Musaona Mphambvu Ya Mulungu Mu Umaso Wanu?

“Djanja ya Yahova inadzadziwika na atumiki ace.”​—IZA. 66:14, Tradução do Novo Mundo.

NYIMBO: 32, 26

MUNAKWANISA KUFOKOTOZA?

Thangwi yanji anthu anango asaona mphambvu ya Mulungu mu umaso wawo, mbwenye anango nkhabe?

Ninji pinapangiza kuti Yahova asatitsalakana lero?

Tinacitanji toera kuona pakweca mphambvu ya Mulungu mu umaso wathu?

1, 2. Kodi anthu anango asanyerezeranji thangwi ya Mulungu?

ANTHU azinji asanyerezera kuti Mulungu nkhabe kutsalakana pinacita iwo. Anango asanyerezera kuti Mulungu nkhabe kutsalakana pinthu pinaacitikira. Mwacitsandzo, pidafudzwa cisa ca pakati pa dziko ya Filipina na Condzi Cikulu cidacemerwa Haiyan mu Nthanda ya Bingu ya 2013, muyang’aniri wa nzinda alonga: “Mulungu akhali kunango.”

² Anthu anango asacita pinthu ninga kuti Mulungu nkhabe kuona pinacita iwo. (Iza. 26:10, 11; 3 Jwau 11) Iwo ndi ninga ale adalonga mpostolo Paulu kuti: ‘Iwo nee akumbuka Mulungu.’ Anthu anewa ‘akhadadzala na pinthu pyonsene pyakukhonda kulungama, pyaumbirimi na pyakuipa.’​—Arom. 1:28, 29.

3. (a) Ndi mibvundzo ipi isafunika ife kucitika thangwi ya Mulungu? (b) Kodi m’Bhibhlya kazinji kene fala yakuti “djanja” ya Yahova isabvekanji?

³ Ndiye tani kwa ife? Mwakusiyana na anthu anewa, ife tisadziwa kuti Yahova asaona pyonsene pinacita ife. Mphapo tisadzindikirambo citsalakano cace na ciphedzo cace mu umaso wathu? Kusiyapo pyenepi, kodi tiri pakati pa anthu adalonga Yezu kuti “anadzaona Mulungu”? (Mat. 5:8) Toera kudziwa kuti pyenepi pisabvekanji, tendeni tione pitsandzo pya m’Bhibhlya pya ale adaona mphambvu ya Mulungu na pya ale adacimwana kuiona. Buluka penepo tinapfundza kuti tinakwanisa tani kuona mphambvu ya Yahova mukuphatisira maso athu a cikhulupiro. Munadinga ife ntsonga zenezi, kumbukani kuti m’Bhibhlya kazinji kene fala yakuti “djanja” ya Mulungu isabveka mphambvu inaphatisira iye toera kuphedza atumiki ace na kukunda anyamalwa ace.​—Lerini Deuteronomyo 26:8.

IWO ACIMWANA KUONA MPHAMBVU YA MULUNGU

4. Thangwi yanji anyamalwa a Aisraele acimwana kuona mphambvu ya Mulungu?

⁴ Mu Israele wakale, anthu azinji akhala na mwai toera kuona na kubva kuti Mulungu aphedza tani Aisraele. Yahova aombola mwacirengo Aisraele mu Ejito, na ciphedzo ca Yahova, Aisraele akunda amambo onsene. (Yos. 9:3, 9, 10) Mwakukhonda tsalakana pyonsene pidaona iwo na pidabva iwo, amambo akumadokero a dzuwa a Yordane ‘agumanyikana toera kumenya nkhondo na Yoswa pabodzi na Aisraele.’ (Yos. 9:1, 2) Mu ndzidzi ukhamenya iwo nkhondo, amambo anewa akhali na mathangwi onsene toera kuona mphambvu ya Mulungu. Na mphambvu ya Yahova, ‘dzuwa na mwezi pyalimira mpaka Aisraele kufudza anyamalwa awo onsene.’ (Yos. 10:13) Mbwenye Yahova ‘aumisa mitima’ ya amambo anewa toera kumenya nkhondo na Aisraele. (Yos. 11:20) Anyamalwa Aisraele afudzwa na Mulungu thangwi iwo akhonda kutawira kuti Yahova akhaphedzera atumiki ace.

