Tumikirani Yahova Mbazidzati Kufika Ntsiku Za Nyatwa
‘Kumbuka Mulungu Wako.’—KOEL. 12:1.
MUNAKWANISA KUFOKOTOZA?
Kodi Akristu akuti ali na maluso anakwanisa tani kuphedza aphale na atsikana?
Ndi pitsandzo pipi pya Bhibhlya pya kutumikira ku mbuto zakuti ziri na kufuna kukulu kwa amwazi mphangwa pyakuti pinaphindulisa Akristu akukalamba lero?
Mu kupita kwa ndzidzi, Akristu anango atoma tani kutumikira Mulungu mu njira zipswa mu umaso wawo?
1, 2. (a) Ndi uphungu upi udapumirwa Salomoni toera kulemba kuna aphale na atsikana? (b) Thangwi yanji uphungu wa Salomoni ndi wakufunikambo kuna Akristu akuti ali nkati mwa pyaka 50 pyakubalwa na akukalamba?
MAMBO SALOMONI akhadapumirwa toera kupanga aphale mafala awa: “Kumbuka Mulungu mbuchiri mphale, mbazidzati kukufikira ntsiku zakuthabuka.” Kodi ndi zipi “ntsiku zakuthabuka”? Salomoni aphatisira mafala anewa toera kulonga ntsiku za zakunentsa za unkhalamba zakuti manja asatetemera, miyendo isasowa mphambvu, kumala kwa mano, kukhonda kuona mwadidi, kukhonda kubva mwadidi, kukhala na imbvi na kukotama kwa nsana. Nee munthu m’bodzi mbadacita masasanyiro mbadikhira mpaka kukalamba toera kutoma kutumikira Yahova.—Lerini Koelete 12:1-5.
2 Akristu azinji akuti ali nkati mwa pyaka 50 pyakubalwa aciri na mphambvu toera kucita pinthu. Panango, iwo ali na imbvi zakucepa, mbwenye nkhabe makhaliro aungumi adalonga Salomoni. Kodi Akristu anewa akukalamba mbadakwanisa kuphindula na uphungu wakupumirwa udaperekwa kwa aphale na atsikana kuti: ‘Kumbuka Mulungu wako?’ Kodi uphungu unoyu usabvekanji?
3. Kodi kusaphatanizanji kukumbuka Mulungu wathu?
3 Ngakhale kuti tiri na pyaka pizinji mbatikatumikira Yahova, mphyadidi kwa ife kulimira m’midzidzi inango mbatinyerezera mwacidikhodikho thangwi ya ukulu wa Nsasanyi wathu. Kodi umaso si wakudzumatirisa tayu? Macitiro a umaso ndi akunentsa kudziwiwa na anthu. Masasanyiro a Yahova ndi akudzala na pinthu pizinji toera titsandzaye na umaso. Tingayang’ana pyakucitwa pya Yahova, tisathimizira kupereka kwathu takhuta ku ufuni wace, udziwisi wace na mphambvu zace. (Sal. 143:5) Mbwenye kukumbuka Mulungu kusaphatanizambo kunyerezera mwacidikhodikho pinatiphemba iye. Mu ndzidzi unoyu wakunyerezera mwacidikhodikho, mwandimomwene tinapibva kukhala akutonga toera kupereka takhuta kuna Nsasanyi wathu mu kuntumikira mwakukwana mu ndzidzi onsene unakhala ife maso.—Koel. 12:13.
MIYAI YAKUPAMBULIKA MU NDZIDZI WAKUKALAMBA
4. Ndi mbvundzo upi wakuti Akristu a maluso mazinji anakwanisa kuucita, na thangwi yanji?
4 Khala imwe muli na pyaka pizinji pya maluso ninga munthu wankulu, pana mbvundzo wakufunika kwa imwe toera kubvundzika, ‘Kodi ndinadzacitanji na umaso wanga cincino mu ndzidzi wakuti ndiciri na mphambvu?’ Ninga Nkristu wa maluso, muli na miyai yakuti idzati kufungulwa kuna anango. Munakwanisa kupanga aphale na atsikana pinthu pidapfundza imwe kubulukira kuna Yahova. Munakwanisa kuwangisa anango mu kulonga pyakugumana napyo pidakhala na imwe mu kutumikira Mulungu. Mambo Dhavidhi aphembera kuti akhale na miyai toera kucita pyenepi. Iye alemba: “Mulungu, mwandipfundzisa kutomera uwana wanga . . . Chinchino ndine nkhalamba na munthu wa imbvi; ntsiku zinombo lekani kundisiya, Mulungu; towera ndibvekese pya mphambvu zanu zikulu kuli anthu onsene a chinchino na a kutsogolo.”—Sal. 71:17, 18.
