa anga.+
25 Ine ndinadzakutcunyusa,
Ine ndinadzakunyungulusa mbandibulusa pirombo pyako pyonsene,
Pontho ndinadzabulusa pinthu pyako pyonsene pyakunyanyasa.+
26 Ndinadzakupasa pontho anyakutonga miseru ako ninga pakutoma,
Pontho ndinadzakupasa anyakupereka uphungu ninga kalene.+
Buluka penepo iwe unadzacemerwa Nzinda Wakulungama, Nzinda Wakukhulupirika.+
27 Nzinda wa Sioni unadzaombolwa mwakulungama,+
Anthu anafuna kubwerera mu nzinda unoyu anadzaombolwa mwakulungama.
28 Anyakusandukira na anyakudawa anadzafudzwa pabodzi pene,+
Pontho ale anasiya Yahova, anadzamaliswa.+
29 Onsene ale akhafuna miti mikulu ikhafuna imwe anadzapasika manyadzo,+
Pontho imwe munadzapasika manyadzo thangwi ya minda ya maluwa* idasankhula imwe.+
30 Thangwi imwe munadzakhala ninga muti ukulu wakuti masamba ace amala bunyala,+
Pontho munadzakhala ninga munda wa maluwa wakusowa madzi.
31 Munthu wamphambvu anadzakhala ninga tsanga yakuuma,
Pontho pinacita iye pinadzakhala ninga ntsasi za moto;
Piwiri pyene pinadzagaka pabodzi pene,
Nkhabe munthu anafuna kudzapithimisa.”
2 Awa ndi masomphenya adaona Izaiya mwana wa Amoji thangwi ya Yuda na Yerusalemu:+
2 Mu ntsiku zakumalisa,
Phiri idamangwa nyumba ya Yahova
Inadzakhazikika mwakuwanga padzulu pa mapiri anango,+
Iyo inadzakhala yakulapha kupiringana mapiri mangʼono,
Pontho anthu a madzindza onsene anadzaenda paphiri ineyi.+
3 Anthu a madzindza mazinji anadzabwera, mbalonga:
“Bwerani, tendeni tikwire paphiri ya Yahova,
Nyumba ya Mulungu wa Yakobe.+
Iye anadzatipfundzisa njira zace,
Pontho ife tinadzafamba munjira zenezi.”+
4 Iye anadzakhala ntongi wa madzindza a anthu,
Pontho iye anadzasasanyira pinthu pyakuti nee piri mwadidi pakati pawo.
Iwo anadzafula* masupada awo toera akhale pyakulima napyo,*
Pontho anadzafula madipa awo toera akhale pyakusadza* napyo.+
Nkhabepo mbumba inafuna kudzakwata supada toera kumenyana na mbumba inango,
Pontho iwo nkhabe kudzapfundzabve nkhondo.+
5 Imwe mbumba ya Yakobe, bwerani,
Tendeni tifambe mu ceza ca Yahova.+
6 Imwe mwaduwala mbumba yanu, mbumba ya Yakobe,+
Thangwi dziko yawo yadzala na pinthu pya Kumabulukiro a Dzuwa;
Iwo akhacita pyaungʼanga*+ ninga Afilisti,
Pontho pakati pawo pakhali na ana azinji a anthu a madziko anango.
7 Dziko yawo yadzala na parata na ouro,
Pontho mpfuma zawo ndi zizinji kakamwe.
Dziko yawo yadzala na makavalo,
Pontho ngolo zawo za nkhondo nkhabe lengeseka.+
8 Dziko yawo yadzala na alungu akusowa basa.+
Iwo asalambira basa ya manja awo,
Pinthu pidacita iwo na pyala pyawo.
9 Natenepa anthu asagodama, mbapwazika,
Pontho imwe nee munaalekerera.
10 Pitani pamwala mbamubisala pa pfumbi
Thangwi yakuonekera kwakugopswa kwa Yahova,
Pontho thangwi ya mphambvu zace na mbiri yace.+
11 Anthu akudzikuza anadzakotamiswa misolo yawo,
Pontho anthu akugaya anadzapaswa manyadzo.
Anafuna kudzakuzwa pa ntsiku ineyi ndi Yahova basi.
12 Thangwi ineyi ndi ntsiku ya Yahova wa anyankhondo.+
Ntsiku ineyi inadzera anthu onsene akudzikuza na akugaya,
Kuna onsene, akulemedzwa na akukhonda kulemedzwa,+
13 Inadzera miti yonsene ya sedhro ya ku Libhano yakuti ndi yakudzikuza na yapadzulu,
Pontho inadzera miti yonsene mikulu ya ku Bhasani,
14 Inadzera mapiri onsene akulapha,
Pontho inadzera nthunda zonsene zikulu,
15 Inadzera nyumba zonsene zakulapha za ndzulu na mipanda yonsene yakuwanga,
16 Inadzera mabote makulu onsene a ku Tarsi,+
Pontho inadzera mabote mangʼono adidi onsene.
17 Anthu akugaya anadzapaswa manyadzo,
Pontho anthu akudzikuza anadzacepeswa.
Anafuna kudzakuzwa pa ntsiku ineyi ndi Yahova basi.
18 Alungu akusowa basa nkhabe kudzaonekabve.+
19 Anthu anadzapita mʼmphako za miyala
Na mʼmadzimba a pantsi pa mataka,+
Thangwi yakuonekera kwakugopswa kwa Yahova,
Pontho thangwi ya mphambvu zace na mbiri yace,+
Mu ndzidzi unafuna iye kulamuka mbacitisa dziko yapantsi kutetemera thangwi yakugopa.
20 Pa ntsiku ineyi, anthu anadzakwata madzimunthu awo akusowa basa a parata na a ouro
Ale adacita iwo toera kualambira,
Mbaaponyera mbewa na anyakalemwalemwa,+
21 Toera apite mʼmphako za miyala,
Mbabisala pakati pa miyala mikulu,
Thangwi yakuonekera kwakugopswa kwa Yahova,
Pontho thangwi ya mphambvu zace na mbiri yace,
Mu ndzidzi unafuna iye kulamuka mbacitisa dziko yapantsi kutetemera thangwi yakugopa.
22 Toera mukhale mwadidi, siyani kunyindira munthu,
Wakuti muya wace uli mʼmphuno mwace.
Thangwi yanji musafunika kunʼnyindira?
3 Onani! Mbuya wandimomwene, Yahova wa anyankhondo,
Akubulusa mu Yerusalemu na mu Yuda pinthu pyonsene pyakufunika kuna iwo na ntundu onsene wa ciphedzo,
Pyakufunika pyonsene, cakudya na madzi,+
2 Mamuna wamphambvu na nyankhondo,
Nyakutonga miseru na mprofeta,+ nyakulotera na nkulu wa mbumba,
3 Ntsogoleri wa anthu 50,+ munthu wacidzo na nyakupereka uphungu,
Nyakudziwa kakamwe misanganiko na nyakucita pisango waluso.+
4 Ine ndinadzacitisa aphale toera akhale atsogoleri awo,
Pontho iwo anadzatongwa na anthu akuti nkhabe nentsa kucinja manyerezero awo.
5 Anthu anadzapondererana unango na ndzace,
Mʼbodzi na mʼbodzi anadzaponderera ndzace.+
Mʼphale anadzapangiza ukali wace kuna munthu wakukalamba,
Munthu wakupwazika nkhabe kudzalemedza munthu wacidzo.+
6 Mʼbodzi na mʼbodzi anadzaphata mʼbale wace panyumba ya babace mbampanga:
“Iwe uli na kapoti, khala ntsogoleri wathu.
Tsogolera nkuku uyu wa madembe.”
7 Mbwenye pa ntsiku ineyi iye anadzatawira:
“Ine nkhabe funa kukhala nyakumanga pironda pyanu;*
Nʼnyumba mwanga, ine nkhabe cakudya nee cakubvala.
Lekani kundikhazikisa ninga ntsogoleri wa mbumba.”
8 Thangwi Yerusalemu agwegweduka,
Pontho Yuda agwa,
Thangwi mafala awo na pinthu pinacita iwo nkhabe bverana na Yahova;
9 Nkhope zawo zisapereka umboni wakuapokanya,
Pontho iwo asalonga madawo awo pakweca ninga anthu a ku Sodhoma;+
Iwo nkhabe yesera kubisa madawo awo.
Dzedze kuna iwo, thangwi akubweresa nyatwa kuna iwo ene!
10 Pangani anthu akulungama kuti pinthu pinadzafamba mwadidi kuna iwo;
11 Dzedze kuna anyakucita pyakuipa!
Nyatwa zinadzaagwera,
Thangwi pinthu pidacitira iwo anango pinadzacitwambo kuna iwo!
12 Mbumba yanga isabvuyiwa na ale anaatsogolera toera kuphata basa,
Pontho iyo isatongwa na akazi.
Mbumba yanga, atsogoleri anu asakucitisani kundzendza-ndzendza,
Pontho asakucitisani kukhonda dziwa njira yanu.+
13 Yahova ali dzololo toera kutonga nseru;
Iye alamuka toera atonge madzindza a anthu.
14 Yahova anadzatonga akulu-akulu na atsogoleri a mbumba yace.
“Imwe mwapisa munda wa mauva,
Pontho pinthu pidabera imwe anthu akutcerenga piri mʼmanyumba mwanu.”+
15 Mbuya Wankulu Kakamwe, Yahova wa anyankhondo alonga:
“Thangwi yanji imwe mwathabusa mbumba yanga, mbamupfinyirira pa mataka nkhope za anthu akutcerenga?”+
16 Yahova alonga: “Nakuti ana akazi a Sioni ndi akudzikuza,
Pakufamba, iwo asalamusa misolo yawo,*
Asatundusa amuna na maso awo, asafamba mwakugaya,
Pontho mu ndzidzi unafamba iwo pisalira pinthu pyakubalikisa pidaikha iwo mʼmphundupundu,
17 Yahova anadzacitisa kuti mʼmisolo mwa ana akazi a Sioni mubuluke makoko,
Pontho Yahova anadzacitisa misolo yawo kukhala na mphandza.*+
18 Pa ntsiku ineyi, Yahova anadzabulusa pyakubalikisa pyawo pyonsene: mapulusera awo a mʼmphundupundu,
Makanʼdedzi na pyakubalikisa pinango pyakulandana na mwezi,+
19 Mphete zawo za mʼmakutu, mapulusera a mu nkono na nguwo zakuphimbira nazo nsolo,
20 Madhunku, mikufu ya mʼmphundupundu na mabhande akubalikisa nawo,
Mitete ya mafuta akununkhira na pithumwa,
21 Mphete za mʼpyala na mphete zinaikhwa pa mphuno,
22 Nguwo zakulapha zinabvalwa pa ntsiku zakupambulika, tunika inabvalwa padzulu pa inango, makapoti na pikhwama,
23 Masupeyu+ mangʼono na nguwo za linyu,
Nguwo zinamangwa munsolo na nguwo zakuphimbira nazo nsolo.
24 Mʼmbuto mwakununkhira mafuta a bhalsamu,+ manungo awo anadzanunkha cinthu cakubvunda;
Mʼmbuto mwakubvala sintu, iwo anadzabvala nkhambala;
Mʼmbuto mwakukhala na tsisi yakusapulwa mwadidi, iwo anadzakhala na mphandza;+
Mʼmbuto mwakubvala nguwo zakudhula, iwo anadzabvala nguwo zakucitwa na sakha;+
Mʼmbuto mwakubalika, iwo anadzakhala na madazi akupiswa.
25 Amuna a mu nzinda wa Sioni anadzaphiwa na supada,
Pontho amuna amphambvu a mu nzinda unoyu anadzaphiwa kunkhondo.+
26 Misuwo mikulu ya nzinda unoyu inadzalira mbitsukwala,+
Pontho iwo unadzakhala pantsi mbusala wakusowa cinthu.”+
4 Pontho mu ndzidzi unoyu, akazi anomwe anadzaphata mamuna mʼbodzi,+ mbalonga:
“Ife tinadya cakudya cathu,
Pontho tinasaka tekhene nguwo toera kubvala;
Basi ene utitawirise toera ticemerwe na dzina yako
2 Mu ndzidzi unoyu, Yahova anadzacitisa kuti pinthu pinamera pikhale pyadidi na pyakubalika. Aizraeli anafuna kudzapulumuka anadzakomerwa, pontho anadzatsandzaya thangwi ya misapo ya dziko ineyi.+ 3 Ale anafuna kusala ku Sioni na ale anafuna kusiyiwa mu Yerusalemu, onsene a mu Yerusalemu akuti alembwa toera akhale mʼmaso,+ anadzacemerwa akucena.
4 Yahova anadzaphatisira mphambvu zace zakutonga, pontho anadzapangiza ukali wace+ toera kubulusa nyambvu* za ana akazi a Sioni,+ pontho toera kutsuka ciropa ciri pakati pa Yerusalemu. 5 Nʼkhundu monsene mwa Phiri ya Sioni na mʼmbuto zace zonsene zakucitira misonkhano, Yahova anadzaikhamo khole ya utci namasikati na ceza ca moto namasiku;+ pontho padzulu pa mbuto yonsene ya mbiri panadzagudumirwa. 6 Panadzakhala nsasa toera ukhale nʼthundzi thangwi ya kupisa kwa masikati,+ toera ukhale mbuto yakuthawira na yacitsidzikizo mu ndzidzi wa condzi na mu ndzidzi unabvumba madzi.+
5 Ndisafuna kuimbira nyimbo munthu anafuna ine.
Ndi nyimbo inalonga pya munthu anafuna ine na munda wace wa mauva.+
Munthu anafuna ine akhali na munda wa mauva wa mataka a ndimu nʼkhundu mwa phiri.
2 Iye atipula munda wace mbabulusa miyala.
Iye atcekamo muti wakuti usabala mauva adidi kakamwe akufuira,
Pakati pa munda unoyu iye amanga cirindo,
Pontho iye akumbamo mbuto yakukamulira mauva.+
Buluka penepo iye adikhira kuti muti unoyu ubale mauva adidi,
Mbwenye iwo wabala mauva akuipa.+
3 “Cincino, imwe anthu anakhala ku Yerusalemu na amuna a ku Yuda,
Ndaphata miyendo, tongani pakati pa ine na munda wanga wa mauva.+
4 Ninji pontho pikhafunika ine kucita kuna munda wanga wa mauva
Pyakuti ine nee ndapicita?+
Thangwi yanji mu ndzidzi ukhadikhira ine mauva adidi
Iwo wabala basi ene mauva akuipa?
5 Cincino ndinakupangani
Pinafuna ine kucita na munda wanga wa mauva:
Ndinabulusa pidamera mwenemu ninga mpanda,
Mbandiupisa.+
Ndinadzagomola mpanda wace wa miyala,
Pontho iwo unadzapondwa-pondwa.
6 Ine nee ndinadzalimabve munda unoyu;+
Nee ndinadzasadza miti ya munda unoyu peno kuusakulira.
Iwo unadzadzala na mathendere a minga na nyakasongole,+
Pontho ndinadzapanga mitambo toera ikhonde kubvumbisa madzi mʼmunda unoyu.+
7 Ine ndine Yahova wa anyankhondo, pontho Izraeli ndi munda wanga wa mauva;+
Amuna a ku Yuda ndi miti ya mauva ikhakomerwa na ine.
Ine ndikhadikhira ulungami,+
Mbwenye ndikhaona pinthu pyakusowa ulungami;
Ine ndikhadikhira pinthu pyadidi,
Mbwenye ndikhabva kulira kwa ale akhatsalakanwa mwakuipa.”+
8 Dzedze kuna ale anathimizira nyumba kusiyapo ziri na iwo,+
Pontho dzedze kuna ale anathimizira minda kusiyapo iri na iwo+
Mpaka mbuto zonsene mbizikhala zawo
Iwo mbakhala okhene basi mu dziko ineyi!
9 Ine ndabva Yahova wa anyankhondo mbadumbira kuti
Nyumba zizinji, ngakhale zikhale zikulu, pontho zakubalika,
Zinadzakhala madembe,
Nee munthu mʼbodzi anadzakhala mwenemu.+
10 Thangwi munda ukulu wa mauva unadzabulusa nkhali* ibodzi basi ya vinyu,
11 Dzedze kuna ale analamuka namacibese kakamwe toera kumwa pyakumwa pyakuledzeresa,+
Akuti asapitiriza kumwa mpaka namasiku kakamwe mbaledzera na vinyu!
12 Mʼmaphwando awo iwo asakhala na maarpa, pyakuimba napyo pya nkhambala,
Mapandero, mafulauta na vinyu;
Mbwenye iwo nkhabe kunyerezera mabasa a Yahova,
Pontho iwo nkhabe kuona basa ya manja Ace.
13 Natenepa mbumba yanga inadzaenda ku ubitcu
Thangwi yakusowa kwawo udziwisi;+
Amunawo amphambvu anadzakhala na njala,+
Pontho mbumba yawo inadzathabuka na nyota.
14 Na thangwi ineyi, Nthumbi* yathimizirika,
Pontho yafungula mulomo mwakusowa madire;+
Anthu a pidzo a mu Yerusalemu, kunyangula kwa mbumba za mu nzinda unoyu na anthu anacita maphwando mwenemu,
Mwakukhonda penula anadzaenda munthumbi.
15 Pontho anthu anadzagodamiswa,
Anthu anadzapaswa manyadzo,
Pontho anthu akudzikuza anadzatsolima thangwi ya manyadzo.
16 Yahova wa anyankhondo anadzakuzwa thangwi ya kutonga kwace;*
Mulungu wandimomwene, Wakucena,+ anadzaphatisira ulungami toera kupangiza kucena kwace.+
17 Pontho anamabira anadzadya ninga ali pa mbuto yawo yakudyera;
Anthu a dziko inango anadzadya mʼmbuto zakusowa anthu zakuti kale zikhali za pinyama pyakudyeswa mwadidi.
18 Dzedze kuna ale anakwewa mulando wawo na nkhambala zakubvunda,
Pontho ale anakwewa madawo awo na nkhambala za ngolo;
19 Kuna ale analonga: “Mbacimbizise basa Yace;
Mbibwere mwakucimbiza toera ife tiione.
20 Dzedze kuna ale analonga kuti cakuipa ndi cadidi, pontho cadidi ndi cakuipa,+
Kuna ale anaikha cidima pa mbuto ya ceza, pontho ceza pa mbuto ya cidima,
Kuna ale analonga kuti pyakuwawa ndi pyakutapira, pontho pyakutapira ndi pyakuwawa!
22 Dzedze kuna ale anabvekera thangwi yakumwa vinyu,
Pontho kuna ale akuti asadziwa kakamwe kubvungaza pyakumwa pyakuledzeresa,+
23 Dzedze kuna ale anamalisa nseru wa nyakudawa thangwi yakudyekerwa,+
Pontho kuna ale anakhonda kutonga mwadidi munthu wakulungama!+
24 Natenepa, ninga malirimi a moto asapisa mapesi,
Pontho tsanga yakuuma isazambazika mʼmalirimi a moto,
Mitcici yawo inadzabvunda,
Pontho maluwa awo anamwazika ninga pfumbi,
Thangwi iwo akhonda mwambo wa* Yahova wa anyankhondo,
Pontho iwo nee alemedza mafala a Wakucena wa Izraeli.+
25 Na thangwi ineyi, Yahova aipirwa kakamwe na mbumba yace,
Pontho iye anadzafuthula djanja yace toera kuatcunyusa.+
Mapiri anadzatetemera,
Manungo awo akufa anadzakhala ninga pirombo mʼmiseu.+
Thangwi ya pinthu pyenepi pyonsene, kuipirwa kwace nee kwamala,
Pontho djanja yace iciri yakufuthuka toera kuatcunyusa.
26 Iye atcimika cidzindikiro ca nkhondo kuna dzindza yakutali;+
Iye aliza ciruzwi* toera kucemera ale ali kunkhomo kwa dziko yapantsi;+
Pontho onani! Iwo akubwera mwakucimbiza kakamwe.+
27 Nkhabe adaneta pakati pawo, pontho nkhabe adagwegweduka.
Nkhabe anaodzira nee kugona.
Masintu ali ncunu mwawo nee alera,
Pontho nkhambala za masandalya awo nee zathumuka.
28 Mapswimo awo onsene akhali akutwa,
Pontho iwo amala kukunga mauta awo onsene.
Nyondo za makavalo awo zakhala ninga mwala,
Pontho maroda a ngolo zawo akhazungulira ninga condzi.+
29 Anthu anewa asalira ninga nkhalamu;
Iwo asalira ninga nkhalamu zingʼono.+
Iwo analira mbaphata cinafuna iwo,
Pontho nkhabe anafuna kupulumusa cinafuna iwo kukwata.
30 Pa ntsiku ineyi, iwo anadzalirira cidaphata iwo
Ninga kutitima kwa bara.+
Anthu onsene anayangʼana dziko ineyi anadzaona cidima cakutsukwalisa;
Ngakhale dzuwa inadzakhala cidima thangwi ya mitambo.+
6 Mu caka cidafa Mambo Uziya,+ ine ndaona Yahova mbali nawa pa mpando waumambo wa cidzo cikulu,+ pontho ukhali pa mbuto yapadzulu. Nguwo idabvala iye yadzadza templo. 2 Padzulu pace pakhali na aserafi; mʼbodzi na mʼbodzi akhali na maphapido matanthatu. Mʼbodzi na mʼbodzi* akhaphimbira nkhope yace na maphapido mawiri, akhaphimbira miyendo yace na maphapido mawiri, pontho akhamburuka na maphapido mawiri.
3 Mʼbodzi na mʼbodzi akhakhuwa kuna ndzace:
“Wakucena, wakucena, wakucena ndi Yahova wa anyankhondo.+
Dziko yonsene yapantsi yadzala na mbiri yace.”
4 Pontho maaro* a misuwo atekenyeka thangwi ya kukhuwa kukhacita iwo,* nyumba mbidzala na utci.+
5 Penepo ine ndalonga: “Dzedze kuna ine!
Mwakukhonda penula ine ndinafa,*
Thangwi ndine munthu wa mulomo wakukhonda cena,
Pontho ndisakhala pakati pa anthu a milomo yakukhonda cena;+
Thangwi maso anga aona Mambo, Yahova wa anyankhondo!”
6 Penepo serafi mʼbodzi amburuka mbabwera kuna ine, pontho iye akhali na khala ya moto+ mʼmanja mwace idabulusa iye pa guwa ya ntsembe+ na cakuphata naco moto. 7 Iye akhuya mulomo wanga mbalonga:
“Ona! Ici cakhuya mulomo wako.
Mulando wako wafudzwa,
Pontho madawo ako alekererwa.”
8 Buluka penepo ine ndabva fala ya Yahova mbilonga: “Ndinatuma ani, pontho mbani anafuna kuenda mʼmbuto mwa ife?”+ Penepo ine ndatawira: “Ndiri pano! Nditumeni!”+
9 Iye alonga: “Ndoko kuna anthu awa, mbuapanga:
‘Imwe munadzabva mwakubwereza-bwereza,
Mbwenye nee munadzabvesesa;
Imwe munadzaona mwakubwereza-bwereza,
Mbwenye nee munadzadziwa cinthu.’+
10 Citisa mitima ya anthu awa kukhala yakuuma,+
Funga makutu awo toera akhonde kubva,+
Pontho funga maso awo,
Toera akhonde kuona na maso awo,
Pontho toera akhonde kubva na makutu awo,
Toera mitima yawo ikhonde kubvesesa,
Pontho toera akhonde kubwerera kuna ine, mbandiawangisa.”+
11 Natenepa ine ndabvundza: “Yahova, mpaka lini?” Penepo iye atawira:
“Mpaka mizinda kumala kufudzika mbisowa munthu toera kukhalamo,
Nyumba mbazikhala zakusowa anthu,
Pontho dziko ifudzwe mbikhala madembe;+
12 Mpaka Yahova athamangise anthu toera aende kutali,+
Pontho mpaka khundu ikulu ya dziko ino ikhale madembe.
13 “Pa anthu khumi a mbumba ya Izraeli mʼbodzi anadzasala, mbwenye iye anadzapiswambo na moto ninga muti ukulu na muti ukulu wakukhala na nthawi zizinji, wakuti ubodzi na ubodzi ungagwandwa usasiya citca; pa citca ceneci panadzamera mbeu* yakucena.”
7 Ahazi+ mwana wa Yotamu, mwana wa Uziya, mu ntsiku zikhali iye mambo wa Yuda, Rezini Mambo wa ku Sirya na Peka+ mwana wa Remaliya mambo wa Izraeli, abwera kudzamenyana na Yerusalemu, mbwenye iye* nee aukunda.+ 2 Anthu a dzindza ya Dhavidhi apangwa tenepa: “Sirya abvungazikana na Efraimu.”
Penepo ntima wa Ahazi na mitima ya mbumba yace yatoma kutetemera ninga pinacita miti ya mu nsitu ingatekenyeswa na mphepo.
3 Natenepa Yahova apanga Izaiya: “Ndaphata miyendo, iwe na mwanako Seari-Yasubhi*+ ndokoni kaonana na Ahazi kunkhomo kwa mbuto inapita na madzi anabuluka pa thawala yakuti iri pa nthunda,+ pa nseu ukulu dhuzi na mbuto inaphata basa mamuna wakuti ndi nyakufula nguwo. 4 Imwe musafunika kumpanga tenepa: ‘Nyerezera mwadidi pinafuna iwe kucita. Leka kugopa, pontho leka kudzudzumika thangwi ya mapindi awa mawiri a nkhuni zakupucira, thangwi yakuipirwa kwa Rezini, Sirya na kwa mwana wa Remaliya.+ 5 Thangwi Sirya, Efraimu na mwana wa Remaliya akunyerezera kukucita pyakuipa mbalonga: 6 “Tendeni kamenyane na dziko ya Yuda, tiifudze* mbatiikunda,* pontho tendeni tikwate mwana wa Tabheli toera akhale mambo wa dziko ineyi.”+
7 “‘Yahova Mbuya Wankulu Kakamwe alonga:
“Pyenepi nee pinafamba mwadidi,
Pontho nee pinacitika.
8 Nsolo wa Sirya ndi Dhamasku,
Pontho nsolo wa Dhamasku ndi Rezini.
Pyaka 65 mbapidzati kumala
Efrayimu anadzafudzwa mbasiya kukhala dzindza.+
Mungakhonda kukhala na cikhulupiro cakuwanga,
Nee munapitiriza kukhala akuwanga.”’”
10 Yahova apitiriza kulonga na Ahazi: 11 “Phemba cidzindikiro kuna Yahova Mulungu wako;+ konsene kunafuna iwe kuti cidzindikiro ceneci cicitike, cinacitika, ngakhale mbuto yakuzika kakamwe ninga Nthumbi* peno kudzulu kakamwe ninga kuthambo.” 12 Mbwenye Ahazi alonga: “Nee ndinaphemba, pontho nee ndinayesera Yahova.”
13 Penepo Izaiya alonga: “Ndaphata miyendo, ndibvesereni imwe a dzindza ya Dhavidhi. Kodi kwa imwe nee pyakwana kuyesera kupirira kwa anthu? Kodi musafunambo kuyesera kupirira kwa Mulungu?+ 14 Natenepa Yahova anadzakupasani cidzindikiro: Onani! Mwali* anadzakhala na mimba mbabala mwana wamamuna,+ pontho iye anadzampasa dzina ya Emanuwele.*+ 15 Iye anadzadya mantega na uci mu ndzidzi unafuna iye kudziwa kukhonda pyakuipa mbasankhula pyadidi. 16 Thangwi mwana mbadzati kudziwa kukhonda pyakuipa mbasankhula pyadidi, dziko ya amambo awiri anagopa iwe inadzasala madembe.+ 17 Yahova anadzacitisa iwe, mbumba yako na anthu a panyumba ya babako kukhala mu ndzidzi wakuti cipo aukhala kale kutomera pa ntsiku idamwazana Efraimu na Yuda,+ thangwi Iye anadzatumiza mambo wa Asirya toera amenyane na iwe.+
18 “Mu ndzidzi unoyu, Yahova anadzaliza ciruzwi* toera kucemera ntcentce zakutali kakamwe za mʼmagowa a nkulo wa Nilo ku Ejitu, na nyuci ziri ku dziko ya Asirya, 19 pontho zonsene zinadzabwera mbaziphama mʼmagowa,* mʼmphako za miyala, mʼmbuto zonsene za minga na mʼmbuto zonsene zinamwera pifuyo madzi.
20 “Mu ntsiku zenezi, na lezi yakubwereka ya kucisa ca ku Nkulo,* inde, na mambo wa Asirya,+ Yahova anadzacinga tsisi ya munsolo na ya mʼmiyendo ya Yuda, pontho anadzacinga ndebvu zace.
21 “Mu ntsiku zenezi, anthu anadzakoya mwanangʼombe mʼbodzi na mabira mawiri. 22 Pontho thangwi yakunjipa kwa nkaka iwo anadzadya mantega, thangwi anthu onsene adasala mu dziko ineyi nee anadzakhala na cinthu cinango toera kudya kusiyapo mantega na uci.
23 “Mu ntsiku zenezi, mbuto zakuti zikhali na miti 1.000 ya mauva, yakuti mbidaguliswa na masiklo 1.000 a parata, basi ene zinadzakhala na mathendere a minga na nyakasongole. 24 Amuna anadzaenda mwenemo na uta na mapswimo, thangwi dziko yonsene inadzadzala na mathendere a minga na nyakasongole. 25 Pontho thangwi yakugopa minga na nyakasongole, nee unaendabve dhuzi na mapiri akhalima iwe na phaza; mapiri anewa anadzakhala mbuto yakudyesera ngʼombe na mabira.”
8 Yahova andipanga: “Kwata tabwa ikulu,+ pontho lemba pa tabwa ineyi na maletra akuoneka mwadidi,* ‘Maeri-Salala-Hazi-Bhazi.’* 2 Pontho ndisafuna anthu akukhulupirika toera acitire umboni pyenepi, nyantsembe Uriya+ na Zakariya mwana wa Yebherekiya.”
3 Buluka penepo ndapita mʼmabonde* na mprofeta wankazi,* pontho iye adzakhala na mimba mbabala mwana wamamuna.+ Penepo Yahova andipanga: “Mpase dzina yakuti Maeri-Salala-Hazi-Bhazi, 4 thangwi khombwani unoyu mbadzati kwanisa kulonga ‘Baba!’ peno ‘Mama!’ mpfuma zonsene za ku Dhamasku na pinthu pidatapatwa ku Samariya pinadzaendeswa kuna mambo wa Asirya.”+
5 Yahova alonga pontho na ine:
6 “Nakuti mbumba iyi yakhonda madzi akuwewa mwadidi a ku Silowa,*+
Pontho isakomerwa na Rezini na mwana wa Remaliya,+
7 Yahova anadzabweresa kuna iwo
Nkulo* wa madzi mazinji na amphambvu,
Mambo wa Asirya+ na mphambvu zace zonsene.
Iye anadzadza mikulo yace mingʼono yonsene,
Mbatayikira
8 Mu dziko yonsene ya Yuda.
Iye anadzakhala ninga madzi akudzala mbafika mpaka nʼkhosi;+
Ninga mbalame, iye anadzafuthula maphapido ace mbagudumira dziko yako yonsene,
9 Imwe mbumba aphekeseni, mbwenye imwe munadzagwandwa-gwandwa.
Bveserani imwe monsene munakhala mʼmbuto zakutali za dziko yapantsi!
Khunganyikani toera mumenye nkhondo,* mbwenye imwe munadzagwandwa-gwandwa!+
Khunganyikani toera mumenye nkhondo, mbwenye imwe munadzagwandwa-gwandwa!
10 Citani masasanyiro, mbwenye iwo anadzapingizwa!
11 Djanja yamphambvu ya Yahova ikhali pana ine toera kundicenjeza kuti ndikhonde kufamba munjira ya mbumba iyi. Pidalonga iye ndi ipi:
12 “Lekani kulonga makunje pinthu pinalonga mbumba iyi kuti ndi makunje!
Lekani kugopa pinagopa iwo;
Lekani kutetemera thangwi ya pyenepi.
13 Yahova wa anyankhondo ndiye anafunika imwe kuona ninga wakucena,+
Ndiye anafunika imwe kugopa,
Pontho ndiye anafuna kukucitisani kutetemera.”+
14 Iye anadzakhala ninga mbuto yakucena,
Mbwenye iye anadzakhalambo ninga mwala wakuti usagwisa,
Pontho iye anadzakhalambo ninga mwala wakugwegwedusa+
Kuna umambo uwiri ene wa Izraeli,
Ninga mulindi na nsampha
Kuna anthu anakhala mu Yerusalemu.
15 Azinji a iwo anadzagwegweduka mbagwa, pontho anadzagwandwa-gwandwa;
Iwo anadzamangwa na nsampha mbaphatwa.
17 Ine ndinadikhira* Yahova+ wakuti abisa nkhope yace kuna dzindza ya Yakobe,+ pontho ine ndinadikhira iye.
18 Onani! Mu Izraeli, ine na ana adandipasa Yahova+ ndife pidzindikiro+ na pirengo pyakubuluka kuna Yahova wa anyankhondo wakuti asakhala Paphiri ya Sioni.
19 Pontho iwo angakupangani kuti: “Bvundzani ale analonga na mizimu na anyakulotera analonga ciwerewere mbadungunya,” kodi mbumba nee isafunika kubvundza Mulungu wawo? Kodi iwo asafunika kubvundza anyakufa toera kuphedza anthu ali mʼmaso?+ 20 Mbwenye iwo asafunika kubvundzisa mwambo na mphangwa zinango zidalembwa!
Iwo angakhonda kulonga mwakubverana na mafala awa, iwo nee anakhala na ceza.*+ 21 Mʼbodzi na mʼbodzi wa iwo anadzapita mu dziko mwawo mwakutsukwala, pontho mbakabva njala;+ thangwi ya njala na kutsukwala, iye anadzayangʼana kudzulu mbapasa dzedze mambo wace na Mulungu wace. 22 Buluka penepo, iye anadzayangʼana pa dziko yapantsi mbaona basi ene kutsukwala na cidima, nʼthundzi, midzidzi yakunentsa na mitambo, pontho nkhabe kudzaona ceza.
9 Mbwenye cidima ceneci nee cinadzakhala ninga cidima cidacitika mu dziko ineyi, mu ndzidzi wakuti dziko ya Zebhuloni na dziko ya Nafitali ikhapwazwa mbithabuswa.+ Mbwenye mukupita kwa ndzidzi, Iye anadzapasa mbiri njira, njira ya ku bara, mucisa ca Yordani, ku Galileya kunakhala anthu a madzindza anango.
2 Anthu akhafamba ncidima
Aona ceza cikulu.
Ale akakhala mu dziko ya cidima cikulu,
Ceza cagaka kuna iwo.+
3 Imwe mwacitisa kuti dzindza ithimizirike;
Mwacitisa kuti kutsandzaya kwawo kukhale kukulu kakamwe.
Iwo asatsandzaya pamaso panu
Ninga kutsandzaya kunakhala na mbumba mu ndzidzi wakubvuna,
Ninga ale anatsandzaya pakugawana pinthu pyakutapatwa.
4 Thangwi imwe mwagwanda-gwanda goli ikhathuka iwo,
Mwagwanda-gwanda muti ukhali mʼmapewa mwawo, ndodo ya ale akhaaphatisa basa,
Ninga pidacita imwe pa ntsiku idakundwa Amidhiyani.+
5 Ntsapato zonsene za anyankhondo zinacitisa dziko yapantsi kutetemera mu ndzidzi unafamba iwo
Na nguwo zonsene zakudzala na ciropa
Pinadzapiswa na moto.
Iye anadzacemerwa Phungu Wadidi Kakamwe,+ Mulungu Wamphambvu,+ Baba Wakwenda na Kwenda, Ntsogoleri wa Ntendere.
7 Utongi wace unadzathimizirika,
Pontho ntendere unadzakhala kwenda na kwenda,+
Pa mpando waumambo wa Dhavidhi+ na mu umambo wace
Toera kuukhazikisa mwakuwanga na kuuphedzera+
Na ulungami+
Kutomera cincino mpaka kwenda na kwenda.
Yahova wa anyankhondo anadzacita pyenepi thangwi ya phinga yace.
8 Yahova atumiza mphangwa toera kucenjeza Yakobe,
Mbwenye izo zaenda kuna Izraeli.+
9 Anthu onsene anadzadziwa pyenepi,
Efraimu na anthu anakhala ku Samariya
Akuti asalonga mwakudzikuza na mwakusowa cilemedzo kuti:
10 “Nyumba za mabhuloko zagwa,
Mbwenye ife tinadzamanga za miyala yakusemwa.+
Miti ya sikomoro yagwandwa,
Mbwenye ife tinadzaikhamo miti ya sedhro.”
11 Yahova anadzatawirisa kuti anyamalwa a Rezini ampingize,
Pontho anadzacitisa kuti anyamalwa a Izraeli acite pinthu,
12 Sirya anabulukira kumabulukiro a dzuwa na Afilisti anabulukira kumadokero a dzuwa,*+
Iwo anadzafungula milomo yawo toera kusakaza Izraeli.+
Thangwi ya pinthu pyenepi pyonsene, kuipirwa kwace nee kwamala,
Pontho djanja yace iciri yakufuthuka toera kuatcunyusa.+
13 Thangwi mbumba ineyi nee yasaka Ule anaatcunyusa;
Iwo nee asaka Yahova wa anyankhondo.+
14 Pa ntsiku ibodzi basi, Yahova anadzagwanda
Nsolo na ncira, muti wakuphukira na tsanga yakulapha* ya Izraeli.+
15 Nsolo ndi mamuna wakugwesera na wakulemedzwa kakamwe,
Mbwenye ncira ndi mprofeta anapereka pitsogolero pyauthambi.+
16 Ale anatsogolera mbumba iyi asaicitisa kundzendza-ndzendza,
Pontho ale anatsogolerwa asakhala akudzudzumika.
17 Na thangwi ineyi, Yahova nee anadzakomerwa na aphale awo,
Pontho iye nee anadzabvera ntsisi anawo aumphawi* na akazi adaferwa na amunawo,
Thangwi onsene ndi anyakusandukira na anyakucita pyakuipa,+
Pontho mʼbodzi na mʼbodzi wa iwo asalonga pinthu pyakusowa basa.
Thangwi ya pinthu pyenepi pyonsene, kuipirwa kwace kudzati mala,
Mbwenye djanja yace iciri yakufuthuka toera kuatcunyusa.+
18 Thangwi uipi usagaka ninga moto,
Mbupisa mathendere a minga na nyakasongole.
Uipi unadzapisa nsitu ukulu wa mathendere,
Pontho utci wa mathendere anewa unadzaenda kudzulu.
19 Thangwi yakuipirwa kwa Yahova wa anyankhondo,
Dziko ineyi inadzapiswa na moto,
Pontho anthu anadzakhala ninga nkhuni za moto.
Nee mʼbodzi anafuna kudzapulumusa ndzace, ngakhale mʼbale wace.
20 Mʼbodzi anadzaceka khundu yamadyo,
Mbwenye anadzapitiriza kubva njala;
Unango anadzadya khundu yabzwere,
Mbwenye nee anadzakhuta.
Mʼbodzi na mʼbodzi anadzadya nyama ya nkono wace,
21 Manase anadzadya Efraimu,
Pontho Efraimu anadzadya Manase.
Uwiri wawo anadzasandukira Yuda.+
Thangwi ya pinthu pyenepi pyonsene, kuipirwa kwace kudzati mala,
Mbwenye djanja yace iciri yakufuthuka toera kuatcunyusa.+
10 Dzedze kuna ale anakhazikisa mitemo yakuipa,+
Ale akuti ndzidzi onsene asalemba mitemo yakuti isabweresa nyatwa kuna anthu,
2 Toera akhondere atcerengi ufulu wawo,
Toera anthu akucepeseka pakati pa mbumba yanga akhonde kucitirwa ulungami,+
Toera atapate pinthu pya akazi adaferwa na amunawo,
3 Kodi imwe munacitanji pa ntsiku yakutongwa* kwanu?+
Munacitanji kufudzwa kungabwera kubulukira kutali?+
4 Cidasala kuna imwe ndi kugodamira anyankaidi
Peno kugwa pakati pa ale adamala kufa.
Thangwi ya pinthu pyenepi pyonsene, kuipirwa kwace kudzati mala,
Mbwenye djanja yace iciri yakufuthuka toera kuatcunyusa.+
5 Ipi ndi pidalonga iye: “Onani munthu wa ku Asirya,+
Iye ndi ndodo inaphatisira ine toera kupangiza ukali wanga,+
Pontho ndisaphatisira ndodo iri mʼmanja mwace toera kutcunyusa!
6 Ine ndinadzantuma toera aende kuna dzindza idandisandukira,+
Toera aende kuna mbumba idandicitisa kuipirwa;
Ndinadzampasa ntemo toera atapate, pontho akwate pinthu pizinji kakamwe,
Buluka penepo aaponde-ponde ninga matope a nʼnjira.+
7 Mbwenye iye nkhabe cifuno cakucita pyenepi,
Pontho ntima wace nkhabe kunyerezera kucita pyenepi;
Thangwi ntima wace usanyerezera pyakufudza,
Tayu kufudza madzindza akucepa, mbwenye mazinji.
