‘Thimizirani Cikhulupiro Cathu’
‘Ndiphedzeni toera kuwangisa cikhulupiro canga.’—MKO. 9:24.
NYIMBO: 54, 24
MUNATAWIRA TANI?
Thangwi yanji kuwangisa cikhulupiro cathu ndi kwakufunika kakamwe?
Tisafunika kucitanji toera kuwangisa cikhulupiro cathu?
Tinapangiza tani kuti tiri na cikhulupiro cakuwanga?
1. Thangwi yanji cikhulupiro ndi cakufunika kakamwe? (Onani cithundzithundzi cakutoma.)
KODI mwabvundzika kale kuti: ‘Yahova anadzandipulumusa pa nyatwa ikulu?’ Mwandimomwene, kupulumuka kusaphataniza pizinji, mbwenye cakufunika kakamwe ndi cidalonga mpostolo Paulu: “Mwakusowa cikhulupiro nkhabe kwanisika kukomeresa mwadidi Mulungu.” (Aheb. 11:6, Tradução do Novo Mundo) Pyenepi pinaoneka ninga pyakukhonda nentsa, mbwenye undimomwene ndi wakuti, ‘si anthu onsene tayu anapangiza cikhulupiro.’ (2 Ates. 3:2) Malemba anewa asatiphedza toera kubvesesa kuti tisafunika kukulisa cikhulupiro cakuwanga.
2, 3. (a) Tisapfundzanji kubulukira kwa mpostolo Pedhro thangwi yakufunika kwa cikhulupiro? (b) Ndi mibvundzo ipi inafuna ife kudinga mu nsolo uno?
2 Mpostolo Pedhro apangiza thangwi yakufunika kwa cikhulupiro pidalonga iye pya ‘n’khaliro waco wakuyeserwa’ wakuti unabweresa ‘kusimbwa, kupasa mbiri na cilemedzo pa ndzidzi wakuonekera kwa Yezu Kristu.’ (Lerini 1 Pedro 1:7.) Nakuti nyatwa ikulu iri cifupi kakamwe, tisafunika kukhala na cinyindiro cakuti cikhulupiro cathu cinatiphedza toera kukhala pakati pa ale anabweresa kusimba pakuonekera kwa Mambo wa mbiri. Tisafunika kukhala ‘anthu akuti ali na cikhulupiro cakuti cinatiphedza toera kupulumuka.’ (Aheb. 10:39) Na cifuno ceneci, tinakwanisa kudembetera ninga pidacita mamuna adalonga kuti: ‘Ndiphedzeni toera kuwangisa cikhulupiro canga!’ (Mko. 9:24) Panango tinakulumizika toera kulonga ninga pidacita apostolo a Yezu: ‘Thimizirani cikhulupiro cathu.’—Luka 17:5.
3 Mu nsolo uno tinadzadinga mibvundzo iyi: Tinakwanisa tani kukulisa cikhulupiro cathu? Tinapangiza tani kuti tiri na cikhulupiro cakuwanga? Thangwi yanji tinakwanisa kunyindira kuti Mulungu anadzatitawira tingamphemba toera kuthimizira cikhulupiro cathu?
KUKULISA CIKHULUPIRO CINAKOMERESA MULUNGU
4. Ndi pitsandzo pipi pyakuti pinatikulumiza toera kuwangisa cikhulupiro cathu?
4 Nakuti ‘pyonsene pidalembwa kale pyalembwa toera kutipfundzisa,’ tinakwanisa kupfundza kubulukira mu pitsandzo pizinji pya anthu akukhulupirika analongwa m’Bhibhlya. (Arom. 15:4) Tingaleri mbiri za anthu anewa, ninga Abrahamu, Sara, Izaki, Yakobe, Mose, Rahabe, Gideoni, Baraki na anango azinji, pinatikulumiza toera kudinga cikhulupiro cathu. (Aheb. 11:32-35) Kusiyapo pyenepi, tingaleri mbiri za abale na alongo athu akukhulupirika a lero, pinatiphedza toera kucita pyonsene pinakwanisa ife toera kuwangisa cikhulupiro cathu.a
5. Kodi Eliya apangiza tani kuti akhali na cikhulupiro cakuwanga kuna Yahova? Kodi citsandzo cace cisatikulumiza toera kucitanji?
