KUTAWIRWA KWA MIBVUNDZO YA BHIBHLYA

Kodi Tinadzakhala Na Utongi Ubodzi Basi Pa Dziko Yonsene Yapantsi?

Nyerezerani kuti utongi wa pa dziko yapantsi unaphindulisa tani anthu. Lero, anthu azinji asathabuka thangwi yakuti ndi akutcerenga kakamwe, mu ndzidzi wakuti anango ndi akupfuma kakamwe. Mbwenye utongi wa dziko wakuti usadziwa pyakufuna pya anthu mbudapasa anthu onsene pyakufuna pyawo. Kodi musanyerezera kuti anthu anakwanisa kukhazikisa utongi unoyu?​—Lerini Yeremiya 10:23.

M’mbiri yonsene, munjira zizinji mautongi asacimwana kutsalakana anthu awo, makamaka anyakutcerenga. Mautongi anango ndi akuuma ntima. (Koelete 4:1; 8:9) Mbwenye Mulungu Wamphambvu Zonsene apikira kukhazikisa utongi wakuti unadzapitira mbuto mautongi anango onsene. Mwandimomwene Utongi wace unadzatsalakana anthu.​—Lerini Izaiya 11:4; Danyele 2:44.

Kodi Umambo Wa Mulungu Unadzakwanirisanji?

Yahova Mulungu asankhula Ntongi wakuthema wa dziko​—Mwanace, Yezu. (Luka 1:31-33) Mukhali iye pa dziko yapantsi, Yezu akhafuna kakamwe kuphedza anthu. Ninga Mambo, iye anadzacitisa anthu a madzindza onsene kubverana na kumalisa nyatwa zonsene.​—Lerini Masalmo 72:8, 12-14.

Kodi anthu onsene anadzatawira Yezu ninga Ntongi? Nkhabe. Mbwenye Yahova ndi wakupirira. (2 Pedro 3:9) Iye akupasa anthu mwai toera kutawira Yezu ninga Ntongi. Mwakukhonda dembuka, Yezu anadzafudza anthu akuipa na kukhazikisa ntendere na citsidzikizo pa dziko yonsene yapantsi.​—Lerini Mikeya 4:3, 4.

Toera kudziwa pizinji, onani nsolo 8 wa bukhu iyi, yakubuluswa na Mboni za Yahova

Isagumanikambo mu www.jw.org/seh