8 Thangwi iye asalonga:
‘Kodi atsogoleri anga onsene nee ndi amambo?+
9 Kodi Kalino+ nee ndi ninga Karkemi?+
Amati+ nee ndi ninga Arpadhi?+
Samariya+ nee ndi ninga Dhamasku?+
10 Djanja yanga yakunda maumambo a alungu akusowa basa,
Akuti madzimunthu awo akhali mazinji kakamwe kupiringana ale akhali ku Yerusalemu na ku Samariya!+
11 Kodi nee ndinacitambo kuna Yerusalemu na madzimunthu ace
Pire pidacita ine kuna Samariya na alungu ace akusowa basa?’+
12 “Yahova angamalisa basa yace yonsene Paphiri ya Sioni na ku Yerusalemu, Iye anadzatcunyusa* mambo wa Asirya thangwi yakusowa kwace cilemedzo, kuyangʼana kwace mwakugaya na kudzikuza kwace.+ 13 Thangwi iye alonga:
‘Ine ndinacita pyenepi na mphambvu ya manja anga,
Pontho na ndzeru zanga, thangwi ndiri na udziwisi.
Ine ndinadzafudza madire a mbumba,+
Pontho ndinatapata mpfuma yawo,+
Mbandikunda anthu anakhala mwenemu ninga munthu wamphambvu.+
14 Ninga munthu anaphata ntsandza,
Manja anga anadzakwata mpfuma za mbumba;
Pontho ninga munthu anagumanya mazai akusukusa,
Ine ndinadzagumanya pinthu pyonsene pya pa dziko yapantsi!
Nkhabepo mbalame inafuna kugubudza maphapido ace peno kufungula mulomo wace peno kulira.’”
15 Kodi macado asaoneka ninga wakufunika kakamwe kupiringana ule anamʼphatisira?
Kodi cakuceka naco matabwa cisaoneka ninga cakufunika kakamwe kupiringana ule anaciphatisira?
Kodi mpswimbo+ inafambisa ule adaithukula?
Peno ndodo inathukula ule wakuti nee acitwa na matabwa?
16 Natenepa, Mbuya wandimomwene, Yahova wa anyankhondo,
Anadzacitisa kuti amuna ace* amphambvu akhale akusowa mphambvu,+
Mbiri yonsene ya munthu wa ku Asirya inadzamala, iyo inadzakhala ninga yapiswa na moto.+
17 Ceza ca Izraeli+ cinadzakhala moto,+
Pontho Wakucena wace anadzakhala malirimi a moto;
Pa ntsiku ibodzi basi, moto unoyu unadzapisa mathendere ace* a minga na nyakasongole wace.
18 Mulungu anadzamalisa mbiri yonsene ya misitu yace na mazunde ace;
Mbiri yace inadzakhala ninga munthu wakuti akuonda kakamwe thangwi yakubva kupha.+
19 Miti inafuna kusala mu nsitu wace
Inadzakhala yakucepa, yakuti mwanangʼono anakwanisa kuilengesa.
20 Mu ndzidzi unoyu, ale anafuna kusala mu Izraeli
Na ale anafuna kupulumuka a dzindza ya Yakobe
Nee anaphedzerabve ule anaamenya;+
Mbwenye iwo anadzaphedzera mwakukhulupirika Yahova,
Wakuti ndi Wakucena wa Izraeli.
21 Basi ene anthu akucepa ndiwo anafuna kubwerera,
Anafuna kusala a dzindza ya Yakobe, anabwera kuna Mulungu Wamphambvu.+
22 Iwe Izraeli, maseze mbumba yako
Ikhale ninga matcetca a nʼkhundu mwa bara,
Basi ene anthu akucepa ndiwo anafuna kubwerera.+
Kufudza kunafuna kucita Mulungu kuna anthu awa,+
Kunadzabwera mwaulungami ninga kudzala kwa madzi.+
23 Inde, Mbuya Wankulu Kakamwe, Yahova wa anyankhondo
Anadzatonga dziko ineyi yonsene.+
24 Natenepa, Mbuya Wankulu Kakamwe, Yahova wa anyankhondo alonga: “Imwe mbumba yanga munakhala ku Sioni, lekani kugopa munthu wa ku Asirya wakuti asakumenyani na mpswimbo mbalamusa ndodo yace+ toera kukumenyani ninga pikhacita Ejitu.+ 25 Thangwi thimize pano kuipirwa kwanga kunadzamala; ukali wanga unadzaenda kuna iwo toera kuafudza.+ 26 Yahova wa anyankhondo anadzankwapula na ntcamu+ ninga pidakunda iye Midhiyani pamwala wa Orebhi.+ Ndodo yace inadzakhala padzulu pa bara, pontho iye anadzailamusa ninga pidacita iye ku Ejitu.+
27 Pa ntsiku ineyi, mitolo yace yakulemera inadzabuluswa mʼmapewa mwanu,+
Goli yace inadzabuluswa nʼkhosi mwanu,+
Pontho goli ineyi inadzakhumulwa+ thangwi ya mafuta.”
28 Iye afika ku Ayati;+
Iye apita na ku Migironi;
Mitolo yace aisiya ku Mikimasi.+
29 Iwo awambuka nkulo;
Agona ku Jebha;+
Rama atetemera, anthu a ku Jibheya+ wakuti ndi nzinda wa Sauli athawa.+
30 Iwe mwana wankazi wa Galimu, khuwa kakamwe!
Iwe Laisa, bvesera!
Bvesera iwe Anatote wakupasa ntsisi!+
31 Anthu a ku Madhimena athawa.
Anthu a ku Jebhimu asaka mbuto yakubisala.
32 Pa ntsiku ineyi, iye analimira ku Nobhe.+
Na djanja yace, iye anathusa phiri ya mwana wankazi wa Sioni,
Phiri idamangwa nzinda wa Yerusalemu.
33 Onani! Mbuya wandimomwene, Yahova wa anyankhondo,
Akugwanda nthawi, pontho zikugwa mbazititimira;+
Miti yakulapha kakamwe ikugwandwa,
Pontho miti mikulu ikucepeswa.
34 Iye agwisa mathendere a mu nsitu na macado wa utale,
Pontho miti ya ku Libhano inadzagwiswa na wamphambvu.
11 Pa citca ca Yese+ panaphukira nthawi,+
Pontho nthawi+ inafuna kuphukira pa mitcitci yace inabala misapo.
2 Nzimu wa Yahova unadzakhala na iye,+
Na thangwi ineyi, iye anadzakhala wandzeru+ na wakubvesesa pinthu,
Iye anadzapereka uphungu wadidi, pontho anadzakhala wamphambvu,+
Iye anadzakhala waudziwisi, pontho anadzalemedza kakamwe Yahova.
3 Kulemedza Yahova kunadzankomera kakamwe.+
Iye nee anadzatonga basi ene thangwi ya pidaona iye,
Nee kusandika basi ene thangwi ya pidabva iye.+
4 Iye anadzatonga mwadidi* anthu akutcerenga,
Pontho iye anadzasandika mwaulungami toera kuphedza anthu akupfulika a pa dziko yapantsi.
Iye anadzamenya dziko yapantsi na ndodo ya pamulomo pace,+
Pontho iye anadzapha anyakucita pyakuipa na muya unabuluka pamulomo pace.+
5 Ulungami unadzakhala sintu ya ncunu mwace,
Kukhulupirika kunadzakhalambo sintu ya ncunu mwace.+
6 Bindzi inadzakhala pabodzi na mwanabira,+
Nyalugwe anadzagona pabodzi na mwanambuzi,
Mwanangʼombe, nkhalamu na pinyama pyakununa pinadzakhala pabodzi;*+
Pontho mwanangʼono ndiye anafuna kupitsogolera.
7 Ngʼombe na ursu* pinadzadya pabodzi,
Pontho anawo anadzagona pabodzi.
Nkhalamu inadzadya tsanga ninga ngʼombe.+
8 Mwana wakuyamwa anadzasendzeka pa mwida* wa nyoka,
Pontho mwana wakuti asiya kuyamwa anadzaikha djanja yace mʼmphako ya nyoka yakugopswa.
9 Paphiri yanga yonsene yakucena, nee panadzacitika pyakuipa+
Peno pinthu pyakuphekesa,+
Thangwi dziko yapantsi inadzadzala na cidziwiso ca Yahova
Ninga kudzala kwa madzi mʼbara.+
10 Pa ntsiku ineyi, ntcitci wa Yese+ unadzalimira ninga cidzindikiro* kuna mbumba za anthu.+
Madzindza anadzaenda kuna iye toera kasaka citsogolero,*+
Pontho mbuto inafuna kukhala* iye inadzakhala ya mbiri.
11 Pa ntsiku ineyi, Yahova anadzafuthula pontho kacikawiri djanja yace toera kugumanya anthu a mbumba yace adasala ku Asirya,+ Ejitu,+ Patrosi,+ Kusi,+ Elami,+ Sineari,* Amati na ntsuwa za mʼbara.+ 12 Iye anadzalamusa cidzindikiro* toera madzindza acione mbagumanya Aizraeli adabalalika,+ pontho anadzagumanya Ayuda adamwazika mu nkhomo zinai za dziko yapantsi.+
13 Bibvu ya Efraimu inadzamala,+
Pontho ale adacita pyakuipa kuna Yuda anadzafudzwa.
Efraimu nee anadzacitirabve Yuda bibvu,
Pontho Yuda nee anadzacitirabve Efraimu pinthu pyakuipa.+
14 Iwo anadzakutira nthunda* za Afilisti kumadokero a dzuwa;
Anadzakwata pabodzi pene pinthu pya anthu a kumabulukiro a dzuwa.
Iwo anadzafuthula manja awo toera kumenyana na* Edhomi+ na Moabhe,+
Pontho iwo anadzatonga Aamoni.+
15 Yahova anadzagawa* gombe* ya bara ya ku Ejitu,+
Pontho iye anadzafambisa djanja yace toera kuthusa Nkulo.*+
Na muya wace wakupisa, iye anadzamenya mikulo mingʼono minomwe ya nkulo unoyu,*
Mbacitisa anthu kuwambuka uku mbadabvala masandalya.
16 Panadzakhala nseu ukulu+ bulukira ku Asirya toera anthu a mbumba yace adasala kweneko apite nawo,+
Nseu unoyu unadzakhala ninga wa Aizraeli pa ntsiku idabuluka iwo mu dziko ya Ejitu.
12 Mwandimomwene pa ntsiku ineyi unadzalonga:
“Ndisapereka takhuta kuna imwe Yahova,
Thangwi maseze imwe mukhadaipirwa na ine,
Mwapangʼono-pangʼono ukali wanu wapunguka mbamundibalangaza.+
2 Onani! Mulungu ndi mpulumusi wanga.+
Ine ndinadzanyindira iye mbandikhonda kugopa;+
Thangwi Yah* Yahova ndi citsidzikizo canga,
Pontho iye adzakhala mpulumusi wanga.”+
3 Imwe munadzatunga madzi mwakutsandzaya
Mʼmicera yacipulumuso.+
4 Pontho pa ntsiku ineyi iwo anadzalonga:
“Perekani takhuta kuna Yahova, cemerani dzina yace,
Dziwisani mabasace kuna madzindza a anthu!+
Dziwisani kuti dzina yace ndi yapadzulu kakamwe.+
5 Imbani nyimbo toera kusimba Yahova,+ thangwi iye acita pinthu pyakudzumisa.+
Pyenepi mbapidziwiswe pa dziko yonsene yapantsi.
6 Imwe anthu anakhala* ku Sioni khuwani, pontho tsandzayani,
Thangwi wankulu pakati panu ndi Wakucena wa Izraeli.”
13 Mphangwa zinalonga pya kutongwa kwa Bhabhilonya+ zidaona Izaiya+ mwana wa Amoji mʼmasomphenya:
2 “Ikhani cidzindikiro*+ paphiri yakusowa miti.
Acemereni mwakugaluza mbamuakhupa na manja anu,
Toera apite na mʼmisuwo mikulu ya anthu akubvekera.
3 Ndapereka ntemo kuna anthu adasankhula ine.*+
Toera kupangiza ukali wanga, ndagumanya anyankhondo anga,
Akuti asatsandzaya mwakudzikuza.
4 Bveserani! Mwinji mʼmapiri;
Mwinji unoyu usabveka ninga mbumba ya anthu azinji!
Bveserani! Uviyaviya wa maumambo,
Uviyaviya wa madzindza adagumanyikana pabodzi pene!+
Yahova wa anyankhondo akugumanya nsoka wa anyankhondo toera kumenya nkhondo.+
5 Yahova pabodzi na pida pya nkhondo pya ukali wace
Akubwera kubulukira ku dziko yakutali,+
Kubulukira kunkhomo yakudzulu,
Toera kufudza dziko yonsene yapantsi.+
6 Tsukwalani, thangwi ntsiku ya Yahova iri dhuzi!
Ntsiku ineyi inadzabwera ninga kufudza kwa Wamphambvu Zonsene.+
7 Na thangwi ineyi, manja onsene anadzakhala akusowa mphambvu,
Pontho mitima ya anthu onsene inadzanyunguluka thangwi yakugopa.+
8 Anthu akugopa kakamwe.+
Iwo akudzudzumika, pontho akubva kupha,
Ninga kunabva nkazi pakubala.
Iwo asayangʼanisana unango na ndzace mwakugopa,
Pontho nkhope zawo zisapangiza kutsukwala.
9 Onani! Ntsiku ya Yahova ikubwera,
Na kuipirwa na ukali ukulu,
Toera kucitisa dziko ineyi kukhala yakugopswa,+
Pontho toera kupha anyakudawa a mu dziko ineyi.
10 Thangwi nyenyezi zakudzulu na misoka ya nyenyezi zenezi*+
Nee zinadzagaka;
Dzuwa inadzathima mu ndzidzi unabuluka iyo,
Pontho mwezi nee unadzagaka.
11 Ndinadzatcunyusa anthu anakhala pa dziko yapantsi thangwi ya pyakuipa pinacita iwo,+
Pontho ndinadzatcunyusa anyakucita pyakuipa thangwi ya madodo awo.
Ndinadzamalisa kugaya kwa anthu akudzikuza,
Pontho ndinadzapasa manyadzo kudzikuza kwa anyakutonga akuipa.+
12 Ndinadzacitisa kuti anthu asoweke kupiringana ouro yadidi kakamwe,+
Pontho anthu anadzasoweka kakamwe kupiringana ouro ya ku Ofire.+
13 Na thangwi ineyi, ndinacitisa kudzulu kutetemera,
Pontho dziko yapantsi inadzatekenyeka mbibuluka pa mbuto payo+
Thangwi yakuipirwa kwa Yahova wa anyankhondo pa ntsiku ya ukali wace ukulu.
14 Ninga mbawala inathamangiswa, pontho ninga nkumbi wakusowa munthu toera kuugumanya,
Mʼbodzi na mʼbodzi anabwerera kuna mbumba yace;
Mʼbodzi na mʼbodzi anathawa mbaenda ku dziko yace.+
15 Ule anafuna kugumanwa anadzalaswa,
Pontho ule anafuna kuphatwa anadzaphiwa na supada.+
16 Anawo anadzagwandwa-gwandwa iwo mbakaona,+
Nyumba zawo zinadzakwatwa,
Pontho akazawo anadzapitwa mʼmabonde mwakukakamizwa.
17 Ine ndinadzacitisa kuti Amedhi aasandukire,+
Akuti asaona parata ninga yakusowa basa,
Pontho akuti nkhabe komerwa na ouro.
18 Mauta awo anagwanda-gwanda aphale;+
Iwo nee anabvera ntsisi misapo ya mimba zawo,
Pontho iwo nee anabvera ntsisi anangʼono.
19 Bhabhilonya wakuti ndi mbiri ya maumambo,+
Nzinda wakubalika unacitisa Akaldheya kudzikuza,+
Unadzakhala ninga Sodhoma na Gomora pidafudzwa iyo na Mulungu.+
20 MʼBhabhilonya nee munadzakhalabve anthu,
Nkhabe munthu anafuna kukhala pontho mu nzinda unoyu, kwenda na kwenda.+
Anthu a ku Arabhya nkhabe kudzamanga nsasa mu nzinda unoyu,
Pontho akumbizi nkhabe kudzaendesa mikumbi yawo mwenemo toera ikapume.
21 Pinyama pya nʼthando pinadzagona mwenemo;
Mʼmanyumba mwawo munadzala na madzidzi.
Mbalame zinacemerwa avestruji zinadzakhala mwenemo,+
Pontho mbuzi za ntsanga* zinadzanumpha-numpha mwenemo.
22 Nʼnyumba zace za ndzulu munadzalira pinyama pyakuti pisalira mwakugaluza kakamwe,
Pontho anambwa a ntsanga anadzalira nʼnyumba zakubalika za amambo.
Ndzidzi wa Bhabhilonya uli dhuzi, pontho ntsiku zace nkhabe kudzathimizirwa.”+
14 Yahova anadzabvera ntsisi Yakobe,+ iye anadzasankhula pontho Izraeli.+ Iye anadzaakhazikisa mu dziko yawo,+ pontho anthu a madziko anango anadzagumanyikana na iwo mbaphatana na dzindza ya Yakobe.+ 2 Anthu a madzindza anango anadzakwata Aizraeli mbabwerera nawo kwawo, pontho dzindza ya Izraeli inadzakwata anthu anewa mbakhala anyabasa awo amuna na akazi+ mu dziko ya Yahova; Aizraeli anadzacitisa ale adaakwata ninga mabitcu kukhala mabitcu awo, pontho iwo anadzatonga ale akhaaphatisa basa mwakukakamiza.
3 Pa ntsiku inafuna kukupulumusani Yahova mu nyatwa zanu, mu pinthu pinakudzudzumisani na basa yakuwanga ikhaphatiswa imwe ku ubitcu,+ 4 imwe munadzalonga nsangani uyu kuna* mambo wa ku Bhabhilonya:
“Ule akhakakamiza anango toera kuphata basa asiya kucita pyenepi!
Kupondererana kwamala!+
5 Yahova akhumula ntcamu wa nyakucita pyakuipa,
Akhumula ndodo ya atongi,+
6 Iye afudza ule wakuti ndzidzi onsene akhamenya mbumba mwakuipirwa na mitcamu,+
Ule wakuti mwakuipirwa akhakunda madzindza, mbaatcinga ndzidzi onsene.+
7 Cincino dziko yonsene yapantsi yapuma, nkhabebve cakudzudzumisa.
Anthu akukhuwa mwakutsandzaya.+
8 Ngakhale miti ya junipero na miti ya sedhro ya ku Libhano,
Yatsandzaya thangwi ya pidakucitikira.
Iyo isalonga: ‘Bulukira pa ntsiku idagwa iwe,
Nkhabepo nyakutema miti adabwera kudzatigwisa.’
9 Ngakhale Nthumbi* pantsi kakamwe, yadzudzumika
Toera kukutambira mu ndzidzi ukhabwera iwe.
Thangwi ya iwe, iyo yalamusa anthu akufa,
Yalamusa atsogoleri* onsene anaponderera anthu pa dziko yapantsi.
Yacitisa amambo onsene a madzindza anango kulamuka mʼmipando yawo yaumambo.
10 Iwo onsene asalonga:
‘Wakhalambo wakusowa mphambvu ninga ife?
Wadzakhala ninga ife?
11 Kudzikuza kwako na nyimbo zikhaimbirwa iwe
Mpfunye zamwazika pantsi pako ninga talimba,
Pontho cakufinika cako ndi unyoka.’
12 Wagwa kubulukira kudzulu,
Iwe wakuyetimira, mwana wa mʼbambakuca!
Iwe wagwiswa pa dziko yapantsi,
Iwe wakuti ukhakunda madzindza!+
13 Iwe walonga muntima mwako: ‘Ine ndinadzakwira kudzulu.+
Ndinadzakwiza mpando wanga waumambo+ padzulu pa nyenyezi za Mulungu,
Pontho ndinadzakhala nawa paphiri ya nsonkhano,
Mbuto zakutali kakamwe za kunkwiriro.+
14 Ndinadzaenda kudzulu kakamwe kwa mitambo;
Ndinacitisika kukhala ninga Wakudzulu Kakamwe.’
15 Mʼmbuto mwa pyenepi, iwe unadzaponywa Munthumbi,*
Nʼdjenje yakuzika kakamwe.
16 Ale anafuna kukuona anadzakuyangʼana mwakudzumatirwa;
Iwo anadzakuyangʼana mwadidi mbalonga:
‘Kodi ndi uyu mamuna akhatekenyesa dziko yapantsi,
Ule akhacitisa maumambo kutetemera,+
17 Ule adacitisa dziko kukhala ninga thando
Mbafudza mizinda,+
Ule wakuti akakhonda kusudzula anyakaidi ace toera abwerere kunyumba?’+
18 Amambo anango onsene a madzindza,
Inde, onsene, aikhwa munthumbi munjira yakulemedzeka,
Mʼbodzi na mʼbodzi munthumbi* yace.
19 Mbwenye iwe waponywa kunja mbukhonda kuikhwa munthumbi,
Ninga nthawi yakusowa basa;
Manungo ako aphimbirwa na anthu akufa akuti aphiwa na supada,
Akuti asaponywa nʼdjenje ya miyala,
Ninga manungo akufa akuti amala pondwa-pondwa.
20 Iwe nee unakhala pabodzi na iwo munthumbi,
Thangwi iwe wafudza dziko yako,
Wapha mbumba yako.
Madzina a dzindza ya anyakucita pyakuipa nee anadzalongwabve.
21 Sasanyani mbuto toera kuphera anace
Thangwi ya mulando wa ambuyawo,
Toera iwo akhonde kulamuka mbakwata dziko yapantsi,
Pontho toera akhonde kuidzadza na mizinda yawo.”
22 “Ine ndinadzacita pinthu kuna iwo,”+ alonga Yahova wa anyankhondo.
“Pontho mʼBhabhilonya ndinadzafudza dzina yace, ya ale adasalikira, dzindza yace na anafuna kukhala patsogolo pace,”+ alonga Yahova.
23 Yahova wa anyankhondo alonga: “Ndinadzacitisa Bhabhilonya kukhala mbuto ya nungu na ya matope, pontho ndinadzampswaira na mpswairo wakufudza nawo.”+
24 Yahova wa anyankhondo adumbira:
“Pinthu pinadzacitika ninga munapifunira ine,
Pontho pinthu pidatonga ine toera kucita, pinadzakwanirisika.
25 Ndinadzanyedza mu dziko yanga munthu wa ku Asirya,
Pontho ndinadzamponda-ponda mʼmapiri anga.+
Ine ndinadzabulusa goli yace kuna mbumba yanga,
Pontho ndinadzabulusa ntolo wace mʼmapewa mwawo.”+
26 Pyenepi ndipyo pidatonga iye kucita pa dziko yonsene yapantsi,
Pontho ineyi ndi djanja idafuthula iye toera kufudza madzindza onsene.
27 Nakuti adatonga kucita pyenepi ndi Yahova wa anyankhondo,
Mbani anafuna kupicimwanisa?+
Iye afuthula djanja yace,
Mbani anafuna kuifunya?+
28 Mu caka cidafa Mambo Ahazi,+ Mulungu atumiza mphangwa izi:
29 “Filistiya, nee mʼbodzi wa iwe asafunika kukhala wakutsandzaya,
Basi ene thangwi ntcamu wa ule akhakumenya wakhumulwa.
Thangwi pa ntcitci wa nyoka+ panadzabuluka nyoka yakugopswa,+
Pontho mwanace anadzakhala nyoka ya venenu.
30 Ana a anthu akucepeseka anadzadya mbakhuta,
Pontho ana a anyakutcerenga anadzagona mwakutsidzikizika,
Mbwenye ine ndinadzapha mbumba yako na njala,
Pontho ale anafuna kusala pakati panu anadzaphiwa.+
31 Imwe anthu a pansuwo ukulu, tsukwalani! Imwe anthu a mu nzinda, khuwani!
Iwe Filistiya, anthu ako onsene anadzasowa cidikhiro!
Thangwi ukubwera nsoka ukulu wa anyankhondo bulukira kunkwiriro,
Iwo akhala ninga utci, pontho nee nyankhondo mʼbodzi asabuluka pa mbuto yace.”
32 Iwo anatawira tani anthu a madzindza anango adabweresa mphangwa?
Iwo anadzaatawira kuti Yahova aikha miyala yakutoma ya Sioni,+
Pontho kuti anthu akucepeseka a mbumba yace anadzathawira mwenemu.
15 Mafala analonga pya kutongwa kwa Moabhe:+
Nakuti wafudzwa namasiku mabodzi basi,
Ari+ wa ku Moabhe amatamiswa.
Nakuti wafudzwa pa ntsiku ibodzi namasiku,
Kiri+ wa ku Moabhe amatamiswa.
2 Anthu akwira kuenda ku Templo na ku Dhibhoni,+
Aenda kalira ku mbuto za padzulu.
Moabhe atsukwala thangwi ya Nebho+ na Medhebha.+
Iwo acinga mpala mʼmisolo mwawo,+ pontho apala ndebvu zawo zonsene.+
3 Mʼmiseu yace, anthu abvala masakha.
Mʼmbuto zawo zapakweca na padzulu panyumba zawo, anthu asadungunya;
Iwo asatcita mbakalira.+
Na thangwi ineyi anyankhondo a Moabhe akukhuwa.
Anthu ali kugopa kakamwe.
5 Ine ndiri kulira thangwi ya Moabhe.
Anthu ace athawira ku Zoari+ na ku Egilati-Selisiya.+
Iwo akwira nthunda ya Luiti uku mbakalira;
Pikhaenda iwo ku Oronaimu akhalira thangwi ya nyatwa.+
6 Madzi a Nimirimu amala kuuma;
Tsanga iwisi yamala kuuma,
Tsanga yonsene yamala, nkhabe idasala iwisi.
7 Na thangwi ineyi, iwo akukwata pinthu pyawo pidasala na mpfuma zawo;
8 Nʼkhuwo wabveka mucisa consene ca Moabhe.+
Kulira kwawo kwabveka mpaka ku Egilaimu;
Kulira kwawo kwabveka mpaka ku Bheeri-Elimu.
9 Thangwi madzi a ku Dhimoni adzala na ciropa,
Pontho Mulungu ali na cinthu cinango cinafuna iye kucita kuna Dhimoni:
Nkhalamu toera kupha ale anafuna kuthawa ku Moabhe,
Pontho toera kupha ale anafuna kusala mu dziko yawo.+
16 Kwatani bira ku Sela toera muitumize kuna ntongi wa dziko,
Pitani na nʼthando
Mpaka kuphiri ya nzinda wa Sioni.
2 Ana akazi a Moabhe anadzakhala ninga mbalame yakuti yathamangiswa mu ntsandza yace,+
Pa mbuto yakupandirira gowa ya Arnoni.+
3 “Perekani uphungu, citani pidalongwa.
Namasikati citisani kuti nʼthundzi wanu ukhale ninga cidima camasiku.
Bisani anthu adabalalika, pontho lekani kupereka anthu adathawa.
4 Iwe Moabhe, anthu anga adamala kubalalika mbakhale mu dziko mwako.
Dziko yako mbikhale mbuto yakubisalira kuna iwo thangwi ya nyakufudza.+
Nyakuaponderera anadzaphiwa,
Kufudzwa kunadzamala,
Pontho ale anaponda-ponda andzawo anadzazambazika pa dziko yapantsi.
5 Penepo mambo wa dzindza ya Dhavidhi anadzakhala pa mpando waumambo.
Utongi wace unadzakhala wakutsidzikizika thangwi ya ufuni wakukhonda mala;+
Iye anadzatonga mwadidi, pontho nee anadzadembuka kucita ulungami.”+
6 Ife tabva pya kudzikuza kwa Moabhe, iye ndi wakudzikuza kakamwe.+
Ife tabva pya kugaya kwace, kudzikuza kwace na ukali wace;+
Mbwenye mafalace akusowa basa nee anadzakwanirisika.
7 Moabhe anadzalira thangwi ya pinafuna kuncitikira;
Iwo onsene anadzalira.+
Ale adamenywa anadzalirira mikate ya mauva akuuma ya ku Kiri-Arezeti.+
8 Minda ya mauva ya ku Esibhoni+ yamala kuuma,
Pontho muti wa mauva wa Sibhima+ wauma;
Atongi a madzindza anango aponda-ponda nthawi zace zakudzala na mauva akufuira;
Nthawi zenezi zikhafika mpaka ku Yazeri;+
Zikhadafikambo mpaka nʼthando.
Nthawi zace zipswa zikhadamwazika mpaka kufika ku bara.
9 Na thangwi ineyi, ine ndinadzalira muti wa mauva wa Sibhima ninga munalira ine Yazeri.
Iwe Esibhoni na Eleale,+ ine ndinakutotesani na misozi yanga,
Thangwi kwamala kukhuwa mwakutsandzaya kwa anyakubvuna na kwa anyakugumanya misapo ya ndzidzi wa malimwe.*
10 Kukomerwa na kutsandzaya pyabuluswa mʼmunda wa misapo,
Mʼminda ya mauva nee musabvekabve nyimbo zinaimbwa thangwi yakutsandzaya na kukhuwa thangwi yakukomerwa.+
Mbuto zakukamulira mauva nee zikhalibve na anthu toera kukamula mauva,
Thangwi ine ndacitisa kuti kukhuwa mwakukomerwa kumale.+
11 Pyenepi ndipyo pinandicitisa kutetemera muntima mwanga thangwi ya Moabhe,+
Ninga kutetemera kwa nkhambala za arpa,
Pontho mʼmimba mwanga mwanyunguluka thangwi ya Kiri-Arezeti.+
12 Maseze Moabhe asiye kuenda pa mbuto za padzulu thangwi ya kuneta mbaenda kacita phembero mu templo yace, nkhabe cinafuna kukwanisa iye.+
13 Anewa ndi mafala adalonga Yahova thangwi ya Moabhe. 14 Mbwenye cincino Yahova alonga: “Nkati mwa pyaka pitatu, ninga pyaka pya nyaganyo,* mbiri ya Moabhe inadzamala thangwi ya uviyaviya ukulu, pontho anthu anafuna kusala anadzakhala akucepa na akusowa mphambvu.”+
17 Mafala analonga pya kutongwa kwa Dhamasku:+
“Onani! Nzinda wa Dhamasku nee unadzakhalapobve,
Mbwenye unadzakhala nkuku wa madembe.+
2 Mizinda ya ku Aroeri+ inadzakhala yakusowa anthu;
Inadzakhala mbuto inafuna kugona pinyama,
Nkhabe anafuna kudzapigopesa.
3 Mizinda ya mipanda yakuwanga nee inadzaonekabve mu Efraimu,+
Pontho mu Dhamasku nee munadzaonekabve umambo;+
Anthu a ku Sirya anafuna kusala,
Anadzacitikirwa ninga pidacitikira mbiri ya Aizraeli,”* adalonga ndi Yahova wa anyankhondo.
4 “Pa ntsiku ineyi mbiri ya Yakobe inadzapunguka,
Pontho kukhuma kwace kunadzamala.*
5 Yakobe anadzakhala ninga anyakubvuna anagumanya tirigu mʼmunda,
Pontho djanja yace inadzabvuna ndzeti za tirigu
Ninga munthu anaphalakatira tirigu nʼGowa ya Refaimu.+
6 Basi ene zinafuna kusala ndi mphendzi toera kuphalakatira,
Ninga pinacitika na muti wa mulivera ungagubudzwa:
Basi ene misapo miwiri peno mitatu yakutokota ya muti wa mulivera ndiyo inafuna kusala kuntsonga kwa nthawi yakulapha,
Nthawi zace zakubala misapo basi ene zinabala misapo minai peno mixanu,”+ adalonga ndi Yahova Mulungu wa Izraeli.
7 Pa ntsiku ineyi, munthu anadzasaka ciphedzo ca Ule adancita, pontho iye anadzanyindira Wakucena wa Izraeli. 8 Iye nee anadzanyindira maguwa a ntsembe,+ basa ya manja ace,+ pontho nee anadzanyindira pinthu pidacita iye na manja ace, nee miti inalambirwa* peno maguwa anaperekerwa insenso.
9 Pa ntsiku ineyi, mizinda yawo yakutsidzikizika inadzakhala ninga mbuto yakuti nkhabe kukhaliwabve mu nsitu,+
Ninga nthawi idasiyiwa yokha thangwi ya Aizraeli;
Iyo inadzakhala madembe.
Na thangwi ineyi, iwe walima munda wa maluwa akubalika*
Mbutceka nthawi zitete zidabuluka mʼmadziko anango.*
11 Namasikati unadzaikha mpanda toera kutsidzikiza mbeu zidabzwala iwe,
Namacibese unazicitisa kuti ziphukire,
Mbwenye pinafuna kubvunwa pinazambazika pa ntsiku ya utenda na yakubva kupha kukulu.+
12 Bveserani! Madzindza mazinji akucita uviyaviya,
Iwo abvunduka ninga madzi a mʼbara!
Madzindza ali piningu-piningu,
Kukhuwa kwawo ndi ninga kutitima kwa madzi amphambvu!
13 Kukhuwa kwa madzindza kunabveka ninga kutitima kwa madzi amphambvu.
Mulungu anadzaasandika, pontho iwo anathawa mbaenda kutali,
Iwo anadzabalaliswa ninga maudzu anamburuswa na mphepo mʼmapiri,
Ninga miti yakuuma inamburuswa na condzi.
14 Mu ndzidzi unadoka dzuwa, kusagopswa.
Kunja mbakudzati kuca anyamalwa asazambazika.
Pyenepi ndipyo pinafuna kucitikira ale anatapata pinthu pyathu,
Pontho ndipyo pinafuna kucitikira ale anakwata pinthu pyathu.
18 Dzedze kuna dziko yakuti kutitima kwa nthete za dziko ineyi kusabveka kakamwe,
Dziko yakuti iri dhuzi na mikulo ya ku Etiopya!+
2 Dziko ineyi isatuma anthu mbawambuka bara,
Na miyadiya yakucitwa na papiro, mbalonga:
“Ndokoni, imwe anyakupereka mphangwa akuti musathamanga kakamwe,
Kuna dzindza ya anthu akulapha, pontho akuti khanda yawo ndi yakuzwerera,
Kuna anthu akuti asagopiwa mʼmbuto zonsene,+
Dzindza yamphambvu, yakuti isakwanisa kukunda,
Yakuti dziko yawo yakwekwetwa* na madzi a mʼmikulo.”
3 Imwe monsene akuti ndimwe a pa dziko yapantsi na imwe munakhala mwenemo,
Pinafuna imwe kuona pinakhala cidzindikiro* cinafuna kulamuswa mʼmapiri,
Pontho munadzabva kulira ninga kulira kwa nyanga.
4 Yahova andipanga tenepa:
“Ine nee ndinadzudzumika, pontho ndinayangʼana pa mbuto idakhazikiswa ine,
Ninga kupisa kwa dzuwa namasikati,
Ninga bume ya ndzidzi wakubvuna wakuti ndi wakupisa.
5 Thangwi mbudzati kufika ndzidzi wakubvuna,
Mu ndzidzi wakuti maluwa amala kugaka, pontho mauva amala kutokota,
Nthawi zitete zinagwandwa na pyakusadza napyo,
Pontho matsandzo anadzagwandwa mbabuluswa.
6 Iwo onsene anadzasiyiwa kuna mbalame zinadya nyama za mʼmapiri,
Pontho kuna pinyama pya ntsanga pya pa dziko yapantsi.
Mu ndzidzi wa malimwe iwo anadzadyiwa na mbalame zinadya nyama,
Pontho mu ndzidzi wakubvuna iwo anadzadyiwa na pinyama pyonsene pya ntsanga.
7 Mu ndzidzi unoyu, dzindza ya anthu akulapha, pontho akuti khanda yawo ndi yakuzwerera,
Anthu akuti asagopiwa mʼmbuto zonsene,
Dzindza yamphambvu, yakuti isakwanisa kukunda,*
Yakuti dziko yawo yakwekwetwa* na madzi a mʼmikulo,
Inadzabweresa muoni kuna Yahova wa anyankhondo
Pa mbuto inacemerwa na dzina ya Yahova wa anyankhondo, Phiri ya Sioni.”+
19 Mafala analonga pya kutongwa kwa Ejitu:+
Onani! Yahova ali mʼmakole akuthamanga kakamwe, pontho ali kuenda ku Ejitu.
Alungu akusowa basa a ku Ejitu anadzatetemera pamaso pace,+
Pontho mitima ya Aejitu inadzagopa kakamwe.
2 “Ine ndinadzacitisa Aejitu kusandukira Aejitu andzawo,
Pontho iwo anadzamenyana unango na ndzace,
Mʼbodzi na mʼbodzi anadzamenyana na mʼbale wace, pontho na ndzace anakhala na iye dhuzi,
Nzinda unadzamenyana na nzinda unango, umambo na umambo unango.
3 Aejitu anadzasowa cakucita,
Pontho ine ndinadzapingiza masasanyiro awo.+
Iwo anadzasaka ciphedzo kuna alungu akusowa basa,
Kuna anyakuombedza, kuna analonga na mizimu na kuna anyakulotera.+
4 Ine ndinadzapereka Ejitu mʼmanja mwa mbuya wakunentsa,
Pontho mambo wakusowa ntsisi ndiye anafuna kuatonga,”+ adalonga ndi Mbuya wandimomwene, Yahova wa anyankhondo.
5 Madzi a mʼbara anadzauma,
Pontho nkulo unadzapwa mbuuma.+
6 Mikulo inadzanunkha kakamwe;
Mikulo mingʼono inabuluka mu nkulo wa Nilo inadzapwa mbiuma.
Mitete na mabande pinadzabunyala.+
7 Miti iri nʼkhundu mwa Nkulo wa Nilo, panagumana nkulo wa Nilo na bara,
Na pinthu pyonsene pidabzwalwa nʼkhundu mwa Nilo+ pinadzauma.+
Pyonsene pinadzakwatwa na mphepo, pontho nee pinadzaonekabve.
8 Asodzi a mʼmadzi anadzalira,
Ale anaponya pimedzo mu nkulo wa Nilo anadzatsukwala,
Pontho anafuna kudzateya malitcera mʼmadzi anewa anadzakhala akucepa.
9 Ale anaphatisira linyu toera kucita nguwo,+
Pontho ale analuka nguwo zakucena anadzapaswa manyadzo.
10 Ndzeru za anyakuluka a ku Ejitu zinadzabalalika;
Onsene anacita ganyo-ganyo anadzatsukwala.
11 Atsogoleri a ku Zoani+ ndi akusowa ndzeru.
Anyakupereka uphungu a Farau akuti ndi audziwisi kakamwe asapereka uphungu wakusowa basa.+
Kodi imwe munakwanisa tani kulonga kuna Farau:
“Ine ndine wa dzindza ya anthu audziwisi,
Dzindza ya amambo akale”?
12 Mphapo ali kupi anthu ako audziwisi?+
Khala iwo asapidziwa mbakupange pidatonga Yahova wa anyankhondo toera kucitira Aejitu.
13 Atsogoleri a ku Zoani acita pinthu mwaudzemwa;
Atsogoleri a ku Nofi*+ anyengezwa;
Atongi a madzindza a ku Ejitu acitisa kuti dzindza ineyi itayike.
14 Yahova acitisa uviyaviya mu Ejitu;+
Atsogoleri ace acitisa Ejitu kundzendza-ndzendza mu pyonsene pinacita iye,
Ninga nyakuledzera anabulumunda pa matapiko ace.
15 Pontho nkhabe cinthu cakuti Ejitu anakwanisa kucicita,
Nkhabe cinthu cakuti nsolo, ncira, nthawi zitete peno mabande anakwanisa kucita.
16 Pa ntsiku ineyi Aejitu anadzakhala ninga akazi, iwo anadzagopa mbatetemera thangwi ya djanja yakugopswa idaalamusira Yahova wa anyankhondo.+ 17 Pontho Aejitu anadzagopa kakamwe dziko ya Yuda. Iwo anadzagopa kakamwe angabva pya dziko ineyi, thangwi ya pidatonga kucita Yahova wa anyankhondo kuna iwo.+
18 Pa ntsiku ineyi, munadzaoneka mizinda mixanu mu dziko ya Ejitu, yakuti inadzalonga cilongero ca ku Kanani,+ pontho inadumbira toera kukhala yakukhulupirika kuna Yahova wa anyankhondo. Nzinda ubodzi unadzacemerwa Nzinda Wakufudza.
19 Pa ntsiku ineyi, pakati pa dziko ya Ejitu panadzakhala guwa ya ntsembe ya Yahova, pontho mʼmadire munadzakhala nzati wa Yahova. 20 Pyenepi pinadzakhala pidzindikiro, pontho pinadzacitira umboni Yahova wa anyankhondo mu dziko ya Ejitu; iwo analirira Yahova thangwi ya ale anaaponderera, pontho iye anaatumizira mpulumusi wankulu toera kuapulumusa. 21 Yahova anadzapangizika kuna Aejitu, pontho Aejitu anadzadziwa Yahova pa ntsiku ineyi; iwo anadzapereka ntsembe na miyoni, pontho anadzacita pikiro kuna Yahova mbaikwanirisa. 22 Yahova anadzatcunyusa Ejitu,+ anadzantcunyusa mbamuwangisa; iwo anadzabwerera kuna Yahova, pontho iye anadzabva kudembetera kwawo mbaawangisa.