5. Kodi Akristu akugwesera anakwanisa tani kupereka kuna anango pinthu pidapfundza iwo?
5 Kodi munakwanisa tani kupereka udziwisi udakhala na imwe mu pyaka pizinji? Munakwanisa kucemera kunyumba kwanu aphale na atsikana anatumikira Mulungu toera kucita masendzekero akuwangisa? Munakwanisa kuaphemba toera kubuluka pabodzi mu utumiki mbamuapangiza kutsandzaya kunakhala na imwe mu kutumikira Yahova? Eliyu wa ndzidzi wakale alonga: “Mphyadidi alonge mba akulu, ankhalamba mbapangisa udziwisi wawo.” (Yobe 32:7) Mpostolo Paulu akulumiza akazi a maluso Acikristu toera kuwangisa anango kubulukira m’mafala na citsandzo. Iye alemba: ‘Akazi akulu akhale anthu akupfundzisa pinthu pyadidi.’—Tito 2:3, Chibverano Chachinchino.
DINGANI MALUSO ANU TOERA KUPHEDZA ANANGO
6. Thangwi yanji Akristu akuti ali na pyaka pizinji nee asafunika kupwaza maluso awo?
6 Khala ndimwe Nkristu wa maluso, muli na pinthu pizinji kakamwe. Dingani pinadziwa imwe cincino pyakuti nee mukhapidziwa mu pyaka 30 peno 40 ndulimu. Mwaluso, munakwanisa kuphatisira midida ya Bhibhlya mu umaso wanu. Mwakukhonda kupenula, imwe muli na luso yakukhuya mitima ya anango na undimomwene wa Bhibhlya. Khala ndimwe nkulu wa mpingo, musadziwa kuti munaphedza tani abale anatowerera njira yakuipa. (Agal. 6:1) Panango mwapfundza kutsalakana mabasa a mpingo, madepartamentu a misonkhano yakupambulika na ya cisa, peno Kumanga Nyumba za Umambo. Panango musadziwa kulonga na madotoro a nyumba za ungumi toera kuphatisira njira zakusiyana-siyana za ukondzi zakuti zisaphedza kucalira kuphatisira ciropa. Ngakhale kuti mwapfundza cincino undimomwene, muli na maluso akufunika mu umaso. Mwacitsandzo, khala mwakuza ana, imwe muli na maluso mazinji akufunika kakamwe. Akristu akukalamba ndi pfuli ya ciwangiso kuna mbumba ya Mulungu mu kupfundzisa, kutsogolera na kuwangisa abale na alongo.—Lerini Yobe 12:12.
7. Ndi pipfundziso pipi pyakuti Akristu akukalamba anakwanisa kupipereka kuna aphale na atsikana?
7 Munaphatisira tani mwakukwana maluso anu? Panango imwe munakwanisa kupfundzisa aphale na atsikana kuti anakwanisa tani kutomesa na kucitisa mapfundziro a Bhibhlya. Khala ndimwe mulongo, munakwanisa kupasa maonero amama akuti ndi atsikana kuti anapitiriza tani kucita mabasa auzimu mu ndzidzi unatsalakana iwo anawo ang’ono? Khala ndimwe m’bale, munakwanisa kupfundzisa aphale akubatizwa toera kucita nkhani mwakugalamuka na kukhala apfundzisi akuthema a mphangwa zadidi? Munakwanisa kuapangiza kuti imwe musacedzera tani abale na alongo akukalamba toera kuawangisa mwauzimu? Ngakhale kuti imwe nee muli na mphambvu ninga zikakhala na imwe, muli na miyai yadidi toera kupfundzisa aphale na atsikana. Mafala a Mulungu asalonga: “Aphale asagaya na mphambvu zawo, ankhalamba mbiri yawo ndi imbvi.”—Mis. 20:29.