5 Citsandzo cibodzi ca m’Bhibhlya ndi ca mprofeta Eliya. Dingani makhundu maxanu anapangiza kunyindira kwace kakamwe Yahova. Pidapanga iye Mambo Akabu kuti Yahova anabweresa cilala, Eliya alonga mwacinyindiro: ‘Na dzina ya Yahova, anatumikira ine, pyaka pino nee bume nee madzi anadzabvumba tayu, ine ndingakhonda kulonga.’ (1 Am. 17:1) Eliya akakhulupira kuti Yahova mbadapereka pinthu pyakufunika kwa iye na kwa anango nkati mwa cilala ceneci. (1 Am. 17:4, 5, 13, 14) Iye apangiza cinyindiro cakuti Yahova mbadalamusa mwana wakufa. (1 Am. 17:21) Eliya nee akhapenula kuti Yahova mbadatumiza moto toera kupisa ntsembe yace pa Phiri ya Karmelo. (1 Am. 18:24, 37) Pidafika ndzidzi toera Yahova amalise cilala, maseze nee pakhali cipangizo cakuti madzi mbadabvumba, Eliya apanga Akabu: “Ndoko ukhadye mbumwa, thangwi ndiri kubva condzi ninga ca madzi makulu maningi.’ (1 Am. 18:41) Kodi mbiri zenezi nee zisapangiza kuti tisafunika kudingika khala cikhulupiro cathu ndi cakuwanga?
TINACITANJI TOERA KUKULISA CIKHULUPIRO CATHU?
6. Ninji cisafunika ife kuphemba kuna Yahova toera kukulisa cikhulupiro?
6 Ife nee tinakwanisa kukulisa cikhulupiro mu kunyindira mphambvu zathu. Cikhulupiro ndi n’khaliro wa nsapo wa nzimu wakucena wa Mulungu. (Agal. 5:22) Natenepa, mphyandzeru kubvera uphungu wa Yezu wakucita phembero toera kuphemba nzimu wakucena, thangwi Yezu atipasa cinyindiro cakuti Baba ‘anadzapasa nzimu wakucena ale anauphemba.’—Luka 11:13.
7. Fokotozani kuti tinakwanisa tani kupitiriza na cikhulupiro cakuwanga.
7 Tingamala kukulisa cikhulupiro cakuwanga, tisafunika kupitiriza kucidyesa. Cikhulupiro cathu cisalandaniswa na moto wa nkhuni. Moto ungagaswa, malirimi ace anakwanisa kugaka na mphambvu kakamwe. Mbwenye tingakhonda kuusesera, unakwanisa kuthowa mbusala makala basi, pakumalisa unadzasala dotha yakutonthola. Mbwenye tingausesera ndzidzi onsene mbatiikha nkhuni zinango, moto unapitiriza kugaka kwenda na kwenda. Munjira ibodzi ene, cikhulupiro cathu cinapitiriza kukhala cakuwanga tingacidyesa ndzidzi onsene na Mafala a Mulungu. Tingaleri na kupfundza Bhibhlya ntsiku zonsene, tinakwanisa kukulisa ufuni wathu kwa Yahova. Pyenepi pinadzatiphedza toera kupitiriza na cikhulupiro cakuwanga.
8. Ninji pontho cinafuna kutiphedza toera kukulisa cikhulupiro cathu mbacipitiriza kukhala cakuwanga?
8 Tinacitanji pontho toera kukulisa cikhulupiro cathu mbacipitiriza kukhala cakuwanga? Lekani kukomerwa basi ene na pidapfundza imwe mpaka pidabatizwa imwe. (Aheb. 6:1, 2) Pitirizani kupfundza pya kukwanirisika kwa maprofesiya a Bhibhlya, thangwi pyenepi pinadzakuphedzani toera kukhala na cikhulupiro cakuwanga. Munakwanisambo kuphatisira Bhibhlya toera kuona khala cikhulupiro canu ciri pakati pa ale anadikhirwa kupangiza cikhulupiro cakuwanga.—Lerini Tyago 1:25; 2:24, 26.
9, 10. Kodi cikhulupiro cathu cisawangiswa tani (a) tingacita uxamwali wadidi? (b) tingagumanika pa misonkhano? (c) tingamwaza mphangwa?
9 Mpostolo Paulu apanga Akristu andzace kuti iwo mbadakwanisa ‘kuwangisa cikhulupiro ca unango na ndzace.’ (Arom. 1:12) Kucedza kazinji kene na abale na alongo athu kunatiphedza toera kuwangisa cikhulupiro ca unango na ndzace, makamaka tingacedza na ale akuti cikhulupiro cawo ‘cayeserwa’ kale. (Tgo. 1:3) Uxamwali wakuipa usafudza cikhulupiro, mbwenye uxamwali wadidi usawangisa cikhulupiro. (1 Akor. 15:33) Na thangwi ineyi, tisakulumizwa toera kugumanika pa misonkhano mwakukhonda phonya, mbatipitiriza ‘kuwangisana unango na ndzace.’ (Lerini Ahebere 10:24, 25.) Thangwi inango ndi yakuti mphangwa zinadingwa pa misonkhano zisatipasa pitsogolero pyakuwangisa cikhulupiro cathu. Pyenepi pisabverana na mafala a mpostolo Paulu akuti, ‘munthu asakhala na cikhulupiro kubulukira mu pinthu pinabva iye.’ (Arom. 10:17) Bvundzikani: ‘Kodi ndisagumanika pa misonkhano Yacikristu mwakukhonda phonya?’