23 Pa ntsiku ineyi, panadzakhala nseu+ wakubuluka ku Ejitu mpaka ku Asirya. Natenepa anthu a ku Asirya anadzaenda ku Ejitu, pontho anthu a ku Ejitu anadzaenda ku Asirya; Aejitu anadzatumikira Mulungu pabodzi na anthu a ku Asirya. 24 Pa ntsiku ineyi, Izraeli anadzacita khundu ya Ejitu na Asirya;+ ineyi inadzakhala nkhombo pakati pa dziko, 25 thangwi Yahova wa anyankhondo anadzaapasa nkhombo mbalonga: “Mbipaswe nkhombo mbumba yanga Ejitu, Asirya basa ya manja anga na Izraeli unthaka wanga.”+
20 Mu caka cakuti Mambo Sarigoni wa ku Asirya atuma Tartani* toera aende ku Asidhodhe,+ iye amenyana na nzinda wa Asidhodhe mbaukunda.+ 2 Mu ndzidzi unoyu, kubulukira kuna Izaiya+ mwana wa Amoji, Yahova alonga: “Ndoko ukadule sakha iri ncunu mwako, pontho ndoko ukadule masandalya ako.” Iye acita pyenepi, mbafamba cipezipezi na wakusowa masandalya.
3 Buluka penepo Yahova alonga: “Ninga pidacitika kuna ntumiki wanga Izaiya wakuti afamba cipezipezi na wakusowa masandalya mu pyaka pitatu ninga cidzindikiro,+ pontho ninga cenjezo ya pinafuna kucitika ku Ejitu+ na ku Etiopya,+ 4 munjira ibodzi ene, mambo wa ku Asirya anadzatsogolera ale adakwatwa ku Ejitu+ na ku Etiopya toera kuendeswa ku ubitcu cipezipezi na akusowa masandalya, aphale na akulu ene anadzafamba matako panja toera kupasa manyadzo Ejitu. 5 Pontho ale akhanyindira Etiopya na ale akhadzikuza thangwi ya* Ejitu anadzagopa mbapaswa manyadzo. 6 Pa ntsiku ineyi, ale anakhala nʼkhundu mwa gombe anadzalonga: ‘Yangʼanani pidacitikira ule akhanyindira ife, ule akhanyindira ife kuti anatiphedza mbatipulumusa kuna mambo wa ku Asirya! Mphapo tinacitanji cincino toera tipulumuke?’”
21 Mafala analonga pya kutongwa kwa thando yakuti ndi ninga bara:*+
Ninga condzi cakufudza cinabuluka kunterero, nyatwa ikufika,
Kubulukira nʼthando, kubulukira mu dziko yakugopswa.+
2 Ine ndaoneswa masomphenya akugopswa:
Munthu waciphamaso mbakacita pinthu mwaciphamaso,
Pontho munthu wakufudza mbakafudza.
Iwe Elami, ndoko! Iwe Medhya,+ ndoko kazungulire nzinda!
Ine ndinadzamalisa nyatwa zonsene zidatomesa iye.+
3 Thangwi ya masomphenya anewa, ine ndiri kuthabuka kakamwe.*+
Ine ndiri kubva kupha kakamwe,
Ninga kubva kupha kunabva nkazi mu ndzidzi unabala iye.
Ine ndiri wakutsukwala kakamwe kwakuti nkhabe kwanisa kubva;
Ine ndiri wakudzudzumika kakamwe kwakuti nkhabe kwanisa kuona.
4 Ntima wanga ukupaluka; ndiri kutetemera thangwi yakugopa.
Kudoka kwa dzuwa kwakuti ndikhakudikhira kakamwe kusandicitisa kugopa.
5 Ikhani meza, pontho khunganyani mipando!
Dyani, pontho mwani!+
Imwe atsogoleri, lamukani, khwazani mafuta xango!
6 Yahova andipanga tenepa:
“Ndoko kaikhe nyakuonera toera alonge pinafuna ona iye.”
7 Iye aona ngolo ya nkhondo yakuti ikhakweyiwa na makavalo mawiri,
Aona ngolo ya nkhondo yakuti ikhakweyiwa na maburu,
Aona ngolo ya nkhondo yakuti ikhakweyiwa na makamelo.
Iye aonesesa mwadidi kakamwe.
8 Buluka penepo, iye akhuwa ninga nkhalamu:
“Yahova, namasikati onsene ine ndisakhala dzololo pa mbuto yakuonera,
Pontho namasiku onsene ndisaphata basa pa mbuto yanga yakuonera.+
9 Onani cinabwera kule:
Anthu ali mu ngolo ya nkhondo yakuti ikukweyiwa na makavalo mawiri!”+
Penepo iye alonga:
“Agwa! Agwa Bhabhilonya!+
Madzimunthu onsene akusemwa a alungu ace amala gwandwa-gwandwa mbaponywa pantsi!”+
10 Imwe mbumba yanga yakuti yamala kububudwa,
Nsapo wa pa* mbuto yanga yakububudira pinthu,+
Ine ndakupangani mphangwa zidabva ine kuna Yahova wa anyankhondo, Mulungu wa Izraeli.
11 Mphangwa zinalonga pya kutongwa kwa Dhuma:*
Munthu akundicemera kubulukira ku Seiri:+
“Nyakuonera, wasala ndzidzi ungasi toera kunja kuce?
Nyakuonera, wasala ndzidzi ungasi toera kunja kuce?”
12 Nyakuonera atawira:
“Kunja kuli cifupi na kuca, pontho kwasala pangʼono toera kudoke.
Mungafuna kubvundzisa, bvundzani.
Bwerani ulendo unango!”
13 Mphangwa zinalonga pya kutongwa kwa thando:
Munadzagona mu nsitu wa nʼthando,
Imwe nsoka wa anthu a ku Dhedhani,+ anacita ulendo na makamelo.
14 Imwe anthu a ku dziko ya Tema,+
Bweresani madzi toera mupase anthu ali na nyota,
Pontho bweresani nkate toera kupasa ale anathawa.
15 Iwo athawa masupada, supada idabuluswa mʼbudu,
Athawa uta udamala kukungwa, pontho athawa kugopswa kwa nkhondo.
16 Yahova andipanga tenepa: “Mu caka cibodzi basi, ninga pyaka pya nyaganyo,* mbiri yonsene ya Kedhari+ inamala. 17 Anyamapswimo anafuna kusala pakati pa anyankhondo a Kedhari anadzakhala akucepa, thangwi adapilonga ndi Yahova Mulungu wa Izraeli.”
22 Mafala analonga pya kutongwa kwa Gowa ya Masomphenya:*+
Ninji pidacitika kuna iwe kuti mbumba yako yonsene ikwire ntsoi za nyumba?
2 Iwe ukhadadzala na uviyaviya,
Iwe ukhali nzinda wakunyangula, nzinda wakukomerwa kakamwe.
Anthu ako adamala kufa nee aphiwa na supada,
Pontho iwo nee afa kunkhondo.+
3 Atongi ako onsene akunentsa athawa pabodzi pene.+
Toera kuendeswa nkaidi iwo nee akungirwa uta.
Maseze akhadathawira kutali kakamwe,
Ale akhagumanwa, akhaphatwa mbaendeswa nkaidi.+
4 Na thangwi ineyi, ine ndalonga: “Lekani kundiyangʼana,
Ndinalira mwakutsukwala kakamwe.+
Lekani kundibalangaza
Thangwi yakufudzwa kwa mbumba yanga.+
5 Thangwi Mbuya Wankulu Kakamwe, Yahova wa anyankhondo;
Abweresa ntsiku ya uviyaviya, yakukundwa na yakugopswa;+
NʼGowa ya Masomphenya.
Kweneko alipo anagomola mpanda,+
Pontho kukhuwa kusabveka mpaka paphiri.
7 Magowa ako adidi kakamwe,
Anadzadzala na ngolo za nkhondo,
Pontho makavalo* anadzalimira pansuwo ukulu,
8 Mpanda wacitsidzikizo wa* Yuda unadzabuluswa.
“Pa ntsiku ineyi imwe munadzanyindira pida pya nkhondo pyakuti piri nʼNyumba ya mu Nsitu,+ 9 pontho imwe munadzaona minyandza mizinji ya Nzinda wa Dhavidhi.+ Imwe munadzaikha madzi mu thawala ya nʼgowa.+ 10 Imwe munadzalengesa nyumba za mu Yerusalemu, mbamugomola zinango toera kusasanyira nazo mpanda. 11 Pakati pa mipanda miwiri, imwe munadzasasanyapo mbuto toera kukoyera madzi a mu thawala yakale, mbwenye nee munadzanyindira Wankulu Kakamwe adacita pinthu pyenepi, pontho nee munadzanyerezera pya Ule adacita pyenepi kale kakamwe.
12 Pa ntsiku ineyi, Mbuya Wankulu Kakamwe, Yahova wa anyankhondo,
Anadzacemeresa anthu toera kulira na kutsukwala,+
Toera kucinga mipala na kubvala masakha.
13 Mbwenye mʼmbuto mwa pyenepi, iwo anadzacita maphwando mbatsandzaya,
Anadzapha ngʼombe na mabira,
Anadzadya nyama, mbamwa vinyu.+
Iwo anadzalonga: ‘Tendeni tidye mbatimwa, thangwi mangwana tinafa.’”+
14 Buluka penepo, Yahova wa anyankhondo andipanga tenepa: “‘Madodo anu nkhabe kudzalekererwa mpaka imwe mufe,’+ adalonga ndi Mbuya Wankulu Kakamwe, Yahova wa anyankhondo.”
15 Ipi ndi pidalonga Mbuya Wankulu Kakamwe, Yahova wa anyankhondo: “Ndoko kuna munthu uyu wa cidzo, Sebhina,+ wakuti asayangʼanira nyumba ya mambo mbumpanga: 16 ‘Ninji cinasaka iwe pano, pontho mbani adakutawirisa toera kukumba nthumbi yako pano?’ Iye akukumba nthumbi yace pa nthunda; akukumba nthumbi* yace pamwala. 17 ‘Ona! Yahova anadzakuphata mwamphambvu, mbakuponya pantsi mwaukali. 18 Mwandimomwene iye anadzakumanga mwamphambvu, mbakuponya ninga bhola mu dziko ikulu. Iwe unadzafera mwenemo, pontho ngolo zako zadidi kakamwe zinadzasala mwenemo, mbapikhala pinthu pyakupasa manyadzo nyumba ya mbuyako. 19 Ine ndinadzakusiyisa basa yako, pontho ndinadzabulusa cidzo ciri na iwe.
20 “‘Pa ntsiku ineyi ine ndinadzacemera ntumiki wanga Eliyakimu+ mwana wa Hilkiya, 21 ine ndinadzambvazika tunika yako, ndinadzakwata sintu yako mbandiimanga ncunu mwace,+ pontho utongi wako ndinadzaupereka mʼmanja mwace. Iye anadzakhala baba wa anthu anakhala mu Yerusalemu na dzindza ya Yuda. 22 Ine ndinadzaikha paphewa pace xavi ya dzindza ya Dhavidhi.+ Iye angafungula, nee mʼbodzi anafuna kwanisa kufunga; pontho iye angafunga, nee mʼbodzi anafuna kwanisa kufungula. 23 Ine ndinadzanʼkhomera ninga ntciri pa mbuto yakuwanga kakamwe, pontho iye anadzakhala mpando waumambo wadidi kakamwe wa mʼbanja ya babace. 24 Anthu anadzamanika pana iye pinthu pyonsene pyadidi kakamwe* pya mʼbanja ya babace: ana na dzindza, pyombo pyonsene pingʼono, pyombo pyonsene pyakuzika na nkhali zikulu.
25 Yahova wa anyankhondo alonga: “‘Pa ntsiku ineyi, ntciri idakhomerwa pa mbuto yakuwanga kakamwe inadzakhutciwa,+ inadzagwandwa mbigwiswa, pontho pinthu pyonsene pidamanikwa pa ntciri ineyi pinadzagwa mbapinyedzeka, thangwi adalonga pyenepi ndi Yahova.’”
23 Mafala analonga pya kutongwa kwa Tiro:+
Imwe mabote makulu a ku Tarsi, tsukwalani!+
Thangwi gombe yafudzwa, nkhabe kwanisikabve kutsama.
Iwo apangwa pyenepi ku dziko ya Kitimu.+
2 Matamani imwe anakhala nʼkhundu mwa gombe.
Imwe mwapfumiswa na anyamalonda a ku Sidhoni+ anawambuka bara.
3 Tirigu ya ku Siori*+ na pinthu pikhabvunwa ku Nilo,
Pikhakwatwa mbipiwambuswa na mʼmadzi mazinji. Tiro akhawina na pinthu pyenepi,
Pontho pyenepi pikhacitisa madzindza anango kuwina.+
4 Iwe Sidhoni mpanda wa bara, pasika manyadzo,
Thangwi bara yalonga:
“Ine nee ndabala, pontho nee ndabva kupha thangwi yakubala,
5 Anthu anadzatsukwala angabva mphangwa zinalonga pya Tiro,+
Ninga pidacitika mu ndzidzi udabva iwo mphangwa zinalonga pya Ejitu.+
6 Wambukani bara mbamuenda ku Tarsi!
Tsukwalani imwe anakhala nʼkhundu mwa gombe!
7 Kodi ndi unoyu nzinda wanu wakuti ukhali wakutsandzaya kutomera kale, kutomera mu ndzidzi wakale kakamwe?
Miyendo ya anthu anakhala mwenemu isaacitisa kuenda kakhala mʼmadziko akutali.
8 Mbani adatonga kubweresa pinthu pyenepi kuna Tiro,
Ule anakhazikisa amambo,
Wakuti anyamalonda ace ndi atsogoleri,
Wakuti anyamalonda ace akufamba-famba akhalemedzwa pa dziko yonsene?+
9 Adatonga kucita pyenepi ndi Yahova wa anyankhondo,
Toera kumalisa kugaya kukhacita iye thangwi ya kubalika kwace,
Toera kupasa manyadzo onsene ale akhalemedzwa pa dziko yonsene.+
10 Iwe mwana wankazi wa ku Tarsi, thimizira dziko yako ninga Nkulo wa Nilo.
Nkhabebve mbuto yakuikha mabote.*+
11 Iye afuthula djanja yace pa bara;
Iye atekenyesa maumambo.
Yahova apereka ntemo toera mpanda wacitsidzikizo wa Fenisya ufudzwe.+
12 Pontho iye alonga: “Iwe nee unadzatsandzayabve,+
Iwe mwali wakupondererwa wa ku Sidhoni.
Lamuka, wambuka bara mbuenda ku Kitimu.+
Ngakhale kweneko iwe nee unadzapulumuka.”
13 Onani dziko ya Akaldheya!+
Si Asirya+ tayu, mbwenye ndi mbumba iyi
Idacinja nzinda unoyu mbukhala mbuto ya pinyama pya nʼthando.
Iwo amanga nyumba zakumenyera nkhondo;
Iwo agomola nyumba zace za ndzulu zakukhala na mpanda wakuwanga,+
Mbaucitisa kukhala madembe.
14 Imwe mabote a ku Tarsi, tsukwalani,
Thangwi mpanda wanu wafudzwa.+
15 Pa ntsiku ineyi, Tiro anadzaduwaliwa mu pyaka 70,+ ninga pyaka pya utongi wa mambo mʼbodzi. Kunkhomo kwa pyaka 70, Tiro anadzacitikirwa ninga pinalongwa mu nyimbo ya puta:
16 “Iwe puta wakuduwaliwa, kwata arpa, mbuzungulira nzinda.
Imba mwadidi arpa yako;
Imba nyimbo zizinji,
Toera iwo akukumbuke.”
17 Kunkhomo kwa pyaka 70, Yahova anadzakumbuka Tiro. Iye anadzatoma pontho kulipwa mbacita uputa na maumambo onsene anagumanika pa dziko yapantsi. 18 Mbwenye pinafuna iye kulipwa na pinafuna iye kupaswa pinadzaperekwa ninga ntsembe yakucena kuna Yahova. Pinthu pyenepi nkhabe kudzagumanywa peno kukoyiwa, thangwi pinafuna iye kulipwa pinaperekwa kuna mbumba ya Yahova, toera adye mpaka kukhuta, pontho toera abvale nguwo zadidi kakamwe.+
24 Onani! Yahova akubulusa anthu onsene mu dziko ino,* pontho iyo ikukhala madembe.+
Iye anadzafudza dziko*+ mbabalalisa onsene anakhala mwenemu.+
2 Pinthu pyenepi pinadzacitika sawasawa kuna anthu onsene:
Kuna mbumba na kuna nyantsembe,
Kuna nyabasa wamamuna na kuna mbuyace,
Kuna nyabasa wankazi na kuna mbuyace wankazi,
Kuna nyakugula na kuna nyakugulisa,
Kuna nyakubwerekesa na kuna nyakubwereka,
Kuna nyakufiyarisi na kuna nyakufiyari.+
3 Mwakukhonda penula anthu onsene anadzabuluswa mu dziko ineyi;
Dziko yonsene inadzatapatwa,+
Thangwi adalonga mafala anewa ndi Yahova.
4 Dziko iri paciliro;*+ ikumala pangʼono-pangʼono.
Ndimu ya mataka ikumala; ikuzambazika.
Anthu akubvekera akumala pangʼono-pangʼono.
5 Dziko ineyi yapswipiswa na anthu anakhala mwenemu,+
Thangwi iwo asiya kubvera mwambo,+
Iwo acinja matongero,+
Pontho iwo apwaza cibverano cakuti cikhafunika kukhala kwenda na kwenda.*+
6 Na thangwi ineyi, dziko ino yadzala na dzedze,+
Pontho anthu anakhala mwenemu ali na mulando.
Natenepa, anthu anakhala mwenemu apunguka,
Pontho amuna adasala ndi akucepa kakamwe.+
8 Zamala nyimbo zakutsandzayisa zikhaimbwa na mapandero;
Kwamala kukhuwa kwa anthu akutsandzaya;
Zamala nyimbo zadidi zakuimbwa na arpa.+
9 Iwo nkhabebve nyimbo mu ndzidzi wakumwa vinyu,
Pontho pyakumwa pyakuledzeresa pisawawa kuna ale anapimwa.
10 Nzinda udasiyiwa okha wafudzika;+
Nyumba zonsene zamala kufungwa toera anthu akhonde kupitamo.
11 Anthu akulira mu nseu thangwi yakusowa vinyu.
Kutsandzaya konsene kwamala;
Kutsandzaya kwa dziko ineyi kwamala.+
12 Nzinda wasala madembe;
Nsuwo ukulu wafudzwa onsene.+
13 Mu dziko ineyi, pakati pa mbumba za anthu, mbumba yanga inadzakhala
Ninga misapo yakusala mʼmuti wa mulivera ungamala kugubudzwa,+
Ninga kuphalakatira kunacitwa pakumala kubvuna mauva.+
14 Iwo anadzakhuwa,
Anadzakhuwa mwakutsandzaya.
Kubulukira ku bara* iwo anadzalonga pya ukulu wa Yahova.+
15 Na thangwi ineyi, iwo anadzasimba Yahova kucisa ca kumabulukiro a dzuwa;+
Mu ntsuwa za mʼbara, iwo anadzasimba dzina ya Yahova Mulungu wa Izraeli.+
16 Kunkhomo kwa dziko tabva nyimbo:
Mbwenye ine ndalonga: “Ine ndiri kumala, ine ndiri kumala!
Dzedze kuna ine! Anyakusandukira andisandukira;
Anyakusandukira aphatisira uthambi toera kundisandukira.”+
17 Kugopa kakamwe, madjenje na misampha pisadikhira imwe anakhala mu dziko ineyi.+
18 Ule anafuna kuthawa dungu ya pinthu pyakugopswa anadzagwera nʼdjenje,
Ule anafuna kubuluka nʼdjenje anadzamangwa na nsampha.+
Misuwo ya madzi a kudzulu inadzafungulwa,
Pontho pantsi panadzatekenyeka.
20 Dziko ikudzedzereka ninga munthu wakuledzera,
Pontho ikumburuswa uku na uku ninga nsasa unamburuswa na mphepo.
Iyo yalemerwa kakamwe na madawo ayo,+
Pontho inadzagwa mbicimwana kulamuka pontho.
21 Pa ntsiku ineyi, Yahova anadzatonga anyankhondo akudzulu,
Pontho anadzatonga amambo a pa dziko yapantsi.
22 Iwo anadzagumanywa pabodzi pene
Ninga anyankaidi anaikhwa nʼdjenje,
Pontho anadzaikhwa nkaidi;
Pakupita ntsiku zizinji iwo anadzatcunyuswa.
23 Yahova wa anyankhondo adzakhala Mambo+ Paphiri ya Sioni+ na ku Yerusalemu,
Iye anadzatonga na cilemedzo consene pamaso pa atsogoleri a mbumba yace,*+
Mu utongi wace wakulemedzeka, ngakhale mwezi wakudzala unadzapangiza cidima.
Pontho dzuwa yakuyetimira inadzakhala ninga cidima.+
25 Yahova, imwe ndimwe Mulungu wanga.
Ine ndisakulemedzani, ndisasimba dzina yanu,
Thangwi imwe mwacita pinthu pyakudzumisa,+
Pinthu pyakuti mukhafuna kupicita kutomera kale kakamwe,+
Mwacita pidalonga imwe,+ mbamupangiza kuti ndimwe wakunyindirika.
2 Imwe mwacinja nzinda kudza nkuku wa miyala,
Nzinda wakutsidzikizwa mwadidi kudza madembe.
Nzinda wa anthu a dziko inango wasiya kukhala nzinda;
Iwo cipo unadzamangwa pontho.
3 Na thangwi ineyi, mbumba yamphambvu inadzakusimbani;
Nzinda wa madzindza anathabusa andzawo unadzakugopani.+
4 Imwe mwadzakhala mbuto yacitsidzikizo kuna munthu wakupwazika,
Mbuto yacitsidzikizo kuna nyakutcerenga angakhala pa nyatwa,+
Mbuto yakuthawira mu ndzidzi wa condzi ca madzi,
Pontho mwadzakhala nʼthundzi mu ndzidzi wakupisa.+
Ukali wa anthu anathabusa andzawo ungakhala ninga condzi ca madzi anamenya pfufu,* imwe munakhala mbuto yacitsidzikizo.
5 Ukali wawo ungakhala ninga kupisa mu dziko yakusowa madzi,
Imwe munadzamalisa kukhuwa kwa anthu a dziko inango.
Ninga nʼthundzi wa makole wakuti usapungula kupisa kwa dzuwa,
Nyimbo ya ale anathabusa andzawo inadzamatamiswa.
6 Paphiri ineyi,+ Yahova wa anyankhondo anadzacitira anthu onsene
Phwando ya pyakudya pyadidi,+
Phwando ya vinyu yadidi,*
Pyakudya pyadidi pyakudzala na mafuta a mʼmagogodo,
Vinyu yadidi, yakusungulwa.
7 Paphiri ineyi, iye anadzabulusa* nguwo idaphimbira anthu onsene,
Pontho nguwo idafinika madzindza onsene.
8 Iye anadzafudza* kufa kwenda na kwenda,+
Pontho Yahova Mbuya Wankulu Kakamwe, anadzapukuta misozi mʼmaso mwa anthu onsene.+
Iye anadzamalisa kupaswa manyadzo kunacitwa mbumba yace pa dziko yonsene yapantsi,
Adalonga pyenepi ndi Yahova.
9 Pa ntsiku ineyi iwo anadzalonga:
“Onani! Uyu ndi Mulungu wathu!+
Uyu ndi Yahova!
Cidikhiro cathu ciri kuna iye.
Tendeni tikomerwe mbatitsandzaya thangwi iye atipulumusa.”+
10 Thangwi djanja ya Yahova inadzapuma paphiri ineyi,+
Pontho Moabhe anadzapondwa-pondwa pa mbuto yace+
Ninga maudzu anapondwa-pondwa toera kucitisa mataka kukhala na ndimu.
11 Iye anadzafuthula djanja yace mbamenya Moabhe
Ninga pinacita nyakusambirira wakuti asamenya madzi na manja ace.
Iye anadzamalisa kudzikuza kwa nzinda unoyu,+
Pontho anadzaphatisira manja ace toera kuumenya mwaluso.
12 Iye anadzafudza nzinda wakutsidzikizwa mwadidi,
Pabodzi na mipanda yace yacitsidzikizo,
Pontho iye anadzaigwisa mbaiponya pantsi.
26 Pa ntsiku ineyi, mu dziko ya Yuda+ munadzaimbwa nyimbo iyi:+
“Ife tiri na nzinda wakuwanga.+
Iye aikha cipulumuso ninga mpanda, pontho ninga mbuto yakututirwa.+
2 Fungulani misuwo mikulu+ toera dzindza yakulungama ipite,
Dzindza yakuti iri na makhaliro adidi.
3 Imwe munadzatsidzikiza ale anakunyindirani na ntima onsene;*
Munadzaapasa ntendere wakukhonda mala,+
Thangwi iwo asakunyindirani.+
5 Thangwi iye acepesa ale anakhala padzulu, nzinda wapadzulu.
Iye autcitisa,
Iye augwisa mpaka pantsi;
Mbauponya pa pfumbi.
6 Nzinda unoyu unadzapondwa
Na miyendo ya anyakutcerenga, na manyalo a anthu akupwazika.”
7 Njira ya munthu wakulungama ndi yadidi.
Nakuti ndiwe wadidi,
Unadzasasanyira njira ya munthu wakulungama.
8 Yahova, mu ndzidzi unatowezera ife ulungami wanu,
Cidikhiro cathu cisakhala kuna imwe.
Ife tisalemedza kakamwe dzina yanu, pontho tisafuna kuti ikumbukirwe.*
9 Namasiku ndisakusakani na ntima wanga onsene,
Inde, ndisapitiriza kukusakani na ntima wanga onsene;+
Thangwi imwe mungatonga dziko yapantsi,
11 Yahova, imwe mwathukula djanja yanu, mbwenye iwo nee akuiona.+
Anadzaona phinga iri na imwe kuna mbumba yanu, mbapasika manyadzo.
Moto wanu unadzapisa anyamalwa anu.
12 Yahova, imwe munadzatipasa ntendere,+
Thangwi ndimwe anatipasa mphambvu
Toera kucita pyonsene pinacita ife.
13 Yahova Mulungu wathu, kusiyapo imwe ife tatongwa na ambuya anango,+
Mbwenye tisasimba dzina yanu basi.+
14 Iwo afa; iwo nee anakhala mʼmaso.
Iwo afa, iwo nee anadzalamukabve.+
Thangwi imwe mwatonga kuafudza
Toera anthu akhonde kuakumbukira pontho.
Imwe mwaikha kutali kakamwe madire onsene a dziko ino.+
16 Yahova, iwo asanyindira imwe mu ndzidzi wa nyatwa;
Pidaatcunyusa imwe, iwo acita phembero yakudembetera.+
17 Ninga nkazi wakuti ali na mimba asabva kupha pakubala,
Pontho asakhuwa thangwi yakubva kupha angasala pangʼono toera kubala,
Ifembo makhaliro athu ali tenepo thangwi ya imwe Yahova.
18 Ife tikhali na mimba, pontho tabva kupha pakubala,
Mbwenye pyakhala ninga tabala mphepo.
Ife nee takwanisa kupulumusa dziko,
Pontho nkhabe anabalwa toera akhale mu dziko ineyi.
19 “Anthu anu adafa anakhala pontho mʼmaso.
Manungo akufa* a mbumba yanga anadzakhala pontho mʼmaso.+
Lamukani, pontho khuwani mwakutsandzaya
Imwe munakhala mu pfumbi!+
Thangwi bume yanu yakhala ninga bume inabuluka namacibese,*
Pontho mataka anadzacitisa kuti ale adafa akhale pontho mʼmaso.
Bisalani mu ndzidzi wakucepa,
Mpaka kuipirwa kwa Mulungu kumale.+
21 Thangwi onani! Yahova akubwera bulukira pa mbuto yace
Toera kutonga anthu anakhala mu dziko ineyi thangwi ya pyakuipa pyawo,
Toera dziko ipangize pakweca ciropa cidawazika mwenemo,
Pontho toera ikhonde kuikha anthu ace adafa.”
27 Pa ntsiku ineyi, Yahova anadzaphatisira supada yace ikulu,+ yakuwanga na yakutwa,
Toera kupha Leviatani,* nyoka yakuthamanga kakamwe
Yakuti isafamba na pfufu ya mimba.
Iye anadzapha nyoka ikulu yakuti isakhala mʼbara.
2 Pa ntsiku ineyi muimbireni* nyimbo iyi:
“Munda wa mauva akuti asabuluka vinyu izinji!+
3 Ine Yahova ndisautsidzikiza.*+
Ndzidzi onsene ndisauthirira madzi.+
Ine ndisautsidzikiza masiku na masikati,
Toera munthu akhonde kuucita pyakuipa.+
4 Ine nee ndaipirwabve.+
Munthu angaikha minga peno nyakasongole pa njira inafuna kuenda na ine kunkhondo,
Ine ndinaiponda-ponda mbandiipisa yonsene na moto.
5 Mʼmbuto mwa pyenepi, iye mbathawire ku mbuto yanga yakutsidzikizika.
Iye mbandisake toera tikhazikise ntendere;
Mbakhazikise ntendere na ine.”
6 Ntsogolo, Yakobe anadzakhala na mitcitci,
Izraeli anadzaphukira mbabuluka maluwa,+
Pontho maluwa anewa anadzadza dziko na misapo.+
7 Kodi iye akhafunika kumenywa na ule anamʼmenya?
Thangwi yanji iye asafunika kuphiwa ninga munaphiwa anthu ace?
8 Iwe unadzakhuwa toera kunʼthusa mu ndzidzi unanʼthamangisa iwe.
Iye anadzanʼthamangisa na mphepo yace yamphambvu pa ntsiku ya mphepo yakumabulukiro a dzuwa.+
9 Munjira ineyi, madawo a Yakobe anadzaphimbirwa,+
Pontho madawo ace angabuluswa, iye anadzacita tenepa:
Anadzacitisa miyala yonsene ya paguwa ya ntsembe
Kukhala ninga miyala ya ntoto yakumala kupeyiwa,
Nee panadzasalabve mizati yakulambirwa,* pontho nee panadzasala maguwa a insenso.+
10 Nzinda wakuwanga unadzasala wakusowa pinthu;
Mbuto zakudyesera pinyama zinadzaduwaliwa mbazisala ninga thando.+
Anangʼombe anadzadya thongwe mbagona kweneko,
Pontho iwo anadzadya nthawi za miti.+
11 Nthawi zawo zingʼono zingauma,
Akazi anazikhumula mbazikwata
Toera kuenda kagasa nazo moto.
Thangwi mbumba iyi nkhabe kubvesesa pinthu.+
Na thangwi ineyi, Ule adaacita nee anadzaabvera ntsisi,
Pontho Ule adaaumba nee anadzaakomera ntima.+
12 Pa ntsiku ineyi, Yahova anadzagubudza misapo kutomera ku Nkulo* mpaka ku Gowa* ya Ejitu,+ pontho imwe mbumba ya Izraeli munadzagumanywa mʼbodzi na mʼbodzi.+ 13 Pa ntsiku ineyi, nyanga ikulu inadzalizwa,+ ale adasala pangʼono toera kuphiwa mu dziko ya Asirya+ na ale adabalalika mu dziko ya Ejitu+ anadzabwera mbagodamira Yahova ku Yerusalemu paphiri yakucena.+
28 Dzedze kuna nthimba* yakugaya ya anyakuledzera a ku Efraimu,+
Na mbiri yace yakubalika yakuti ikubunyala ninga maluwa,
Yakuti iri padzulu pa gowa ya ndimu ya ale adakundwa na vinyu!
2 Onani! Yahova anadzatuma munthu wakuwanga na wamphambvu.
Munthu unoyu anadzaponya nthimba ineyi pantsi,
Ninga madzi anabvumba na piphaliwali na matalala, madzi anabvumba na mphepo ikulu yakufudza,
Pontho iye anadzaiponya pantsi ninga yakwekwetwa na madzi akubvumba amphambvu.
3 Nthimba zakugaya za anyakuledzera a ku Efraimu,
Zinadzapondwa-pondwa.+
4 Maluwa akubunyala adabalikisa nthimba ineyi,
Akuti ali padzulu pa gowa ya ndimu,
Anadzakhala ninga masambvu akucimbiza kutokota malimwe mbadzati kufika.
Munthu angaaona, asaatcoda mbaameza mwakucimbiza.
5 Pa ntsiku ineyi, Yahova wa anyankhondo anadzakhala ninga nthimba, pontho ninga nkhata ya maluwa yakubalika kakamwe kuna anthu ace adasala.+ 6 Pontho Iye anadzacitisa anyakutonga miseru kutonga mwaulungami, anadzapasambo mphambvu ale anathamangisa anyamalwa pansuwo ukulu wa nzinda.+
7 Anyantsembe na aprofeta atayika thangwi ya vinyu;
Pyakumwa pyakuledzeresa pisaacitisa kudzedzereka.
Iwo asatayika thangwi ya pyakumwa pyakuledzeresa;
Vinyu isaamala ndzeru,
Pontho iwo asadzedzereka thangwi ya pyakumwa pyakuledzeresa;
Masomphenya awo asaacitisa kutayika,
Pontho iwo asadodomeka pakutonga miseru.+
8 Pontho meza zawo zadzala na matapiko,
Nkhabepo mbuto idasowa matapiko.
9 Mbani anafuna kupfundziswa,
Pontho mbani anafuna kufokotozerwa mphangwa?
Kodi ndi ale adalekeswa bere,
Akuti asiyiswa kwene cincino kuyamwa?
10 Thangwi ndzidzi onsene iye asalonga: “Ntemo na ntemo, ntemo na ntemo,
Matongero padzulu pa matongero, matongero padzulu pa matongero,*+
Pangʼono apa, pangʼono kule.”
11 Natenepa, toera kulonga na mbumba iyi, iye anaphatisira anthu akuti asamangika pakulonga,* na ale akuti asalonga cilongero ca dziko inango.+ 12 Iye akhadaapanga kale kuti: “Ino ndi mbuto toera kupuma. Ale adaneta mbapume; iyi ndi mbuto toera kupuma,” mbwenye iwo akhonda kubvera pyenepi.+ 13 Na thangwi ineyi, kwa iwo mafala a Yahova anadzabveka:
“Ntemo na ntemo, ntemo na ntemo,
Matongero padzulu pa matongero, matongero padzulu pa matongero,*+
Pangʼono apa, pangʼono kule,”
Toera mu ndzidzi unafamba iwo,
Agwegweduke mbagwa na madede,
Pontho aphekeke, amangike pa nsampha mbaphatwa.+
14 Natenepa, bveserani mafala a Yahova imwe anthu akugaya,
Imwe atongi a mbumba iyi, munakhala mu Yerusalemu,
15 Thangwi imwe musalonga:
Madzi angadzala kakamwe,
Nee anafika kuna ife,
Thangwi taphatisira uthambi ninga mbuto yathu yakuthawira,
Pontho ife tabisala mu uthambi.”+
16 Natenepa, Yahova Mbuya Wankulu Kakamwe alonga:
“Ine ndiri kuikha mu Sioni mwala wadidi kakamwe toera ukhale wapantsi,+
Mwala wakufunika kakamwe wapankhomo+ toera pantsi pakhale pakuwanga.+
Ule anakhulupira mwala unoyu nee anadzagopa.+
17 Ine ndinadzaphatisira ulungami ninga nkhambala yakupima nayo,+
Pontho ndinadzauphatisira ninga cinthu cakundendemeza naco.*+
Matalala anadzafudza mbuto yakuthawira yauthambi,
Pontho madzi anadzadzala pa mbuto idabisala imwe.
18 Cibverano cidacita imwe na Kufa cinadzafudzika,
Pontho cibverano cidacita imwe na Nthumbi* nee cinadzacitika.+
Madzi angadzala kakamwe,
Imwe munadzafudzwa nawo.
19 Mu ndzidzi onsene unadzala iwo,
Thangwi iwo anadzadzala ntsiku zonsene namacibese,
Namasikati, pontho namasiku.
Kugopa kunakucitisani toera kubvesesa mphangwa.”*
20 Talimba yabvira kakamwe, nkhabe kwana toera kugonapo,
Pontho cakufinika ndi cingʼono kakamwe, nkhabe kwana toera kufinika.
21 Yahova anadzalamuka ninga pidacita iye Paphiri ya Perazimu;
Iye anadzacita pinthu ninga pidacita iye nʼgowa, dhuzi na Jibheyoni,+
Toera acite cinthu cinafuna iye, cakuti cidzati kucitika,
Pontho toera aphate basa yace, basa yakuti cipo yacitwa kale.+
22 Cincino lekani kupwaza,+
Toera nkhambala zanu zikhonde kutimbiswa kakamwe,
Thangwi ine ndabva pidalonga Mbuya Wankulu Kakamwe, Yahova wa anyankhondo,
23 Fungulani makutu anu toera mubvesere fala yanga;
Bveserani mwadidi pinalonga ine.
24 Kodi nyakulima asaphatisira ndzidzi wace basi ene toera kulima nee kubzwala?
Kodi iye asapitiriza basi ene kutipula na kuikha mizera?+
25 Mataka onsene angamala kuzwerera,
Kodi iye nee asawazamo kumeni yakupswipa, pontho asabzwala kumeni ya ntundu unango?
Kodi nee asabzwala tirigu, mapira na sevadha mʼmbuto zace,
26 Mulungu asalanga munthu mwakubverana na pinthu pyadidi,
Pontho iye asampfundzisa.+
27 Kumeni yakupswipa nee isagubudzwa na cakububuda naco,+
Pontho roda ya ngolo nkhabe kutekenywa padzulu pa kumeni ya ntundu unango.
Mbwenye kumeni yakupswipa isagubudzwa na ndodo,
Pontho kumeni ya ntundu unango isagubudzwa na cimuti.
28 Mu ndzidzi wakububuda tirigu, kodi munthu asaipeya kudza ufa wakucita nawo nkate?
Nkhabe, iye nee asaipeya;+
Iye angafambisa ngolo yace yakububuda nayo, pabodzi na makavalo ace padzulu pa tirigu ineyi,
Iye nee asaipeya.+
29 Pyenepi pyabulukambo kuna Yahova wa anyankhondo,
Wakuti uphungu wace ndi wadidi* kakamwe,
29 “Dzedze kuna Ariyeli,* nzinda udakhala Dhavidhi!+
Pitiriza pyaka na pyaka;
Maphwando+ onsene mbapitirize kucitwa.
2 Mbwenye ine ndinadzabweresa nyatwa kuna Ariyeli,+
Pontho panadzaoneka kutsukwala na kulira;+
Iye anadzakhala ninga cakuikhira moto wa pa guwa ya ntsembe ya Mulungu.+
3 Ine ndinadzamanga misasa nʼkhundu mwako monsene toera kumenyana na iwe;
Ndinadzakuzungulira na mpanda wa miti yakusongoka,
Pontho ndinadzacita nthunda toera kumenyana na iwe.+
4 Iwe unadzagwiswa pantsi;
Unadzalonga bulukira pantsi,
Pontho pinafuna iwe kulonga nee pinadzabveka mwadidi thangwi ya pfumbi.
Fala yako inadzabveka pantsi+
Ninga fala ya munthu analonga na mizimu,
Mafala ako anadzabveka ninga aciwerewere pantsi pa mataka.
5 Mwinji wa anyamalwa* ako unadzakhala ninga pfumbi ifinu,+
Mwinji wa atongi ako ausumankha unadzakhala ninga mapwepwa akumburuswa na mphepo.+
Pyenepi pinadzacitika mwakututumusa, mwakukhonda dikhira.+
6 Yahova wa anyankhondo anabwera kudzakupulumusa.
Angacita pyenepi, panadzaoneka kudhima, piteketeke, kutitima kukulu,
Mphepo ikulu, condzi na malirimi a moto.”+
7 Buluka penepo, mwinji wa madzindza onsene unamenyana na Ariyeli,+
Onsene anamenyana na iye,
Ale anamanga nyumba za ndzulu toera kumenyana na iye
Na ale anamuonesa nyatwa,
Anadzakhala ninga ndoto, ninga masomphenya a masiku.
8 Inde, pinadzakhala ninga munthu wakuti ali na njala, mbalota kuti akudya,
Mbwenye asalamuka na njala;
Pinadzakhalambo ninga munthu wakuti ali na nyota mbalota kuti akumwa,
Mbwenye asalamuka wakuneta, pontho na nyota.
Pinadzacitikambo sawasawa kuna mwinji uyu wa madzindza onsene
Wakuti ukumenyana na Phiri ya Sioni.+
Iwo aledzera, mbwenye tayu na vinyu;
Iwo asadzedzereka, mbwenye tayu thangwi ya pyakumwa pyakuledzeresa.