5. Ninji pidakhonda kudzindikira Mambo wakuipa Akabu?

⁵ Mukupita kwa ndzidzi, Mambo wakuipa Akabu akhala na miyai toera kuona mphambvu ya Mulungu. Eliya ampanga: ‘Nee bume nee madzi anadzabvumba tayu, ine ndingakhonda kulonga!’ (1 Am. 17:1) Mafala anewa akhadabuluka kwa Yahova, mbwenye Akabu akhonda kutawira cipangizo. Ntsiku inango, Akabu aona moto udabuluka kudzulu mu ndzidzi udaphembera Eliya kuna Yahova toera kupisa ntsembe yace. Buluka penepo, Eliya apangiza kuti Yahova mbadamalisa cilala mudapanga iye Akabu kuti: ‘Ndoko kasasanye ngolo yako toera ukhonde kubvumbwa!’ (1 Am. 18:22-45) Akabu aona pyonsene pidacitika, mbwenye iye akhonda kudzindikira kuti pyenepi pikhacitika na mphambvu ya Mulungu. Pitsandzo pyenepi pisatipfundzisa ntsonga yakufunika kakamwe​—tisafunika kudzindikira mphambvu ya Yahova.

IWO AONA MPHAMBVU YA YAHOVA

6, 7. Kodi Agibeoni na Rahabe adzindikiranji mu ntsiku za Yoswa?

⁶ Mwakusiya na amambo anewa akuipa, anango aona mphambvu ya Mulungu, maseze akhalimbo akuipa. Mwacitsandzo, mwakusiyana na madzindza mazinji adamenya nkhondo na Aisraele mu ntsiku za Yoswa, Agibeoni akhazikisa ntendere na Aisraele. Thangwi yani? Iwo alonga: ‘Mabitcu anu abwera . . . thangwi yakubva dzina ya Yahova Mulungu wanu, tabva mbiri ya pyonsene pidacita iye.’ (Yos. 9:3, 9, 10) Mwandzeru iwo adzindikira kuti Yahova akhaphedzera Aisraele.

⁷ Rahabe aonambo mphambvu ya Mulungu mu ntsiku zace. Pakumala kubva njira idaombola Yahova atumiki ace, iye apanga anyakusuzumira dziko awiri a Aisraele: ‘Ndisadziwa kuti Yahova anadzakupasani dziko ino.’ Maseze kulonga pyenepi pikhaikha pangozwi umaso wace, iye akhulupira kuti Yahova mbadapulumusa iye pabodzi na acibale ace.​—Yos. 2:9-13; 4:23, 24.

8. Kodi Aisraele anango adzindikira tani mphambvu ya Mulungu?

⁸ Mwakusiyana na Akabu Mambo wakuipa wa Israele, Aisraele anango adzindikira mphambvu ya Yahova pidabuluka moto kudzulu mbupisa ntsembe ya Eliya. Mudaona iwo moto unoyu, iwo alonga: ‘Yahova ndi Mulungu wandimomwene.’ (1 Am. 18:39) Inde, iwo aona pakweca mphambvu ya Mulungu.

9. Tinakwanisa tani kuona Yahova na mphambvu yace lero?

⁹ Pitsandzo pyadidi na pyakuipa pidadinga ife, pisatiphedza toera kubvesesa kuti pisabvekanji kuona mphambvu ya Mulungu. Mu ndzidzi unadziwa ife Yahova, tinakwanisambo kuona mphambvu yace thangwi ‘maso a ntima wathu’ asatiphedza toera kudzindikira makhaliro ace na macitiro ace. (Aef. 1:18) Mwandimomwene, tisafunika kutowezera anthu akukhulupirika akale na a ntsiku zino adaona kuti Yahova asaphedza tani atumiki ace. Mphapo ndi cipangizo cipi ciri na ife cakuti Yahova asaphedza anthu lero?

CIPANGIZO CA MPHAMBVU YA MULUNGU LERO

10. Ndi cipangizo cipi ciri na ife cakuti Yahova asaphedza anthu lero? (Onani cithundzithundzi cakutoma.)

¹⁰ Ife tiri na mathangwi mazinji toera kutawira kuti Yahova asapitiriza kuphedza anthu lero. Kazinji kene, tisabva mbiri za anthu adaphemba ciphedzo cauzimu mbacipaswa. (Sal. 53:2) Pikhamwaza Allan mphangwa nyumba na nyumba pa ntsuwa ing’ono ya ku Filipina agumana nkazi wakuti atoma kulira. Allan alonga: “Pa macibese anewa, nkazi unoyu aphembera kuna Yahova toera Mboni za Yahova zifike panyumba pace. Pikhali iye ntsikana, akhadapfundza Bhibhlya na Mboni za Yahova, mbwenye asiya kupita ncibverano na iwo pidamanga iye banja mbaenda kakhala ku ntsuwa inango. Mulungu atawira phembero yace mwakucimbiza kakamwe, pyenepi pyakhuya ntima wace.” Nkati mwa caka ceneci, iye aperekeka kuna Yahova mbabatizwa.