KUTUMIKIRA KU MBUTO YAKUTI IRI NA KUFUNA KUKULU KWA AMWAZI MPHANGWA
8. Mu kupita kwa ndzidzi, ninji pidacita Paulu mu umaso wace?
8 Mu kupita kwa ndzidzi, mpostolo Paulu aphatisira mwakukwana maluso ace toera kutumikira Mulungu mu umaso wace. Iye akhadapirira pyaka pizinji pya basa ya umisionaryo, pontho akhunganyika toera kamwaza mphangwa mu Roma, mu ndzidzi udabuluswa iye nkaidi ku Roma mu caka 61 N.W. (2 Akor. 11:23-27) Mwakukhonda penula, abale mu nzinda unoyu ukulu apasa ntengo kupitiriza kwace kupereka ciphedzo. Mbwenye Paulu aona kuti ciphedzo cikhafunika kakamwe m’madziko anango. Iye atoma pontho basa yace ya umisionaryo, akwata Timoti na Tito mbaenda ku Efeso, buluka penepo aenda ku Kreta, panango mbamalisira ku Masedonya. (1 Tim. 1:3; Tito 1:5) Ife nkhabe dziwa khala iye aenda ku Espanya, mbwenye iye akhafuna kwendako.—Arom. 15:24, 28.
9. Kodi Pedhro aenda lini katumikira ku mbuto yakuti iri na kufuna kukulu kwa amwazi mphangwa? (Onani cithundzithundzi cakutoma.)
9 Panango mpostolo Pedhro akhali na pyaka pyakupiringana 50 mudaenda iye ku mbuto yakuti ikhali na kufuna kukulu kwa amwazi mphangwa. Thangwi yanji pyenepi mphyandimomwene? Khala iye akhali na thunga ibodzi ene na Yezu peno panango wankulu pang’ono, iye mbadakhala na pyaka cifupi na 50 pyakubalwa mudagumanikana iye na apostolo anango ku Yerusalemu mu caka 49 N.W. (Mach. 15:7) Mu kupita kwa ndzidzi pakumala nsonkhano unoyu, Pedhro aenda ku Babilonya, mwakukhonda penula iye aenda toera kamwaza mphangwa kuna Ayuda azinji mu cisa ceneci. (Agal. 2:9) Iye akakhala kweneku mudalemba iye tsamba yace yakutoma yakupumirwa mu caka 62 N.W. (1 Ped. 5:13) Kutumikira mu dziko inango kunakwanisa kukhala kwakunentsa, mbwenye Pedhro nee atawirisa kuti thunga yace incimwanise kutsandzaya mu kutumikira Yahova mwakukwana.
10, 11. Longani cakugumana naco ca banja ibodzi yakuti mu kupita kwa ndzidzi yaenda katumikira ku mbuto yakuti iri na kufuna kukulu kwa amwazi mphangwa.
10 Lero, Akristu azinji akuti ali nkati mwa pyaka 50 na akukalamba asaona kuti makhaliro awo asacinja na asakwanisa kutumikira Yahova mu njira zipswa. Anango asacinja kuenda ku mbuto zakuti ziri na kufuna kukulu kwa amwazi mphangwa. Mwacitsandzo, Robert alemba: “Ine na nkazanga tikhali nkati mwa pyaka 50 mudaona ife kuti tikhali na miyai mizinji. Mwana wathu m’bodzi basi akhadabuluka panyumba, nee tikhali na anyakubala akuti akhafunika citsalakano, pontho tikhadatambira kobiri yakucepa kubulukira kwa anyakubala athu. Ndaona kuti kugulisa nyumba yathu mbitidakhala na kobiri yakukwana toera kulipa nyumba yakulugari na kutsalakana pinthu pyathu mpaka kutambira kobiri yakupuma kuphata basa thangwi ya kukalamba. Tabva kuti ku dziko ya Bolivia anthu anatawira kupfundza Bhibhlya ndi azinji mbwenye makhaliro a umaso ndi akunentsa. Tatonga toera kucinja. Kudzolowera makhaliro mapswa mu dziko ya Bolivia kukhali kwakunentsa. Pinthu pyonsene pikhali pyakusiyana kakamwe na pidadzolowera ife ku Amerika Wakunkwiriro. Mbwenye kuwangisira kwathu kukhapaswa nkhombo.”