10 Thangwi Yahova akupasani citulo cikulu kakamwe;+
Iye afunga maso anu, akuti ndi aprofeta,+
Pontho iye aphimbira misolo yanu, yakuti ndi anyakuona masomphenya.+
11 Kwa imwe, masomphenya onsene asakhala ninga mafala a mʼbukhu yakufungwa na cidzindikiro.+ Iwo angapasa munthu toera aaleri mbampanga: “Taphata miyendo, leri bukhu iyi mwakugaluza,” iye anadzatawira: “Nee ndinakwanisa kuileri, thangwi yafungwa na cidzindikiro.” 12 Iwo angapereka bukhu ineyi kuna munthu wakukhonda dziwa leri, mbalonga: “Taphata miyendo, leri bukhu iyi,” iye anadzatawira: “Ine nkhabe dziwa leri.”
13 Yahova alonga: “Anthu awa asafika kuna ine na milomo yawo,
Pontho asandilemedza na milomo yawo basi,+
Mbwenye mitima yawo iri kutali kakamwe na ine;
Iwo asandilambira mwakubverana na mitemo ya anthu, ire idapfundziswa iwo.+
14 Natenepa, Ine ndinadzacita pontho pinthu pyakugopswa kuna mbumba iyi,+
Ndinadzacita pirengo pizinji kuna iwo;
Ndinadzamalisa udziwisi wa anthu awo audziwisi,
Pontho ndzeru za anthu awo akucenjera zinadzamala.”+
15 Dzedze kuna ale anaenda kutali toera kubisira Yahova pinthu pinacita iwo.+
Iwo asacita pinthu pyawo pacidima
Mbalonga: “Mbani anationa?
Mbani anadziwa pinacita ife?”+
16 Imwe musacita pinthu mwakusiyana kakamwe!*
Kodi nyakuumba dongo asafunika kuoniwa sawasawa na dongo?+
Kodi cinthu cidacitwa cisafunika kulonga pya ule adacicita kuti:
“Adandicita siye tayu”?+
Kodi cinthu cidaumbwa cisafunika kulonga pya ule adaciumba kuti:
“Iye nkhabe ndzeru”?+
17 Thimize pano, Libhano anadzacinja kudza munda wa misapo,+
Pontho munda wa misapo unadzaoniwa ninga nsitu.+
18 Pa ntsiku ineyi, munthu wakukhonda kubva* anadzabva mafala a mʼbukhu,
Pontho maso a boliboli anadzasudzuka ku cidima cikulu, mbatoma kuona.+
19 Munthu wakupfulika anadzatsandzaya kakamwe thangwi ya Yahova,
Pontho nyakutcerenga anadzatsandzaya kakamwe thangwi ya Wakucena wa Izraeli.+
20 Thangwi nyakutonga mwakuipa nee anadzaonekabve,
Nyakugaya anadzamaliswa,
Pontho onsene anapitiriza kukhala mʼmaso toera kucita andzawo pyakuipa anadzaphiwa:+
21 Ale anaphatisira mafala authambi toera kukonesa andzawo,
Ale anateya nsampha toera kuphata ule anatsidzikiza anthu* pansuwo ukulu wa nzinda,+
Pontho ale analonga mafala authambi toera nyakulungama akhonde kucitirwa pinthu mwaulungami.+
22 Natenepa, Yahova ule adaombola Abhrahamu,+ alonga tenepa kuna dzindza ya Yakobe:
23 Thangwi iye angayangʼana nʼkhundu mwace mbaona anace,
Akuti ndi basa ya manja anga,+
Iwo anadzasimba dzina yanga;
Inde, iwo anadzasimba Wakucena wa Yakobe,
Pontho iwo anadzalemedza kakamwe Mulungu wa Izraeli.+
24 Anthu akuphonyeka mʼmanyerezero anadzakhala na udziwisi,
Pontho ale anadungunya anadzatawira kupfundziswa.”
30 Yahova alonga: “Dzedze kuna ana akukhonda bvera,+
Akuti asacita pinafuna iwo, tayu pinafuna ine,+
Akuti asacita cibverano* mwakukhonda tsogolerwa na nzimu wanga,
Toera kuthimizira madawo padzulu pa madawo.
2 Mwakukhonda kundibvundzisa,*+ iwo asatcitira mpaka ku Ejitu+
Toera kuenda katsidzikizwa na Farau*
Pontho toera acite Ejitu ninga nʼthundzi wawo wakuthawira!
3 Mbwenye citsidzikizo ca Farau cinadzakupasani manyadzo,
Pontho kuthawira mu nʼthundzi wa Ejitu kunadzakupwazisani.+
4 Atsogoleri ali ku Zoani,+
Pontho anthu adatumwa afika ku Anesi.
5 Iwo onsene anadzapaswa manyadzo
Na mbumba yakusowa basa,
Yakuti nee inaaphedza, pontho yakuti nee inaawinisa cinthu,
Mbwenye basi ene inaabweresera manyadzo na kutsukwala.”+
6 Mphangwa zakutonga zinalonga pya pinyama pya kunterero:
Apita na mu dziko yakunentsa na ya nyatwa,
Ya nkhalamu, nkhalamu zakulira,
Dziko ya nyoka za venenu na ya nyoka zakugopswa;
Iwo athukisa maburu mpfuma zawo,
Pontho miyoni yawo aiikha pa nthuku za makamelo.
Mbwenye pinthu pyenepi nee pinadzaphedza mbumba.
7 Thangwi ciphedzo ca Ejitu ndi cakusowa basa.+
Natenepa, ine ndampasa dzina yakuti “Raabhe,+ ule anakhala kwene nee kucita cinthu.”
8 “Cincino ndoko kakwate cinthu, ulembe pyenepi iwo mbakaona,
Lemba pinthu pyenepi mʼbukhu,+
Toera ntsogolo, pyenepi pikhale
Ninga umboni wakwenda na kwenda.+
10 Iwo asapanga anyakuona masomphenya: ‘Lekani kuona masomphenya,’
Pontho asapanga anyakuona pyantsogolo: ‘Lekani kutipanga masomphenya andimomwene.+
Tipangeni pinthu pyakutikomera* basi; muone masomphenya authambi.+
11 Siyani njira yadidi; pitani na njira inango.
Lekanibve kutipanga pya Wakucena wa Izraeli.’”+
12 Natenepa, Wakucena wa Izraeli alonga:
“Nakuti mukukhonda kubva pinalonga ine,+
Mbamunyindira kunyengeza na uthambi,
Pontho musakhulupira pyenepi,+
13 Madodo anewa anadzakhala kuna imwe ninga mpanda wakuti uli na nyandza,
Ninga mpanda wakulapha wakuti wasala pangʼono toera kugwa.
Mwakukhonda dikhira, iwo unadzagwa mu ndzidzi ubodzi ene.
14 Iwo unadzasweka ninga nkhali ikulu ya nyakuumba,
Yakuti isanyedzeka-nyedzeka mbikhonda kusala na dzinga ene
Toera kupalira nayo moto,
Peno kutunga nayo madzi mu ncera.”*
15 Ipi ndipyo pidalonga Yahova, Mbuya Wankulu Kakamwe, Wakucena wa Izraeli:
“Mungabwerera kuna ine mbamupfulika, munadzapulumuswa;
Imwe munadzakhala amphambvu mungapitiriza kukhala akukhurudzika mbamundinyindira.”+
Mbwenye imwe mwakhonda pyenepi.+
16 Mʼmbuto mwa pyenepi, imwe mwalonga: “Nkhabe, ife tinakwira makavalo mbatithawa!”
Natenepa imwe mwathawa.
“Tinadzakwira makavalo akuthamanga kakamwe!”+
Na thangwi ineyi, ale anafuna kukuthamangisani anathamanga kakamwe.+
17 Anthu 1.000 anadzatetemera thangwi yakuthuswa na munthu mʼbodzi;+
Thangwi yakuthuswa na anthu axanu, imwe munadzathawa,
Mpaka ale anafuna kusala akhale ninga muti wakulapha* padzulu paphiri,
Ninga muti wa cidzindikiro pa nthunda.+
18 Mbwenye Yahova asadikhira mwakupirira* toera kukucitirani udidi,+
Pontho iye anadzalamuka toera kukubverani ntsisi.+
Thangwi Yahova ndi Mulungu waulungami.+
Anyakutsandzaya ndi onsene ale anapitiriza kunʼdikhira.*+
19 Anthu angakhala mu Sioni ku Yerusalemu,+ imwe nee munadzalirabve.+ Mungakhuwa toera kuphemba ciphedzo, mwakukhonda penula, iye anadzakubverani ntsisi; iye anadzakutawirani mu ndzidzi ubodzi ene unabva iye phembo yanu.+ 20 Maseze Yahova anadzacitisa kuti nyatwa zikhale cakudya canu, madzi anu akhale kupondererwa,+ Mpfundzisi wanu Wankulu nee anadzabisalabve, pontho imwe munadzaona na maso anu Mpfundzisi wanu Wankulu.+ 21 Imwe mungaenda kunkono wamadyo peno wabzwere,+ makutu anu anadzabva fala nduli mwanu mbilonga: “Njira ndi iyi,+ fambani munjira ineyi.”
22 Pontho madzimunthu anu akusemwa akuti akhwazwa parata na madzimunthu anu a utale akukhwazwa ouro,*+ munadzaaona kukhala akunyanyasa. Imwe munadzaataya ninga munataya nkazi cinguwo cace cakumwezi, mbamulonga: “Bulukani pano!”*+ 23 Iye anadzabvumbisira madzi mbeu zinabzwala imwe mʼmataka,+ pontho mataka anadzabala pyakudya pizinji na pyadidi.+ Pa ntsiku ineyi, pifuyo pyanu pinadzadya pa mbuto yakuti iri na thongwe izinji.+ 24 Ngʼombe na maburu akuti asalima anadzadya cakudya cadidi cakumala kubvungazwa, cakuti camala kubuluswa mapwepwa.* 25 Pontho pa ntsiku inafuna kuphiwa anthu azinji nyumba za ndzulu zingagwa, mʼmapiri onsene akulapha na nʼnthunda zonsene zikulu munadzaoneka mphuno za madzi na mikulo.+ 26 Pa ntsiku yakuti Yahova anadzapyangirira cironda ca* mbumba yace,+ mbawangisa cironda cikulu cidaaphekesa iye,+ ceza ca mwezi wakudzala cinadzakhala ninga ceza ca dzuwa; pontho ceza ca dzuwa cinadzakhala cakugaka kakamwe mʼmaulendo akupiringana manomwe+ ninga ceza ca ntsiku zinomwe.
27 Onani! Dzina ya Yahova ikubwera kubuluka kutali.
Iyo iri na ukali wakugaka, pontho yazungulirwa na mitambo yakulemera.
Mulomo wace wadzala na kuipirwa,
Pontho lirimi yace yakhala ninga moto wakufudza.+
28 Nzimu* wace ndi ninga madzi anadzala mpaka nʼkhosi,
Toera kusukusa madzindza ninga pinacita munthu pakupepeta na cisero toera kubulusa pirombo;*
Pontho iye anadzamanga mulomo+ wa mbumba zenezi na nkhambala toera kuzifambisa munjira yakuipa.
29 Mbwenye nyimbo zanu zinadzakhala ninga nyimbo zinaimbwa namasiku
Mu ndzidzi unakhunganyika imwe toera kuenda ku* phwando,+
Pontho mitima yanu inadzatsandzaya ninga pinacita munthu
Anafamba mbakaliza* fulauta
Mu ndzidzi unaenda iye kuphiri ya Yahova, wakuti ndi Mwala wa Izraeli.+
30 Yahova anadzacitisa fala yace yamphambvu+ kubveka,
Pontho anadzapangiza nkono wace+ wakuti unadzabwera na ukali ukulu,+
Pabodzi na moto wakufudza,+
32 Ndzidzi onsene unafuna Yahova kumenya Asirya
Na ndodo yace yakutcunyusa nayo,
Kunadzabveka kulira kwa pandero na arpa+
Angalamusa nkono wace toera kumenyana nawo.+
Iye acitisambo kuti mbuto yakukoyera nkhuni ikhale yakuzika na ikulu,
Muli na moto uzinji na nkhuni zizinji.
Muya wa Yahova wakuti ndi ninga gowa ya enxofre
Unadzagasa moto mwenemo.
31 Dzedze kuna ale anaenda ku Ejitu toera kasaka ciphedzo,+
Kuna ale ananyindira makavalo,+
Kuna ale ananyindira ngolo zizinji za nkhondo,
Pontho kuna ale ananyindira mphambvu za makavalo a nkhondo.
Mbwenye iwo nee asasaka ciphedzo kuna Wakucena wa Izraeli,
Pontho iwo nee asasaka Yahova.
2 Iye ndi waudziwisi, pontho anadzabweresa nyatwa,
Iye anadzakwanirisa mafalace.
Iye anadzatcunyusa nsoka wa anyakucita pyakuipa,
Pontho anadzatcunyusa ale anaphedza anyakucita pyakuipa.+
3 Aejitu nee ndi Mulungu, mbwenye ndi anthu ene pyawo;
Makavalo awo si auzimu tayu, mbwenye ndi aunyama.+
Yahova angafuthula djanja yace,
Onsene anapereka ciphedzo anadzagwegweduka,
Pontho ale anaphedzwa anadzagwa;
Onsene anadzafa pa ndzidzi ubodzi ene.
4 Thangwi Yahova andipanga:
“Ninga nkhalamu ingʼono na yamphambvu yakuti isalira toera kutsidzikiza nyama idaphata iyo,
Mu ndzidzi wakuti akumbizi azinji asacemerezana toera kuithamangisa,
Iyo mbikhonda gopa mafala awo
Peno kuthuswa na uviyaviya wawo,
Munjira ibodzi ene, Yahova wa anyankhondo anadzabwera kudzamenya nkhondo
Toera kutsidzikiza Phiri ya Sioni na nthunda yace.
5 Yahova wa anyankhondo anadzatsidzikiza nzinda wa Yerusalemu,+ ninga pinacita mbalame inamburuka toera kutsidzikiza anace.
Iye anadzautsidzikiza mbaupulumusa.
Iye anadzauombola mbaukoya.”
6 “Imwe mbumba ya Izraeli, bwererani kuna Ule adasandukira imwe mbamunʼdawira kakamwe.+ 7 Thangwi pa ntsiku ineyi, mʼbodzi na mʼbodzi wa imwe anadzataya alungu ace akusowa basa a parata na a ouro, ale adacita imwe na manja anu mbakucitisani kudawa.
8 Anthu a ku Asirya anadzaphiwa na supada yakuti nee ndi ya munthu;
Iwo anadzadyiwa na supada, mbwenye tayu ya munthu.+
Anadzathawa thangwi ya supada,
Pontho aphale awo anadzaphatiswa basa yakukakamizwa.
9 Mwala wawo unadzazambazika thangwi yakugopa,
Pontho atsogoleri awo anadzagopa kakamwe thangwi ya cidzindikiro,” alonga Yahova,
Wakuti ceza cace ciri mu Sioni, pontho wakuti moto wace wakupisa kakamwe uli mu Yerusalemu.
2 Mʼbodzi na mʼbodzi wa iwo anadzakhala ninga mbuto* yakuthawira mphepo,
Mbuto yakubisalira* mu ndzidzi wa condzi,
Ninga mikulo ya madzi mu dziko yakusowa madzi,+
Ninga nʼthundzi wa mwala ukulu mu dziko yakupisa kakamwe.
3 Penepo, maso a ale akuti asakwanisa kuona nee anadzafungwa,
Pontho makutu a ale akuti asakwanisa kubva anadzabvesesa mwadidi.
4 Mitima ya ale anacita pinthu mbadzati kunyerezera mwadidi inadzanyerezera pyaudziwisi,
Lirimi ya ale ali na cibubu inadzalonga mwadidi, pontho mwakubveka.+
5 Nyakucita pyakuipa nee anadzacemerwabve nyakupasa mwakudzala manja,
Pontho munthu anakhonda kutowezera makhaliro adidi nkhabe kudzacemerwa wakulemedzeka;
6 Nyakucita pyakuipa basi ene asalonga pyakuipa,
Pontho ntima wace usanyerezera pinthu pyakuipa,+
Toera kucitisa anango kusandukira* Yahova na kulonga uthambi thangwi ya Iye,
Toera kucitisa munthu wakuti ali na njala akhonde kudya,
Pontho toera kucitisa munthu ali na nyota akhonde kumwa madzi.
7 Munthu anakhonda kutowezera makhaliro adidi, manyerezero ace ndi akuipa;+
Iye asacitisa anthu kucita pinthu pyakupasa manyadzo,
Pontho asalonga uthambi toera kuthabusa nyakutcerenga,+
Ngakhale nyakutcerenga alonge undimomwene.
8 Mbwenye munthu ali na ntima wakupasa, asapasa mwakudzala manja,
Pontho asapitiriza kupasa mwakudzala manja.
9 “Imwe akazi akuti nkhabe dzudzumika na pinthu, lamukani, pontho bveserani fala yanga!
Imwe ana akazi akuti nkhabe dzudzumika na pinthu,+ bveserani pinalonga ine!
10 Pangapita caka cibodzi na ntsiku zingasi, imwe akuti nkhabe dzudzumika na pinthu, munadzatoma kudzudzumika
Thangwi ndzidzi wakutcoda mauva ungamala, nkhabe kudzaoneka nee nsapo ubodzi wakuti wagumanywa.+
11 Tetemerani, imwe akazi akuti nkhabe dzudzumika na pinthu!
Dzudzumikani, imwe akuti nkhabe dzudzumika na pinthu!
Dulani nguwo zanu,
Pontho bvalani masakha ncunu mwanu.+
12 Menyani diti yanu, pontho lirani
Thangwi ya minda yanu yadidi na miti ya mauva yakuti isabala misapo.
13 Mataka a mbumba yanga anadzamera minga na pswepswe;
Iyo inadzaphimbira nyumba zonsene zakuti zikhali zakutsandzaya,
Inde, nzinda wakuti ukhali wakukomerwa.+
14 Thangwi nyumba yandzulu na yakutsidzikizika inadzasiyiwa yokha;
Uviyaviya wa mu nzinda nee unadzabvekabve.+
Ofeli+ na nyumba yandzulu ya nyakuonera pinadzakhala madembe,
Pontho inadzakhala mbuto yakusendzekera maburu a ntsanga,
Na mbuto yakudyera mikumbi ya pinyama,+
15 Mpaka Mulungu atitsanulire nzimu wace,+
Thando mbidzakhala munda wa misapo,
Pontho munda wa misapo mbuoniwa ninga nsitu.+
16 Penepo nʼthando munadzakhala ulungami,
Pontho mʼmunda wa misapo munadzaoneka udidi.+
17 Ulungami wandimomwene unadzabweresa ntendere,+
Pontho ulungami wandimomwene unadzacitisa kupfulika na citsidzikizo cakwenda na kwenda.+
18 Mbumba yanga inadzakhala pa mbuto ya ntendere,
Inadzakhala nʼnyumba zakutsidzikizika na mʼmbuto zadidi toera kupuma.+
19 Mbwenye matalala anadzafudza nsitu,
Pontho nzinda unadzapaswa manyadzo.
20 Anyakutsandzaya ndimwe akuti musabzwala mʼmbuto zonsene ziri na madzi,
Akuti asasudzula ngʼombe na buru.”+
33 Dzedze kuna iwe nyakufudza wakuti udzati kufudzwa;+
Nyakusandukira wakuti udzati kusandukirwa!
Iwe ungamala kufudza, unadzafudzwa.+
Iwe ungamala kusandukira, unadzasandukirwa.
2 Yahova, tibvereni ntsisi.+
Cidikhiro cathu ciri kuna imwe.
Tiphedzeni na nkono wanu*+ ntsiku zonsene namacibese,
Inde, imwe ndimwe mpulumusi wathu mu ndzidzi wa nyatwa.+
3 Mbumba zisathawa zingabva uviyaviya.
Imwe mungalamuka, madzindza asabalalika.+
4 Anthu anadzagumanya pinthu pidatapata imwe, ninga akugumanya anyadzombe azinji;*
Anthu anadzapikutira ninga pinacita anyadzombe azinji.
5 Yahova anadzapaswa mbiri,
Thangwi iye asakhala kudzulu kakamwe.
Iye anadzadza Sioni onsene na ulungami.
6 Ndiye anakucitisani kukhala akutsidzikizika;
Ndiye anakupasani cipulumuso cikulu,+ udziwisi, ndzeru na kukucitisani kugopa Yahova;+
Ineyi ndi mpfuma yace.
7 Onani! Amunawo* acipapo asakhuwa mu nseu;
Anthu adatumwa na mphangwa za ntendere akulira kakamwe.
8 Miseu mikulu yamala kugudjuka;
Nkhabebve anapita na njira zenezi.
9 Dziko yatsukwala* kakamwe, pontho ikuzambazika.
Libhano apasika manyadzo;+ akumala pangʼono-pangʼono.
Saroni adzakhala ninga madembe,
Pontho masamba a Bhasani na Karmelo akugwa.+
10 Yahova alonga: “Cincino ine ndinalamuka,
Cincino ine ndinapangiza mphambvu zanga,+
Cincino ine ndinapangiza ukulu wanga.
11 Imwe anyakucita pyakuipa, mabasa anu na pinanyerezera imwe ndi pyakusowa basa. Ipyo pyakhala ninga mapesi na tsanga yakuuma.
Makhaliro anu akuipa anakufudzani ninga moto.+
12 Mbumba za anthu zinadzakhala ninga dotha ya ntoto wakupiswa.
Iwo anadzagaka pa moto ninga minga yakugwandwa.+
13 Imwe muli kutali, bveserani pinafuna ine kudzacita!
Pontho imwe muli dhuzi, dzindikirani mphambvu zanga!
14 Anyakudawa a ku Sioni akugopa;+
Anyakusandukira akutetemera thangwi yakugopa:
‘Mbani mwa ife wakuti anakwanisa kukhala pa moto wakufudza?+
Mbani mwa ife wakuti anakwanisa kukhala pa malirimi a moto akukhonda thima?’
15 Ndi ule wakuti ndzidzi onsene asacita pinthu pyakulungama,+
Wakuti asalonga undimomwene,+
Wakuti asakhonda kuwina pinthu munjira yakuipa na yakunyengeza,
Wakuti nkhabe kutawira kudyekerwa,+
Ule anafunga makutu ace toera akhonde kubva makani akucucisa ciropa,
Pontho asafunga maso ace toera akhonde kuona pinthu pyakuipa,
16 Iye anadzakhala pa mbuto yapadzulu kakamwe;
Iye anadzathawira mʼmphako za miyala ninga mbuto yacitsidzikizo,*
Iye anadzapaswa nkate wace,
Pontho madzi ace akumwa nee anadzamala.”+
17 Maso ako anadzaona mambo mu mbiri yace;
Iwo anadzaona dziko yakutali.
18 Iwe unadzakumbuka* muntima mwako pinthu pyakugopswa pidacitika kale, mbulonga:
“Ali kupi mulembi?
Ali kupi ule akhalipisa misonkho?+
Ali kupi ule akhalengesa nyumba za ndzulu?”
19 Nee munadzaonabve mbumba yakusowa cilemedzo,
Mbumba yakuti isalonga cilongero cakunentsa kakamwe toera kucibvesesa,
Yakuti nee isabva cilongero ca dziko inango.+
20 Yangʼanani Sioni, nzinda unacitira ife maphwando athu!+
Maso anu anadzaona Yerusalemu ninga mbuto yadidi toera kukhala,
Nsasa wakuti nkhabe kudzabuluswa.+
Ntcici za nsasa unoyu cipo zinadzadulwa,
Pontho nee nkhambala yace ibodzi inadzagwandwa.
21 Yahova wakuti ndi Wankulu Kakamwe,
Anadzatitsidzikiza ninga pinacita mikulo peno magowa makulu anatsidzikiza mbuto,
Yakuti mabote a nkhondo nkhabe kwanisa kupita na penepo
Nee mabote makulu.
22 Thangwi Yahova ndi Ntongi wathu,+
Yahova ndi Nyakukhazikisa Mitemo yathu,+
Yahova ndi Mambo wathu;+
Ndiye basi anafuna kudzatipulumusa.+
23 Nkhambala za nyamalwa zinadzalera;
Nee zinakwanisa kumangirira muti wakulapha wa bote peno kufuthula nguwo inacitisa bote kufamba.
Mu ndzidzi unoyu pinthu pizinji pyakutapatwa pinadzagawiwa;
Ngakhale anyakulamala miyendo anadzatapata pinthu pizinji.+
24 Pontho nee munthu mʼbodzi anakhala pa dziko anadzalonga kuti: “Ndiri kubva kupha.”+
Anthu anakhala mwenemo anadzalekererwa madodo awo.+
34 Imwe madzindza, fendedzerani dhuzi toera mubve,
Imwe mbumba, bveserani mwadidi.
Dziko na pinthu pyonsene piri mwenemu, bveserani,
Mataka na pyonsene piri mwenemu.
2 Thangwi Yahova aipirwa na madzindza onsene,+
Pontho iye aipirwa kakamwe na anyankhondo a madzindza anewa.+
Iye anadzaafudza;
Iye anadzaapha.+
3 Anthu awo adaphiwa anadzatayiwa kunja,
Kununkha kwa anthu awo adamala kuphiwa kunadzabveka kakamwe;+
4 Anyankhondo onsene akudzulu anadzabvunda,
Kudzulu kunadzafunywa ninga mpukutu.
Anyankhondo onsene a kweneku anadzabunyala mbagwa,
Ninga tsamba yakubunyala inagwa mʼmuti wa mauva,
Pontho ninga sambvu yakubunyala inagwa mu nsambvu.
5 “Thangwi kudzulu supada yanga inadzatota na ciropa.+
Inadzatcita toera kudzatonga Edhomi,+
Mbumba idatonga ine kuti ifudzwe.
6 Yahova ali na supada; supada ineyi inadzadzala na ciropa.
Thangwi Yahova akhunganya ntsembe ku Bhozira,
Ciropa cinadzacuciswa kakamwe mu dziko ya Edhomi.+
7 Nyati* zinatcitira pabodzi na pinyama pyenepi,
Nyati zingʼono pabodzi na nyati zikulu.
Dziko yawo inadzamala tota na ciropa,
Pontho pfumbi yawo inadzamala tota na mafuta.”
8 Yahova asankhula ntsiku toera kutcunyusa anyamalwa ace,+
Caka cinafuna iye kubwezera pinthu pyakuipa pidacitirwa Sioni.+
9 Mikulo yace,* inadzacinja kudza upula,
Pfumbi yace inadzacinja kudza enxofre,
Pontho dziko yace inadzakhala ninga upula wakuti uli kugaka.
10 Moto wace nkhabe kudzathimiswa, nee namasiku nee namasikati;
Utci wace unadzapitiriza kupucira kwenda na kwenda.
Iwo unadzapitiriza kukhala wakufudzwa mu ubalwi na ubalwi;
Kwenda na kwenda nkhabe anafuna kupita na mu nzinda unoyu.+
11 Bvuwo-bvuwo na nungu anadzakhala mu dziko ineyi,
Pontho madzidzi na makhungubwe anadzakhala mwenemo.
Mulungu anadzaphatisira nkhambala yakupima nayo na mwala wakundendemeza nawo
Toera kupangiza kuti dziko ineyi inadzakhala yakusowa pinthu na yakusowa basa.
12 Nee mamuna mʼbodzi wakubvekera anadzakhazikiswa ninga mambo,
Pontho atsogoleri ace onsene anadzamala.
13 Minga inadzamera panyumba zace zakuwanga za ndzulu,
Uliri na mathendere a minga anadzamera mʼmbuto zace zakutsidzikizika.
Iye anadzakhala mphako ya anambwa a ntsanga,+
Nyumba za mbalame zinacemerwa avestruji.
14 Pinyama pinakhala nʼthando pinadzagumanikana mwenemo na pinyama pinalira mwakugaluza kakamwe,
Pontho mbuzi za ntsanga* zinadzacemerambo zinango.
Inde, mbalame zinafamba namasiku zinadzakhala mwenemo mbazigumana mbuto toera kugona.
15 Penepo, nyoka ya mbadza inadzamanga ntsandza yace mbiteya mazai,
Pontho iyo inadzaswa mazai anewa mbitsidzikiza anace.
Inde, mbalame zinadya nyama, zimuna na zikazi, zinadzagumanika kweneko.
16 Sakani bukhu ya Yahova, pontho ilerini mwakugaluza:
Nee cinyama cibodzi cinadzasoweka;
Nee cibodzi cinadzasowa cindzace,
Thangwi ndi mulomo wa Yahova udapereka ntemo unoyu,
Pontho udagumanya pinyama pyenepi ndi nzimu wace.
17 Thangwi Ndiye adasankhula kuti unthaka wawo unakhala upi,
Pontho djanja yace yapima mbuto inafuna kupaswa pinyama pyenepi.*
Dziko ineyi inadzakhala ya pinyama pyenepi kwenda na kwenda;
Ipyo pinadzakhala mu dziko ineyi kwenda na kwenda.
35 Thando na mataka akuuma pinadzasekera,+
Pontho thando inadzakomerwa mbibuluka maluwa ninga a safarau.+
2 Mwakukhonda penula inadzabuluka maluwa;+
Inadzatsandzaya mbikhuwa thangwi yakukomerwa.
Iyo inadzapaswa mpfuma yonsene ya ku Libhano,+
Pontho inadzapaswa pinthu pyakubalika pya ku Karmelo+ na pya ku Saroni.+
Anthu anadzaona mbiri ya Yahova na kubalika kwa Mulungu wathu.
3 Wangisani manja adafewa,
Pontho wangisani mabondo adagoboka.+
4 Pangani ale adapswipa ntima kuti:
“Khalani akuwanga. Lekani kugopa.
Onani, Mulungu wanu anadzabwezera pyakuipa anyamalwa anu,
Mulungu anadzaatcunyusa.+
Iye anabwera, pontho anakupulumusani.”+
5 Pa ndzidzi unoyu, maso a maboliboli anadzafunguka,+
6 Pa ndzidzi unoyu, anthu akulamala anadzanumpha ninga mbawala,+
Pontho malirimi a anthu akukhonda longa* anadzakhuwa mwakutsandzaya.+
Nʼthando munadzakhala na madzi,
Pontho munadzawewa mikulo ya madzi.
7 Mbuto ya mataka akuuma inadzakhala gowa yakudzala na mitete,
Pontho mataka akusowa madzi anadzakhala na madzi.+
Mbuto zikhagona anambwa a ntsanga,+
Munadzakhala tsanga iwisi, mitete na papiro.
Nyakudawa nkhabe kudzafamba munjira ineyi.+
Basi ene njira ineyi ndi ya ale adatawiriswa kufamba mwenemu;
Nee dzemwa mʼbodzi anadzafamba munjira ineyi.
9 Nkhalamu nee zinadzakhala mwenemu,
Nee cinyama cibodzi cakugopswa cinadzapita na njira ineyi.
Pinyama pyenepi nkhabe kudzaoneka mwenemu;+
Basi ene ale adaombolwa ku ubitcu anadzafamba munjira ineyi.+
10 Ale adaombolwa na Yahova anadzabwerera+ mbafika ku Sioni na nʼkhuwo wakutsandzaya.+
Iwo anadzabvazikwa kutsandzaya kwa kwenda na kwenda.+
Iwo anadzakhala akukomerwa na akutsandzaya,
Pontho kutsukwala na kubulira pinadzamala.+
36 Mu caka 14 ca Mambo Ezekiya, Senakeribhe mambo wa Asirya+ abwera kudzamenyana na mizinda yonsene yakuwanga ya ku Yuda mbaikwata.+ 2 Buluka penepo, mambo wa Asirya atuma Rabhisake*+ pabodzi na nsoka ukulu wa anyankhondo kubulukira ku Lakisi+ toera kuenda kuna Mambo Ezekiya ku Yerusalemu. Iwo alimira pa mbuto inapita na madzi anabuluka pa thawala+ yakuti iri pa nthunda, pa nseu ukulu dhuzi na mbuto inaphata basa mamuna wakuti ndi nyakufula nguwo.+ 3 Penepo Eliyakimu+ mwana wa Hilkiya, wakuti akhali ntsogoleri wa anthu a panyumba ya mambo, Sebhina+ wakuti akhali mulembi na Yowa mwana wa Azafe wakuti akhali nyakulemba pyonsene pikhacitika, abuluka mbaenda kaonana na Rabhisake.
4 Natenepa Rabhisake aapanga: “Ndaphata miyendo, pangani Ezekiya kuti: ‘Mambo wankulu, mambo wa Asirya alonga: “Ninji cinanyindira iwe?+ 5 Iwe usalonga: ‘Ine ndiri na maluso na mphambvu yakumenya nkhondo,’ mbwenye mafala ako ndi apezi. Mbani ananyindira iwe toera undisandukire?+ 6 Iwe usanyindira ciphedzo ca Ejitu, ntete wakupanduka wakuti usaphola manja a ule anauphata toera kutsidzikizika. Farau mambo wa ku Ejitu ndi ninga ntete unoyu kuna onsene ananʼnyindira.+ 7 Imwe mungalonga kuti: ‘Tisanyindira Yahova Mulungu wathu,’ kodi siye tayu adafudzirwa na Ezekiya mbuto zace zaulambiri na maguwa ace,+ mbapanga anthu a ku Yuda na a ku Yerusalemu kuti: ‘Musafunika kulambira Mulungu pa guwa iyi’?”’+ 8 Natenepa ndaphata miyendo, cincino cita bhetci na mbuyanga mambo wa Asirya:+ Ine ndinakupasa makavalo 2.000 toera ndione khala iwe unagumana amuna akukwana toera kuafambisa. 9 Iwe unakwanisa tani kubweza mʼbodzi mwa atsogoleri angʼono kakamwe a mbuyanga, mu ndzidzi wakuti iwe usanyindira Ejitu toera akupase ngolo za nkhondo na anyamakavalo? 10 Iwe usanyerezera kuti Yahova nee anditawirisa toera ndibwere kudzamenyana na dziko ino mbandiifudza? Yahova ndiye andipanga: ‘Ndoko kamenyane na dziko ineyi mbuifudza.’”
11 Penepo Eliyakimu, Sebhina+ na Yowa apanga Rabhisake:+ “Taphata miyendo, longani na atumiki anu Muciaramaki,*+ thangwi ife tisabva cilongero ceneci; lekani kulonga na ife mu cilongero ca Ayuda, thangwi anthu adalimira padzulu pa mpanda asabva pinalonga ife.”+ 12 Mbwenye Rabhisake abvundza: “Kodi mbuyanga andituma toera ndidzapange imwe basi na mbuyanu mafala anewa? Nee anditumambo toera ndidzapange amuna awa adakhala padzulu pa mpanda, akuti anadzadya matubzwi awo, mbamwa mitindo yawo pabodzi na imwe?”
13 Buluka penepo Rabhisake alimira mbakhuwa mu cilongero ca Ayuda+ mbalonga: “Bveserani mafala a mambo wankulu, mambo wa Asirya.+ 14 Mambo alonga tenepa: ‘Lekani kunyengezwa na Ezekiya, thangwi iye nee anakwanisa kukupulumusani.+ 15 Pontho lekani kutawirisa kuti Ezekiya akucitiseni kunyindira Yahova,+ mbalonga: “Mwakukhonda penula, Yahova anatipulumusa, pontho nzinda uno nee unadzaperekwa mʼmanja mwa mambo wa Asirya.” 16 Lekani kubvera Ezekiya, thangwi mambo wa Asirya alonga tenepa: “Khazikisani ntendere na ine mbamuperekeka,* pontho mʼbodzi na mʼbodzi wa imwe anadzadya misapo ya muti wace wa mauva na misapo ya muti wace wa masambvu, mbamwa madzi a mu ncera wace, 17 mpaka ine ndibwere mbandikuendesani ku dziko yakulandana na yanu,+ dziko yakuti isabala tirigu na sevadha toera mucite nayo mikate na mauva toera mucite nawo vinyu. 18 Lekani kutawirisa kuti Ezekiya akunyengezeni, mbalonga: ‘Yahova anatipulumusa.’ Kodi alipo alungu a madzindza anango adapulumusa dziko yawo mʼmanja mwa mambo wa Asirya?+ 19 Ali kupi alungu a Amati na Arpadhi?+ Ali kupi alungu a Sefarvaimu?+ Kodi iwo apulumusa Samariya mʼmanja mwanga?+ 20 Pakati pa alungu onsene a madziko anewa, mbani adakwanisa kupulumusa dziko yawo mʼmanja mwanga? Mphapo Yahova anakwanisa kupulumusa Yerusalemu mʼmanja mwanga?”’”+
21 Mbwenye iwo amatama pyawo mbakhonda kuntawira, thangwi mambo akhadabulusa ntemo uyu: “Lekani kuntawira.”+ 22 Mbwenye Eliyakimu mwana wa Hilkiya, wakuti akhali ntsogoleri wa anthu a panyumba ya mambo, Sebhina+ wakuti akhali mulembi na Yowa mwana wa Azafe wakuti akhali nyakulemba pyonsene pikhacitika, apandula nguwo zawo mbaenda kapanga Ezekiya pidalonga Rabhisake.
37 Mambo Ezekiya pidabva iye pyenepi, apandula nguwo zace, abvala masakha mbapita nʼnyumba ya Yahova.+ 2 Buluka penepo, mambo atuma Eliyakimu wakuti akhali ntsogoleri wa anthu a panyumba ya mambo, Sebhina wakuti akhali mulembi na akulu a anyantsembe, iwo abvala masakha toera aende kuna mprofeta Izaiya+ mwana wa Amoji. 3 Iwo apanga Izaiya: “Ezekiya alonga tenepa: ‘Lero ndi ntsiku ya nyatwa, yakusandikwa* na yakupaswa manyadzo; ndife ninga nkazi wakuti ndzidzi wace wakubala wafika, mbwenye iye nee ali na mphambvu toera kubala.+ 4 Panango Yahova Mulungu wanu anabvesera mafala onsene a Rabhisake, ule adatumwa na mbuyace wakuti ndi mambo wa Asirya toera kutikana Mulungu wa mʼmaso,+ pontho iye anadzatcunyuswa thangwi ya mafala adabva Yahova Mulungu wanu. Natenepa, citani phembero+ thangwi ya anthu adasala mu dziko ino.’”+
5 Buluka penepo atumiki a Mambo Ezekiya aenda kaonana na Izaiya.+ 6 Natenepa Izaiya aapanga: “Ndokoni mukampange mbuyanu kuti: ‘Yahova alonga tenepa: “Leka kugopa+ thangwi ya mafala adabva iwe, mafala adalonga atumiki a mambo wa Asirya+ toera kundixola nawo. 7 Ndinadzaikha manyerezero muna iye, iye anadzabva mphangwa mbabwerera ku dziko yace;+ pontho ine ndinadzacitisa kuti iye aphiwe na supada mu dziko yace.”’”+
8 Rabhisake pidabva iye kuti mambo wa Asirya abuluka ku Lakisi, abwerera kuna iye mbanʼgumana akumenyana na Libhina.+ 9 Mambo abva mphangwa izi thangwi ya Tiraka, Mambo wa ku Etiopya: “Iye abwera kudzamenyana na imwe.” Natenepa, pidabva iye pyenepi, atuma pontho anthu kuna Ezekiya,+ mbalonga: 10 “Ndokoni mukampange tenepa Ezekiya Mambo wa ku Yuda: ‘Leka tawirisa kuti Mulungu wako ananyindira iwe akunyengeze na mafala akuti: “Yerusalemu nee anadzaperekwa mʼmanja mwa mambo wa Asirya.”+ 11 Ona! Iwe wabva pidacita amambo a ku Asirya mʼmadziko onsene, iwo aafudza.+ Mphapo, ndiwe basi anafuna kupulumuka? 12 Kodi iwo apulumuswa na alungu a madzindza adafudzwa na ambuyanga?+ Ali kupi Gozani, Arani,+ Rezefi na anthu a ku Edheni akuti akakhala ku Tele-Asari? 13 Ali kupi mambo wa ku Amati, mambo wa ku Arpadhi, mambo wa nzinda wa ku Sefarvaimu,+ wa ku Ena na wa ku Iva?’”