11, 12. (a) Kodi Yahova asaphedza tani atumiki ace? (b) Longani citsandzo ca munthu adatambira ciphedzo ca Yahova?

¹¹ Atumiki azinji a Mulungu asaona cipangizo ca ciphedzo cace, mu ndzidzi unasiya iwo misambo yakuipa ninga kufumali, kuphatisira mitombwe yakuledzeresa, peno kuona ucipezipezi. Anango asalonga kuti ayesera kazinji kene toera kusiya misambo ineyi mukuphatisira mphambvu zawo, mbwenye acimwana. Mbwenye pidasaka iwo ciphedzo ca Yahova, iye aapasa ‘mphambvu yakupiringana yacibaliro,’ mbakwanisa kukunda misambo yawo.​—2 Akor. 4:7; Sal. 37:23, 24.

¹² Yahova asaphedza atumiki ace azinji toera kuthimbana na nyatwa zawo. Mwacitsandzo, Amy anentseka pidaphembwa iye toera kuphedzera kumangwa kwa Nyumba ya Umambo na nyumba ya amisionaryo pa ntsuwa ing’ono ya Pacífico. Iye alonga: “Tikakhala mu oteli ing’ono, pontho ntsiku zonsene tikhafamba m’miseu yakudzala na madzi toera kufika ku mbuto ikhaphata ife basa.” Iye akhafunikambo kudzolowera makhaliro a pacisa, pontho kazinji kene nee kukhali magetsi peno madzi. Amy athimiza: “Toera kutekeresa pinthu, ine ndalonga mwaukali kuna mulongo unango akhaphata basa pabodzi na ife. Ndaenda kunyumba mwakutsukwala. Mu kwartu yanga mukhali cidima, ndafungula ntima wanga kuna Yahova mbandiphemba ciphedzo.” Pidabwera magetsi, iye aleri revista ya Ncenjezi ya nsolo wa programu ya anyakumalisa xikola ya Gileade unalonga pinthu pyonsene pikhathimbana na iye ninga, makhaliro mapswa, citsuwo na kudzolowera anthu apswa. Amy alonga: “Pa masiku anewa ndaona ninga Yahova akhalonga na ine. Pyenepi pyandiwangisa toera kupitiriza m’basa yanga.”​—Sal. 44:25, 26; Iza. 41:10, 10.

13. Ndi umboni upi uli na ife unapangiza kuti Yahova asaphedza atumiki ace mu ‘kutsidzikiza na kukhazikisa mwakutawirika’ mphangwa zadidi?

¹³ Kupembera kwa Mboni za Yahova mu ‘kutsidzikiza na kukhazikisa mwakutawirika mphangwa zadidi,’ ndi cipangizo cinango ca ciphedzo ca Yahova. (Afil. 1:7) Mautongi anango ayesera kulimirisa basa ya atumiki a Mulungu. Mbwenye tingayang’ana nduli, Mboni za Yahova zawina miseru yakukwana 268 m’mathando makulu akutonga miseru. Pontho kutomera mu caka 2000 zawina miseru yakukwana 24 mu Thando Ikulu Inatsalakana pya Udidi wa Anthu ku Europa. Pyenepi pisapangiza pakweca kuti nkhabepo munthu anakwanisa kuthimbana na mphambvu ya Mulungu.​—Iza. 54:17; lerini Izaiya 59:1.

14. Kodi tisaona tani ciphedzo ca Yahova m’basa yathu yakumwaza mphangwa na kuphatana kwathu Kwacikristu pa dziko yonsene?

¹⁴ Kumwazwa kwa mphangwa zadidi pa dziko yonsene yapantsi basi ene kusakwanisika na ciphedzo ca Mulungu. (Mat. 24:14; Mach. 1:8) Kuphatana kwa atumiki a Yahova pa dziko yonsene kusakwanisika basi ene na ciphedzo cace. Kuphatana kweneku ndi kwakupambulika! Anthu akuti nee asalambira Yahova asalonga: ‘Mwandimomwene Mulungu ali na imwe.’ (1 Akor. 14:25) Natenepa, pyenepi pyonsene pisapangiza kuti Mulungu asaphedza atumiki ace. (Lerini Izaiya 66:14.) Mphapo ndiye tani kwa imwe? Kodi musaona pakweca mphambvu ya Yahova mu umaso wanu?

MUSAONA MPHAMBVU YA YAHOVA MU UMASO WANU?

