MBIRI YA UMASO
Nee Atsumbikika Na Cisankhulo Cidacita Iye Mu Uphale Wace
Yalongwa Na Ilve Apanyuk
MU PYAKA pyakumalisa pya umaso wace, tiu wanga wankulu Nikolai Dubovinsky alemba mbiri ya umaso wace yakuti isapangiza kutsandzaya na kupswipa ntima m’basa yace yakutumikira Yahova. Khundu izinji ya mbiri ineyi yacitika mu ndzidzi udakhondeswa basa yathu ku União Soviética wakale. Mwakukhonda tsalakana nyatwa na pinentso, iye apitiriza kukhala wakukhulupirika na umaso wakutsandzayisa. Tiu Nikolai akhalonga kazinji kene kuti asafuna kuti anang’ono abve pya mbiri yace, natenepa, ndisafuna kulonga pya mbiri ineyi. Iye abalwa mu caka 1926 m’banja ya anyakulima mu cisa ca Podvirivka ku Chernivtsi Oblast, Ukraniya.
NIKOLAI ALONGA KUTI AGUMANA TANI UNDIMOMWENE
Tiu Nikolai alonga: “Ntsiku inango mu caka 1941, m’bale wanga wankulu Ivan abweresa panyumba bukhu A Harpa de Deus, O Plano Divino das Eras, marevista mangasi a Ncenjezi na mabukhu mazinji. Ine ndaleri onsene. Ndakomerwa na kudziwa kuti ndi Dyabo anacitisa nyatwa zonsene pa dziko yapantsi, tayu Mulungu. Ndaleri mabukhu anewa pabodzi na Maevanjelyu mbandidzindikira kuti ndikhadagumana undimomwene. Mwakugalamuka ndatoma kulonga pya cidikhiro canga ca Umambo kuna anango. Pikhapfundza ine mabukhu anewa, kubvesesa kwanga undimomwene kwathimizirika, pontho cifuno canga cakukhala ntumiki wa Yahova cadzakhala cakuwanga kakamwe.
“Ndadzindikira kuti mbidathabuswa thangwi ya pikhulupiro pyanga. Ukhali ndzidzi wa nkhondo, mbwenye nee ndikhafunika kupha munthu. Toera kukhunganyika ku mayesero anewa, ndatoma kukoya m’manyerezero malemba mangasi ninga Mateo 10:28 na Mateo 26:52. Ndatonga kuti ndzidzi onsene mbidapitiriza kukhala wakukhulupirika kwa Yahova, ngakhale kuti panango mbidaphiwa!
“Pidakwanirisa ine pyaka 18 mu caka 1944 ndacemerwa toera kucita basa ya unyankhondo. Unoyu ukhali ndzidzi wakutoma ukhali ine pakati pa anyakukhulupira andzanga, abale anango aciphale a thunga yakuenda kunkhondo akhalimbo pa mbuto inagumanyizwa anyakuenda kunkhondo. Ife tapanga akulu a utongi kuti nee mbatidaenda kunkhondo. Mwakuipirwa, nkulu wa anyankhondo atithusa kuti nee mbadatipasa cakudya, mbadatikumbisa madjenje peno kutilasa na mpfuti. Mwacipapo, ife tatawira: ‘Tiri m’manja mwanu. Mbwenye mwakukhonda kutsalakana pinafuna imwe kuticita, ife nee tinaswa ntemo wa Mulungu wakuti: “Leka kupha munthu.”’—Eks. 20:13.
“Buluka penepo, ine na abale awiri tatumizwa ku Belarus toera kucita basa yakulima na yakusasanyira papswa nyumba zakugomoka. Ndisakumbuka pinthu pidasakazwa na nkhondo pidaona ine mu pisa pya Minsk ninga: Miti yakupiswa idagwera mu nseu, anthu akufa akukhonda kufikirwa, makavalu akufa akuti akhabvunda m’madhibhi na munsitu. Ndaona ngolo zakusiyiwa, mpfuti zikulu za maroda na ndeka yakufudzika. Pyenepi pyacitika thangwi yakukhonda kubvera mitemo ya Mulungu.