10 Tingamwaza mphangwa mu utumiki, tisakulisa cikhulupiro ca anango na cathu cene. Ninga Akristu a pyaka dzana yakutoma, ife tisapfundza kunyindira Yahova na ntima onsene, mbatilonga na cipapo m’makhaliro onsene.—Mach. 4:17-20; 13:46.
11. Thangwi yanji Yoswa na Kalebu akhali na cikhulupiro cakuwanga? Tinakwanisa tani kukulisa cikhulupiro ninga cawo?
11 Tingaona njira inatiphedzera Yahova mu umaso wathu na njira inatawira iye maphembero athu, cikhulupiro cathu cisakula. Pyenepi pyacitika na Yoswa na Kalebu. Iwo apangiza cikhulupiro kwa Yahova mudaenda iwo kasuzumira Dziko Yakupikirwa. Mbwenye mukupita kwa ndzidzi, pidaona iwo pyonsene pidacita Yahova mu umaso wawo, cikhulupiro cawo cathimizirika kakamwe. Na thangwi ineyi, Yoswa alonga mwacipapo kuna Aisraele mbati: ‘Pyonsene pidakupangani Yahova Mulungu wanu, nee cibodzi cidakhonda kucitika; pyonsene pyacitika.’ Mukupita kwa ndzidzi, iye athimiza: ‘Tenepa mphapo, gopani Yahova mbamuntumikira mwakukhulupirika. . . . Mbwenye ine na nyumba yanga tinatumikira Yahova.’ (Yos. 23:14; 24:14, 15) Munaona ife pinthu pyonsene pyadidi pinaticitira Yahova, tinakwanisambo kukhala na cikhulupiro cakuwanga.—Sal. 34:8.
TINAPANGIZA TANI CIKHULUPIRO CATHU?
12. Mwakubverana na nyakupfundza Tyago, tinapangiza tani kuti tiri na cikhulupiro cakuwanga?
12 Tinapangiza tani kuti tiri na cikhulupiro cakuwanga? Nyakupfundza Tyago asatawira mbvundzo unoyu na mafala awa: ‘Ine ndinakuonesa cikhulupiro canga kubulukira m’macitiro anga.’ (Tgo. 2:18) Macitiro athu anapangiza kuti tiri na cikhulupiro candimomwene. Tendeni tione pitsandzo pingasi.
13. Thangwi yanji basa yakumwaza mphangwa ndi njira yadidi yakupangiza cikhulupiro?
13 Kumwaza mphangwa ndi njira yadidi kakamwe yakupangiza cikhulupiro cathu. Thangwi yanji? Thangwi tingamwaza mphangwa tisapangiza kuti tisakhulupira kuti kumala kwa makhaliro ano a pinthu kuli cifupi, pontho ‘nee kunadzadembuka!’ (Hab. 2:3) Njira ibodzi yakudinga cikhulupiro cathu ndi kubvundzika: ‘Kodi basa yakumwaza mphangwa ndi yakufunika kakamwe kwa ine? Ndisacita pyonsene pinakwanisa ine toera kumwaza mphangwa? Ndisasaka njira toera kuthimiza utumiki wanga?’ (2 Akor. 13:5) Inde, ‘kubvekesa peno kulonga pakweca toera kupulumuka’ ndi njira ikulu kakamwe yakupangiza kuti tiri na cikhulupiro cakuwanga muntima mwathu.—Lerini Aroma 10:10.
14, 15. (a) Tinapangiza tani cikhulupiro mu umaso wathu wa ntsiku na ntsiku? (b) Longani cakugumana naco cinapangiza cikhulupiro cakuwanga.
14 Tinakwanisambo kupangiza cikhulupiro cathu tingathimbana na nyatwa mu umaso wathu wa ntsiku na ntsiku. Tingathimbana na utenda, utcerengi, kufewa manungo, kutsukwala, peno nyatwa zinango, tiri na cinyindiro cakuti Yahova na Mwanace ‘anadzatiphedza pa ndzidzi wakuthema.’ (Aheb. 4:16) Ife tisapangiza cinyindiro ceneci tingacita phembero, mbatiphemba ciphedzo cauzimu na cakumanungo. Yezu alonga kuti tinakwanisa kuphemba Yahova toera atipase ‘cakudya cathu ca ntsiku na ntsiku.’ (Luka 11:3) Bhibhlya isapangiza kuti Yahova anakwanisa kutipasa pinafuna ife. Mu ndzidzi wa cilala cikulu kakamwe mu Israele, Yahova apasa Eliya cakudya na madzi. Bhibhlya isalonga kuti ‘makhungubwe akhansiyira mikate na nyama, macibese na maulo, akhamwa madzi a mu nkulo.’ (1 Am. 17:3-6) Ife tisakhulupira kuti Yahova anakwanisa kutipasa pinthu pinafuna ife.