14 Ezekiya akwata matsamba mʼmanja mwa ale adaabweresa, mbaaleri. Buluka penepo, Ezekiya aenda panyumba ya Yahova mbaafuthula* pamaso pa Yahova.+ 15 Ezekiya atoma kucita phembero kuna Yahova,+ mbalonga: 16 “Yahova wa anyankhondo,+ Mulungu wa Izraeli, imwe musakhala pa mpando waumambo padzulu* pa akerubhi, imwe ndimwe basi Mulungu wandimomwene pakati pa maumambo onsene a pa dziko yapantsi. Imwe mwacita kudzulu na dziko yapantsi. 17 Yahova bveserani mwadidi!+ Imwe Yahova, fungulani maso anu, pontho onani!+ Bveserani mafala onsene adatumiza Senakeribhe toera kuxola imwe Mulungu wa mʼmaso.+ 18 Yahova, ndimomwene kuti amambo a ku Asirya afudza madziko onsene,+ kuphatanizambo dziko yawo. 19 Pontho iwo aponya alungu awo pa moto,+ thangwi iwo nee akhali alungu, mbwenye akhali pinthu pidacitwa na manja a anthu,+ matabwa na miyala. Na thangwi ineyi, iwo akwanisa kuafudza. 20 Mbwenye cincino Yahova Mulungu wathu, tipulumuseni mʼmanja mwace toera maumambo onsene a pa dziko yapantsi adziwe kuti imwe basi Yahova, ndimwe Mulungu.”+
21 Buluka penepo, Izaiya mwana wa Amoji atumiza mphangwa izi kuna Ezekiya: “Yahova Mulungu wa Izraeli alonga tenepa: ‘Nakuti wacita phembero kuna ine thangwi ya Senakeribhe mambo wa Asirya,+ 22 awa ndi mafala adalonga Yahova thangwi ya iye:
“Mwali, mwana wankazi wa Sioni asakupwaza, mbakusingirira.
Mwana wankazi wa Yerusalemu asasukusa nsolo wace thangwi ya iwe.
23 Mbani adaxola iwe+ mbulonga naye mwakusowa cilemedzo?
Mbani adakhuwira iwe
Mbumuyangʼana mwakudzikuza?+
Ndi Wakucena wa Izraeli!+
24 Waphatisira atumiki ako toera kuxola Yahova+ mbulonga:
‘Na ngolo zanga zizinji za nkhondo
Ndinakwira padzulu pa mapiri,+
Mbuto zakutali kakamwe za Libhano.
Ndinadzagwanda miti yace yakulapha ya sedhro, miti yace yadidi kakamwe ya junipero.
Ndinadzaenda ku mbuto zace zakubisalira za padzulu kakamwe, mʼmisitu yace yakupata kakamwe.
25 Ndinadzakumba micera, mbandimwa madzi;
Ndinadzaumisa mikulo* ya ku Ejitu na manyalo anga.’
26 Iwe nee wabva? Ine ndacita kale kakamwe cisankhulo ceneci.
Ine ndakhunganya* pyenepi kutomera kale kakamwe.+
Cincino ndinapicita.+
Iwe unadzafudza mizinda yakuwanga mbikhala madembe.+
27 Anthu a mwenemo anadzakhala akusowa ciphedzo;
Iwo anadzagopa mbakhala na manyadzo.
Iwo anadzakhala ninga maudzu a ntsanga na thongwe iwisi,
Ninga maudzu a pantsoi akuti asaumiswa na mphepo yakumabulukiro a dzuwa.
28 Ine ndisadziwa mwadidi ndzidzi unakhala iwe pantsi, ndzidzi unabuluka iwe, ndzidzi unapita iwe,+
Na ndzidzi unaipirwa iwe na ine,+
29 Thangwi kuipirwa kwako na ine+ na kukhuwa kwako kwafika mʼmakutu mwanga.+
Ndinadzaikha cimedzo canga mphuno mwako, pontho ndinadzamanga nkhambala*+ pamulomo pako,
Mbandikubweza kudabuluka iwe na njira idabwera na iwe.”
30 “‘Cidzindikiro kuna iwe* cinadzakhala ici: Caka cino munadzadya pinthu pinafuna kumera pyokha;* pontho caka caciwiri munadzadya pinafuna kumera pa mbuto ibodzi ene; mbwenye caka cacitatu munadzabzwala mbeu mbamubvuna, pontho munadzatceka miti ya mauva mbamudya misapo yace.+ 31 Anthu a panyumba ya Yuda anafuna kudzapulumuka, ale anafuna kusala,+ anadzakhala na mitcitci pantsi ninga miti, mbabala misapo. 32 Thangwi ku Yerusalemu kunadzabuluka anthu adasalikira, pontho Kuphiri ya Sioni+ kunadzabuluka anthu adapulumuka. Yahova wa anyankhondo anadzacita pyenepi thangwi ya phinga yace.+
33 “‘Yahova alonga tenepa thangwi ya mambo wa Asirya:+
“Iye nee anadzapita mu nzinda uno+
Nee anadzaponyamo pswimo
Peno kumenyana nawo mbaphatisira xango
Peno kucita nthunda toera kumenyana nawo.”’+
34 ‘Iye anadzabwerera na njira idabwera na iye;
Iye nee anadzapita mu nzinda uno,’ alonga Yahova.
35 ‘Ine ndinadzatsidzikiza nzinda uno+ mbandiupulumusa thangwi ya ine,+
Pontho thangwi ya ntumiki wanga Dhavidhi.’”+
36 Anju wa Yahova aenda ku misasa ya Asirya, mbapha anyankhondo 185.000. Anthu pidalamuka iwo namacibese, agumana anthu akufa basi.+ 37 Natenepa, Senakeribhe Mambo wa Asirya abuluka mbabwerera ku Ninive,+ pontho iye akhala kweneko.+ 38 Senakeribhe pikhagodama iye nʼnyumba* ya Nisiroki wakuti ndi mulungu wace, anace akhacemerwa Adhrameleki na Sarezeri amupha na supada,+ mbathawira ku dziko ya Ararati.+ Buluka penepo, mwanace akhacemerwa Esari-Adhoni+ adzakhala mambo pa mbuto yace.
38 Mu ntsiku zenezi, Ezekiya aphatwa na utenda mbasala pangʼono toera kufa.+ Mprofeta Izaiya+ mwana wa Amoji abwera kuna iye, mbampanga: “Yahova alonga tenepa: ‘Pereka pitsogolero kuna anthu a panyumba* pako, thangwi iwe unafa; nee unawanga.’”+ 2 Natenepa, Ezekiya azungunusa nkhope yace ku pfufu, mbatoma kucita phembero kuna Yahova: 3 “Ndisakudembeterani Yahova, ndaphata miyendo, kumbukani+ kuti ine ndafamba mwakukhulupirika pamaso panu, pontho na ntima onsene.+ Ine ndacita pinthu pyadidi pamaso panu.” Penepo Ezekiya atoma kulira kakamwe.
4 Buluka penepo, Izaiya atambira mphangwa izi zakubuluka kuna Yahova: 5 “Bwerera toera upange Ezekiya kuti:+ ‘Yahova Mulungu wa mbuyako Dhavidhi alonga tenepa: “Ndabva phembero yako,+ pontho ndaona misozi yako.+ Ndinathimizira pyaka 15 pya umaso wako,*+ 6 mbandipulumusa iwe na nzinda uno mʼmanja mwa mambo wa Asirya, pontho ndinatsidzikiza nzinda uno.+ 7 Cidzindikiro ca Yahova cinapangiza kuti Yahova anadzacita pidalonga iye ndi ici:+ 8 Ine ndinacitisa kuti nʼthundzi wa pa masikada a Ahazi ubwerere nduli masikada khumi.”’”+ Natenepa, nʼthundzi wakuti ukhali pa masikada wabwerera nduli masikada khumi.
9 Mphangwa zidalemba Ezekiya Mambo wa ku Yuda mu ndzidzi udabva iye kupha mbawanga.
10 Ine ndalonga: “Ine mbandidzati kukalamba,
Ndakakamizwa toera kupita na pa misuwo mikulu ya Nthumbi.*
Ndinakwatirwa pyaka pyanga pinango pidasala.”
11 Ine ndalonga: “Ine nee ndinadzaona Yahova,* nee ndinadzaona Yahova mu dziko ya anthu ali mʼmaso.+
Ine nee ndinadzayangʼanabve anthu
Ndingakhala ku mbuto ya pinthu pyakusowa umaso.
12 Nyumba yanga yakhutciwa mbienda kaikhwa kutali na ine,+
Ninga nsasa wa nkumbizi.
Ine ndapyangirira umaso wanga ninga pinacita nyakusona nguwo;
Iye andigwanda ninga pinacitwa usalu udasalikira pa nguwo idamala kusonwa.
Kutomera namacibese mpaka namaulo imwe musandibweresera nyatwa.+
13 Ine ndayesera kukhurudzika mpaka namacibese.
Iye asaswa magogodo anga onsene ninga pinacita nkhalamu;
Kutomera namacibese mpaka namaulo imwe musandibweresera nyatwa.+
Maso anga aneta na kuyangʼana kudzulu;+
‘Yahova, ndiri wakutsukwala kakamwe;
Ndiphedzeni!’+
15 Ndinalonganji ine?
Iye alonga na ine mbacita pinthu.
Ndinakhala wakucepeseka mu umaso wanga onsene
Thangwi ndatsukwala kakamwe.
16 ‘Yahova, anthu onsene asakhala na umaso thangwi ya pinthu pyenepi,*
Pontho thangwi ya pinthu pyenepi, ine ndisapitiriza kukhala mʼmaso.
Imwe munandipasa pontho ungumi wadidi mbamundikoya na umaso.+
17 Onani! Mʼmbuto mwa ntendere, ine ndakhala wakutsukwala kakamwe;
Mbwenye nakuti musandifuna
Mwanditsidzikiza toera ndikhonde kugwera nʼdjenje yakufudza.+
Imwe mwaponya kunduli kwanu madawo anga onsene.*+
Onsene anagwera nʼdjenje nee anakwanisa kuona kukhulupirika kwanu.+
19 Anthu ali mʼmaso, basi ene ale ali mʼmaso anakwanisa kukusimbani,
Ninga pinacita ine lero.
Baba anakwanisa kupfundzisa anace kukhulupirika kwanu.+
20 Yahova, ndipulumuseni,
Pontho ife tinadzaimba nyimbo zanga na pyakuimba napyo pya nkhambala+
Panyumba ya Yahova mu ntsiku zonsene za umaso wathu.’”+
21 Buluka penepo, Izaiya alonga: “Bweresani nkate wa masambvu akuuma, pontho uikheni pa phute* toera iye awange.”+ 22 Ezekiya abvundza: “Ninji cinafuna pangiza kuti ndinadzaenda kunyumba ya Yahova?”+
39 Pa ndzidzi unoyu, mambo wa ku Bhabhilonya akhacemerwa Merodhaki-Bhaladhani mwana wa Bhaladhani atumiza matsamba na muoni kuna Ezekiya,+ thangwi iye akhadabva kuti Ezekiya akhabva kupha, mbwenye awanga.+ 2 Ezekiya atambira mwadidi* anthu adatumwa, mbaapangiza nyumba yace yakukoyera mpfuma.+ Iye aapangiza parata, ouro, mafuta a bhalsamu na mafuta anango adidi, mbuto yonsene yakukoyera pida pya nkhondo na pyonsene pikhali nʼnyumba mwace munakoyera iye mpfuma. Nkhabepo cinthu ca nʼnyumba mwace na ca mu umambo wace cidakhonda iye kuapangiza.
3 Buluka penepo, mprofeta Izaiya aenda kuna Mambo Ezekiya, mbambvundza: “Amuna awa alonganji, pontho abuluka kupi?” Natenepa Ezekiya atawira: “Iwo abuluka ku dziko yakutali, ku Bhabhilonya.”+ 4 Pidamala iye, ambvundza: “Aonanji nʼnyumba mwanu?” Ezekiya atawira: “Iwo aona pyonsene piri nʼnyumba mwanga. Nkhabepo cinthu cidakhonda ine kuapangiza mule munakoyera ine mpfuma yanga.”
5 Natenepa Izaiya apanga Ezekiya: “Bveserani mafala a Yahova wa anyankhondo, 6 ‘Ona, zinadzafika ntsiku zakuti pyonsene piri nʼnyumba mwako na pyonsene pidakoya ambuyako mpaka lero, pinadzakwatwa mbapiendeswa ku Bhabhilonya. Nkhabepo cinafuna kudzasala,’+ alonga Yahova.+ 7 ‘Anango mwa ana amuna anafuna kudzabala iwe, anadzaendeswa ku ubitcu, pontho iwo anadzakhala atsogoleri a panyumba ya mambo wa ku Bhabhilonya.’”+
8 Natenepa Ezekiya apanga Izaiya: “Mafala a Yahova adalonga imwe ndi adidi.” Pontho iye athimiza: “Thangwi unadzaoneka ntendere na citsidzikizo* mu ndzidzi* unakhala ine mʼmaso.”+
40 Mulungu wanu alonga: “Balangazani, balangazani mbumba yanga.+
2 Longani munjira yakuti inakhuya ntima wa* Yerusalemu,
Pontho mpangeni kuti basa inacita iye mwakukakamizwa yamala,
Mulando ukakhala na iye wamala.+
Iye atcunyuswa na Yahova thangwi ya madawo onsene adacita iye.”+
3 Munthu ali kukhuwa nʼthando:
Sasanyirani njira ya Yahova!+
“Sasanyirani Mulungu wathu+ njira yakulungama nʼthando.+
4 Magowa onsene mbatutirwe,
Mapiri onsene mbazerezwe, pontho nthunda zonsene zizerezwe,
Mbuto zakukumbika-kumbika mbazifikirwe.
Pontho mbuto za magolomondo mbazizerezwe.+
5 Mbiri ya Yahova inadzapangizika,+
Pontho anthu onsene anadzaona pyenepi,+
Thangwi Yahova ndiye adalonga pyenepi.”
6 Bveserani! Alipo analonga: “Dziwisani!”
Unango abvundza: “Ndinadziwisanji?”
Anthu onsene ndi ninga tsanga iwisi.
Ufuni wawo wakukhonda mala ndi ninga maluwa a ntsanga.+
Mwandimomwene anthu ndi ninga tsanga iwisi.
9 Kwira paphiri yakulapha,
Iwe nkazi anabweresera Sioni mphangwa zadidi.+
Khuwa mwakugaluza kakamwe,
Iwe nkazi anabweresera Yerusalemu mphangwa zadidi.
Khuwa mwakugaluza, leka kugopa.
Dziwisa mizinda ya Yuda kuti: “Mulungu wanu ali pano.”+
Nkhombo zinafuna iye kupereka ziri na iye,
Pontho pinalipa iye piri na iye.+
11 Iye anadzatsalakana* nkumbi wace ninga pinacita nkumbizi.+
Iye anadzagumanyiza anamabira na manja ace,
Pontho anadzaakwata mbaaikha panthimandzi pace.
Iye anadzatsogolera mwadidi mabira anayamwisa.+
12 Kodi madzi onsene a mʼbara asakwana nʼdjanja ya ani,+
Pontho mbani adaphatisira djanja yace* toera kupima kudzulu?
14 Mbani adabvundzisa iye toera akhale na udziwisi,
Peno mbani adampfundzisa njira zaulungami,
Mbani adampfundzisa udziwisi,
Peno mbani adampangiza njira yakubvesesa kwandimomwene?+
15 Onani! Madzindza a anthu akhala ninga thotho ya madzi mu nʼgolo,
Pontho ndi ninga pfumbi yakucepa pa bhalansa.+
Onani! Iye asathukusa ntsuwa ninga pfumbi.
16 Ngakhale nsitu wa Libhano nee unakwana toera moto upitirize kugaka,*
Pontho pinyama pya nsitu unoyu nee pinakwana toera kupereka ntsembe zakupiswa.
17 Kwa iye, madzindza onsene a anthu asakhala ninga nee alipo;+
Iye asaaona ninga nkhabe basa, pontho asaaona ninga nkhabepo pinthu.+
18 Mulungu munamulandanisa na ani?+
Ndi cinthu cipi cinafuna kumulandanisa na imwe?+
19 Munthu asacita dzimunthu,*
Buluka penepo, nyakuphata basa na utale asaikhwaza ouro,+
Pontho iye asaisasanyira na maunyolo a parata.
20 Munthu asasankhula muti toera acite dzimunthu,+
Muti wakuti nkhabe bvunda.
Iye asasaka mesiri waluso,
Toera kusema dzimunthu yakuti nkhabe kugwa.+
21 Kodi imwe nee musapidziwa?
Kodi imwe nee mwabva?
Kodi imwe nee mwadziwiswa kutomera kale?
Kodi imwe nee mwabvesesa kutomera ndzidzi udacitwa dziko yapantsi?+
22 Alipo anakhala padzulu pa dziko yapantsi yakubulungika,*+
Pontho anthu anakhala mwenemo ndi ninga anyadzombe.
Iye asathasika kudzulu ninga nguwo yakupepa,
Pontho iye asafuthulako ninga tenti toera kukhalamo.+
23 Iye asamalisa pidzo pya atongi,
Pontho asacitisa anyakutonga miseru a pa dziko kukhala akusowa basa.
24 Iwo akhala ninga miti idatcekwa kwene cincino,
Iwo ndi ninga miti idabzwalwa cincino,
Iwo ndi ninga miti yakuti ikutoma kwene kukhala na mitcitci,
Yakuti isapepeserwa kabodzi basi mbiuma,
Pontho isamburuswa na mphepo ninga pinacitwa mapesi.+
25 “Kodi imwe munakwanisa kundilandanisa na ani? Mbani adalandana na ine?” Adalonga ndi Wakucena.
26 “Lamusani maso anu mbamuyangʼana kudzulu.
Mbani adacita nyenyezi zenezi zonsene?+
Ndi Ule wakuti asazicitisa kubuluka ninga anyankhondo, mbazilengesa ibodzi na ibodzi;
Iye asacemera ibodzi na ibodzi na dzina yace.+
Nakuti iye ali na mphambvu zizinji na zakudzumisa,+
Ibodzi na ibodzi iri pa mbuto yace.
27 Iwe Yakobe, pontho iwe Izraeli, thangwi yanji walonga kuti:
‘Yahova nee akuona njira yanga,
Pontho Mulungu nee anditsalakana mwakulungama’?+
28 Kodi iwe nkhabe kupidziwa? Kodi udzati kupibva?
Yahova, Ule Adacita pinthu pyonsene pa dziko yapantsi ndi Mulungu wakwenda na kwenda.+
Iye nkhabe neta, nee kukhala wakusowa mphambvu.+
Nkhabe anakwanisa kubvesesa udziwisi wace.+
30 Aphale asaneta mbakhala akusowa mphambvu,
Pontho aphale asagwegweduka mbagwa,
31 Mbwenye ale anadikhira Yahova anadzakhala pontho na mphambvu.
Iwo anadzamburuka kudzulu kakamwe ninga pyapungu.+
Iwo anadzathamanga mbakhonda neta;
Iwo anadzafamba mbakhonda neta.”+
41 “Imwe ntsuwa, matamani mbamundibvesera;
Imwe madzindza, khalani pontho na mphambvu.
Ndifendedzereni dhuzi, buluka penepo longani.+
Tendeni tigumanyikane toera titongesane.
2 Mbani adapasa mphambvu munthu wakumabulukiro a dzuwa,+
Mbancemera mu ulungami wace toera akhale dhuzi na miyendo yace*
Toera kumpasa madzindza,
Pontho toera kuncitisa kutonga amambo?+
Mbani adaphatisira supada yace toera kuacinja kudza pfumbi,
Mbaabalalisa na uta wace ninga pinacita mphepo na mapwepwa?
3 Iye asaathamangisa, mbakhonda kudzudzumiswa na cinthu
Mbapita na njira yakuti cipo aipita kale.
Pontho ndinakhala mʼbodzi ene kuna akumalisa.”+
5 Ntsuwa zaona pyenepi mbizitoma kugopa.
Ale anakhala kunkhomo kwa dziko yapantsi atoma kutetemera.
Iwo asagumanyikana pabodzi.
6 Mʼbodzi na mʼbodzi asaphedza ndzace
Pontho asapanga mʼbale wace: “Khala wakuwanga.”
7 Natenepa, ule anacita madzimunthu asapasa mphambvu ule anacita pinthu na utale;+
Ule anaphapata utale na martelo*
Asapasa mphambvu ule anamenya utale na martelo.
Iye asalonga: “Utale wasoldhariwi mwadidi.”
Buluka penepo dzimunthu isakhomerwa na maperego toera ikhonde kugwa.
8 “Mbwenye iwe Izraeli, ndiwe ntumiki wanga,+
Iwe Yakobe, ule adasankhula ine,+
Mwana* wa xamwali wanga Abhrahamu,+
9 Iwe ndiwe adakwata ine kubulukira kunkhomo kwa dziko yapantsi,+
Pontho iwe ndiwe adacemera ine kutali kakamwe.
Ine ndakupanga: ‘Iwe ndiwe ntumiki wanga;+
Ine ndakusankhula, pontho nee ndakukhonda.+
10 Leka kugopa, thangwi ine ndiri na iwe.+
Leka kupswipa ntima, thangwi ine ndine Mulungu wako.+
Ndinadzakuwangisa, inde, ndinadzakuphedza,+
Ine ndinadzakuphata mwakuwanga na djanja yanga yamadyo yaulungami.’
11 Ona! Onsene anaipirwa na iwe anadzapaswa manyadzo mbapwazwa.+
Ale anamenyana na iwe anadzaphiwa mbazambazika.+
12 Iwe unadzaasaka anthu anamenyana na iwe, mbwenye nee unadzaagumana;
Anadzakhala ninga cinthu cakuti nee ciripo, ninga cinthu cakuti nkhabeko.+
13 Thangwi ine Yahova Mulungu wako, ndaphata djanja yako yamadyo,
Ndine anakupanga kuti: ‘Leka kugopa. Ine ndinadzakuphedza.’+
14 Leka kugopa, iwe mpfunye* Yakobe,+
Imwe amuna a Izraeli, ine ndinadzakuphedzani,” adapilonga ndi Yahova, Muomboli wanu,+ Wakucena wa Izraeli.
15 “Ona! Ine ndiri kukucita toera ukhale cakububudira naco,+
Cakububuda naco cipswa cakukhala na madzino.
Iwe unadzaponda mbunyedza mapiri,
Pontho unadzagwisa nthunda mbazikhala ninga pinthu pyakusowa basa.
16 Iwe unadzaaponya ndzulu
Mphepo mbiakwata;
Condzi ca mphepo cinadzaamwaza.
17 “Anthu akusowa na akutcerenga ali kusaka madzi, mbwenye nee asaagumana.
Malirimi awo auma thangwi ya nyota.+
Ine Yahova ndinadzaatawira.+
Ine Mulungu wa Izraeli, nee ndinadzaasiya.+
18 Ine ndinadzacitisa nthunda kukhala na mikulo ya madzi,+
Pontho ndinadzacitisa magowa kukhala na micera ya madzi.+
Ine ndinadzacitisa thando kukhala gowa yakudzala na mitete,
Pontho ndinadzacitisa dziko yakusowa madzi kukhala na mphuno za madzi.+
Nʼthando ndinadzatcekamo muti wa junipero,
Muti wa frexo* pabodzi na muti wa sipre,+
20 Natenepa anthu onsene anaona mbadziwa,
Pontho anabvesera mbabvesesa
Kuti djanja ya Yahova ndiyo idacita pyenepi,
Pontho Wakucena wa Izraeli ndiye adacitisa pyenepi.”+
21 Yahova alonga: “Longani nseru wanu,
Perekani maonero anu,” adapilonga ndi Mambo wa Yakobe.
22 “Tipangizeni pidzindikiro, pontho tipangeni pinthu pinafuna kucitika.
Tipangeni pinthu pidacitika kale,*
Toera ife tipinyerezere,* mbatidziwa kuti ninji pinafuna kucitika.
Peno tipangeni pinthu pinafuna kudzacitika.+
23 Tipangeni pinthu pinafuna kucitika ntsogolo,
Toera ife tidziwe kuti imwe ndimwe alungu.+
Inde, citani cinthu cadidi peno cakuipa,
Toera ife tione pyenepi mbatidzumatirwa.+
24 Onani! Imwe ndimwe pinthu pyakuti nee piripo,
Pontho pinacita imwe ndi pyakusowa basa.+
Ule anasankhula kukulambirani ndi wakunyanyasa.+
25 Ine ndacemera munthu bulukira kunkwiriro, pontho iye anabwera,+
Munthu wakumabulukiro a dzuwa+ wakuti anadzacemera dzina yanga.
Iye anadzaponda-ponda atongi ninga dongo,+
Ninga pinacita nyakuumba pikalango na dongo.
26 Mbani adalonga pinthu pyenepi kutomera kale toera ife tipidziwe,
Peno kutomera mʼmidzidzi yakale toera ife tilonge: ‘Pinalonga iye mphyandimomwene’?+
Mwandimomwene, nkhabepo adadziwisa pyenepi!
Nee mʼbodzi adalonga pyenepi!
Nee mʼbodzi adabva pidalonga imwe!”+
27 Ine ndikhali wakutoma adapanga Sioni kuti: “Ona pinthu pinafuna kucitika!”+
Pontho ndinadzatuma munthu toera aende kalonge mphangwa zadidi ku Yerusalemu.+
28 Mbwenye ine ndapitiriza kuyangʼana, pontho nee ndaonapo munthu;
Pakati pawo nee pakhali na munthu toera kupereka uphungu.
Maseze ndapitiriza kubvundza, nkhabe munthu adanditawira.
29 Onani! Iwo onsene akhala ninga pinthu pyakuti nee piripo.
Pinacita iwo mphyapezi.
Madzimunthu awo* a utale ndi mphepo na akusowa basa.+
42 Onani! Uyu ndi ntumiki wanga+ wakuti ndisamʼphedza!
Ine ndansankhula,+ pontho ndisakomerwa naye!+
2 Iye nkhabe kudzakhuwa peno kugaluza fala yace,
Pontho iye nkhabe kudzacitisa kuti fala yace ibveke mu nseu.+
Iye anadzacita pinthu mwakukhulupirika mbabweresa ulungami.+
4 Ceza cace nee cinadzathowa, pontho nee anadzanyedzwa mpaka akhazikise ulungami pa dziko yapantsi;+
Pontho ntsuwa zisadikhira mwambo wace.*
5 Yahova Mulungu wandimomwene,
Ule adacita kudzulu mbafuthulako,+
Ule adacita dziko yapantsi na pyonsene pinamera mwenemo,+
Ule anapereka muya kuna anthu anakhala mwenemo,+
Pontho ule anapereka nzimu* kuna ale anafamba mwenemo alonga:+
6 “Ine Yahova wakuti ndisacita pinthu mwaulungami ndakucemera;
Ine ndaphata djanja yako.
Ine ndinadzakutsidzikiza, pontho iwe unadzakhala ninga cibverano pakati pa ine na mbumba,+
Pontho ninga ceza kuna madzindza,+
7 Toera ufungule maso a maboliboli,+
Toera kubulusa munthu ali nkaidi,
Pontho toera kubulusa nkaidi ale adakhala pantsi ncidima.+
8 Ine ndine Yahova. Ineyi ndi dzina yanga;
Ine nkhabe kupereka mbiri yanga kuna alungu anango,
Pontho kusimbwa kwanga nee ndinakupereka kuna madzimunthu akusemwa.+
9 Onani, pinthu pidalonga ine pakutoma pyacitika;
Cincino, ndiri kukudziwisani pinthu pipswa.
Mbapidzati kucitika, ine ndisakudziwisani.”+
10 Imbirani Yahova nyimbo ipswa,+
Nsimbeni na nyimbo kutomera kunkhomo kwa dziko yapantsi,+
Nsimbeni imwe munanyindira bara na pinthu pyonsene piri mwenemo.
Imwe ntsuwa na pyonsene piri mwenemo, nsimbeni.+
Mbakhuwe mwakutsandzaya anthu anakhala mʼmiyala;
Iwo mbakhuwe kakamwe padzulu pa mapiri.
12 Mbapase mbiri Yahova,
Pontho mbansimbe mu ntsuwa.+
13 Yahova anadzabuluka ninga nyankhondo.+
Iye anakhala ninga nyankhondo wakuti ali dzololo toera kuenda kunkhondo.+
Iye anakhuwa, inde, iye anakhuwa kakamwe ninga ale anaenda kunkhondo;
Iye anadzapangizika kukhala wamphambvu kakamwe kupiringana anyamalwa ace.+
14 “Ine ndamatama mu ndzidzi uzinji.
Ine ndapitiriza kumatama mbandikhonda kulonga.
Ninga nkazi mu ndzidzi unabala iye,
Mu ndzidzi ubodzi ene ndinabulira, ndinasowa mphambvu, pontho ndinapuma peko-peko.
15 Ine ndinadzafudza mapiri na nthunda,
Pontho ndinadzaumisa pinthu pyonsene pidamera mwenemo.
Ine ndinadzacinja mikulo kudza ntsuwa,
Pontho ndinadzaumisa magowa adadzala na mitete.+
16 Ine ndinadzatsogolera maboliboli toera afambe na njira yakuti iwo nkhabe kuidziwa,+
Pontho ndinadzaacitisa kuti afambe mʼmiseu yakuti iwo nkhabe kuidziwa.+
Ndinadzacinja cidima kudza ceza iwo mbakaona,+
Pontho mbuto yakukumbika-kumbika ndinadzaicinja mbikhala yakuzwerera.+
Ine ndinadzaacitira pyenepi, pontho nee ndinadzaathawa.”
17 Ale ananyindira madzimunthu akusemwa
Anadzakakamizika toera kubwerera nduli, pontho anadzapasika manyadzo,
Ale analonga kuna madzimunthu a utale:* “Imwe ndimwe alungu athu.”+
19 Kodi alipo boliboli kusiyapo ntumiki wanga?
Kodi alipo munthu wakuti nkhabe kubva nee pangʼono pene ninga munthu adatuma ine?
Mbani wakuti nkhabe kuona nee pangʼono pene ninga ule adapasa ine nkhombo?
Mbani wakuti nkhabe kuona nee pangʼono pene ninga ntumiki wa Yahova?+
20 Iwe usaona pinthu pizinji, mbwenye nee usapionesesa.
Makutu ako afunguka, mbwenye iwe nkhabe kubva.+
21 Thangwi ya ulungami wace,
Yahova asafuna kakamwe kuti mwambo wace upaswe mbiri na kulemedzwa.
22 Iyi ndi mbumba yakuti yatapatirwa pinthu pyawo mbapibiwa;+
Onsene afungirika mphako, mbabisala nkaidi.+
Atapatirwa pinthu pyawo mbasowa munthu wakuapulumusa,+
Pontho iwo aberwa pinthu pyawo mbasowa munthu wakulonga kuti: “Pibwezeni!”
23 Mbani mwa imwe anafuna kubva pyenepi?
Mbani anafuna kubvesera mbabvesesa pinafuna kucitika ntsogolo?
24 Mbani adapereka Yakobe ninga pyakutapatwa,
Pontho mbani adapereka Izraeli kuna anyakutapata?
Kodi si Yahova tayu, ule adadawira ife?
Iwo akhonda kufamba munjira zace,
Pontho iwo akhonda kubvera mwambo wace.+
25 Natenepa Iye aakhutulira ukali wace,
Kuipirwa kwace na ukali wace wa nkhondo.+
Nkhondo yafudza pinthu pyonsene pikhali nʼkhundu mwawo, mbwenye iwo nee acita pinthu.+
Nkhondo ikhaapisa, mbwenye iwo nee akhatsalakana pyenepi.+
43 Ipi ndi pidalonga Yahova,
Ule adakucita iwe Yakobe, Ule adakusasanya iwe Izraeli:+
“Leka kugopa, thangwi ine ndakuombola.+
Ine ndakucemera na dzina yako.
Iwe ndiwe wanga.
Ungafamba pakati pa moto, iwo nee unadzakupisa,
Pontho malirimi a moto nee anadzakubvula.
3 Thangwi ine ndine Yahova Mulungu wako,
Wakucena wa Izraeli, Mpulumusi wako.
Ine ndapereka Ejitu, Etiopya na Sebha
Ninga ciomboli kuna iwe.
Natenepa, ndinadzapereka mbumba thangwi ya iwe,
Pontho ndinadzapereka madzindza toera kupulumusa umaso wako.
5 Leka kugopa, thangwi ine ndiri na iwe.+
Ndinadzabweresa anako* kubulukira kumabulukiro a dzuwa
Mbandikugumanyani kubulukira kumadokero a dzuwa.+
6 Ine ndinadzapanga kunkwiriro: ‘Abweze kwawo!’+
Pontho ndinadzapanga kunterero: ‘Leka kuakhondesa.
Bweresa ananga amuna kubulukira kutali, pontho bweresa ananga akazi kubulukira kunkhomo kwa dziko yapantsi.+
7 Bweresa onsene anacemerwa na dzina yanga,+
Pontho ale adacita ine toera kundipasa mbiri,
Inde, ale adacita ine.’+
8 Bulusani mbumba yakuti ndi maboliboli, maseze ali na maso,
9 Madzindza onsene mbagumanyikane pa mbuto ibodzi ene,
Pontho mbumba zonsene mbazigumanyikane pabodzi pene.+
Pakati pawo,* mbani anafuna kwanisa kulonga pyenepi?
Peno, kodi iwo anakwanisa kutipanga pinthu pinafuna toma kucitika,+
Mbabwerese amboni awo toera kupangiza kuti pinalonga iwo ndi pyandimomwene,
Peno acitise anango kubva mbalonga: ‘Unoyu ndi undimomwene!’”+
10 Yahova alonga: “Imwe ndimwe mboni zanga,+
Inde, ntumiki wanga adasankhula ine,+
Toera mundidziwe mbamundikhulupira,*
Pontho toera mubvesese kuti ine ndine Mʼbodzi ene.+
Ine mbandidzati kukhalapo, nee pakhali Mulungu unango,
Pontho patsogolo panga nee panadzaonekabve Mulungu unango.+
11 Ine ndine Yahova,+ pontho kusiyapo ine nkhabepo mpulumusi unango.”+
12 “Ine ndine Ule adakupangani pinthu pinafuna kucita ine, ule adakupulumusani, pontho ule adakudziwisani pyenepi,
Mu ndzidzi wakuti nee mukhali na mulungu unango pakati panu.+
Natenepa, imwe ndimwe mboni zanga,” alonga Yahova, “pontho ine ndine Mulungu.+
13 Kusiyapo pyenepi, ndzidzi onsene ine Ndine mʼbodzi ene;+
Pontho nkhabepo anafuna kwanisa kundipokosera cinthu mʼmanja mwanga.+
Mu ndzidzi unacita ine pinthu, mbani anafuna kwanisa kupipingiza?”+
14 Yahova Muomboli wanu,+ Wakucena wa Izraeli alonga tenepa:+
“Thangwi ya imwe, ine ndinatuma nsoka wa anyankhondo toera kuenda ku Bhabhilonya, pontho ndinacitisa kuti mipiringanyo yonsene ya misuwo mikulu igwe,+
Akaldheya anadzakhuwa mʼmabote mwawo mwakutsukwala.+
15 Ine ndine Yahova, Wakucena wanu,+ ule Adacita Izraeli,+ Mambo wanu.”+
16 Ipi ndi pidalonga Yahova,
Ule adafungula njira pakati pa bara,
Pontho ule adafungula njira pa madzi a mabimbi,+
17 Ule anaendesa kunkhondo ngolo za nkhondo na makavalo,+
Nsoka wa anyankhondo pabodzi na anyankhondo amphambvu:
“Iwo anadzagwa mbacimwana kulamuka.+
Iwo anadzathimiswa ninga tursida ya nyale.”
18 “Lekani kukumbuka pinthu pyakale,
Pontho lekani kupitiriza kupinyerezera.
19 Onani! Ine ndiri kucita pinthu pipswa;+
Pontho ipyo pikucitika.
Kodi imwe mudzati kupidzindikira?
20 Pinyama pya ntsanga pinadzandilemedza,
Anambwa a ntsanga na maavestruji,
Thangwi ndacitisa kuti nʼthando mubuluke madzi,
Mbandiikhamo mikulo,+
Toera mbumba yanga, anthu adasankhula ine+ amwe,
21 Mbumba idagumanya ine
Toera idziwise mbiri yanga.+
23 Imwe nee mwandibweresera mabira toera muapereke ninga ntsembe zakupiswa,
Pontho nee mwandipasa mbiri na ntsembe zanu.
Ine nee ndakukakamizani toera mundibweresere miyoni,
Pontho ine nee ndakunetesani kakamwe mu ndzidzi ukhakuphembani ine insenso.+
24 Iwe nee waphatisira kobiri yako toera kundigulira phesi yakununkhira,
Pontho nee wandikhutisa na mafuta a ntsembe zako.+
Mbwenye wandilemeresa na madawo ako,
Pontho wandinetesa na madodo ako.+
26 Khala ciripo cidaduwala ine, ndikumbusembo;
Longa maonero ako toera kupangiza kuti pinalonga iwe mphyandimomwene.
28 Natenepa, ndinadzaona atsogoleri a pa mbuto yakucena ninga anthu akukhonda cena,
Ine ndinadzapereka Yakobe toera afudzwe,
Pontho ndinadzatawirisa Izraeli toera atikanwe.+
44 “Cincino bvesera iwe ntumiki wanga Yakobe
Na iwe ntumiki wanga Izraeli, ule adasankhula ine.+
2 Ipi ndi pidalonga Yahova,
Ule adakucita na ule adakuumba,+
Ule adakuphedza mu ndzidzi ukhali iwe mʼmimba:
5 Mʼbodzi anadzalonga: “Ine ndine wa Yahova.”+
Unango anadzapasika ekhene dzina ya Yakobe,
Unangombo anadzalemba mʼmanja mwace: “Ndine wa Yahova.”
Pontho unango anadzapasika dzina yakuti Izraeli.’
‘Ine ndine wakutoma na wakumalisa.+
Kusiyapo ine, nkhabepo Mulungu unango.+
7 Mbani wakulandana na ine?+
Mbatawire mwakugaluza,
Pontho mbandipangize umboni wace!+
Mbalonge pinthu pinafuna kucitika cincino na pinafuna kucitika ntsogolo,
Ninga pinacita ine kutomera ndzidzi udakhazikisa ine mbumba yakale.
Kodi nee ndakupangani mbandikudziwisani pyenepi mbapidzati kucitika?
Imwe ndimwe mboni zanga.+
Kodi alipo Mulungu unango kusiyapo ine?
Nkhabe, nkhabepo Mwala unango;+ nkhabepo mwala unango unadziwa ine.’”
9 Onsene anasema madzimunthu ndi akusowa basa,
Pontho madzimunthu anafuna iwo kakamwe anadzakhala akusowa basa.+
Ninga amboni awo, iwo* nkhabe ona cinthu, pontho nkhabe dziwa cinthu,+
Na thangwi ineyi, ale anacita madzimunthu anewa anadzapaswa manyadzo.+
11 Onani! Andzace onsene anadzapaswa manyadzo!+
Ale anacita madzimunthu anewa ndi anthu ene pyawo.
Onsene mbagumanyikane, pontho mbakhale mʼmbuto zawo.
Iwo anadzagopa kakamwe, pontho anadzapaswa manyadzo pabodzi pene.
12 Nyakufula utale asaphata utale pa moto na faramentu yace.*
Iye asaufula na martelo,
Mbausasanya na nkono wace wamphambvu.+
Buluka penepo asaphatwa na njala mbasowa mphambvu;
Thangwi yakukhonda kumwa madzi, iye asaneta.
13 Mesiri wakusema miti, asafuthula nkhambala yakupima nayo, mbalemba muti na jiji yakufuira.
Iye asaphatisira macado, pontho asaulemba na faramentu inango yakulemba nayo.*
14 Pana unango wakuti asagwanda miti ya sedhro.
Iye asasankhula ntundu unango wa muti, muti ukulu,
Pontho iye asautsalakana toera ukhale ukulu kakamwe pakati pa miti inango ya mu nsitu.+
Iye atceka muti,* pontho madzi asacitisa muti unoyu kukula.
15 Buluka penepo, munthu asaikha pa moto muti unoyu mbukhala ninga nkhuni.
Khundu inango, iye asaigasa toera kuotha;
Khundu inango asagasa nayo moto toera kuphika nkate.
Kusiyapo pyenepi, iye asacita mulungu na muti unoyu mbaulambira.
Iye asacinja muti unoyu mbudza dzimunthu yakusemwa, pontho asagodama pamaso pa dzimunthu ineyi.+
16 Khundu ibodzi ya muti unoyu asaipisa pa moto;
Khundu inango asaotca nayo nyama, asadya mbakhuta.
Pontho iye asaiotha mbalonga:
“Ahede! Ine ndiri kupisirwa uku mbandikayangʼana moto.”
17 Mbwenye khundu idasala, iye asaicinja kudza mulungu mbikhala dzimunthu yace yakusemwa.
Iye asaigodamira, mbailambira.
Iye asacita phembero kuna dzimunthu ineyi mbalonga:
“Ndipulumuse, thangwi iwe ndiwe mulungu wanga.”+
18 Iwo nkhabe dziwa cinthu, pontho nkhabe kubvesesa cinthu,+
Thangwi maso awo aphimbirwa, mbacimwana kuona,
Pontho mitima yawo nkhabe dzindikira pinthu.
19 Nkhabepo ananyerezera,
Nkhabepo ali na udziwisi peno kubvesesa pinthu mbalonga:
“Phindi ya muti ndaipisa pa moto,
Pontho makala ace ndaphika nawo nkate mbandiotca nyama toera kudya.
Kodi phindi idasala ya muti unoyu, ndisafunika kuicinja mbidza cinthu cakunyanyasa?+
Kodi ine ndisafunika kulambira phindi ya muti?”*
20 Iye akhala ninga munthu anadya dotha.
Ntima wace wanʼnyengeza mbumpeusa.
