Sangizirani Mpfunzisi Wankulu Pakuphatisira Bukhu Yakuti Biblya Isapfunzisanji
1 Mpfunzisi Wankulu, Yezu, m’nzidzi onsene akhafokotoza pinthu m’njira yokhonda nensa na mwakubveka. Towera kucitisa anyakubvesera ace kunyerezera, m’midzidzi inango iye akhatoma kubvunza maonero awo. (Mat. 17:24-27) Iye akhatsogolera manyerezero ku Mafala a Mulungu. (Mat. 26:31; Mko. 7:6) Iye akhacita pyonsene towera kukhonda kupasa anyakupfunzace mphangwa zizinji, mbadziwa kuti iwo anapitiriza kupfunza. (Jwau 16:12) Yezu akhafunambo kudziwa khala anyakupfunzace akhabvesesa na kukhulupira pikhapfunziswa iwo. (Mat. 13:51) Bukhu yakuti Biblya Isapfunzisanji yacitwa towera kutiphedza kupfunzisa m’njira ibodzibodzi.
2 Mabvunzo Akutoma: Munatoma imwe nsolo, mphyadidi kutsogolera manyerezero ku mabvunzo akutoma ali pantsi pa nsolo. Citani mabvunzo akukhonda funika ntawiro towera kusisimula maba a nyakupfunza. Peno munakwanisa kumphemba towera kutawira mwacigwagwa mabvunzo anewa. Nkhabe funika kudinga matawiro ace mwacidikhodikho peno kulungamisa matawiro ace onsene akuipa. Mungakwanise basi kupereka takhuta ku manyerezero ace na kutoma kudinga mphangwa. Kutawira kwace mabvunzo akutoma kunadzakuphedzani kudziwa khala musafunika kugomezera kakamwe ntsonga zinango za pfunziro.
3 Malemba: Pfunziro isafunika kubulukira m’Malemba. (Aheb. 4:12) Mbwenye, nkhabe funika kuleri malemba onsene akusowa mafala m’ndima. Gomezerani Malemba ale akuti asapangiza phata ya pikhulupiro pyathu. Malemba anapereka ntsonga zakuthimizirika panango nkhabe funika kulerwi. Bukhu yakuti Biblya Isapfunzisanji isapangiza undimomwene m’njira yokhonda nensa. Citani kuti pfunziro ikhale yokhonda nensa. Gomezerani ntsonga zikulu, na calirani kufuna kulonga pinthu pizinji peno kulonga mphangwa zokhonda khala za bukhu ino mwakusowa basa.
4 Nthimiziro: Nthimiziro uli na misolo 14 inalongwa m’nsolo ukulu. Kudinga misolo ineyi nkati mwa pfunziro ndi cisankhulo ca munthu. Ku misolo inango mungakwanise kuwangisa nyakupfunza wanu kuleri ekha mphangwa zakuthimizira, makamaka khala iye asabvesesa na kutawira mphangwa zinagumanika m’nsolo ukulu. Mwacitsanzo, khala nyakupfunza asakhulupira kuti Yezu ndi Mesiya, panango nkhabe funika kudinga na iye nsolo wa nthimiziro wakuti “Yezu Kristu—Mesiya Wakupikirwa,” munadinga imwe nsolo 4, wakuti “Kodi Yezu Kristu Mbani?” M’midzidzi inango, panango ndi kwakuphindulisa kukwata nzidzi nkati mwa pfunziro towera kudinga mphangwa za nthimiziro peno khundu yayo.
5 Khala mwasankhula kudinga mphangwa za nthimiziro, mungakwanise kukhunganya mabvunzo mwanyapantsi na kudinga ndima na nyakupfunza ninga munadinga imwe nsolo ukulu. Peno mwakubverana na pyakufuna pya nyakupfunza, mungakwanise kusankhula mphindi zingasi nkati mwa pfunziro towera kubwerezera mphangwa na iye. Pyenepi pinadzakucitisani kudziwa khala iye abvesesa mphangwa zidaleri iye ekha.
6 Bokosi Ya Kubwerezera Pidapfunzwa: Bokosi inagumanika kunkhomo kwa nsolo ubodzi na ubodzi isapasa mafala akuti kazinji kene asatawira mabvunzo akutoma. Munakwanisa kuphatisira mafala anewa towera kubwerezera ntsonga zikulu za nsolo. Amwazi mphangwa anango aona kukhala kwakuphedza kakamwe kuleri mafala onsene na panango na malemba akutowerera na nyakupfunza. Buluka penepo iwo asaphemba nyakupfunza towera afokotoze mwacigwagwa kuti malemba asapangiza tani undimomwene wa mafala. Pyenepi pisapangiza mpfunzisi khala nyakupfunza abvesesa mwadidi ntsonga zikulu za pfunziro na zenezi zisaphedzerwa tani na Biblya pabodzi na khala iye asazitawira. Pyenepi pisapfunzisambo nyakupfunza kuphatisira Biblya towera kufokotoza undimomwene kwa anango.
7 Njira zizinji zadidi kakamwe za kukwanirisa basa yathu ya kupfunzisa anthu na kucita anyakupfunza ndi kusangizira njira zakupfunzisa za Yezu. (Mat. 28:19, 20, Mphangwa Zadidi) Bukhu yakuti Biblya Isapfunzisanji inatiphedza kucita pyenepi. Iphatisireni mwadidi towera kupfunzisa anango undimomwene m’njira yakubveka, yokhonda nensa, na yakutsanzayisa.
[Study Questions]
1. Kodi Yezu akhapfunzisa tani?
2. Kodi tinakwanisa kuphatisira m’njira zipi mabvunzo akutoma a nsolo ubodzi na ubodzi?
3. Kodi tinakwanisa tani kucitisa pfunziro kukhala yokhonda nensa?
4. Kodi ndi ninji pinafuna tonga khala tisafunika kukwata nzidzi nkati mwa pfunziro towera kudinga mphangwa za nthimiziro?
5. Khala tasankhula kudinga mphangwa za nthimiziro, kodi tinakwanisa tani kucita pyenepi?
6. Kodi inaphatisirwa tani bokosi ya kubwerezera pidapfunzwa inagumanika kunkhomo kwa pfunziro ibodzi na ibodzi?
7. Kodi tinakwanisa tani kuphatisira bukhu yakuti Biblya Isapfunzisanji towera kukwanirisa basa yathu?