“Nkhondo yamala mu caka 1945, mbwenye tapitiriza nkaidi mu pyaka khumi, thangwi yakukhonda kumenya nkhondo. Mu pyaka pitatu pyakutoma, ife nee tikhasonkhana, pontho nee tikhali na mabukhu Acikristu. Takwanisa kupita ncibverano na alongo anango mukuphatisira matsamba, mbwenye iwo amangwambo mbatongwa kuphata basa mwakuwanga m’mazunde mu pyaka 25.
“Mu caka 1950, ndabuluswa nkaidi mbandibwerera kunyumba. Pikhali ine nkaidi, mai wanga na ng’ono wanga wankazi Maria adzakhala Mboni za Yahova! M’bale wanga wankulu akhadadzati kubatizwa, mbwenye akhapfundza Bhibhlya. Nakuti ndikhamwaza mphangwa mwaphinga, anyankhondo a União Soviética akhafuna kundiendesa pontho nkaidi. Buluka penepo, abale akhatsogolera basa yathu andiphemba toera kuphedzera basa yakucita mabukhu mu nyumba yapantsi. Pa ndzidzi unoyu ndikhali na pyaka 24.”
KUKHUNGANYA MABUKHU
“Mboni za Yahova zikhakomerwa na kulonga: ‘Basa ya Umambo ingakhondeswa padzulu pa mataka, inapitiriza kucitwa pantsi pa mataka.’ (Mis. 28:28) Pa ndzidzi unoyu, mabukhu athu mazinji akhadhindwa mwacibisobiso n’nyumba za pantsi pa mataka. Kwartu yakutoma ikhaphata ine basa ikhagumanika pantsi pa mataka pa nyumba ya m’bale wanga wankulu Dmitry. Midzidzi inango, ndikhamala masumana mawiri n’nyumba yapantsi. Nyale ya querosene ingathima thangwi yakusoweka kwa oxigênio, ndikhagona mbandidikhira mpaka n’nyumba mudzale na muya wadidi.
“Ntsiku inango, m’bale akaphata na ine basa andibvundza: ‘Nikolai, kodi iwe wabatizwa?’ Maseze ndikhatumikira Yahova mu pyaka 11, mbwenye nee ndikhadabatizwa. Natenepa, iye acedza na ine mbandibatizwa pa ntsiku ineyi namasiku n’thawala, ndikhali na pyaka 26. Pidapita pyaka pitatu, ndatambira basa inango yakutumikira ninga m’bodzi wa Comissão do País. Pa ndzidzi unoyu, abale akuti nee akhadamangwa, aphembwa toera kupitira mbuto ale akhadamangwa. Natenepa basa ya Umambo yapitiriza.”
PINENTSO PYAKUPHATA BASA PANTSI PA MATAKA
“Basa yakudhinda mabukhu pantsi pa mataka ikhanentsa kakamwe kupiringana kukhala nkaidi! Toera kucalira kuphatwa na apolixa a KGB, nee ndagumanika pa misonkhano mu pyaka pinomwe. Ndikhatsalakana ndekhene umaso wanga wauzimu. Ndikhaonana na acibale anga basi ene mu ndzidzi ukhaenda ine kaaona, pyenepi nee ndikhapicita kazinji kene. Mbwenye iwo akhabvesesa makhaliro anga, pyenepi pikhandiwangisa. Kutsukwala ndzidzi onsene na kucita mpholemphole pikhandimala mphambvu. Mbwenye tikhali dzololo toera kuthimbana na pyonsene. Mwacitsandzo, ntsiku inango namasiku apolixa awiri abwera panyumba. Ine ndanumpha na pa janela ya kuntsi kwa nyumba mbandithawira munsitu. Ndabulukira m’munda mbandibva dzumbi. Pidabva ine kulira kwa mpfuti, ndadzindikira kuti dzumbi ikhadabva ine ikhali ya mpfuti! M’bodzi wa ale akhanditowerera akwira pa kavalo mbapitiriza kundilizira mpfuti mpaka kumala pyumbu pyace! Cumbu cibodzi candilasa pa nkono. Pidathamanga ine mpaka makilometru 5 mbakanditowerera ndabisala munsitu. Mukupita kwa ndzidzi, pikhatongwa ine ndapangwa kuti iwo akhadandilizira pyumbu 32!