Iye nkhabe kwanisa kupulumusa umaso wace, pontho iye nkhabe kwanisa kulonga kuti:
“Ndiri na cinthu cakusowa basa mʼmanja mwanga.”
21 “Kumbuka pinthu pyenepi, iwe Yakobe, pontho kumbuka pyenepi, iwe Izraeli,
Thangwi iwe ndiwe ntumiki wanga.
Ine ndakucita, pontho iwe ndiwe ntumiki wanga.+
Iwe Izraeli, ine nkhabe kudzakuduwala.+
22 Ine ndinadzafudza madawo ako mbakhala ninga aphimbirwa na khole,+
Pontho madawo ako anadzakhala ninga aphimbirwa na khole yakupswipa kakamwe.
Bwerera kuna ine, thangwi ine ndinadzakuombola.+
23 Khuwani mwakutsandzaya, imwe anakhala kudzulu,
Thangwi Yahova acita pinthu!
Khuwani mwakutsandzaya, imwe anakhala pantsi kakamwe pa dziko yapantsi!
Khuwani mwakutsandzaya, imwe mapiri,+
Misitu na miti yonsene iri mwenemo!
Thangwi Yahova aombola Yakobe,
Pontho apangiza mbiri yace kuna Izraeli.”+
24 Ipi ndi pidalonga Yahova, Muomboli wako,+
Ule adakucita kutomera mʼmimba:
“Ine ndine Yahova, ule adacita pinthu pyonsene.
Mbani akhali na ine?
25 Ine ndisapingiza pidzindikiro pya aprofeta authambi,
Pontho ndine anacitisa kuti anyakulotera acite pinthu ninga madzemwa;+
Ndine anacitisa anthu andzeru kusowa cakucita,
Pontho ndisacitisa ndzeru zawo kukhala zakusowa basa;+
26 Ine ndine Ule anakwanirisa mafala a ntumiki wace,
Pontho ndine ule anakwanirisa masomphenya a anthu adatuma iye;+
Ule analonga pya Yerusalemu kuti: ‘Anthu anadzakhala mwenemu,’+
Pontho ule analonga pya mizinda ya Yuda: ‘Iyo inadzamangwa pontho,+
Ine ndinadzamanga pontho Yerusalemu wakuti akhadafudzwaʼ;+
27 Ule anapanga madzi akuzika kuti: ‘Uma,
Pontho ndinadzaumisa mikulo yako yonseneʼ;+
28 Ule analonga pya Siro:+ ‘Iye ndi nkumbizi wanga,
Pontho iye anadzacita pyonsene pinafuna ineʼ;+
Ule analonga pya nzinda wa Yerusalemu: ‘Iwo unadzamangwa pontho,’
Pontho ule analonga pya templo kuti: ‘Unadzatoma kumangwa.’”+
45 Ipi ndi pidalonga Yahova kuna nyakudzodzwa wace Siro,+
Ule adaphata ine djanja yace yamadyo+
Toera ndikunde madzindza a anthu pamaso pace,+
Toera ndimalise mphambvu za amambo,
Toera kufungula pamaso pace misuwo miwiri yakuphatanizwa,
Natenepa misuwo mikulu nee inadzafungwa:
Ndinadzagwanda-gwanda misuwo ya nkuwa,
Pontho ndinadzagwanda mipiringanyo ya utale.+
3 Ine ndinadzakupasa mpfuma zidakoyiwa mʼmbuto zacidima,
Pontho ndinadzakupasa mpfuma zidabiswa mʼmbuto zakupata,+
Toera iwe udziwe kuti ine ndine Yahova,
Mulungu wa Izraeli, ule anakucemera na dzina yako.+
4 Ine ndisakucemera na dzina yako
Thangwi ya ntumiki wanga Yakobe na Izraeli, ule adasankhula ine.
Ine ndiri kukupasa dzina yacilemedzo, maseze iwe nkhabe kundidziwa.
5 Ine ndine Yahova, pontho nkhabepo unango.
Nkhabepo Mulungu unango kusiyapo ine.+
Ine ndinadzakupasa mphambvu maseze iwe nkhabe kundidziwa,
6 Toera anthu adziwe,
Kutomera kumabulukira a dzuwa mpaka kumadokero a dzuwa
Kuti nkhabepo unango kusiyapo ine.+
Ine ndine Yahova, pontho nkhabepo unango.+
7 Ine ndisacita ceza+ na cidima,+
Ine ndisabweresa ntendere+ na nyatwa;+
Ine Yahova ndisacita pyenepi pyonsene.
8 Madzi mbabvumbe bulukira kudzulu;+
Mitambo mbibvumbise ulungami.
Mataka mbafunguke toera abale misapo yacipulumuso,
Pa ndzidzi ubodzi ene, mataka mbacitise ulungami kuphukira.+
Anacitisa pyenepi ndine Yahova.”
9 Dzedze kuna ule analongezana na Adancita,
Thangwi iye akhala ninga dzinga,
Yakuti iri pakati pa madzinga anango ali pantsi!
Kodi dongo inakwanisa kupanga ule anaiumba kuti: “Ninji pinacita iwe?”+
Peno cinthu cidacita iwe cinakwanisa kulonga: “Iye nkhabe manja”?*
10 Dzedze kuna ule anabvundza baba: “Ndi ntundu wanji wa mwana anafuna bala imwe?”
Pontho dzedze kuna ule anabvundza mama: “Ndi ntundu wanji wa mwana anabala imwe?”*
11 Ipi ndi pinalonga Yahova, Wakucena wa Izraeli,+ ule adancita:
“Kodi iwe usapenula pinthu pinafuna kucita ine,
Mbunditonga thangwi ya ananga+ na mabasa a manja anga?
12 Ine ndacita dziko yapantsi,+ pontho ndacita munthu mbandimuikha mwenemo.+
13 Yahova wa anyankhondo alonga: “Mu ulungami wanga ine ndakhunganya munthu toera acite pinthu,+
Pontho ine ndinadzalungamisa njira inadzafuna kupita na iye.
Ndiye anafuna kudzandimangira nzinda wanga+
Mbabulusa mbumba yanga mu ubitcu+ mwakukhonda kulipwa peno kudyekerwa.”+
14 Yahova alonga tenepa:
“Pinthu pinawina* Aejitu, malonda* a ku Etiopya na Asebheya, na amuna akulapha,
Anadzabwera kuna iwe mbakhala ako.
Iwo anadzakutowera uku amangwa na maunyolo.
Iwo anadzabwera mbagodama patsogolo pako.+
Iwo anadzalonga kuna iwe mʼphembero: ‘Mwandimomwene Mulungu ali na iwe,+
Pontho nkhabepo unango; nkhabepo Mulungu unango.’”
15 Mwandimomwene imwe ndimwe Mulungu wakuti musabisala,
Mulungu wa Izraeli, Mpulumusi.+
16 Iwo anadzapwazwa mbapaswa manyadzo;
Anyakucita madzimunthu onsene anadzabuluka mbaenda mwakupwazika.+
17 Mbwenye Yahova anadzapulumusa Izraeli kwenda na kwenda.+
Kwenda na kwenda, iwe nee unadzapaswa manyadzo peno kupwazwa.+
18 Thangwi ipi ndipyo pidalonga Yahova,
Nciti wakudzulu,+ Mulungu wandimomwene,
Ule adacita dziko yapantsi, ule adaicita mbaikhazikisa mwakuwanga,+
Ule wakuti nee aicita papezi,* mbwenye aicita toera anthu akhalemo:+
“Ine ndine Yahova, pontho nkhabepo unango.
19 Ine nee ndalonga pa mbuto yakubisika,+ mu dziko yacidima;
Ine nee ndapanga dzindza* ya Yakobe kuti:
‘Ndisakeni mbwenye kuwangisira kwanu kunakhala kwapezi.’
Ine ndine Yahova, ule analonga pinthu pyandimomwene, pontho anadziwisa pinthu pyakulungama.+
20 Gumanyikanani mbamubwera.
Ndifendedzereni imwe adapulumuka kuna madzindza anango.+
Ale anathukula madzimunthu akusemwa, nkhabe cinadziwa iwo,
Pontho asacita phembero kuna mulungu wakuti nee anaapulumusa.+
21 Fokotozani, pontho longani nseru wanu.
Iwo mbabvundzisane unango na ndzace.
Mbani adalongeratu pinthu pyenepi kale kakamwe,
Pontho mbani adadziwisa pinthu pyenepi mʼmidzidzi yakale?
Sine tayu Yahova?
Nkhabepo Mulungu unango kusiyapo ine;
Nkhabepo Mulungu unango waulungami na Mpulumusi+ kusiyapo ine.+
22 Imwe munakhala pa dziko yonsene yapantsi, bwerani kuna ine toera mupulumuswe,+
Thangwi ine ndine Mulungu, pontho nkhabepo unango.+
23 Ine ndadumbira mu dzina yanga;
Mafala adabuluka nkanwa mwanga mbandimomwene,
Pontho iwo nee anadzabwerera:+
Anthu onsene anadzandigodamira,
Anthu onsene anadzadumbira kuti ndi akukhulupirika kuna ine,+
24 Pontho anadzalonga: ‘Ulungami wandimomwene na mphambvu piri kuna Yahova.
Onsene anaipirwa na iye anadzabwera pamaso pace mbakhala na manyadzo.
25 Dzindza* yonsene ya Izraeli inadzaona kuti yacita pyadidi kutumikira Yahova,+
Pontho iwo anadzagaya thangwi ya pinthu pidacita iye kuna iwo.’”
46 Bheli akotama,+ Nebho apendama.
Madzimunthu akwizwa pa pinyama, pinyama pyakuthukula napyo mitolo,+
Ninga mitolo yakuti isalemeresa pinyama pyakuneta.
2 Alungu anewa anadzakotama, mbagodama pabodzi pene;
Iwo nee anakwanisa kupulumusa mitolo,*
Pontho iwo ene akuendeswa ku ubitcu.
3 “Ndibvesereni imwe anthu a dzindza ya Yakobe, pontho imwe monsene mudasala pakati pa mbumba ya Izraeli,+
Imwe anatsalakana ine kutomera mu ndzidzi udabalwa imwe na imwe anakwata ine kutomera mu ndzidzi ukhali imwe mʼmimba.+
4 Mpaka imwe kukalamba, ine ndinadzakhala mʼbodzi ene;+
Mpaka imwe mubuluke imbvi, ine ndinapitiriza kukutsalakanani.
Ninga pinacita ine, ine ndinakukwatani, ndinakutsalakanani, pontho ndinakupulumusani.+
6 Alipo ale anagubudza ouro mʼmaborosa mwawo;
Mbapima parata pa bhalansa.
Iwo asasaka nyakufula utale toera acite mulungu na parata ineyi.+
Buluka penepo iwo asagodamira dzimunthu ineyi mbailambira.+
7 Iwo asaikwata mbaiikha mʼmapewa mwawo;+
Iwo asaithukula mbaiikha pa mbuto payo, pontho iyo isakhala penepo dzololo.
Iyo nkhabe buluka pa mbuto payo.+
Iwo asaicemera, mbwenye iyo nkhabe tawira;
Iyo nkhabe kupulumusa munthu angakhala pa nyatwa.+
8 Kumbukani pyenepi, pontho khalani acipapo.
Bveserani mwadidi, imwe anyakucita pyakuipa.
9 Kumbukani pinthu pyakale,* pinthu pidacitika kale kakamwe,
Kuti ine ndine Mulungu, pontho nkhabepo unango.
Ine ndine Mulungu, pontho nkhabepo unango wakulandana na ine.+
10 Pinthu mbapidzati kucitika, ine ndisalonga mwanyapantsi kuti pinacitika tani,
Pontho kutomera kale kakamwe, ndisalonga pinthu pyakuti pidzati kucitika.+
Ine ndisalonga: ‘Mwakukhonda penula, pinthu pidapikira ine pinadzacitika,+
Pontho ndinadzacita pyonsene pinafuna ine.’+
11 Ine ndinadzacemera capungu kumabulukiro a dzuwa,+
Ndinadzacemera munthu bulukira ku dziko yakutali toera abwere kudzacita pinafuna ine.+
Ine ndalonga pyenepi, pontho ndinadzapicita.
Ine ndakhazikisa cifuniro canga, pontho ndinacikwanirisa.+
12 Ndibvesereni imwe anthu akuuma mitima,
Imwe akuti muli kutali kakamwe na ulungami.
13 Ndzidzi toera kupangiza ulungami wanga uli dhuzi;
Iwo nee uli kutali,
Pontho ndzidzi unafuna ine kupulumusa anthu nee unadembuka.+
Ine ndinadzapulumusa Sioni, mbandipasa Izraeli mbiri yanga.”+
47 Tcita, pontho khala pa pfumbi,
Iwe mwali mwana wa Bhabhilonya.+
Khala pantsi pa mbuto yakuti nee iri na mpando waumambo,+
Iwe mwana wankazi wa Akaldheya,
Thangwi cipo anthu anakulemedza pontho ninga mwana wa mambo.
2 Kwata libwe mbupeya ufa.
Bulusa nguwo inaphimbira na iwe nsolo wako.
Dula kapoti wako, pontho funya nguwo zidabvala iwe toera miyendo ikhale panja.
Wambuka mikulo.
3 Anthu anadzakuona pezi.
Manyadzo ako anadzapangizika pakweca.
Ine ndinakubwezera pyakuipa pidacita iwe,+ pontho nkhabe anafuna kundikhondesa.*
5 Iwe mwana wankazi wa Akaldheya,+
Pita ncidima, khala pantsi, pontho leka kulonga;
Cipo unadzacemerwa pontho Nyanyi wa Maumambo.+
6 Ine ndaipirwa kakamwe na mbumba yanga.+
Mbwenye iwe nee waabvera ntsisi.+
Ngakhale anthu akukalamba iwe waathukisa ntolo wakulemera.+
7 Iwe walonga: “Ine ndinakhala Nyanyi kwenda na kwenda.”+
Iwe nee watsalakana pinthu pyenepi;
Nee wanyerezera kuti pinthu pyenepi pinadzamala tani.
8 Bvesera ipi iwe unakomerwa na tsendzo,+
Iwe unakhala mwakutsidzikizika, mbulonga muntima mwako:
“Wamphambvu ndine basi, nkhabepo unango wakulandana na ine.+
Nee ndinadzakhala nzice.
Cipo ndinadzaferwa na ana.”+
9 Mbwenye pinthu pyenepi piwiri pyene, pinadzabwera kuna iwe mwakututumusa pa ntsiku ibodzi ene:+
Kukhala nzice, pontho kuferwa na ana.
Mwakukhonda penula, pinthu pyenepi pinadzacitika kuna iwe,+
Thangwi ya* kuinjipa kwa pyaungʼanga pinacita iwe, pontho thangwi ya mphambvu yako yonsene ya masalapita.+
10 Iwe ukhanyindira pyakuipa pikhacita iwe.
Iwe ukhalonga: “Nkhabepo anandiona.”
Udziwisi wako na ndzeru zako ndipyo pidakupeusa,
Pontho iwe usalonga muntima mwako: “Wamphambvu ndine basi, nkhabepobve unango.”
11 Mbwenye iwe unadzagwerwa na nyatwa,
Pontho pyaungʼanga pinacita iwe nee pinapingiza nyatwa zinafuna kukugwera.*
Nyatwa zinakugwera, pontho iwe nee unakwanisa kuzicalira.
Kufudzwa kwako kunadzakhala kwakututumusa, pinthu pyakuti cipo iwe wapiona kale.+
12 Natenepa, pitiriza na masalapita ako, pontho na pinthu pyako pizinji pyaungʼanga,+
Pyakuti usapicita kutomera mu uwana wako.
Panango pinakuphedza;
Panango unacitisa napyo anthu kukugopa.
13 Iwe waneta na mwinji wako wa anyakupereka uphungu.
Iwo mbabwere kuna iwe toera akupulumuse,
Ale analambira pinthu pyakudzulu,* ale anadinga nyenyezi,+
Ale analonga pinafuna kukucitikira,
Mwezi ungabalwa.
14 Onani! Iwo ndi ninga mapesi.
Moto unadzaapisa.
Iwo nee anakwanisa kupulumusika okhene* pa malirimi a moto.
Iwo si makala a moto tayu toera anthu aothe,
Pontho unoyu si moto toera kuotha tayu.
15 Pyenepi ndipyo pinafuna kudzacitika kuna anyamasalapita ako,
Ale adaphata na iwe basa kutomera mu uwana wako.
Iwo anadzabalalika, mʼbodzi na mʼbodzi mbaenda na njira yace.*
Nkhabe munthu anafuna kudzakupulumusa.+
48 Bveserani ipi, imwe a dzindza ya Yakobe,
Imwe mudapasika dzina ya Izraeli,+
Pontho imwe adabuluka kuna Yuda,*
Imwe anadumbira mu dzina ya Yahova,+
Pontho imwe munacemera Mulungu wa Izraeli,
Maseze musacita pyenepi mwaumpfakafaka na mwakusowa ulungami.+
2 Thangwi iwo apasika dzina ya nzinda wakucena,+
Mbasaka ciphedzo ca Mulungu wa Izraeli,+
Wakuti dzina yace ndi Yahova wa anyankhondo.
3 “Ine ndakupangani kale kakamwe pinthu pidamala kucitika.*
Mulomo wanga walonga pyenepi,
Pontho ine ndakudziwisani.+
Mwakukhonda dembuka, ine ndacita pinthu pidalonga ine mbapikwanirisika.+
4 Nakuti ine ndikhadziwa kuti ndiwe munthu wakukhonda bvera,
Kuti uzingo wa khosi yako ndi wakuwanga ninga utale, pontho nkhope yako ndi ninga nkuwa,+
5 Ine ndakupanga pyenepi kale kakamwe.
Pinthu pyenepi mbapidzati kucitika, ine ndakudziwisa,
Toera iwe ukhonde kulonga: ‘Adacita pyenepi ndi dzimunthu yanga;
Dzimunthu yanga yakusemwa na dzimunthu yanga ya utale* ndiyo idatonga kucita pyenepi.’
6 Iwe wabva, pontho waona pyenepi pyonsene.
Kodi nee unapangambo anango?+
Kutomera cincino kuenda ntsogolo, ine ndinakupanga pinthu pipswa,+
Pinthu pyakuti iwe nee ukhapidziwa, thangwi pikhali ncibisobiso.
7 Pyenepi pikucitwa cincino, nee pyacitwa kale kakamwe,
Pinthu pyakuti cipo iwe ukhadapibva kale,
Toera iwe ukhonde kulonga: ‘Onani, ine ndikhapidziwa kale.’
8 Iwe nee wapibva,+ pontho nee ukhapidziwa kale,
Kalene makutu ako akhadafungwa.
Thangwi ine ndisadziwa kuti iwe usacita pinthu pizinji kakamwe pya umpfakafaka,+
Pontho iwe usacemerwa nyakudawa kutomera mu ndzidzi udabalwa iwe.+
9 Mbwenye thangwi ya dzina yanga, ine ndinabweza ukali wanga;+
Thangwi ya mbiri yanga, ine nee ndinadzapangiza ukali wanga kuna iwe,
Pontho nee ndinadzakufudza.+
10 Ona, ine ndakusungula, mbwenye tayu ninga pinacitwa parata.+
Ine ndakuyesera* mbandikunyungulusa pa mbuto inanyungulusirwa utale.+
11 Ine ndinacita pinthu thangwi ya dzina yanga+
Thangwi yanji ndinatawirisa kuti dzina yanga ipswipiswe?+
Mbiri yanga nee ndinaipereka kuna unango.
12 Ndibvesere, iwe Yakobe na iwe Izraeli, ule adacemera ine.
Ndingapicemera, ipyo pisabwera.
14 Khalani pabodzi pene imwe monsene, pontho bveserani.
Mbani pakati pawo* adadziwisa pinthu pyenepi?
Ule wakuti Yahova asanfuna.+
Anadzacita ku Bhabhilonya pyonsene pinafuna iye,+
Pontho iye anaphatisira nkono wace toera kufudza Akaldheya.+
15 Ine ndalonga, pontho ndancemera.+
Ine ndamʼbweresa, pontho ndinadzacitisa kuti pinthu pinfambire mwadidi.+
16 Bwerani dhuzi na ine, pontho bveserani ipi.
Bulukira pakutoma, ine nee ndalonga ncibisobiso.+
Mu ndzidzi ukhacitika pinthu, ine ndikhali penepo.”
Mbwenye cincino, Yahova Mbuya Wankulu Kakamwe atuma ine, pontho atuma nzimu wace.
17 Ipi ndi pidalonga Yahova Muomboli wako, Wakucena wa Izraeli:+
“Ine Yahova ndine Mulungu wako,
Ule anakupfundzisa toera pinthu pikufambire mwadidi,+
Ule anakupangiza njira inafunika iwe kufamba nayo.+
18 Mbapidakhala mwadidi kakamwe mbudabvera matongero anga!+
Natenepa, ntendere wako mbudakhala ninga nkulo,+
Pontho ulungami wako mbudakhala ninga mabimbi a mʼbara.+
Cipo madzina awo mbadabuluswa, peno kufudzwa pamaso panga.
20 Bulukani mʼBhabhilonya!+
Thawani Akaldheya!
Khuwani mwakutsandzaya toera kudziwisa pyenepi! Pidziwiseni!+
Dziwisani pyenepi mpaka kunkhomo kwa dziko yapantsi.+
Longani: “Yahova aombola ntumiki wace Yakobe.+
21 Mu ndzidzi ukhaatsogolera iye mʼmbuto zakusowa madzi, iwo nee akhabva nyota.+
Iye aabulusira madzi pamwala;
Iye aswa mwala, mbacitisa madzi kubuluka penepo.”+
22 Yahova alonga: “Nkhabeko ntendere kuna ale anacita pinthu pyakuipa.”+
49 Imwe ntsuwa, ndibvesereni,
Pontho bveserani mwadidi imwe madzindza anakhala kutali.+
Yahova andicemera ine mbandidzati kubalwa.*+
Kutomera mu ndzidzi ukhali ine mʼmimba mwa mai wanga, iye acemera dzina yanga.
Iye andicitisa kukhala pswimo yakunozwa;
Iye andibisa mʼbudu yace yakuikhira mapswimo.
3 Iye andipanga: “Iwe Izraeli, iwe ndiwe ntumiki wanga,+
Kubulukira kuna iwe, ine ndinadzapangiza mbiri yanga.”+
4 Mbwenye ine ndalonga: “Ine ndaphata basa papezi.
Ine ndabvunga mphambvu zanga papezi na pinthu pyakusowa basa.
5 Yahova, ule adandicita toera ndikhale ntumiki wace kutomera mu ndzidzi ukhali ine mʼmimba,
Andipanga toera ndiendese pontho Yakobe kuna iye,
Toera Izraeli agumanyizwe kuna iye.+
Kuna Yahova ine ndinadzapaswa mbiri,
Pontho Mulungu wanga anadzakhala mphambvu yanga.
6 Iye alonga: “Ine ndakukhazikisa toera ukhale ntumiki wanga
Tayu basi ene toera ubwezerese madzindza a Yakobe,
Na kubwezeresa pontho Aizraeli adapulumuswa.*
Ine ndakuperekambo ninga ceza kuna madzindza anango,+
Toera cipulumuso canga cifike kunkhomo kwa dziko yapantsi.”+
7 Yahova Muomboli wa Izraeli, Wakucena,+ alonga tenepa kuna munthu wakupwazika,+ ule anaidiwa na madzindza, ntumiki wa atongi:
“Amambo anadzaona mbalamuka,
Pontho atsogoleri anadzagodama
Thangwi ya Yahova wakuti ndi wakukhulupirika,+
Wakucena wa Izraeli, ule adakusankhula.”+
8 Yahova alonga tenepa:
“Mu ndzidzi wakupangiza ntsisi, ine ndakutawira,+
Pontho pa ntsiku yacipulumuso, ine ndakuphedza;+
Ine ndapitiriza kukutsidzikiza toera iwe ukhale cibverano pakati pa ine na mbumba,+
Toera ndisasanyire pontho dziko,
Toera ndipase pontho mbumba yanga unthaka wawo,+
9 Toera kupanga ale ali nkaidi: ‘Bulukani kunja!’+
Pontho toera kupanga ale ali ncidima:+ ‘Bulukirani!’
Iwo anadzagumana cakudya nʼkhundu mwa njira ninga mabira,
Cakudya cawo cinadzagumanika nʼkhundu monsene mwa njira.*
10 Iwo nee anadzabva njala nee nyota,+
Iwo nee anadzathabuswabve na mphepo yakupisa, peno kupisa kwa dzuwa,+
Thangwi iwo anadzatsogolerwa na ule anaabvera ntsisi,+
Pontho iye anadzaenda nawo ku mbuto zinabuluka madzi.+
11 Ndinadzacinja mapiri anga onsene kudza njira,
Pontho miseu yanga inadzakhala padzulu.+
12 Onani! Iwo ali kubwera bulukira kutali,+
Anango ali kubulukira kunkwiriro, anango ali kubulukira kumadokero a dzuwa,
Pontho anango ali kubulukira ku dziko ya Sinimu.”+
13 Kudzulu, khuwa mwakutsandzaya; dziko yapantsi, tsandzaya.+
Mapiri mbakomerwe na mikhuwo yakutsandzaya.+
14 Mbwenye Sioni asapitiriza kulonga:
“Yahova andithawa,+ pontho Yahova andiduwala.”+
15 Kodi nkazi anakwanisa kuduwala mwanace wakuyamwa,
Peno anacimwana kubvera ntsisi mwana adabala iye?
Ngakhale akazi anewa aduwale, ine cipo ndinakuduwala.+
16 Ona! Ine ndalemba dzina yako mʼmanja mwanga.
Mipanda yako yonsene iri pamaso panga.
17 Anako anabwera mwakucimbiza.
Ale adakufudza mbakukunda, anadzabuluka kuna iwe mbaenda.
18 Yangʼana nʼkhundu mwako, pontho ona pinacitika.
Iwo onsene agumanyikana pabodzi.+
Iwo ali kubwera kuna iwe.
Yahova alonga: “Ndiri kudumbira mu dzina ya umaso wanga kuti
Iwe unadzaabvala onsene ninga pyakubalikisa,
Pontho unadzaabvala ninga pinacita mankhadzi wankazi.
19 Maseze mbuto zako zikhadamala kufudzwa mbazikhala zakusowa anthu, pontho dziko yako mbikhala madembe,+
Cincino iyo inadzacepa thangwi ya anthu anafuna kudzakhala mwenemo,+
20 Ana adabalwa mu ndzidzi ukhali iwe wakutsukwala anadzakupanga tenepa:
‘Mbuto ino yaticepera kakamwe.
Tipaseni mbuto inango toera tikhale.’+
21 Iwe unadzalonga muntima mwako:
‘Mbani baba wa ana anewa?
Ine ndine nkazi adaferwa na ana, pontho nee ndisabala,
Ndaendeswa ku ubitcu, pontho ndafungirwa nkaidi.
Mbani adakuza ana anewa?+
22 Yahova Mbuya Wankulu Kakamwe alonga tenepa:
“Onani, ine ndinadzalamusira madzindza djanja yanga,
Pontho ndinadzalamusa cidzindikiro canga kuna mbumba za anthu.+
Iwo anadzathukula anako amuna mʼmanja mwawo* mbaabweresa,
Pontho mʼmapewa mwawo anadzathukula anako akazi.+
23 Iwe unadzatsalakanwa na amambo,+
Pontho akazawo anadzakhala amakayaya ako.
Iwo anadzagodama pamaso pako mbakotamisa nkhope zawo mpaka pantsi,+
Pontho anadzanyanguta pfumbi ya manyalo ako,+
Penepo iwe unadzadziwa kuti ine ndine Yahova;
Ale anandidikhira nee anadzapaswa manyadzo.”+
24 Kodi pisakwanisika kukwatira nyankhondo anthu adaphata iye ninga anyakaidi ace,
Peno, pinakwanisika kuombola mabitcu a ntongi waukali?
25 Mbwenye Yahova alonga tenepa:
Ine ndinadzathimbana na ale anathimbana na iwe,+
Pontho ndinadzapulumusa anako.
26 Ine ndinadzacitisa kuti ale anakutsalakana mwakuipa adye manungo awo,
Iwo anadzaledzera na ciropa cawo ninga amwa vinyu yakutapira.
Pontho anthu onsene anadzadziwa kuti ine ndine Yahova,+
Ndine Mpulumusi wako+ na Muomboli wako,+
Wamphambvu wa Yakobe.”+
50 Ipi ndi pidalonga Yahova:
“Iri kupi tsamba inapangiza kuti ndakhondana+ na mai wanu, ule adathamangisa ine?
Kodi ine ndakugulisani kuna nyamangawa upi?
2 Thangwi yanji nee ndagumana munthu pidabwera ine?
Thangwi yanji nkhabepo adatawira pidacemera ine?+
Kodi djanja yanga yabvira kakamwe toera kukuombolani?
Kodi ine nee ndiri na mphambvu toera kupulumusa?+
Ntsomba za mwenemo mbazibvunda thangwi madzi amala kuuma,
Pontho zisafa na nyota.
3 Kudzulu ndabvazikako cidima,+
Pontho ndaphimbirako na sakha.”
4 Yahova Mbuya Wankulu Kakamwe andipfundzisa pinafunika ine kulonga,*+
Toera ndidziwe kuti ndinatawira* tani na mafala adidi munthu wakuneta.+
Iye asandilamusa ntsiku zonsene namacibese;
Iye asacitisa makutu anga kubvesera mwadidi ninga munthu wakupfundziswa.+
Nee ndikhacita pinthu pyakusiyana na pikhandipanga iye.+
6 Ine ndapasira nkhodolo ale akhandimenya,
Ine ndapereka cidebvu canga kuna ale anacinga ndebvu.
Ine nee ndabisa nkhope yanga thangwi ya manyadzo, peno gopa kuphulirwa mata.+
7 Mbwenye Yahova Mbuya Wankulu Kakamwe anadzandiphedza.+
Na thangwi ineyi, nee ndinakhala na manyadzo.
Natenepa, ndinaumisa nkhope yanga ninga mwala,+
Pontho ndisadziwa kuti nee ndinapaswa manyadzo.
8 Ule anandiona ninga wakulungama ali dhuzi.
Mbani anakwanisa kundipambizira?+
Tendeni tilamuke toera titongwe.
Mbani ali na mulando na ine?
Mbafendedze dhuzi na ine.
9 Yahova Mbuya Wankulu Kakamwe anadzandiphedza.
Mbani anafuna kundipasa mulando?
Onani! Iwo onsene anadzasakala ninga nguwo.
Iwo anadzadyiwa na mpfunye.
10 Mbani mwa imwe wakuti asagopa Yahova,
Mbabva fala ya ntumiki wace?+
Mbani wakuti anakwanisa kufamba pa cidima cikulu, pa mbuto yakusowa ceza?
Iye mbanyindire dzina ya Yahova, pontho mbasake ciphedzo kuna Mulungu wace.
11 “Onani! Imwe monsene munagasa moto,
Imwe munacitisa ntsasi kuthomuka,
Fambani pa ceza ca moto wanu,
Pakati pa ntsasi zidagasa imwe.
Ine ndinadzakutcunyusani na manja anga munjira iyi:
Munadzaenda kagona uku mbamukabva kupha kakamwe.
51 “Ndibvesereni imwe munasaka ulungami,
Imwe munasaka Yahova.
Yangʼanani pamwala udasemwa imwe,
Pontho yangʼanani pa djenje ya mwala udakumbwa imwe.
2 Yangʼanani babanu Abhrahamu,
Pontho yangʼanani Sara+ ule adakubalani.
3 Thangwi Yahova anadzabalangaza Sioni.+
Iye anadzabalangaza mbuto zace zonsene zidamala kufudzwa,+
Mbacitisa thando yace kukhala ninga ya Edheni,+
Pontho anadzacitisa thando yace kukhala ninga munda wa maluwa wa Yahova.+
Mwenemo anthu anadzakomerwa, mbatsandzaya,
Anadzapereka takhuta, mbaimba nyimbo.+
4 Imwe mbumba yanga, ndibvesereni,
Pontho imwe madzindza, bveserani mwadidi pinalonga ine.+
Thangwi ine ndinadzakhazikisa ntemo,+
Pontho ndinadzakhazikisa ulungami wanga ninga ceza kuna madzindza.+
5 Ulungami wanga wasala pangʼono toera kufika.+
Ntsuwa zinadzandinyindira,+
Pontho izo zinadzadikhira mphambvu zanga.
6 Yangʼanani kudzulu,
Pontho yangʼanani dziko yapantsi.
Thangwi kudzulu kunadzazambazika ninga utci;
Dziko yapantsi inadzasakala ninga nguwo,
Pontho anthu anakhala mwenemo anadzafa ninga imbu.
7 Ndibvesereni imwe munadziwa ulungami,
Mbumba yakuti iri na mwambo wanga mʼmitima mwawo.+
Lekani kugopa kusingirirwa na anthu,
Pontho lekani kuagopa iwo angakutikanani.
8 Thangwi maberethe anadzaadya ninga pinacita iwo na nguwo;
Mbwenye ulungami wanga unadzakhala kwenda na kwenda,
Pontho cipulumuso canga cinadzakhala mu ubalwi na ubalwi.”+
9 Yahova mbalamuse nkono wace,+
Inde, iye mbalamuse nkono wace toera kupangiza mphambvu zace!
Iye mbaulamuse ninga pidacita iye kale kakamwe.
10 Kodi simwe tayu adaumisa madzi a mʼbara, madzi akuzika kakamwe?+
Simwe tayu adacita njira pantsi pa bara toera ale adaombolwa apite nayo?+
11 Ale adaombolwa na Yahova anadzabwerera.+
Iwo anadzafika ku Sioni, mbakakhuwa mwakutsandzaya,+
Pontho iwo anadzabvazikwa* kutsandzaya kwa kwenda na kwenda.+
Iwo anadzakomerwa kakamwe, mbatsandzaya,
Pontho kutsukwala na kubulira pinadzazambazika.+
12 “Ine ndine Ule anakubalangaza.+
Thangwi yanji iwe usafunika kugopa munthu wakuti asafa,+
Pontho thangwi yanji iwe usafunika kugopa mwana wa munthu wakuti asabunyala ninga ntsanga iwisi?
13 Thangwi yanji waduwala Yahova ule adakucita,+
Ule adafuthula kudzulu,+ mbacitisa dziko yapantsi kukhala yakuwanga?
Ntsiku zonsene iwe ukhagopa ukali wa ule anakuponderera,
Iwe ukhagopa ninga iye mbadakwanisa kukufudza.
Mphapo uli kupi ukali wa ule anakuponderera?
14 Thimize pano, bitcu adamangwa na maunyolo anadzasudzulwa;+
Iye nee anadzafa mbaponywa nʼdjenje,
Pontho nee anadzasowa cakudya.
15 Mbwenye ine ndine Yahova Mulungu wako,
Ule anabvundula bara, mbaicitisa kukhala na mabimbi,+
Dzina yace ndi Yahova wa anyankhondo.+
16 Ine ndinadzaikha mafala anga pamulomo pako,
Pontho ndinadzakutsidzikiza na manja anga,+
Toera kukhazikisa kudzulu na kucitisa dziko yapantsi kukhala yakuwanga,+
Mbalonga kuna Sioni: ‘Iwe ndiwe mbumba yanga.’+
17 Lamuka, lamuka, leka gona iwe Yerusalemu,+
Iwe adakwata khomitco mʼmanja mwa Yahova mbumwa ukali wace.
Iwe wamwa ukali unoyu mu khomitco inaikhirwa vinyu;
Iwe wakhuthula nʼkhomitco inacitisa munthu kudzedzereka.+
18 Nee mwana mʼbodzi adabala iye ali kweneko toera kuntsogolera,
Pontho mwa ana amuna onsene adakuza iye, nee mʼbodzi amʼphata djanja.
19 Nyatwa izi ziwiri zinadzakugwera:
Kutapatwa na kufudzwa, pontho njala na supada!+
Mbani anafuna kukubvera ntsisi?
Mbani anafuna kukubalangaza?+
20 Anako akomoka.+
Iwo ali lamba-lamba mʼmagurayi a miseu
Ninga pinyama pya ntsanga pidamangwa pa nsampha.*
Iwo adzalirwa na ukali wa Yahova, kusandika kwa Mulungu wako.”
21 Natenepa, ndaphata miyendo, bvesera ipi
Iwe nkazi wakuthabuka na wakuledzera, mbwenye tayu na vinyu.
22 Ipi ndi pidalonga Mbuyako Yahova, Mulungu wako ule anatsidzikiza mbumba yace:
“Ine ndinakukwatira mʼmanja mwako khomitco inakucitisa kudzedzereka,+
Khomitco inamwerwa vinyu, khomitco ya ukali wanga;
Cipo iwe unadzamwera pontho khomitco ineyi.+
23 Ine ndinadzakwata khomitco ineyi mbindiipereka mʼmanja mwa ale anakuthabusa,+
Kuna ale anakupanga: ‘Gona pantsi toera ife tipite na padzulu pako!’
Natenepa iwe wacita nsanako ninga mataka,
Ninga njira toera iwo apite na penepo.”
52 Lamuka! Lamuka! Bvala mphambvu,+ iwe Sioni!+
Bvala nguwo zako zakubalika+ iwe Yerusalemu, nzinda wakucena!
Thangwi munthu wakukhonda sidzwa na wakukhonda cena nee anadzapitabve muna iwe.+
2 Iwe Yerusalemu, gubudza pfumbi, lamuka mbukhala pa mpando.
Sudzula nkhambala ziri nʼkhosi mwako, iwe mwana wankazi wa Sioni adaendeswa ku ubitcu.+
3 Natenepa, Yahova alonga:
4 Na thangwi ineyi, Yahova Mbuya Wankulu Kakamwe alonga:
“Pakutoma mbumba yanga yaenda ku Ejitu mbikhala kweneko ninga alendo;+
Buluka penepo, iyo yathabuswa na Asirya mwakusowa mathangwi.”
5 “Ndinacitanji cincino?” alonga Yahova.
“Thangwi adakwata mbumba yanga nee alipa cinthu.
Ale anaatonga asapitiriza kukhuwa mwakutsandzaya,”+ alonga Yahova,
“Pontho ndzidzi onsene, dzina yanga isatsalakanwa mwakusowa cilemedzo.+
6 Na thangwi ineyi, mbumba yanga inadzadziwa dzina yanga;+
Iwo anadzadziwa pa ntsiku ineyi kuti analonga Ndine.
Onani, ndine pano!”
7 Ndi akubalika kakamwe manyalo a munthu anafamba padzulu pa mapiri mbabweresa mphangwa zadidi,+
Ule anadziwisa pya ntendere,+
Ule anabweresa mphangwa zadidi za pinthu pyadidi,
Ule anadziwisa pya kupulumuswa kwa anthu,
Ule anapanga Sioni kuti: “Mulungu wako adzakhala Mambo!”+
8 Bvesera! Anyakuonera ako akukhuwa.
Iwo akukhuwa pabodzi pene mwakutsandzaya,
Thangwi iwo akuona Yahova mbakabweresa pontho Sioni.
9 Imwe madembe a ku Yerusalemu, komerwani, khuwani pabodzi pene mwakutsandzaya,+
Thangwi Yahova abalangaza mbumba yace;+
iye aombola Yerusalemu.+
10 Yahova asiya pakweca nkono wace wakucena toera anthu a madzindza onsene auone;+
Anthu pa dziko yonsene yapantsi anadzaona pinthu pidacita Mulungu wathu toera kupulumusa mbumba yace.+
11 Imwe munathukula pyombo pya Yahova,+
Bulukani, bulukani, bulukani mwenemu,+ lekani kukhuya cinthu cakupswipiswa,+
Bulukani pakati pace+ toera mupitirize kukhala akucena.
12 Imwe nee munadzabuluka mwakugopa,
Pontho nee munadzafunika kuthawa,
Thangwi Yahova anadzakhala patsogolo panu,+
Pontho Mulungu wa Izraeli anadzakhala nduli mwanu.+
13 Onani! Ntumiki wanga+ anadzacita pinthu mwandzeru.
Iye anadzapaswa basa yakufunika kakamwe,
Iye anadzapaswa cidzo cikulu mbalemedzwa kakamwe.+
14 Nakuti ndi anthu azinji akhamuyangʼana mwakudzumatirwa,
Thangwi maonekero ace akhadacinjika kakamwe mbasiyana na anthu onsene
Pontho iye akhadacinjika kakamwe kwakuti nee akhaonekabve ninga mwana wa munthu.
15 Munjira ibodzi ene, iye anadzacitisa madzindza mazinji a anthu kudzumatirwa.+
Amambo angamuona anadzamatama,*+
Thangwi iwo anadzaona pinthu pyakuti adzati kupipangwa,
Pontho iwo anadzabvesera pinthu pyakuti adzati kupibva.+
53 Mbani adakhulupira pinthu pidalonga ife?*+
Pontho mphambvu* za Yahova+ zapangizwa kuna ani?+
2 Iye anadzaphukira ninga nthawi ipswa+ pamaso pace,* ninga ntcitci unamera mu dziko yakusowa madzi.
Iye nee anadzaoneka ninga munthu wacidzo, nee wakulemedzeka;+
Pontho ife tingamuona, nee tinakomerwa na maonekero ace.*
3 Iye akhapwazwa, pontho akhacalirwa na anthu,+
Iye akhali munthu wakuti akhabva kupha, pontho akhadziwa kuti utenda ninji.