11 Robert apitiriza kulonga: “Cincino umaso wathu wadzala na mabasa a m’mpingo. Anthu anango adapfundzisa ife Bhibhlya abatizwa. Banja ibodzi idapfundzisa ife Bhibhlya isakhala m’makhaliro akucepeseka mu cisa cakutali kakamwe na nzinda. Mbwenye masumana onsene, piwalo pya banja ineyi asacita ulendo wakunentsa toera kugumanika pa misonkhano. Nyerezerani kutsanzaya kwathu kuona kuthambaruka kwa banja ineyi na kuona mphale wankulu wa m’banja ineyi kutumikira ninga mpainiya!”
KUFUNIKA KWA ANYABASA MU PISA PYA PILONGERO PYA MADZIKO ANANGO
12, 13. Longani cakugumana naco ca Nkristu adatoma kutumikira Yahova mu njira ipswa mudalimira iye kuphata basa thangwi yakukalamba.
12 Mipingo na misoka ya pilongero pya madziko anango inakwanisa kuphindula kubulukira ku citsandzo ca abale na alongo akukalamba. Pontho, pisa pyenepi pinakhala pyakutsadzayisa toera kuphata basa. Mwacitsandzo, Brian alemba: “Ine na nkazanga takhala na pyakugumana napyo mu umaso wathu. Mukakhala ine na pyaka 65 ndalimira kuphata basa thangwi yakukalamba mwakubverana na mwambo wa ku Britanya. Anathu akhadamala kubuluka panyumba, mbwenye kukhanentsa kugumana anthu toera kupfundza nawo Bhibhlya. Buluka penepo, ndagumana mphale Wakuxina wakuti akhaenda kadinga mphangwa za xikola ku universidade ya pacisa. Iye atawira ncemerero wa misonkhano ya mpingo, pontho ndatoma kupfundza naye Bhibhlya. Pakumala masumana mangasi, iye abwera ku misonkhano na xamwali wace Wacixina. Pakupita masumana mawiri, abwera na xamwali wace waciwiri, buluka penepo abwera pontho na wacitatu.
13 “Mu kupita kwa ndzidzi nyakudinga mphangwa wacixanu Wacixina aphemba toera kupfundza Bhibhlya. Ine ndatoma kunyerezera, ‘Nakuti ndiri na pyaka 65 nee pisabveka kuti ndisafunika kulimira kutumikira Yahova.’ Natenepa, ndabvundza nkazanga wakuti ali na pyaka 63 khala asafuna kupfundza Cixina. Tikhaphatisira makaseti akugravari toera kupfundza Cixina. Pyenepi pyacitika pyaka khumi ndulimu. Kumwaza mphangwa mu cisa ca cilongero ca dziko inango kusaticitisa kupibva pontho kuti ndife aphale. Mpaka lero, tapfundza Bhibhlya na Axina akukwana 112. Azinji a iwo asagumanika pa misonkhano. Cincino, m’bodzi wa iwo asatumikira pabodzi na ife ninga mpainiya.”
TSANDZAYANI NA PINAKWANISA IMWE KUCITA
14. Ninji pinafuna kutsandzayisa Akristu akukalamba, pontho citsandzo ca Paulu cisaawangisa tani?
14 Ngakhale kuti Akristu azinji akuti ali nkati mwa pyaka 50 ali na miyai yadidi toera kucita pinthu pipswa m’basa ya Yahova, mbwenye si onsene tayu anakwanisa. Anango a iwo ali na ungumi wakunentsa, anango asatsalakana anyakubala akukalamba peno ana akuti asafunika citsalakano. Munakwanisa kutsandzaya kudziwa kuti Yahova asapasa ntengo pinakwanisa imwe kucita m’basa yace. Mbwenye, mbuto mwakuipirwa thangwi ya pinthu pinacimwana imwe kucita, tsandzayani na pinakwanisa imwe. Dingani citsandzo ca mpostolo Paulu. Mu pyaka pizinji, iye akhali nkaidi, mbacimwana kupitiriza basa yace ya umisionaryo. Mbwenye akhalonga pya Malemba na anthu onsene akhaenda kumuona na akhawangisa cikhulupiro cawo.—Mach. 28:16, 30, 31.