15. Thangwi yanji midzidzi inango nee tinakwanisa kuona pakweca mphambvu ya Yahova mu umaso wathu?

¹⁵ Midzidzi inango panango nee tinakwanisa kuona mphambvu ya Mulungu mu umaso wathu. Thangwi yanji? Tingathimbana na nyatwa zizinji, panango tinaduwala kuti Mulungu atiphedza kazinji kene nduli. Pyenepi pyacitika kuna Eliya. Iye akhali wacipapo, mbwenye pikhafuna iye kuphiwa na Nyankhoda Yezabele, Eliya agopa. Iye aduwala kuti Yahova akhadamphedza kale nduli. Bhibhlya isalonga kuti iye aphemba kufa. (1 Am. 19:1-4) Kodi Eliya mbadagumana kupi ciphedzo? Iye akhafunika kunyindira Yahova.​—1 Am. 19:14-18.

16. Tinacitanji toera kuona Mulungu ninga pidacita Yobe?

¹⁶ Yobe akhadadzudzumika kakamwe na nyatwa zace mbakhonda kuona pinthu ninga mukhapionera Yahova. (Yob. 42:3-6) Ninga Yobe, tingathimbana na nyatwa, midzidzi inango tinacimwana kuonambo mphambvu ya Mulungu mu umaso wathu. Ninji cinafuna kutiphedza toera kukhala na maonero a Mulungu? Tisafunika kunyerezera mwacidikhodikho pinalonga Bhibhlya thangwi ya nyatwa zathu. Natenepa, tinakwanisa kuona kuti ninji pinacita Yahova kwa ife. Ninga Yobe, tinakwanisambo kulonga: ‘Ine ndikhabva pya imwe, mbwenye cincino ndisakuonani na maso anga.’

17, 18. (a) Munakwanisa tani kuona mphambvu ya Yahova mu umaso wanu? (b) Longani citsandzo cinapangiza kuti Mulungu asatiphedza tani lero.

¹⁷ Tinakwanisa tani kuona mphambvu ya Yahova mu umaso wathu? Tendeni tidinge pitsandzo pixanu. Cakutoma, imwe musatawira kuti Yahova akuphedzani toera kugumana undimomwene. Caciwiri, panango mwabvesera nkhani pa misonkhano Yacikristu, mbamulonga, “Ndi pyenepi pikhafuna ine!” Cacitatu, panango mwaona Yahova mbakatawira phembero yanu. Cacinai, panango mukhafuna kucita pizinji m’basa ya Yahova mbamuona njira idakuphedzani iye toera kukwanirisa pifuno pyanu. Cacixanu, panango mwasiya basa yanu yakudziko thangwi ikhakupingizani toera kutumikira Yahova, buluka penepo mwaona Mulungu mbakakwanirisa pikiro yace: ‘Cipo ndinadzakusiya.’ (Aheb. 13:5) Tingakhala na uxamwali wakuwanga na Yahova, tinakwanisa kuona mphambvu yace mu umaso wathu.

¹⁸ Sarah, anakhala ku Keniya alonga: “Ndacita phembero kuna Yahova thangwi ya nyakupfundza wanga wakuti nee akhapasa ntengo pfundziro yace ya Bhibhlya. Ndaphemba Yahova khala ndisafunika kusiya kupfundza Bhibhlya na iye. Mwakukhonda dembuka, pidacita ine ‘Amen,’ ntokodzi wanga walira. Akhali nyakupfundza wa Bhibhlya unoyu, iye aphemba toera kuenda ku misonkhano pabodzi na ine! Ndadzumatirwa kakamwe!” Mungaonesesa mwadidi pinthu pyonsene pinacita Mulungu mu umaso wanu, munakwanisambo kuona mphambvu yace. Rhonna, mulongo anakhala ku Azya alonga: “Pisaphemba luso toera kudzindikira citsogolero ca Yahova. Mbwenye mungacita pyenepi, munadzumatirwa kuona kuti iye asatitsalakana kakamwe!”

19. Ninji pontho cisafunika ife kucita toera kuona Mulungu?

¹⁹ Yezu alonga: ‘Anyakutsandzaya ndi anthu akucena ntima, thangwi anadzaona Mulungu.’ (Mat. 5:8) Tinakwanisa tani kukhala anthu ‘akucena ntima’? Tisafunika kukhala na manyerezero akucena mbatisiya makhaliro onsene akuipa. (Lerini 2 Akorinto 4:2.) Tingakulisa uxamwali wathu na Mulungu mbatikhala na makhaliro adidi, tinakhala pakati pa ale anakwanisa kuona Mulungu. Mu nsolo unatowerera tinadzadinga kuti cikhulupiro cathu cinatiphedza tani toera kuona pakweca mphambvu ya Yahova mu umaso wathu.