Pikhali ninga atibisira nkhope yace.*
Iye apwazwa, mbatimuona ninga wakusowa basa.+
Mbwenye ife tamuona ninga munthu wakuthabuswa, wakutcunyuswa na Mulungu na wakubvuyiwa.
6 Tonsene tikhafamba ninga mabira akutayika,+
Mʼbodzi na mʼbodzi akhaenda kukhafuna iye,
Pontho Yahova acitisa kuti madodo athu onsene agwere kuna iye.+
Iye akwatwa ninga bira yakuti iri kuenda kaphiwa,+
Iye akhali ninga bira ikazi yakuti nkhabe kukhuwa pakukwedzwa maweya,
Pontho iye nkhabe kufungula mulomo wace.+
8 Thangwi yakutongwa mwakusowa ulungami,* iye akwatwa;
Pontho mbani anafuna kudzudzumika na mphangwa zinalonga pya dzindza yace?*
9 Maseze iye nee akhacita cinthu cakuipa,*+
Pontho pamulomo pace nee pabuluka mafala authambi,+
Iye aikhwa munthumbi* pakati pa anthu akuipa.
10 Mbwenye Yahova akhafuna kuti iye athabuswe kakamwe, pontho iye ancitisa kubva kupha.
Imwe mungapereka umaso wace ninga ntsembe thangwi ya mulando,+
Iye anadzaona dzindza* yace, anadzathimizira ntsiku zace,+
Pontho Yahova anadzamʼphatisira toera kucita pinafuna iye.+
11 Thangwi ya nyatwa zonsene zidatamba iye, anadzaona pidacita iye mbakomerwa.
Thangwi ya pinthu pizinji pinadziwa iye, ntumiki wanga wakulungama,+
Anadzacitisa anthu azinji kukhala akulungama,+
Pontho iye anadzakwata madodo awo.+
12 Na thangwi ineyi, ndinadzampasa khundu yace pabodzi na anango,
Pontho iye anadzagawana pyakutapatwa na anthu amphambvu
Thangwi iye apereka umaso wace mpaka kufa,+
Pontho aoniwa ninga mʼbodzi wa anyakudawa;+
Iye athukula madawo a anthu azinji,+
Pontho iye apita pakati toera kuphedza anyakudawa.+
54 Yahova alonga: “Khuwa mwakutsandzaya iwe nkazi wakuti nkhabe kubala!+
Komerwa, pontho khuwa mwakutsandzaya+ iwe nkazi wakuti udzati kuona nyatwa zakubala,+
Thangwi ana a nkazi adasiyiwa ndi azinji kakamwe
Kupiringana ana a nkazi wakuti ali na mamuna.”+
2 “Thimizira mbuto ya nsasa wako.+
Futhula nguwo za nsasa wako ukulu.
Leka kubwerera nduli, laphisa nkhambala za nsasa wako,
Pontho khomera mwadidi ntcici za nsasa wako.+
3 Thangwi madire ako anadzathimizirika kukhundu yamadyo na kukhundu yabzwere.
Ana ako anadzakunda madzindza,
Pontho iwo anadzakhala mʼmizinda idasiyiwa ninga madembe.+
4 Leka kugopa,+ thangwi iwe nee unadzapaswa manyadzo;+
Leka kupasika manyadzo, thangwi iwe nee unadzaphatiswa mwala.
Iwe unadzaduwala manyadzo a uwana wako,
Pontho nee unadzakumbukabve nyatwa za uzice wako.”
5 “Thangwi Nciti wako Wankulu+ ndi ninga mamunako,*+
Dzina yace ndi Yahova wa anyankhondo,
Pontho Muomboli wako ndi Wakucena wa Izraeli.+
Iye anadzacemerwa Mulungu wa dziko yonsene yapantsi.+
6 Mu ndzidzi udakucemera Yahova, iwe ukhali ninga nkazi wakusiyiwa na mamunace, pontho wakutsukwala,+
Iwe ukhali ninga nkazi adasembwa mbali ntsikana, buluka penepo mbakhondwa,” adapilonga ndi Mulungu wako.
7 “Ine ndikhadakusiya mu ndzidzi wakucepa,
Mbwenye thangwi ya ntsisi zanga zikulu, ine ndinakubweresa pontho.+
8 Thangwi yakuipirwa kwanga kukulu, ine ndakubisira nkhope yanga mu ndzidzi wakucepa,+
Mbwenye thangwi ya ufuni wanga wakukhonda mala, ine ndinadzakubvera ntsisi,”+ adapilonga ndi Muomboli wako,+ Yahova.
9 “Kuna ine pyenepi pinadzacitika ninga ntsiku za Nowa.+
Ninga mudadumbira ine kuti madzi a mu ntsiku za Nowa nee anadzadzalabve pa dziko yonsene yapantsi,+
Natenepa, ndiri kudumbira kuti nee ndinadzaipirwabve na iwe peno kukutcunyusa.+
10 Thangwi mapiri anakwanisa kubuluswa,
Pontho nthunda zinakwanisa kutekenyeswa,
Mbwenye ufuni wanga wakukhonda mala kuna iwe nee unadzabuluswa,+
Pontho cibverano canga cakukhazikisa ntendere na iwe nee cinadzatekenyeswa,”+ alonga Yahova, Ule anakubvera ntsisi.+
11 “Iwe nkazi wakuthabuswa,+ wakugubudzwa na mphepo na wakukhonda balangazwa,+
Ine ndikuphatisira simenti yakuwanga toera kumanga mpanda wako wa miyala,
Pontho pantsi pa mpanda wako ndiri kumangapo na miyala ya safira.+
12 Mbuto zakumenyera nkhondo za mpanda wako ndinazimanga na miyala ya rubhi,
Misuwo yako mikulu inadzakhala ya miyala yakuyetimira,*
Pontho pidzindikiro pya madire ako pinadzakhala pya miyala ya ntengo ukulu.
14 Iwe unadzakhazikiswa mwakuwanga mu ulungami.+
Kupondererwa kunadzakhala kutali kakamwe na iwe,+
Nee unadzathuswa, pontho nee unadzagopa cinthu,
Thangwi pyakugopswa nee pinakufendedzera dhuzi.+
15 Munthu angabwera kudzamenyana na iwe,
Adantuma sine tayu.
Ule anabwera kudzamenyana na iwe anadzakundwa.”+
16 “Ine ndine adacita nyakufula utale,
Wakuti asapepesera moto,
Pontho thangwi ya basa ineyi iye asacita cida.
Ndine adacita munthu wakuti basa yace ndi yakufudza.+
17 Cida consene cinasasanywa toera kukuphekesa nee cinadzapembera,+
Pontho iwe unakunda* malirimi onsene anafuna kukupambizira pa miseru.
Unoyu ndi unthaka wa atumiki a Yahova,
Pontho ulungami wawo usabulukira kuna ine,” alonga Yahova.+
55 Bwerani kuna madzi,+ imwe monsene anabva nyota!+
Imwe adasowa kobiri, bwerani, kwatani cakudya canu!
Inde, bwerani mudzakwate vinyu na nkaka+mwakukhonda lipa.+
2 Thangwi yanji musapitiriza kubvunga kobiri yanu na pinthu pyakuti nee ndi nkate,
Pontho thangwi yanji musabvunga kobiri inatambira imwe* na pinthu pyakuti nee pinakukhutisani?
Ndibvesereni mwadidi toera mudye pinthu pyadidi,+
Pontho imwe munadzakomerwa kakamwe na cakudya cakuti mwandimomwene ndi cadidi.+
3 Ndibvesereni, pontho bwerani kuna ine.+
Imwe mungandibvesera, munapitiriza kukhala mʼmaso,
Pontho ine ndinadzacita cibverano cakwenda na kwenda na imwe+
Ine ndinadzapangiza kuna imwe ufuni wakukhonda mala* ninga udapikira ine kuna Dhavidhi.+
5 Iwe unadzacemera dzindza yakuti nee ukhaidziwa,
Pontho anthu a dzindza yakuti nkhabe kukudziwa anadzathamanga mbabwera kuna iwe
Thangwi Yahova Mulungu wako,+ Wakucena wa Izraeli
Anadzakupasa mbiri.+
6 Sakani Yahova mu ndzidzi wakuti munakwanisa kunʼgumana.+
Ncemereni mu ndzidzi wakuti ali dhuzi.+
7 Anyakucita pyakuipa mbasiye njira zawo,+
Pontho anyakucita pyauphanga mbasiye manyerezero awo;
Mbabwerere kuna Yahova, ule wakuti anaabvera ntsisi,+
Mbabwerere kuna Mulungu wathu, wakuti anaalekerera na ntima onsene.+
8 “Thangwi manyerezero anga asiyana na manyerezero anu,+
Pontho njira zanu zasiyana na njira zanga,” alonga Yahova.
9 “Ninga kudzulu ndi kutali kakamwe na dziko yapantsi,
Munjira ibodzi ene, njira zanga ndi zapadzulu kakamwe kupiringana zanu,
Pontho manyerezero anga ndi apadzulu kakamwe kupiringana anu.+
10 Ninga neve* na madzi akuti asabvumba buluka kudzulu,
Akuti nkhabe kubwerera kudzulu mbadzati kutotesa mataka, kumeresa pinthu na kupicitisa kubala,
Mbapasa anthu mbeu toera kubzwala na cakudya toera kudya,
11 Pyenepi pinadzakhala sawasawa na mafala anabuluka pamulomo panga.+
Iwo nee anabwerera kuna ine mbadzati kukwanirisa cifuniro cawo,+
Mbwenye iwo anacita pyonsene pinafuna ine,*+
Mwakukhonda penula, iwo anadzacita mwakubverana na pikhafuna ine.
Nthunda na mapiri anadzakhuwa mwakutsandzaya pamaso panu,+
Pontho miti yonsene ya ntsanga inadzamenya manja.+
13 Mʼmbuto mwa mathendere a minga, unafuna kudzakula ndi muti wa junipero,+
Pontho mʼmbuto mwa uliri, unafuna kudzakula ndi muti wa murta.*
Pyenepi pinadzapasa mbiri Yahova,+
Ceneci cinadzakhala cidzindikiro cakuti nkhabe kudzabuluswa kwenda na kwenda.”
56 Ipi ndi pidalonga Yahova:
“Towezerani ulungami,+ pontho citani pinthu pyadidi
Thangwi mwakukhonda dembuka ndinabweresa cipulumuso,
Pontho ndinadzapangiza ulungami wanga.+
2 Nyakutsandzaya ndi munthu anacita pyenepi,
Pontho mwana wa munthu anapitiriza kucita pyenepi,
Ule anakoya Sabudu mbakhonda kuipswipisa,+
Pontho ule anabweza djanja yace toera kukhonda kucita ntundu onsene wa cinthu cakuipa.
3 Munthu wa dziko inango wakuti asalambira Yahova+ nee asafunika kulonga:
‘Mwandimomwene Yahova anandibulusa pakati pa mbumba yace.’
Pontho mamuna wakukhonda bala* nee asafunika kulonga: ‘Onani! Ine ndine muti wakuuma.’”
4 Ipi ndi pidalonga Yahova kuna amuna akukhonda bala* akuti asapitiriza kukoya masabudu anga mbasankhula kucita pinakomerwa na ine, pontho akuti asapitiriza kukoya cibverano canga:
5 “Ine ndinadzaapasa mbuto nʼnyumba mwanga, pontho ndinadzakumbuka dzina yawo,
Cinthu cakuti ndi cadidi kakamwe kupiringana ana amuna na ana akazi.
Ine ndinadzaapasa dzina ya kwenda na kwenda,
Dzina yakuti nee inadzafudzika.
6 Anthu a dziko inango akuti asaenda kuna Yahova toera kumulambira,
Toera kufuna dzina ya Yahova,+
Pontho toera akhale atumiki ace,
Onsene anakoya Sabudu mbakhonda kuipswipisa
Na ale anakoya cibverano canga,
7 Ine ndinadzaabweresa kuphiri yanga yakucena+
Mbandiacitisa kutsandzaya nkati mwa nyumba yanga yakucitira maphembero.
Ine ndinadzatawira pa guwa yanga ya ntsembe, ntsembe zawo zakupiswa na ntsembe zawo zinango.
Thangwi nyumba yanga inadzacemerwa nyumba inacitira maphembero anthu a madzindza onsene.”+
8 Yahova Mbuya Wankulu Kakamwe, ule anagumanya Aizraeli adamwazika+ alonga:
“Ine ndinadzagumanya anango kuna iye kusiyapo ale adamala kugumanywa.”+
9 Imwe pinyama pyonsene pya ntsanga,
Na imwe pinyama pyonsene pya mu nsitu,+ bwerani mudzadye.
10 Anyakuonera ace ndi maboliboli,+ nkhabepo adadzindikira pikhafuna kucitika.+
Iwo onsene akhala ninga anambwa akuti ndi mabewewe, nkhabe kwanisa kuuta.+
Basa yawo nkhugona pantsi mbapuma peko-peko; iwo asafuna kakamwe kugona.
11 Iwo ndi ninga anambwa akudyesa kakamwe;
Iwo nkhabe khuta.
Iwo ndi akumbizi akukhonda kudzindikira pinthu.+
Mʼbodzi na mʼbodzi wa iwo asatowezera njira yace;
Inde, mʼbodzi na mʼbodzi wa iwo asasaka kuwina pinthu mwakusowa ulungami, mbalonga:
12 “Bwerani, ndisiyeni ndikakwate vinyu,
Tendeni timwe mpaka kuledzera.+
Pontho mangwana tinadzacita pibodzi pyene, peno kupiringana pyenepi!”
57 Munthu wakulungama asafa,
Mbwenye nkhabe anadzudzumika napyo,
Anthu akukhulupirika ali kufa,+
Mbwenye nkhabe anadzindikira kuti munthu wakulungama ali kufa
Toera akhonde tamba nyatwa.
2 Iye asagumana ntendere.
Anthu onsene akukhulupirika ali kugona munthumbi.*
3 “Mbwenye imwe fendedzerani dhuzi,
Imwe ana a nkazi wakuti ndi ngʼanga,
Imwe ana a mamuna waupombo na ana a nkazi waulukwali:
4 Mbani anaseka imwe?
Mbani anasingirira imwe, pontho mbani anatikana imwe?
Kodi imwe simwe ana a anyakudawa tayu,
Simwe ana a anyakunyengeza tayu,+
5 Ale akuti asafuna kakamwe kupita mʼmabonde pakati pa miti mikulu,+
Pantsi pa miti yonsene ya masamba akubithimira,+
Ale akuti asapha anagʼono nʼgowa,*+
Pantsi pa miyala mikulu?
6 Iwe usafuna kakamwe miyala yakuzwerera ya ku gowa.*+
Inde, miyala ineyi ndi unthaka wako.
Iwe wathirira ntsembe za pyakumwa mbupereka miyoni kuna miyala ineyi.+
Kodi imwe musanyerezera kuti ndisakomerwa* na pyenepi?
8 Iwe waikha dzimunthu nʼnyumba mwako.*
Iwe wandisiya ndekha mbudula nguwo;
Iwe wakwira mbuthimizira mbuto ya talimba yako.
Pontho iwe wacita cibverano na iwo.
9 Iwe waenda kuna Meleki* na mafuta,
Pontho waenda na mafuta mazinji kakamwe akununkhira.
Iwe watuma anyakupereka mphangwa ako mbaenda kutali kakamwe,
Natenepa, iwe watcitira Munthumbi.*
10 Iwe wawangisira kakamwe toera kutowezera njira zako zizinji,
Mbwenye nee walonga kuti: ‘Nkhabepo cidikhiro!’
Iwe wakhala pontho na mphambvu.
Na thangwi ineyi, iwe nee wasiya.*
11 Mbani akhagopa iwe,
Mbutoma kulonga uthambi?+
Iwe nee wandikumbuka.+
Pontho nee wanyerezera cinthu muntima mwako.+
Nakuti ine ndamatama mbandikhonda kucita pinthu thangwi ya pinacita iwe,+
Iwe nee wandigopa.
13 Iwe ungakhuwa toera kuphemba ciphedzo,
Madzimunthu onsene adagumanya iwe nee anakupulumusa.+
Iwo anadzamburuswa na mphepo,
Muya ene basi unadzaakwekweta,
Mbwenye ule anathawira kuna ine, anadzatambira dziko,
Pontho anadzapaswa phiri yanga yakucena ninga unthaka.+
14 Anthu anadzalonga: ‘Sasanyani, sasanyani njira! Cenesani njira!+
Bulusani pyakugwegwedusa pyonsene nʼnjira ya mbumba yanga.’”
15 Wapadzulu Kakamwe, wakuti asakhala kwenda na kwenda,+
Pontho wakuti dzina yace ndi yakucena,+ alonga:
“Ine ndisakhala kudzulu na pa mbuto yakucena,+
Mbwenye ndisakhalambo na ale anathabuka, pontho a ntima wakucepeseka,
Toera kupasa mphambvu anthu akupwazika,
Pontho toera kupasa mphambvu ale ananentseka mʼmanyerezero.+
16 Thangwi ine nee ndinanentsana na iwo kwenda na kwenda
Peno kupitiriza kukhala wakuipirwa;+
Mphambvu za munthu zinamala thangwi ya ine,+
Ngakhale pinthu pyakupuma pidacita ine.
17 Ine ndaipirwa kakamwe thangwi ya madawo ace akufuna kuwina pinthu mwakukhonda kulungama,+
Natenepa, ine ndaipirwa, ndabisa nkhope yanga mbandintcunyusa.
Mbwenye iye apitiriza kukhala wakukhonda bvera+ mbatoweza pinafuna ntima wace.
18 Ine ndaona njira zace,
Mbwenye ndinamuwangisa+ mbandintsogolera,+
Pontho ine ndinabalangaza iye+ na ale analira pabodzi na iye.”+
19 “Ine ndinaacitisa toera andisimbe.
Ndinapitiriza kupasa ntendere ale anakhala dhuzi na ale anakhala kutali,”+ alonga Yahova,
“Pontho ine ndinaawangisa.”
20 “Mbwenye anyakucita pyakuipa asakhala ninga bara ya mabimbi yakuti nkhabe khurudzika,
Pontho madzi ace asabvundula pinthu pidamera mwenemo na matope.”
21 Mulungu wanga alonga: “Nkhabeko ntendere kuna nyakucita pyakuipa.”+
58 Iye andipanga: “Khuwa kakamwe, leka kuthowesa fala!
Galuza fala yako ninga nyanga.
Dziwisa mbumba yanga kundisandukira kudacita iyo,+
Dziwisa dzindza ya Yakobe madawo awo.
2 Iwo asandisaka ntsiku zonsene,
Pontho asapangiza ninga akomerwa thangwi yakudziwa njira zanga,
Mbakhala ninga dzindza yakuti isacita pinthu pyakulungama,
Pontho yakuti nee yasiya ulungami wa Mulungu wawo.+
Iwo asandiphemba toera kutonga mwadidi miseru,
Mbakhala ninga asafuna kufendedzera Mulungu:+
3 ‘Thangwi yanji nee musaona tingacita jejuu?+
Pontho thangwi yanji nee musaona tingapangiza kutsukwala thangwi ya madawo athu?’+
4 Jejuu inacita imwe isamala na nthonga na kulongezana,
Pontho imwe musamenyana unango na ndzace mwauphanga.
Lekani kucita jejuu ninga idacita imwe lero mbamudikhira kuti fala yanu inabveka kudzulu.
5 Kodi ine ndisakomerwa na jejuu ninga ineyi,
Ninga ntsiku toera munthu apangize kutsukwala kwace,
Kukotamisa nsolo wace ninga tsanga,
Mbagonera sakha na dotha?
Ndi ineyi inacemera imwe jejuu na ntsiku yakukomeresa Yahova?
6 Nkhabe, jejuu inandikomera ndi iyi:
Kusudzula nkhambala za ale anamangwa mwakusowa ulungami,
Kusudzula nkhambala za goli,+
Kusudzula anthu adapondererwa,+
Pontho kugwanda pakati magoli onsene.
7 Kupasa cakudya ale adacisowa,+
Kutambira panyumba panu anyakutcerenga na ale adasowa nyumba,
Kubvazika ale adasowa nguwo,+
Pontho khonda kupasira nkhodolo abale ako.
8 Ungacita pyenepi ceza cako cinadzaonekera ninga mʼbambakuca,+
Pontho unadzawangiswa mwakucimbiza.
Ulungami unaenda patsogolo pako,
Pontho mbiri ya Yahova inadzabwera nduli mwako.+
9 Penepo iwe unadzacemera, pontho Yahova anadzakutawira;
Unadzakhuwa toera kuphemba ciphedzo, pontho iye anadzalonga: ‘Ndiri pano!’
Ungabulusa goli pakati pako,
Pontho ungasiya kuthonya na cala cako mbusiya kulonga mafala akuipa,+
10 Ungapasa nyanjala cinthu cinafuna iwe,+
Mbukhutisa ale adasowa,
Penepo ceza cako cinadzaoneka, ngakhale ncidima,
Pontho cidima cako cinadzakhala ninga masikati.+
11 Ndzidzi onsene Yahova anadzakutsogolera,
Mbakupasa pinafuna iwe, ngakhale mu dziko yakusowa madzi;+
Iye anadzawangisa magogodo ako,
Pontho unadzakhala ninga munda wakuthirirwa mwadidi+
Ninga mphuno ya madzi yakuti madzi ace nkhabe mala.
12 Thangwi ya iwe, nyumba zidamala kufudzwa zinadzamangwa pontho,+
Unadzatoma pontho kukumbira nyumba zikhadatomwa na madzindza akale.+
Iwe unadzacemerwa nyakusasanyira mipanda,+
Nyakusasanyira miseu toera anthu akhale nʼkhundu mwa miseu ineyi.
13 Ungakoya Sabudu mbukhonda kusaka pinafuna iwe pa ntsiku yanga yakucena,+
Pontho ungaona Sabudu ninga ntsiku yakutsandzayisa kakamwe, ntsiku yakucena ya Yahova, ntsiku yakuthema kusimbwa,+
Mbuipasa mbiri, mbukhonda kusaka pinthu pinafuna iwe na kulonga mafala akusowa basa,
14 Penepo unadzatsandzaya kakamwe thangwi ya Yahova,
Pontho ndinadzakufambisa na kavalo pa mbuto za padzulu za dziko yapantsi.+
Ndinadzakucitisa kuti utsandzaye na unthaka wa mbuyako Yakobe,+
Adalonga pyenepi ndi Yahova.”
59 Onani! Djanja ya Yahova nee ndi yakubvira kakamwe toera ikhonde kupulumusa,+
2 Nkhabe, madodo anu ndiwo adakucitisani kukhala kutali na Mulungu wanu.+
Iye akubisirani nkhope yace thangwi ya madawo anu,
Pontho iye asakhonda kubva pinalonga imwe.+
3 Thangwi manja anu apswipiswa na ciropa,+
Pontho pyala pyanu pyapswipa na madodo.
Milomo yanu isalonga uthambi,+ pontho malirimi anu asalonga pinthu pyakukhonda kulungama.
4 Nkhabepo anasaka ulungami,+
Pontho nkhabepo analonga undimomwene angaenda kuthando yakutongera miseru.
Iwo asanyindira pinthu pyakukhonda kukhala pyandimomwene,+ pontho asalonga pinthu pyakusowa basa.
Iwo asamita nyatwa, mbabala pinthu pyakuipa.+
5 Iwo asaswa mazai a nyoka yakugopswa,
Pontho iwo asaluka utandaude.+
Ule anadya mazai awo asafa,
Pontho dzai ingasweka isabulusa nyoka yakugopswa.
6 Utandaude unaluka iwo nee anaubvala ninga nguwo,
Pinthu pinacita iwo nee pinaaphedza.+
Mabasa awo ndi akuipa,
Pontho asacita pyauphanga na manja awo.+
7 Miyendo yawo isathamanga toera kucita pinthu pyakuipa,
Pontho iwo asathamanga toera kupha munthu wakusowa mulando.+
Manyerezero awo ndi manyerezero akuipa;
Ndzidzi onsene iwo asafudza anthu mbaathabusa.+
8 Iwo nkhabe kudziwa njira yantendere,
Pontho munjira zinapita na iwo nkhabe ulungami.+
Iwo asagongonyesa njira zawo;
Nee mʼbodzi anafamba na njira zenezi anadzadziwa ntendere.+
9 Na thangwi ineyi, ulungami uli kutali na ife,
Pontho pinthu pyakulungama piri kutali na ife.
Ife tisadikhira ceza, mbwenye onani, cidima cokha-cokha;
Ife tikhadikhira ceza, mbwenye tisapitiriza kufamba ncidima.+
10 Ife tisaphamphasa mpanda ninga maboliboli;
Ife tisapitiriza kuumphamphasa ninga ale adasowa maso.+
Ife tisagwegweduka namasikati ninga pinacita anthu namasiku;
Pakati pa anthu amphambvu, ife tisakhala ninga anthu akufa.
11 Ife tonsene tisakhuwa ninga maursu,
Pontho tisalira ninga nkhangaiwa.
Tisadikhira ulungami, mbwenye tisadikhira papezi;
Tisadikhira cipulumuso, mbwenye ciri kutali na ife.
Thangwi ife tisadziwa kuti takusandukirani;
Ife tisadziwa mwadidi madodo athu.+
13 Ife taswa ntemo, mbatikhonda Yahova;
Tapasira nkhodolo Mulungu wathu.
Ife talonga pya kuponderera na pya kusandukira;+
Ife tisanyerezera uthambi unafuna ife kulonga, buluka penepo mbatiulonga.+
14 Anthu asakhonda kucita pinthu pyakulungama,+
Pontho ulungami usakhala kutali;+
Undimomwene wagwegweduka* pa mbuto yapakweca,
Pontho pinthu pyakulungama nkhabe kwanisa kupita.
16 Pidaona iye kuti nee pakhali na munthu toera kuphedza,
Iye adzumatirwa kakamwe na pyenepi,
Natenepa, iye abweresa cipulumuso na nkono wace,
Pontho ulungami wace ndiwo udankulumiza toera kucita pyenepi.
17 Buluka penepo iye abvala ulungami ninga cakutsidzikiza naco diti,
Pontho abvala capeu cakuwanga ca cipulumuso munsolo mwace.+
18 Iye anadzaabwezera mwakubverana na pinthu pidacita iwo:+
Ukali kuna ale anamuida, kubwezera pyakuipa kuna anyamalwa ace.+
Pontho ntsuwa zinadzapaswa pire pidathema izo.
19 Ale anakhala kumadokero a dzuwa anadzagopa dzina ya Yahova,
Pontho ale anakhala kumabulukiro a dzuwa anadzampasa mbiri,
Thangwi iye anadzabwera nakuthamanga ninga nkulo wakukuka,
Wakuti usatsogolerwa na nzimu wa Yahova.
20 “Ku Sioni kunadzabwera+ Muomboli,+
Kuna anthu a dzindza ya Yakobe adasiya kucita pyakuipa,”+ alonga Yahova.
21 “Cibverano cinacita ine na iwo ndi ici,”+ alonga Yahova. “Nzimu wanga wakuti uli na iwe na mafala anga adaikha ine pamulomo pako, nee anadzabuluka pamulomo pako, pamulomo pa anako,* peno pamulomo pa adzukulu ako,”* alonga Yahova, “kutomera cincino mpaka kwenda na kwenda.”
60 “Iwe nkazi,+ lamuka, pangiza ceza cako thangwi ceza cako cafika.
Mbiri ya Yahova ikuyetimira kuna iwe.+
2 Ona! Cidima cinadzaphimbira dziko yapantsi,
Pontho cidima cikulu cinadzaphimbira madzindza;
Mbwenye Yahova anayetima kuna iwe,
Pontho mbiri yace inadzaoneka kuna iwe.
4 Yangʼana nʼkhundu mwako monsene mbuona pinacitika!
Iwo onsene agumanyikana, pontho akubwera kuna iwe.
5 Pa ndzidzi unoyu iwe unadzaona pyenepi mbukomerwa,+
Pontho ntima wako unadzakomerwa, iwe mbutsandzaya kakamwe,
Thangwi mpfuma za mʼbara zinadzabwereswa kuna iwe;
Pontho pinthu pya madzindza a anthu pinadzabwera kuna iwe.+
6 Dziko yako inadzadzala na mikumbi ya makamelo,
Makamelo a ku Midhiyani na a ku Efa.+
Anthu onsene a ku Sabha anadzabwera;
Iwo anadzabweresa ouro na mafuta a olibhano.
Iwo anadzasimba Yahova pakweca.+
7 Mikumbi yonsene ya ku Kedhari+ inadzagumanywa kuna iwe.
Mabira a ku Nebhayoti+ anadzabwereswa kuna iwe.*
Ine ndinadzatawirisa kuti iwo aperekwe ninga ntsembe pa guwa yanga,+
Pontho ine ndinadzathimizira kubalika kwa nyumba yanga.+
8 Mbani anewa anabwera mbakamburuka ninga makole,
Pontho ninga nkhangaiwa zinaenda nʼnyumba* munakhala izo?
9 Thangwi ntsuwa zinandidikhira;+
Mabote a ku Tarsi ali kubwera,
Iwo ali kubweresa anako kubulukira kutali+
Pabodzi na parata yawo na ouro yawo
Toera kusimba dzina ya Yahova Mulungu wako na Wakucena wa Izraeli,
10 Anthu a dziko inango anadzamanga mpanda wako,
Pontho amambo awo anadzakutumikira,+
Thangwi ine ndakutcunyusa mu ndzidzi udaipirwa ine,
Mbwenye na udidi wanga, ine ndinadzakubvera ntsisi.+
11 Ndzidzi onsene misuwo yako mikulu inadzakhala yakufunguka;+
Masiku na masikati iyo nee inadzafungwa,
Toera pinthu pya madzindza anango pibwere kuna iwe,
Pontho amambo awo ndiwo anafuna kutoma kucita pyenepi.+
12 Thangwi dzindza na umambo unafuna khonda kukutumikira unafudzwa,
Pontho madzindza anadzafudzirwatu.+
13 Mbiri ya ku Libhano, inadzabwera kuna iwe,+
Muti wa junipero, wa frexo* pabodzi na muti wa sipre,+
Toera kubalikisa mbuto yanga yakucena;
Pontho ndinadzapasa mbiri mbuto inaikha ine manyalo anga.+
14 Ana a ale akhakuthabusa anadzabwera mbagodama pamaso pako;
Anthu anakutsalakana mwakusowa cilemedzo anadzagodama dhuzi na manyalo ako,
Pontho iwo anadzakucemera nzinda wa Yahova,
Sioni wa Wakucena wa Izraeli.+
15 Nee unadzakhala wakusiyiwa na wakuidiwa, anthu mbakhonda kupitabve na pana iwe,+
Ine ndinadzacitisa kuti ukhale wakusimbwa kwenda na kwenda,
Cinthu cakuti cinacitisa anthu kutsandzaya kwenda na kwenda.+
16 Iwe unadzamwa nkaka wa madzindza,+
Pontho unadzayamwa bere ya amambo;+
Pontho iwe unadzadziwa kuti ine Yahova ndine Mpulumusi wako,
Unadzadziwambo kuti Wamphambvu wa Yakobe ndi Muomboli wako.+
17 Mʼmbuto mwa nkuwa, ndinadzabweresa ouro,
Pontho mʼmbuto mwa utale ndinadzabweresa parata;
Mʼmbuto mwa matabwa ndinadzabweresa nkuwa,
Pontho mʼmbuto mwa miyala ndinadzabweresa utale;
Ndinadzakhazikisa ntendere ninga muyangʼaniri wako,
Pontho ndinadzakhazikisa ulungami ninga ntsogoleri wako.+
18 Mu dziko yako nee mudzabvekabve pyauphanga,
Nkati mwa madire ako nee munadzaonekabve kufudzwa na madembe.+
Mpanda wako unadzaucemera Cipulumuso,+ pontho misuwo yako mikulu unadzaicemera Kusimba.
19 Thangwi dzuwa nee inadzakhalabve ceza cako namasikati,
Pontho mwezi nee unadzakhalabve ceza cako namasiku,
Thangwi Yahova anadzakhala ceza cako cakwenda na kwenda,+
Pontho Mulungu wako anadzakhala kubalika kwako.+
20 Dzuwa yako nee inadzadoka,
Pontho mwezi wako nee unadzabira,
Thangwi Yahova anadzakhala ceza cako cakwenda na kwenda,+
Pontho ntsiku zakutsukwala kwako zinadzagumanika kuti zamala.+
21 Mbumba yako yonsene inadzakhala yakulungama;
Iwo anadzakhala mu dziko ineyi kwenda na kwenda.
22 Ingʼono inadzakhala 1.000,
Pontho yakucepa inadzakhala dzindza yamphambvu.
Ine Yahova ndinadzacimbizisa pyenepi pa ndzidzi wace.”
61 Nzimu wa Yahova Mbuya Wankulu Kakamwe uli na ine,+
Thangwi Yahova andidzodza toera kumwaza mphangwa zadidi kuna anthu akucepeseka.+
Iye andituma toera kuwangisa anthu akusweka ntima,
Toera kudziwisa pya kubuluswa kwa ale ali nkaidi,
Pontho toera kufungula maso a anthu ali nkaidi,+
2 Toera kudziwisa kuti ndzidzi unafuna Yahova kubvera ntsisi anthu akucepeseka wafika,
Pontho toera kudziwisa kuti ndzidzi wa Mulungu wathu wakubwezera anyamalwa ace wafika,+
Toera kubalangaza onsene analira,+
3 Toera kutsalakana ale analira thangwi ya Sioni,
Toera kuapasa maluwa akubalikisa munsolo, tayu dotha,
Kuapasa mafuta toera atsandzaye, tayu kulira,
Toera kuapasa nguwo zakuti anazibvala mu ndzidzi unandisimba iwo, tayu kupswipa ntima.
Pontho iwo anadzacemerwa miti mikulu yaulungami,
Idatcekwa na Yahova toera iye asimbwe.+
4 Iwo anadzamanga pontho nyumba zidafudzwa kale kakamwe;
Iwo anadzamanga pontho mbuto zakuti nee zisakhaliwa,+
Iwo anadzasasanyira pontho mizinda idamala kufudzika,+
Mbuto zakuti zikhadafudzwa kale kakamwe.+
5 “Anthu a madziko anango anadzaperekeka toera kukumbiza pifuyo pyanu,
Pontho anthu a madziko anango+ anadzalima minda yanu mbatsalakana minda yanu ya mauva.+
6 Mbwenye imwe munadzacemerwa anyantsembe a Yahova;+
Iwo anadzakucemerani atumiki a Mulungu wathu.
Iwo anadzadya pinthu pya madzindza,+
Pontho anadzagaya thangwi ya mpfuma yawo.
7 Imwe nee munadzakhala na manyadzo, mbwenye munadzakhala na nkhombo zizinji,
Pontho nee munadzapaswa manyadzo, mbumba yanga inadzakhuwa mwakutsandzaya thangwi ya pidapaswa iwo.
Inde, iwo anadzapaswa nkhombo zizinji kakamwe mu dziko yawo.+
Iwo anadzatsandzaya kwenda na kwenda.+
Mwakukhulupirika, ine ndinaapasa pidathema iwo,
Pontho ndinadzacita nawo cibverano cakwenda na kwenda.+
9 Dzindza* yawo inadzadziwika pakati pa madzindza anango,+
Pontho adzukulu awo anadzadziwika pakati pa mbumba.
10 Ine ndinadzatsandzaya kakamwe thangwi ya Yahova.
Ine ndinadzatsandzaya na ntima wanga onsene thangwi ya Mulungu wanga.+
Thangwi iye andibvazika nguwo zacipulumuso;+
Iye andifinikiza tunika* ya ulungami,
Ninga mankhadzi wamamuna anabvala nguwo yakuphimbira munsolo* ninga ya nyantsembe,+
Pontho ninga mankhadzi wankazi wakuti asabvala pinthu pyace pyakubalikisa.
11 Ninga mataka asacitisa pinthu kumera,
Pontho munda wa maluwa usamera pinthu pidabzwalwa mwenemo,
Natenepa, Yahova Mbuya Wankulu Kakamwe,
Anadzacitisa kuti anthu ansimbe, pontho anadzacitisa kuti ulungami+ uoneke+ pakati pa madzindza onsene.
62 Thangwi ya Sioni nee ndinamatama,+
Pontho thangwi ya Yerusalemu ndinacita pinthu
Mpaka ulungami wace uyetimire ninga ceza,+
Pontho cipulumuso cace cigake ninga moto.+
Iwe unadzacemerwa na dzina ipswa,+
Yakuti unadzaipaswa na Yahova.
3 Iwe unadzakhala nthimba yakubalika mʼmanja mwa Yahova,
Ninga nguwo yakuphimbira nayo nsolo* wa mambo, mʼmanja mwa Mulungu wako.
Mbwenye dzina yako inadzakhala: Ine Ndisakomerwa na Iye,+
Pontho dziko yako inadzacemerwa: Nkazi Wakusembwa.
Thangwi Yahova anadzakomerwa na iwe,
Pontho dziko yako inadzakhala ninga nkazi wakusembwa.
5 Thangwi ninga mʼphale asasemba mwali,
Anako amuna anadzakusemba.
Mulungu wako anadzakomerwa na iwe,
Ninga pinacita mankhadzi wamamuna kuna mankhadzi wankazi.+
6 Iwe Yerusalemu, ine ndaikha anyakuonera pa mpanda wako.
Ndzidzi onsene, iwo nee asafunika kumatama, nee namasikati nee namasiku.
Imwe munalonga pya Yahova,
Lekani siya kucita pyenepi,
7 Pontho pitirizani kucita pyenepi mpaka iye akhazikise Yerusalemu mwakuwanga,
Inde, mpaka anthu onsene pa dziko yapantsi amuone kukhala wakuthema kusimbwa.”+
8 Yahova adumbira na djanja yace yamadyo, na nkono wace wamphambvu:
“Nee ndinadzaperekabve cakudya cako kuna anyamalwa ako,
Anthu a dziko inango nee anadzamwabve vinyu yako ipswa, idaphatira iwe basa mwakuwanga.+
9 Mbwenye ale anabvuna anadzadya cakudya ceneci, pontho iwo anadzasimba Yahova;
Ale anakamula mauva, anadzamwa vinyu ineyi mʼmakintalo anga akucena.”+
10 Bulukani, bulukani na pa misuwo mikulu.
Sasanyirani mbumba nseu.+
Sasanyani, sasanyani nseu.
Bulusani miyala.+
Lamusani cidzindikiro toera cioniwe na mbumba.+
11 Onani! Yahova adziwisa mpaka kunkhomo kwa dziko yapantsi:
“Pangani mwana wankazi wa Sioni,
‘Ona! Cipulumuso cako ciri kubwera.+
Nkhombo zinafuna iye kupereka ziri na iye,
Pontho pinalipa iye piri na iye.’”+
12 Ale adaombolwa na Yahova, anadzacemerwa mbumba yakucena,+
Pontho iwe unadzacemerwa Wakusakwa, Nzinda Wakuti Nee Wasiyiwa.+
63 Mbani unoyu anabwera bulukira ku Edhomi,+
Buluka ku Bhozira,+ uku abvala nguwo zakugadza,*
Mbani unoyu adabvala nguwo zakubalika
Mbafamba mwamphambvu kakamwe?
“Unoyu ndine, Ule analonga pinthu pyakulungama,
Ule wakuti ali na mphambvu zikulu zakupulumusa.”
2 Thangwi yanji nguwo zako ndi zakufuira,
Pontho thangwi yanji nguwo zako zisaoneka ninga za munthu anakamula mauva pa mbuto yakukamulira mauva?+
3 “Ine ndakamula ndekhene mauva.
Nee mʼbodzi wa mbumba akhali pabodzi na ine.
Mu ukali wanga ine ndakamula anyamalwa anga,
Pontho na kuipirwa kwanga ine ndaaponda-ponda.+
Nguwo zanga zamala khwazika ciropa cawo,
Pontho ndaphingiza nguwo zanga zonsene.
4 Thangwi ntsiku yakubwezera pyakuipa iri muntima mwanga,+
Pontho wafika ndzidzi toera kuombola mbumba yanga.
5 Ndayangʼana, mbwenye nee pakhali na munthu toera kundiphedza;
Ndadzudzumika thangwi nkhabepo adandiphedza.
Natenepa nkono wanga wabweresa cipulumuso,+
Pontho kuipirwa kwanga kwandikulumiza toera kucita pyenepi.
6 Ine ndaponda-ponda anthu mu ukali wanga,
Ine ndaacitisa kuledzera na kuipirwa kwanga,+
Pontho ndakhutula pantsi ciropa cawo.”
7 Ine ndinadzalonga pya mabasa a ufuni wakukhonda mala a Yahova,
Mabasa akuthema kusimbwa a Yahova,
Thangwi ya pinthu pyonsene pidaticitira Yahova,+
Pinthu pizinji pyadidi pidacita iye kuna dzindza ya Izraeli,
Mwakubverana na ntsisi zace, pontho na ufuni wace ukulu.