15. Thangwi yanji Akristu akukalamba asapaswa ntengo kakamwe?
15 Yahova asapasambo ntengo pinacita ankhalamba m’basa yace. Ngakhale kuti Salomoni alonga kuti ntsiku za nyatwa zakunentseka kwa ungumi nee ndi ndzidzi wadidi tayu mu umaso, mbwenye Yahova asapasa ntengo pinacita Akristu akukalamba toera kunsimba. (Luka 21:2-4) Mipingo isapasa ntengo citsandzo cakukhulupirika ca Akristu akukalamba akuti atoma kale kutumikira Yahova.
16. Ndi miyai ipi yakuti panango Yana nee akhala nayo, mbwenye iye acitanji toera kulambira Mulungu?
16 Bhibhlya isalonga citsandzo ca nkazi wakukalamba akhacemerwa Yana, wakuti mwakukhupirika apitiriza kusimba Yahova mu unkhalamba wace. Iye akhali nzice wa pyaka 84 pyakubalwa mu ndzidzi udabalwa Yezu. Panango, iye nee akhala maso mu ndzidzi uzinji toera kukhala nyakutowerera wa Yezu, peno toera kudzodzwa na nzimu wakucena, peno toera kutsandzaya mu kumwaza mphangwa zadidi za Umambo. Natenepa, Yana mbadacitanji, akatsandzaya na pikhacita iye. ‘Iye hakhabuluka mu templo tayu mbacita mabasa a Mulungu masikati na masiku.’ (Luka 2:36, 37) Mu ndzidzi ukhapereka nyantsembe ntsembe mu templo macibese onsene na maulo, Yana akhagumanyikana na mwinji pa berere mbakacita phembero mwaciwerewere, panango acita phembero ineyi m’mphindi makumatatu. Mudaona iye nkhombwani Yezu, iye atoma ‘kulonga pya khombwani kuli anthu onsene akhadikhira kupulumuswa kwa Yerusalemu.’—Luka 2:38.
17. Kodi tinakwanisa tani kuphedza Akristu akukalamba peno akuduwala toera kucita khundu mu ulambiri wandimomwene?
17 Lero, tisafunika kukhala akuyang’anisisa toera kuphedza Akristu akukalamba peno akuduwala. Anango akuti asafuna kugumanika pa misonkhano ya mpingo peno pa misonkhano yakupambulika na ya cisa, panango anacimwana kucita pyenepi. M’mbuto zinango, mwaufuni mipingo isacita masasanyiro akuphedza ankhalamba toera kubvesera misonkhano mu kuphatisira ntokondzi wa m’manja. M’mbuto zinango, pyenepi nkhabe kwanisika. Ngakhale tenepa, Akristu akuti nkhabe kwanisa kugumanika pa misonkhano anakwanisa kucita khundu mu kuphedza ulambiri wandimomwene. Mwacitsandzo, maphembero awo asacitisa kuti mpingo Wacikristu upembere.—Lerini Masalmo 92:13, 14.
18, 19. (a) Thangwi yanji Akristu akukalamba panango nee anakwanisa kuona kuti asawangisa anango? (b) Mbani akuti anakwanisa kuphatisira uphungu wakuti ‘Kumbuka Mulungu wako?’
18 Panango, Akristu akukalamba nee anakwanisa kuona kuti asawangisa kakamwe anango. Mwacitsandzo, ngakhale kuti Yana akhali wakukhulupirika pyaka pyonsene mu templo, panango iye nee anyerezera kuti mu kupita kwa pyaka citsandzo cace mbicidapitiriza kuwangisa anango. Ufuni wa Yana kuna Yahova walembwa m’Bhibhlya. Mwakukhonda kupenula, ufuni wanu kuna Yahova usalembwa m’mitima ya alambiri andzanu. Mafala a Mulungu asalonga: “Imbvi ndi nthimba ya mbiri kuli munthu, iyo nja munthu anafamba mu ulinganiri”!—Mis. 16:31.
19 Pana madire a pinthu pyakuti ife tonsene tinakwanisa kupicita m’basa ya Yahova. Mbwenye ale akuti mwa ife aciri na mphambvu pang’ono anakwanisa kuphatisira na ntima onsene mafala awa akupumirwa: “Kumbuka Mulungu mbuchiri mphale, mbazidzati kukufikira ntsiku zakuthabuka.”—Koel. 12:1.