15 Ife tisanyindira kuti kuphatisira midida ya Bhibhlya kunatiphedza toera kugumana cakudya. Rebecca ndi mulongo wakumanga banja wa ku Azya, iye aona pyenepi m’banja yace. Iwo aphatisira Mateo 6:33 na Misangani 10:4 mu umaso wawo. Iwo aikha Umambo pa mbuto yakutoma. Rebecca alonga kuti mamunace akhaona kuti mikakamizo ya basa yace yakudziko mbidaikha pangozwi umaso wawo wauzimu, natenepa, aisiya. Mbwenye iwo akhali na ana anai toera kuatsalakana. Rebecca alonga pidacitika: “Ife tatoma kucita mabholo mbatiagulisa. Mu pyaka pizinji kubulukira padatoma ife kutsalakana umaso munjira ineyi, tisaona kuti Yahova cipo atisiya. Ife cipo tasowa cakudya.” Kodi imwe mwakhalambo na cakugumana naco cidawangisa cikhulupiro canu?
16. Ndi maphindu api anafuna kukhala na ife tinganyindira Mulungu?
16 Nee tisafunika kuduwala kuti kutowezera pitsogolero pya Mulungu kusabweresa maphindu kwa ife. Paulu aphatisira mafala a Habakuki mudalemba iye kuti: ‘Munthu wakulungama anakhala maso kubulukira mu cikhulupiro.’ (Agal. 3:11; Hab. 2:4) Natenepa, tisafunika kukhulupira kakamwe Ule wakuti mwandimomwene anakwanisa kutiphedza. Paulu asatikumbusa kuti Mulungu ndiye ‘anacita pinthu mwa ife na mphambvu zace, iye ali na mphambvu zakucita pinango pyakupiringana pyonsene pinakwanisa ife kuphemba na kunyerezera.’ (Aef. 3:20) Atumiki a Yahova asacita pyonsene pinakwanisa iwo toera kucita cifuno ca Mulungu. Iwo asadziwa kuti nkhabe kwanisa kucita pyonsene okhene, natenepa, iwo asanyindira nkhombo za Yahova. Mphyakutsandzayisa kakamwe kudziwa kuti Mulungu ali na ife!
KUTAWIRWA KWA PHEMBO YA CIKHULUPIRO
17. (a) Kodi phembo ya apostolo yatawirwa tani? (b) Thangwi yanji tisanyindira kuti phembo yathu toera kuthimizirwa cikhulupiro inadzatawirwa?
17 Mwakubverana na pidamala ife kudinga, panango tinakhala na mabvero ninga a apostolo pidapanga iwo Yezu: ‘Thimizirani cikhulupiro cathu.’ (Luka 17:5) Phembo yawo yatawirwa, makamaka pa Pentekoste ya caka 33 N.W., pidatsanulirwa iwo nzimu wakucena mbakwanisa kubvesesa mwakukwana cifuniro ca Mulungu. Pyenepi pyawangisa cikhulupiro cawo. Ninga maphindu, iwo acita basa ikulu kakamwe yakumwaza mphangwa yakuti cipo ikhadacitwa kale mpaka pa ndzidzi unoyu. (Akol. 1:23) Kodi nee tisadikhira kuti phembo yathu ya kuthimizirwa cikhulupiro inadzatawirwa? Yahova asapikira kuti anabvesera maphembero athu ‘tingaphemba mwakubverana na cifuno cace.’ (1 Jwau 5:14) Bhibhlya isalonga: “Munthu onsene anakhulupira Mulungu nee anadzatsumbikika.”—Arom. 10:11, NM.
18. Kodi Yahova asapasa tani nkhombo ale anakulisa cikhulupiro cawo?
18 Mwakukhonda penula, Yahova asakomerwa kakamwe na ale anan’nyindira mwakukwana. Yahova anadzatawira phembo yathu toera kuthimizirwa cikhulupiro. Natenepa, cikhulupiro cathu cinadzakhala cakuwanga kakamwe, pyenepi pinadzatiphedza toera kuoniwa ninga anthu ‘akuthema toera kupita mu Umambo wa Mulungu.’—2 Ates. 1:3, 5.
[Cidzindikiro capantsi]
a Toera kuona pitsandzo pingasi, onani mbiri ya umaso wa Lillian Gobitas Klose (Despertai! de 22 de Julho de 1993), wa Feliks Borys (Despertai! de 22 Fevereiro de 1994), na ya Josephine Elias (Despertai! de Setembro de 2009).