“Nakuti ndamala ndzidzi uzinji pantsi pa mataka, manungo anga akhali na ncete kakamwe. Pyenepi pyandicitisa kusiya basa ikhacita ine. Natenepa, ndikakhala ndzidzi uzinji kakamwe pa dzuwa. Kukhala kwanga pantsi pa mataka pyakhuya ungumi wanga. Ntsiku inango nee ndakwanisa kugumanika pa nsonkhano wakufunika kakamwe pabodzi na abale anango, thangwi ndikhabuluka ciropa nkanwa na mphuno.”
KUMANGWA KWA NIKOLAI
“Ndamangwa pa ntsiku 26 ya Thongwe ya caka 1957. Pidapita nthanda zitanthatu Thando Ikulu Yakutonga Miseru ya ku Ukraniya yadziwisa pidatonga iyo kucita. Ine ndatongwa kuphiwa na pelotão de fuzilamento, mbwenye nakuti ntemo unoyu ukhadafudzwa, ndatongwa kumala pyaka 25 nkaidi. Mwa ife, asere atongwa kumala pyaka 130 m’basa yakuwanga m’mazunde. Ife tatumizwa ku mazunde a Mordvinia, kwakuti kukhali Mboni za Yahova cifupi na 500. Tikhasonkhana mwacibisobiso m’misoka ming’ono toera kupfundza Ncenjezi. Pidamala iye kudinga marevista athu mangasi akuti akhadakwatwa, muoneri unango wa zunde alonga: ‘Mungapitiriza kualeri, nkhabe anafuna kufewesa cikhulupiro canu!’ Tikhaphata basa ntsiku zonsene, kazinji kene tikhacita pizinji kupiringana pikhapangwa ife toera kucita. Mbwenye nkadamu wa zunde adungunya: ‘Basa inacita imwe pano nee ndi yakufunika kwa ife. Pinafuna ife ndi kunyindirika kwanu na kubvera kwanu.’”
CIKHULUPIRO CACE NEE CAFEWA
Pidabuluswa iye m’mazunde mu caka 1967, tiu Nikolai aphedzera kusasanyirwa kwa mipingo ku Estoniya na ku St. Petersburg, Rusiya. Pakutoma kwa caka 1991, nseru wa mu caka 1957 wafudzwa thangwi yakusoweka kwa pipangizo pyakukwana. Pa ndzidzi unoyu, Mboni za Yahova zizinji zakuti zikhadathabuswa kakamwe na mautongi zasudzulwa. Mu caka 1996, Nikolai aenda kakhala mu nzinda wa Velikiye Luki ku Pskov Oblast, nsindzo wa makilometru 500 kubulukira ku St. Petersburg. Iye agula nyumba ing’ono, pontho mu caka 2003 Nyumba ya Umambo yamangwa panyumba pace. Lero, mipingo miwiri yakuthambaruka isasonkhana mu Nyumba ineyi ya Umambo.
Ine na mamunanga tisatumikira pa ofesi ya filiali ya Mboni za Yahova ku Rusiya. Nthanda zingasi mbadzati kufa, tiu Nikolai abwera kudzationa paulendo wakumalisa mu nthanda ya Murope ya caka 2011. Mafalace atikhuya kakamwe pidatipanga iye mwakukomerwa: “Mwa pyonsene pinaona ine, ndiri na cinyindiro cakuti mwakuphiphirisa ntsiku yacinomwe yakuzungulira nzinda wa Yeriko yatoma.” (Yos. 6:15) Iye akhali na pyaka 85 pyakubalwa. Maseze akhala na umaso wakunentsa, iye alonga: “Ndiri wakutsandzaya kakamwe thangwi pikhali ine mphale, ndatonga kutumikira Yahova! Ine cipo ndatsumbikika thangwi yakucita pyenepi!
[Ntsonga ikulu pa tsamba 16]
“Tikhaphata basa ntsiku zonsene, kazinji kene tikhacita pizinji kupiringana pikhapangwa ife toera kucita”