8 Thangwi iye alonga: “Mwandimomwene iwo ndi mbumba yanga, ana akuti anadzakhala akukhulupirika kuna ine.”*+
Natenepa, iye adzakhala Mpulumusi wawo.+
9 Ndzidzi onsene wa nyatwa zawo, iye akhanentsekambo.+
Pontho nyakupereka mphangwa wace* ndiye adaapulumusa.+
Thangwi ya ufuni wace na ntsisi zace iye aaombola,+
Iye aalamusa mbaatsalakana ninga mukhaatsalakanira iye kale.+
10 Mbwenye iwo ansandukira+ mbatsukwalisa nzimu wace wakucena.+
11 Iwo akumbuka ntsiku zakale,
Ntsiku za Mose ntumiki wace,
Pontho iwo abvundza: “Ali kupi ule adaawambusa pakati pa bara+ pabodzi na akumbizi a mbumba yace?+
Ali kupi Ule adaikha muna iye nzimu Wace wakucena,+
12 Ali kupi Ule adaphedza Mose* na mphambvu zace zikulu,+
Ule adagawa madzi pamaso pawo,+
Toera anthu akumbuke dzina yace kwenda na kwenda,+
13 Ali kupi Ule adaacitisa kufamba pa madzi akuzika,
Iwo mbafamba nee kugwegweduka,
Ninga kavalo nʼthando?
14 Ninga cinyama cantsanga cakuti cisaenda ku gowa toera kapuma,
Natenepa nzimu wa Yahova waacitisa kupuma.”+
Imwe mwatsogolera mbumba yanu munjira ineyi,
Toera dzina yanu yakubalika ipaswe mbiri.+
15 Yangʼanani pantsi bulukira kudzulu,
Pontho onani bulukira pa mbuto inakhala imwe yapadzulu, yakucena na yakubalika.
Imwe mwatibisira pinthu pyenepi.
16 Thangwi imwe ndimwe Babathu;+
Maseze Abhrahamu nee asatidziwa,
Pontho Izraeli nee asatidzindikira,
Imwe Yahova ndimwe Babathu.
Dzina yanu ndi Muomboli wathu wakuti asatiombola kutomera kale kakamwe.+
17 Yahova, thangwi yanji mwatisiya toera tipeuke munjira zanu,
Thangwi yanji mwatawirisa* mitima yathu kukhala yakuuma mbatikhonda kukugopani?+
Bwererani thangwi ya atumiki anu,
Madzindza a unthaka wanu.+
18 Mbumba yanu yakucena yakhala mu dziko ineyi mu ndzidzi wakucepa.
Anyamalwa athu aponda-ponda mbuto yanu yakucena.+
19 Kutomera kale kakamwe, ife tadzakhala ninga anthu akuti cipo imwe mwaatonga,
Ninga ale akuti cipo acemerwa na dzina yanu.
64 Mbapidakhala mwadidi kakamwe mbamudapandula kudzulu mbamutcita pantsi,
Natenepa mapiri mbadatetemera thangwi ya imwe,
2 Ninga pinacita moto ungapisa nkhuni zakuuma,
Pontho ninga pinacita iwo ungaperusa madzi,
Natenepa anyamalwa anu mbadadziwa dzina yanu,
Pontho madzindza mbadatetemera pamaso panu!
3 Pidacita imwe pinthu pyakudzumisa pyakuti ife nee tikhapidikhira,+
Imwe mwatcita, pontho mapiri atekenyeka pamaso panu.+
4 Kutomera kale kakamwe nkhabepo munthu adabva,
Peno kunyerezera pya Mulungu unango kusiyapo imwe,
Pontho nkhabepo adamuona, wakuti asacita pinthu toera kuphedza ale ananʼdikhira.*+
5 Imwe mwasaka ale akuti asakomerwa na kucita pinthu pyadidi,+
Ale akuti asakukumbukani mbatowezera njira zanu.
Imwe mwaipirwa thangwi ife tikhapitiriza kudawa,+
Ife tisadawa kutomera kale.
Kodi cincino, ife tathema kupulumuswa?
6 Pontho ife tonsene tadzakhala ninga munthu wakukhonda cena,
Macitiro athu onsene aulungami anadzakhala ninga cinguwo ca nkazi wakuti ali ku mwezi.+
Tonsene tinabunyala ninga tsamba,
Pontho ife tinakwatwa na madodo athu ninga mphepo.
7 Nkhabepo anacemera dzina yanu,
Nkhabepo anawangisira toera kusaka ciphedzo canu,
Thangwi imwe mwatibisira nkhope yanu,+
Pontho imwe mwaticitisa kuti tionde thangwi ya madodo athu.
8 Mbwenye cincino Yahova, imwe ndimwe Babathu.+
9 Imwe Yahova, lekani kuipirwa kakamwe,+
Pontho lekani kukumbuka madodo athu kwenda na kwenda.
Taphata miyendo, tiyangʼaneni, thangwi tonsene ndife mbumba yanu.
10 Mizinda yanu yakucena yadzakhala ninga thando.
Sioni adzakhala ninga thando,
Yerusalemu adzakhala ninga madembe.+
11 Nyumba* yathu yakucena na yakubalika,
Mule mukhakusimbirani ambuyathu,
Yamala kupiswa na moto,+
Pontho pinthu pyonsene pikhakomerwa na ife pyamala kufudzwa.
12 Imwe Yahova, na nyatwa zonsene zinatigwera, kodi munapitiriza kukhonda kutiphedza?
Kodi munapitiriza kumatama, mbamutisiya kuti tithabuswe kakamwe?+
65 “Ine ndapangizika ndekhene kuna ale akuti nee andisaka;
Ine ndatawirisa kuti anthu adakhonda kundisaka andigumane.+
Kuna dzindza yakuti nee yacemera dzina yanga ine ndalonga: ‘Ndiri pano, ndiri pano!’+
2 Ntsiku zonsene ine ndikhafuthula manja anga kuna mbumba yakukhonda kubvera,+
Kuna ale anafamba munjira yakuipa,+
Mbatowezera manyerezero awo;+
3 Mbumba yakuti ndzidzi onsene isanditsukwalisa pakweca,+
Thangwi yakupereka ntsembe mʼminda ya maluwa,+ pontho thangwi yakupisa ntsembe padzulu pa mabhuloko akupiswa, utci wace mbuyenda kuna alungu awo.
4 Iwo asakhala pakati pa nthumbi,+
Pontho namasiku iwo asaenda kagona mʼmbuto zakubisika,*
Asadya nyama za nkhumba,+
Pontho mapanela awo na pikalango pyawo piri na nsuzi wa pinthu pyakupswipiswa.*+
5 Iwo asalonga: ‘Khala pa mbuto iri na iwe; leka kundifendedzera dhuzi
Thangwi ine ndine wakucena kakamwe kupiringana iwe.’*
Iwo ndi ninga utci mʼmphuno mwanga, ninga moto unagaka ntsiku zonsene.
6 Onani! Pyenepi pyalembwa patsogolo panga;
Ine nee ndinapitiriza kukhala wakumatama,
Mbwenye ndinaabwezera,+
Ine ndinaabwezera mbandiatcunyusa thangwi ya pyonsene pidacita iwo
7 Thangwi ya madodo awo na madodo a ambuyawo,”+ alonga Yahova.
“Nakuti iwo apereka ntsembe mʼmapiri mbacitisa utci wace kupucira,
Pontho iwo andipwaza nʼnthunda,+
Pakutoma ndinadzaatcunyusa thangwi ya pinthu pyakuipa pidacita iwo.”*
8 Ipi ndi pinalonga Yahova:
“Ninga vinyu ipswa yakuti isagumanika mu tsandzo ya mauva,
Pontho munthu mbalonga: ‘Leka kuataya, thangwi muna pinthu pyadidi* mwenemo,’
Natenepa ine ndinadzacita pibodzi pyene thangwi ya atumiki anga;
Ine nee ndinadzaafudza onsene.+
9 Kuna Yakobe ndinadzacitisa kuti kuoneke mwana,*
Pontho kuna Yuda kunadzaoneka munthu anafuna kudzakwata mapiri anga ninga unthaka;+
Anthu adasankhula ine anadzakhala mu dziko ineyi,
Pontho atumiki anga anadzakhala mwenemo.+
10 Kuna mbumba yanga inandisaka,
Saroni+ inadzakhala mbuto yakudyesera mabira,
Pontho Gowa ya Akori+ inadzakhala mbuto yakupumira ngʼombe.
11 Mbwenye imwe muli pakati pa ale adasiya Yahova,+
Ale adaduwala phiri yanga yakucena,+
Ale anakhunganyira meza mulungu anapasa Ncena,*
Pontho ale anadzadza makhomitco na vinyu yakubvungazwa toera kupasa mulungu anaonera pya Tsogolo.*
12 Natenepa ine ndinadzakuperekani toera muphiwe na supada,+
Pontho monsene munadzagodama toera kuphiwa,+
Thangwi ine ndacemera, mbwenye imwe nee mwatawira,
Ine ndalonga, mbwenye imwe nee mwabvesera;+
Imwe mwapitiriza kucita pinthu pyakuipa pamaso panga,
Pontho mwasankhula pire pinakhonda kukomerwa na ine.”+
13 Natenepa, Yahova Mbuya Wankulu Kakamwe alonga:
“Onani! Atumiki anga anadzadya, mbwenye imwe munadzakhala na njala.+
Atumiki anga anadzamwa,+ mbwenye imwe munadzakhala na nyota.
Atumiki anga anadzatsandzaya,+ mbwenye imwe munadzakhala na manyadzo.+
14 Atumiki anga anadzakhuwa mwakutsandzaya thangwi ya makhaliro adidi a mitima yawo,
Mbwenye imwe munadzalira thangwi yakubva kupha mʼmitima mwanu,
Pontho munadzakhuwa thangwi yakusanyika mʼmitima mwanu.
15 Imwe munadzasiya dzina yakuti ale adasankhula ine anadzaiphatisira toera kupasa dzedze,
Pontho Yahova Mbuya Wankulu Kakamwe anadzapha mʼbodzi na mʼbodzi wa imwe,
Mbwenye atumiki ace iye anadzaacemera na dzina inango;+
16 Natenepa, onsene anasaka kupaswa nkhombo pa dziko yapantsi,
Anadzazipaswa na Mulungu wandimomwene,*
Pontho onsene anadumbira pa dziko yapantsi
17 Onani, ine ndiri kucita kudzulu kupswa na dziko yapantsi ipswa;+
Pinthu pyakale nee pinadzakumbukirwabve,
Pontho nee pinadzakhalabve muntima.+
18 Natenepa komerwani, pontho tsandzayani kwenda na kwenda thangwi ya pinthu pinafuna kucita ine.
Onani, ine ndiri kucita Yerusalemu ninga cinthu cakutsandzayisa,
Pontho mbumba yace toera ikhale thangwi yakucitisa kukomerwa.+
19 Pontho ine ndinadzakomerwa na Yerusalemu mbanditsandzaya thangwi ya mbumba yanga;+
Mu Yerusalemu nee munadzabvekabve kulira peno kukhuwa thangwi ya nyatwa.”+
20 “Mwenemu nee munadzaonekabve mwana wakuyamwa wakuti anadzakhala mʼmaso mu ntsiku zakucepa,
Nee munadzaonekabve nkhalamba yakuti inadzafa mbidzati kukwanirisa ntsiku zace.
Thangwi munthu anafa na pyaka 100 anadzaoniwa ninga mʼphale,
Pontho nyakudawa anadzapaswa dzedze, maseze akhale na pyaka 100 pyakubalwa.*
22 Iwo nee anadzamanga nyumba toera unango akhalemo,
Pontho nee anadzabzwala toera anango adye.
Thangwi ntsiku za mbumba yanga zinadzakhala ninga ntsiku za muti,+
Pontho anthu adasankhula ine anadzatsandzaya kakamwe na basa ya manja awo.
24 Iwo mbadzati kucemera, ine ndinadzatawira;
Iwo mbadzati malisa kulonga, ine ndinadzabva.
25 Bindzi na mwanabira anadzadya pabodzi,
Nkhalamu inadzadya tsanga ninga ngʼombe,+
Pontho nyoka inadzadya pfumbi.
Ipyo nee pinadzafudza cinthu peno kucita cinthu cakuipa paphiri yanga yakucena,”+ alonga Yahova.
66 Yahova alonga tenepa:
“Kudzulu ndi mpando wanga wa umambo, dziko yapantsi ndi mbuto yakuikhira manyalo anga.+
Mphapo ndi ntundu wanji wa nyumba inafuna kundimangira imwe,+
Pontho mbuto yanga toera kupuma mbidakhala kupi?”+
2 “Manja anga ndiwo adacita pinthu pyenepi pyonsene,
Munjira ineyi, pinthu pyenepi pyadzakhalapo,” alonga Yahova.+
“Munthu anafuna kuyangʼana ine ndi uyu:
Munthu wakucepeseka na wa ntima wakutsukwala wakuti asagopa mafala anga.+
3 Munthu anapha ngʼombe asaoniwa ninga ule anapha munthu.+
Munthu anapereka bira ninga ntsembe asaoniwa ninga munthu anagwanda khosi ya mwanambwa.+
Ule anapereka muoni asaoniwa ninga ule anapereka ciropa ca nkhumba ninga ntsembe!+
Ule anapereka ntsembe ya olibhano ninga ntsembe ya cikumbuso+ ndi ninga ule anapasa nkhombo na mafala akulongerera.*+
Iwo asankhula kutowezera njira zawo,
Pontho asakomerwa kucita pinthu pyakunyanyasa.
4 Natenepa, ine ndinadzasaka njira toera kuatcunyusa,+
Pontho ine ndinadzaabweresera pinthu pinagopa iwo.
Thangwi pidacemera ine nkhabepo adatawira;
Mu ndzidzi ukhalonga ine nkhabepo adabvesera.+
Iwo apitiriza kucita pinthu pyakuipa pamaso panga,
Pontho iwo asankhula kucita pinthu pinakhonda kukomerwa na ine.”+
5 Bveserani mafala a Yahova, imwe anagopa mafalace:
“Abale anu akuti asakuidani, pontho akuti asakupambulani thangwi ya dzina yanga, alonga: ‘Mbasimbwe Yahova!’+
Mulungu anadzaonekera mbabweresa kutsandzaya kuna imwe,
Mbwenye iwo anadzapaswa manyadzo.”+
6 Mu nzinda muli kubveka kukhuwa kwa uviyaviya, kukhuwa kukubulukira ku templo!
Kukhuwa kweneku kusapangiza kuti Yahova ali kubwezera anyamalwa ace pinthu pidathema iwo.
7 Nkazi mbadzati kubva kupha, abala mwana.+
Kupha kwa kubala mbakudzati fika kuna iye, abala mwana wamamuna.
8 Mbani adabva kale pinthu pyenepi?
Mbani adaona kale pinthu ninga pyenepi?
Kodi dziko inakwanisa kubalwa pa ntsiku ibodzi basi?
Peno dzindza inakwanisa kubalwa ndzidzi ubodzi ene?
Mbwenye mu ndzidzi ukhatoma Sioni kubva kupha toera kubala, abala anace amuna.
9 “Kodi ine ndisacitisa ndzidzi wakubala ufike mbandicitisa kuti mwana akhonde kubalwa?” alonga Yahova.
“Kodi ndinacitisa mwana asale pangʼono na kubalwa, buluka penepo mbandifunga nthumbo?” adapilonga ndi Mulungu wanu.
10 Tsandzayani na Yerusalemu, pontho komerwani naye.+
Imwe monsene akuti musanfuna,+ tsandzayani kakamwe naye, imwe monsene akuti musamulira,
11 Thangwi imwe munadzayamwa nkaka wace mbamukhuta mwadidi, pontho munadzabalangazwa,
Imwe munadzayamwa kakamwe mbamukomerwa na kukula kwa mbiri yace.
12 Natenepa Yahova alonga:
“Ndinadzampasa ntendere wakulandana na nkulo,+
Pontho ndinadzampasa mpfuma za madzindza ninga nkulo wakudzala.+
Imwe munadzayamwa, pontho munadzathukulwa mʼmanja,
Munadzatsalakanwa mwadidi pa miyendo pace.
13 Ninga mama asabalangaza mwanace,
Inembo ndinapitiriza kukubalangazani,+
Pontho imwe munadzabalangazwa thangwi ya Yerusalemu.+
14 Imwe munadzaona pyenepi, pontho mitima yanu inadzakomerwa,
Magogodo anu anadzakhala pontho na mphambvu ninga tsanga iwisi.
Pontho mphambvu za Yahova zinadzapangizika kuna atumiki ace,
Mbwenye iye anadzaipirwa na anyamalwa ace.”+
15 “Thangwi Yahova anadzabwera ninga moto,+
Pontho ngolo zace za nkhondo zinadzabwera ninga condzi,+
Toera kubwezera ukali wace ukulu kuna anyamalwa ace,
Toera kuatcunyusa na malirimi a moto.+
16 Yahova anadzatonga na moto,
Inde, iye anadzaphatisira supada toera kutonga anthu onsene;
Pontho ale anafuna kuphiwa na Yahova anadzakhala azinji.
17 “Ale anakhunganyika mbaceneseka toera kupita mʼminda,*+ mbalimira kuntsi kwa dzimunthu iri pakati pa munda, ale anadya nyama ya nkhumba,+ pinthu pyakukhonda cena na matciru,+ anadzafa onsene pabodzi pene,” alonga Yahova. 18 “Nakuti ndisadziwa mabasa awo na pinthu pinanyerezera iwo, ndikubwera toera kugumanya anthu a madzindza onsene na pilongero pyonsene, iwo anadzabwera mbaona mbiri yanga.”
19 “Ndinadzaikha cidzindikiro pakati pawo, pontho anango mwa ale anafuna kupulumuka ndinadzaatumiza kuna madzindza, kuna ale ali na luso yakuphatisira uta a ku Tarsi,+ Puli na ku Ludhi.+ Ine ndinadzaatumizambo kuna ale anakhala ku Tubhali, ku Yavani+ na ku ntsuwa zakutali kakamwe, akuti adzati kubva kulonga thangwi ya ine peno kuona mbiri yanga; pontho iwo anadzalonga pya mbiri yanga pakati pa madzindza.+ 20 Iwo anadzabweresa abale anu onsene ninga muoni kuna Yahova kubulukira mʼmadzindza onsene,+ iwo anadzabwera mʼmakavalo, mu ngolo zikulu na zingʼono, mʼmaburu na mʼmakamelo akuthamanga kakamwe mpaka kufika paphiri yanga yakucena ku Yerusalemu,” alonga Yahova, “ninga pinacita mbumba ya Izraeli ingabweresa muoni mu pyombo pyakucena panyumba ya Yahova.”
21 “Anango ndinadzaakwata toera akhale anyantsembe anango toera akhale Alevi,” alonga Yahova.
22 “Ninga kudzulu kupswa na dziko yapantsi ipswa,+ pinacita ine pinadzapitiriza pamaso panga,” alonga Yahova, “natenepa dzindza* yanu na dzina yanu inadzapitiriza.”+
23 “Kutomera mwezi upswa mpaka mwezi unango upswa, pontho kutomera Sabudu mpaka Sabudu inango,
Anthu onsene anadzabwera toera kundilambira,”+ alonga Yahova.
24 “Iwo anadzabuluka mbaona manungo a anthu adaphiwa thangwi yakukhonda kundibvera;
Thangwi mpfunye zinafuna kudya manungo awo nee zinadzafa,
Moto unafuna kuapisa nee unadzathima,+
Pontho manungo awo anadzakhala pinthu pyakunyanyasa kuna anthu onsene.”
Dzina ineyi isabveka “Yahova Asapulumusa.”
Peno: “kudziwa mbuyace.”
Fala na Fala: “pyatumbulwa.”
Peno: “nsasa.”
Peno: “pipfundziso pya.”
Peno: “mwana adaferwa na pai wace.”
Peno: “cinewi.”
Peno: “pyakumwa pyakuledzeresa pyakucitwa na tirigu.”
Panango miti na minda ineyi ya maluwa isacita khundu yakulambira madzimunthu.
Peno: “citsogolero cinadzabuluka.”
Peno: “anadzasanduza.”
Peno: “pyakusindula napyo.”
Peno: “pyakusaira; pyakusindula; pyakukadza.”
Peno: “pyaufiti.”
Peno: “nyakuwangisa pironda pyanu.”
Fala na Fala: “ansandukira pamaso pa mbiri yace.”
Fala na Fala: “anadzadya misapo ya mabasa awo.”
Fala na Fala: “makhosi (makholongo) awo.”
Peno: “kuti nkhuma zawo zikhale pakweca.”
Kweneku ndi kupwazwa thangwi yakukhonda sembwa, pontho thangwi yakusowa ana.
Fala na Fala: “matubzwi.”
Fala na Fala: “bhato.” Onani Apendise B14.
Onani Apendise B14.
Onani Apendise B14.
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “kutonga kwace mwakulungama.”
Peno: “Cisankhulo ca; Uphungu wa.”
Peno: “akucenjera.”
Peno: “pitsogolero pya.”
Peno: “ciruzu.”
Fala na Fala: “Iye.”
Peno: “makaxiri.”
Fala na Fala: “fala ya ule akakhuwa.”
Fala na Fala: “ine ndinamatamiswa.”
Peno: “dzindza.”
Munjira inango: “iwo.”
Dzina ineyi isabveka “Anafuna Kudzabwerera Basi Ene Ndi Ale Adasala.”
Munjira inango: “tiithuse.”
Peno: “mbatiphola mpanda.” Fala na Fala: “minyandza.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “Ntsikana.”
Dzina ineyi isabveka “Mulungu Ali na Ife.”
Peno: “ciruzu.”
Peno: “uwadhi.”
Unoyu ndi nkulo wa Eufrate.
Peno: “ninga munalembera anthu azinji.” Fala na Fala: “mʼmalembero a munthu wakuti asafa.”
Panango dzina ineyi isabveka “Kuthamanga Toera Katapata peno Kufika Mwakucimbiza Toera Kutapata.”
Fala na Fala: “ndaenda dhuzi.”
Unoyu ndi nkazi wa Izaiya.
Silowa ikhali mbuto inabuluka madzi.
Unoyu ndi nkulo wa Eufrate.
Onani Izaiya 7:14.
Peno: “Bvalani pida pyanu pya nkhondo.”
Fala Yacihebheri yakuti “Mulungu ali na ife” ndi Emanuwele. Onani Izaiya 7:14; 8:8.
Peno: “mpukutu.”
Peno: “pitsogolero.”
Peno: “ndinadikhira na ntima onsene.”
Fala na Fala: “kunja nee kunaca.”
Fala na Fala: “utongi unadzakhala mʼmapewa mwace.”
Fala na Fala: “bulukira nduli.”
Munjira inango: “nthawi ya ncindu na ntete.”
Peno: “ana adaferwa na pai.”
Peno: “ana adaferwa na pai.”
Peno: “yakutcunyuswa.”
Peno: “mbiri yanu.”
Fala na Fala: “Ine ndinadzatcunyusa.”
Anewa ndi “Asirya,” analongwa pa vesi 5 na 24.
Anewa ndi “Asirya,” analongwa pa vesi 5 na 24.
Peno: “mwaulungami.”
Munjira inango: “Mwanangʼombe na nkhalamu pinadzadya pabodzi.”
Peno: “ditiringwe.”
Peno: “mpalo.”
Peno: “muti wa cidzindikiro.”
Peno: “Madzindza anadzansaka.”
Peno: “mbuto inafuna kupuma.”
Dzina ineyi isabveka Bhabhilonya.
Peno: “muti wa cidzindikiro.”
Fala na Fala: “phewa.”
Peno: “anadzathimizira mphambvu zawo kuna.”
Munjira inango: “anadzaumisa.”
Fala na Fala: “lirimi.”
Unoyu ndi nkulo wa Eufrate.
Munjira inango: “anadzagawa nkulo unoyu kudza mikulo mingʼono minomwe.”
“Yah” ndi dzina ya Yahova ingalembwa mwacigwagwa.
Fala na Fala: “Iwe nkazi anakhala,” mafala anewa asalandanisa mbumba yonsene ninga nkazi.
Peno: “muti wa cidzindikiro.”
Fala na Fala: “adacenesa ine.”
Peno: “na misoka ya nyenyezi ya Kezili,” panango akulonga pya nsoka wa Orioni na misoka inango ya nyenyezi yakuti iri dhuzi na unoyu.
Munjira inango: “madimonyo akulandana na mbuzi.”
Peno: “imwe munadzasingirira.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Fala na Fala: “mabokho.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Fala na Fala: “nʼnyumba.”
Peno: “uwadhi.”
Fala Yacihebheri isalonga pya muti wakuti usagumanika kakamwe nʼkhundu mwa mikulo ya ku Oriente Médio. Ncizungu ndi “choupos.”
Munjira inango: “Thangwi nʼkhuwo wa nkhondo wabveka kuna misapo yanu ya ndzidzi wa malimwe na ya ndzidzi wakubvuna.”
Peno: “pyaka pyakulengeswa mwadidi, ninga pinacita nyaganyo”; pyenepi pisabveka, basi ene pyaka pitatu.
Fala na Fala: “ana a Izraeli.”
Fala na Fala: “mafuta a manungo ace anadzamala.”
Onani Mabvekero a Mafala Anango.
Peno: “adidi.”
Peno: “nthawi zitete za mulungu wa dziko inango.”
Peno: “yakukululwa.”
Peno: “muti wa cidzindikiro.”
Peno: “dzindza yakuti isaponda thangwi iri na mphambvu kakamwe.”
Peno: “yakukululwa.”
Peno: “Mefi.”
Peno: “nkulu wa anyankhondo.”
Peno: “akhadzumatirwa thangwi ya kubalika kwa.”
Panango ineyi ndi mbuto ikhali Bhabhilonya wakale.
Fala na Fala: “ncunu mwanga mukupha kakamwe.”
Fala na Fala: “Mwana wa.”
Dzina ineyi isabveka “Kumatama.”
Peno: “pyaka pyakulengeswa mwadidi, ninga pinacita nyaganyo”; pyenepi pisabveka, basi ene pyaka pitatu.
Pisaoneka kuti mbuto ineyi ndi Yerusalemu.
Peno: “anyamakavalo.”
Peno: “akhunganya.”
Peno: “anyamakavalo.”
Peno: “Kurtina ya.”
Fala na Fala: “mbuto yakukhala.”
Fala na Fala: “pyakulemera.”
Unoyu ndi nkulo ungʼono unabuluka mu Nkulo wa Nilo.
Fala na Fala: “amiyali.”
Munjira inango: “gombe.”
Peno: “dziko yapantsi.”
Peno: “anadzazolimisa dziko.”
Munjira inango: “iri kuuma.”
Peno: “cibverano cakale.”
Peno: “kumadokero a dzuwa.”
Peno: “Kubalikisa.”
Fala na Fala: “pamaso pa atsogoleri ace.”
Peno: “paredhi.”
Peno: “vinyu yakukhota.”
Fala na Fala: “anadzafudza.”
Peno: “anadzamalisa.”
Peno: “Ife tisanyindira iye.”
Munjira inango: “ale akuti manyerezero awo ndi akukhonda gawika.”
“Yah” ndi dzina ya Yahova ingalembwa mwacigwagwa.
Pyenepi pisabveka, ife tisafuna kuti anthu adziwe dzina ya Mulungu mbaikumbukira.
Peno: “pa dziko yapantsi.”
Peno: “anapfundza pyaulungami.”
Peno: “anapfundza ulungami.”
Fala na Fala: “Mitembo.”
Munjira inango: “bume ya pinthu pyonsene piwisi.”
Onani Mabvekero a Mafala Anango.
Mafala anewa asalonga pya Izraeli, wakuti asalandaniswa na munda wa mauva.
Peno: “ndisautsalakana.”
Onani Mabvekero a Mafala Anango.
Unoyu ndi nkulo wa Eufrate.
Peno: “Uwadhi.” Onani Mabvekero a Mafala Anango.
Pisaoneka kuti ndi nzinda ukulu wa Samariya.
Fala na Fala: “Nkhambala yakupima nayo pa nkhambala yakupima nayo, nkhambala yakupima nayo pa nkhambala yakupima nayo.”
Fala na Fala: “mulomo.”
Fala na Fala: “Nkhambala yakupima nayo pa nkhambala yakupima nayo, nkhambala yakupima nayo pa nkhambala yakupima nayo.”
Munjira inango: “taona masomphenya.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “nkhambala yakundendemeza nayo.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “Anadzakukukululani.”
Munjira inango: “Iwo angabvesesa pinthu pinacitika, anadzagopa kakamwe.”
Peno: “dziko yonsene yapantsi.”
Fala Yacihebheri idaphatisirwa pa mbuto ineyi isalonga pya ntundu unango wa tirigu yakupwazika yakuti ikhalimwa ku Ejitu wakale.
Peno: “pinafuna iye ndi pyadidi.”
Peno: “Pontho wakuti udziwisi wace ndi ukulu kakamwe.”
Dzina ineyi panango isabveka “Cakuikhira Moto pa Guwa ya Mulungu.” Mafala anewa panango asalonga pya Yerusalemu.
Fala na Fala: “alendo.”
Peno: “Ndimwe akuphonyeka kakamwe!”
Peno: “dhrodhro.”
Fala na Fala: “ule anasandika anthu.”
Pyenepi pisabveka, kutsolima thangwi ya manyadzo, pontho thangwi ya kuphatiswa mwala.
Fala na Fala: “asathirira pantsi pyakumwa pyakuledzeresa,” pyenepi pikhapangiza kuti acita cibverano.
Peno: “Mwakukhonda kubvundzisa mulomo wanga.”
Fala na Fala: “mpanda wakuwanga wa Farau.”
Peno: “cipfundziso ca.”
Fala na Fala: “pyadidi.”
Munjira inango: “mbuto yakukoyera madzi.”
Peno: “mphondo.”
Peno: “asapitiriza kudikhira.”
Peno: “ananʼdikhira na ntima onsene.”
Peno: “madzimunthu akunyunguluswa.”
Munjira inango: “pontho anadzapiona ninga pyakusowa basa.”
Peno: “amala kuabulusa na foxolo na garfu.”
Peno: “gogodo yakusweka ya.”
Peno: “Muya.”
Fala na Fala: “cisero ca pinthu pyakusowa basa.”
Peno: “unaceneseka imwe thangwi ya.”
Peno: “thangwi yakulira kwa.”
Fala yakuti “Tofeti” idaphatisirwa pa vesi iyi isaphiphirisira mbuto inapiswa pinthu, yakuti isaimirira kufudza.
Peno: “khumbi.”
Peno: “yakuthawira.”
Peno: “kucita pinthu pyakukhonda lemedza.”
Peno: “mphambvu yanu.”
Peno: “nthete zizinji.”
Panango anewa ndi Ayuda.
Nyamalwa.
Munjira inango: “yauma.”
Peno: “mbuto yakuthawira ya pa nthunda.”
Peno: “unadzanyerezera.”
Peno: “anadzakhala thobodoo.”
Peno: “Ngʼombe za ntsanga.”
Unoyu ndi Bhozira, nzinda ukulu wa ku Edhomi.
Munjira inango: “madimonyo akulandana na mbuzi.”
Fala na Fala: “iye aphatisira nkhambala yakupima nayo toera kuagawira dziko.”
Peno: “madhrodhro.”
Peno: “mabewewe.”
Peno: “nkulu wa anyakupereka pyakumwa.”
Peno: “Cisirya.”
Fala na Fala: “Khazikisani nkhombo na ine mbamubwera kuna ine.”
Peno: “yakutikanwa.”
Fala na Fala: “mbaifuthula.”
Munjira inango: “pakati.”
Peno: “mbuto zinapita na madzi a nkulo wa Nilo.”
Peno: “ndacita.”
Nkhambala inalongwa pano ndi ire inaphatisirwa toera kutsogolera kavalo. Nkhambala ineyi isamangirwa pa cinthu cautale cinaikhwa pamulomo wa kavalo.
Unoyu ndi Ezekiya.
Peno: “pinafuna kukula kubulukira ku mbeu zidagwa pantsi.”
Peno: “mu templo.”
Peno: “pabanja.”
Fala na Fala: “ntsiku zako.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Fala na Fala: “Yah.” Yah ndi dzina ya Yahova ingalembwa mwacigwagwa.
Pyenepi pisabveka mafala a Mulungu na pinthu pinacita iye.
Peno: “mwabulusa madawo anga onsene pamaso panu.”
Peno: “Seoli,” ndi kumasiye kunaikhwa anthu onsene. Onani Mabvekero a Mafala Anango.
Peno: “nyakadumu.”
Fala na Fala: “akomerwa thangwi ya iwo.”
Peno: “undimomwene.”
Fala na Fala: “ntsiku.”
Peno: “Longani munjira yakuti inabalangaza.”
Peno: “nzimu.”
Peno: “anadzakumbiza.”
Djanja inalongwa pano ndi kunkhomo kwa cala cingʼono mpaka kunkhomo kwa cala cikulu. Onani Apendise B14.
Munjira inango: “mbani anabvesesa.”
Peno: “nkhabe kupereka nkhuni zakukwana.”
Peno: “dzimunthu yakunyunguluswa.”
Peno: “yakuzungulira.” Pisabveka, yakuti nkhabe nkhomo.
Pyenepi pisabveka, toera kutumikira Iye.
Peno: “nyundo.”
Fala na Fala: “mbeu.”
Pyenepi pisabveka wakusowa citsidzikizo, pontho wakupwazika.
Ndi thendere yakuti iri na masamba akubithimira na maluwa akucena akununkhira mwadidi.
Ndi muti ukulu wakuti usalapha mpaka metru 15. Masamba ace ndi akubithimira pangʼono, pontho nthawi zace ndi zakuumbuka ninga dotha.
Fala na Fala: “pakutoma.”
Peno: “Toera ife tipiphatisire mʼmitima yathu.”
Peno: “Madzimunthu awo akunyunguluswa.”
Peno: “citsogolero cace.”
Peno: “mphambvu ya umaso.”
Peno: “madzimunthu akunyunguluswa.”
Peno: “madhrodhro.”
Fala na Fala: “mbeu.”
Peno: “madhrodhro.”
Pisaoneka kuti analongwa pano ndi alungu authambi.
Peno: “mbamundinyindira.”
Pisaoneka kuti anewa ndi apfundzisi a Mwambo.
Dzina ineyi isabveka “Wakulungama,” ineyi ndi dzina yacilemedzo ya Izraeli.
Peno: “dziko yakusowa madzi.”
Fala na Fala: “mbeu.”
Fala Yacihebheri isalonga pya muti wakuti usagumanika kakamwe nʼkhundu mwa mikulo ya ku Oriente Médio. Ncizungu ndi “choupos.”
Iwo unoyu ndi madzimunthu.
Peno: “dzimunthu yakunyunguluswa.”
Peno: “nyundo yace.”
Peno: “kompaso.”
Ncizungu, muti unoyu usacemerwa loureiro.
Peno: “phindi ya muti wakuuma.”
Munjira inango: “dongo inakwanisa kulonga kuti: ‘Basa yako nee iri na pyakuphatira’?”
Peno: “Mbani anabvera imwe kupha toera kumʼbala?”
Munjira inango: “anyabasa.”
Munjira inango: “anyamalonda.”
Munjira inango: “toera ikhale yakusowa pinthu.”
Fala na Fala: “mbeu.”
Fala na Fala: “Mbeu.”
Mitolo ineyi ndi madzimunthu adakwizwa pa pinyama.
Fala na Fala: “pyakutoma.”
Munjira inango: “nee ndinadzagumanikana mwadidi na munthu.”
Munjira inango: “Mwakukhonda tsalakana.”
Peno: “Pontho pyaungʼanga pyako nee pinapingiza nyatwa zinafuna kukugwera.”
Munjira inango: “Ale anagawa kudzulu; Anyakudziwisa pya nyenyezi.”
Peno: “kupulumusa umaso wawo.”
Fala na Fala: “kwawo.”
Fala na Fala: “adabuluka mʼmadzi a Yuda.”
Fala na Fala: “pyakutoma.”
Peno: “dzimunthu yakunyunguluswa.”
Peno: “ndakudinga.” Munjira inango: “ndakusankhula.”
Pawo unoyu panango ndi alungu authambi.
Fala na Fala: “Mbeu.”
Fala na Fala: “pikhali ine mʼmimba.”
Fala na Fala: “mu nʼthundzi wa.”
Peno: “Yahova anadzandicitira ulungami.”
Peno: “ndiye anafuna kundipasa nkhombo.”
Fala na Fala: “adatsidzikizwa.”
Munjira inango: “nthunda zakusowa tsanga.”
Fala na Fala: “kunduli.”
Peno: “andipasa lirimi yakupfundziswa mwadidi.”
Munjira inango: “ndinawangisa.”
Munjira inango: “mpfunye.”
Onani Mabvekero a Mafala Anango.
Fala na Fala: “anadzabvazikwa mʼmisolo yawo.”
Peno: “ukonde.”
Peno: “anadzasowa cakulonga.”
Munjira inango: “pidabva ife?”
Fala na Fala: “nkono.”
Mafala akuti “pamaso pace” asalonga pya munthu anaona peno Mulungu.
Peno: “maonekero ace nkhabe kutitundusa.”
Munjira inango: “Iye asakhala ninga munthu wakuti anthu ampasira nkhodolo.”
Fala na Fala: “kutongwa na kupondererwa.”
Peno: “makhaliro ace a umaso?”
Peno: “iye amenywa mpaka kufa.”
Peno: “uphanga.”
Peno: “Munthu mʼbodzi anadzapereka nthumbi yace.”
Fala na Fala: “mamuna wakupfuma.”
Fala na Fala: “mbeu.”
Peno: “mbuyako.”
Peno: “miyala ya kore ya moto.”
Peno: “unadzakonesa.”
Peno: “kobiri inatambira imwe mwakuithabukira.”
Peno: “wakunyindirika.”
Peno: “cinewi.”
Peno: “cifuniro canga.”
Ndi thendere yakuti iri na masamba akubithimira na maluwa akucena akununkhira mwadidi.
Fala na Fala: “mamuna wakukapalwi.”
Fala na Fala: “Amuna akukapalwi.”
Fala na Fala: “patalimba pawo.”
Peno: “uwadhi.”
Peno: “uwadhi.”
Peno: “ndisabalangazika.”
Fala na Fala: “kuntsi kwa aro na nsuwo.”
Panango unoyu ndi nsambo wakulambira madzimunthu.
Munjira inango: “mambo.”
Peno: “Seoli,” ndi masiye anaikhwa anthu onsene. Onani Mabvekero a Mafala Anango.
Fala na Fala: “Na thangwi ineyi, iwe nee waneta.”
Peno: “pinakomerwa na imwe.”
Fala na Fala: “yalemera.”
Peno: “kunyindirika kwagwegweduka.”
Peno: “kunyindirika kwazambazika.”
Fala na Fala: “pontho pikhali pyakuipa pamaso pace.”
Peno: “tunika yakusowa mikono.”
Fala na Fala: “mbeu.”
Fala na Fala: “mbeu ya mbeu yako.”
Fala na Fala: “anadzakutumikira.”
Peno: “nʼcipwere.”
Peno: “anadzakubalikisa.”
Ndi muti ukulu wakuti usalapha mpaka metru 15. Masamba ace ndi akubithimira pangʼono, pontho nthawi zace ndi zakuumbuka ninga dotha.
Fala na Fala: “Mbeu.”
Fala na Fala: “mbeu.”
Peno: “tunika yakusowa mikono.”
Peno: “dhunku; turbhante.”
Peno: “dhunku; turbhante.”
Munjira inango: “nguwo zakufuira kakamwe.”
Peno: “nee anadzandisandukira.”
Peno: “anju anakhala patsogolo pace.”
Peno: “Ule adacitisa kuti nkono wace wakubalika uende pabodzi na djanja yamadyo ya Mose.”
Fala na Fala: “mwacitisa.”
Peno: “ale ananʼdikhira mwakupirira.”
Peno: “Ndimwe adaticita.”
Peno: “Templo.”
Munjira inango: “nʼnyumba za anyakuonera.”
Peno: “pyakukhonda cena.”
Munjira inango: “Gopa ine ndinakuthapulisa kucena kwanga.”
Peno: “ine ndinadzaabwezera nʼkhandzwa mwawo.”
Fala na Fala: “nkhombo.”
Fala na Fala: “mbeu.”
Peno: “Mwai.”
Peno: “Pinafuna kucitika kutsogolo.”
Peno: “wakukhulupirika.” Fala na Fala: “Ameni.”
Peno: “wakukhulupirika.” Fala na Fala: “Ameni.”
Peno: “Pinentso pyakale.”
Munjira inango: “Pontho ule anadzacimwana kukwanisa pyaka 100, anadzaoniwa ninga wakupaswa dzedze.”
Fala na Fala: “mbeu.”
Munjira inango: “ule anasimba dzimunthu.”
Ineyi ndi minda yakubalika inaphatisirwa toera kulambira madzimunthu.
Fala na Fala: “mbeu.”