Gulu Yakucita Cifuno Ca Yahova,

tsamba 64-72

NSOLO 7

MISONKHANO ‘INAPANGIZA KUFUNA NA MABASA ADIDI’

NSONKHANO WA BASA

Nsonkhano Wa Basa usagomezera utumiki wathu wa mmunda. Usatikhunganya towera kucita khundu mwakukwana m’kumwaza mphangwa zadidi za Umambo, kucita anyakupfunza na kumwaza mphangwa za kufendedzera kwa ntsiku yakutonga miseru ya Mulungu. (Mat. 28:20, MZ; Mko 13:10; 2 Ped. 3:7) Khundu ikulu ya basa ineyi, isacitwa m’kupanga anthu na kuapasa mabukhu akubuluswa m’Biblya. Mbwenye kuti utumiki wathu uphate ntima na ubale misapo, usanyindira kuphatisira kwathu midida yakulungama ya Yahova m’umaso wathu. (Mat. 13:23; Jwau 15:8) Ife tisapangiza tenepa maphindu adidi anabwera m’kuphatisira Malemba. Mwakuthema, Nsonkhano Wa Basa usagomezera makhundu anewa onsene a utumiki wathu wa Mulungu.

Nthanda ibodzi na ibodzi Utumiki Wathu Wa Umambo usandandalika Misonkhano ya Basa pa sumana. Imwe munadzatambira Utumiki Wathu Wa Umambo wanu kubulukira ku mpingo. Munatambirwa Utumiki Wathu Wa Umambo upswa, nyakuyang’anira wakutsogolera asadinga mwacidikhodikho pinagumanika mwenemu na asapasa makhundu akusiyana-siyana a misonkhano kwa abale akuthema. Iye angakwanise kucita masasanyiro a nkhani zenezi towera zicitwe na akulu a mpingo akusiyana-siyana.

Akulu na atumiki akutumikira akuthema asaikhwa towera kutsalakana makhundu akusiya-siyana a ndandanda wa Nsonkhano Wa Basa. Iwo asafunika kucita mphole-mphole, towera akhonde kuthimizira mphangwa zinango, mbwenye acite nkhani mwakubverana na pidandandalikwa m’Utumiki Wathu Wa Umambo. Pyenepi pisabveka kuti asafunika kupfunza nkhani zidapaswa iwo mwacidikhodikho towera kusankhula ntsonga zakufunika za cipfunziso na kuona kuti anazicita tani towera kuti abale akwanise kuzibvesesa na kuzikumbukira. Asanyerezerambo mwacidikhodikho maphatisiro a mphangwa zenezi mwakubverana na makhaliro a pa mpingo.

Ngakhale pana njira zakusiyana-siyana za kukamba nkhani mwadidi, si kwadidi tayu kuphatisira njira yakuti inaphimbira pyakufunika pya nkhani ineyi. Pitsanzo nkhabe funika kucitwa ninga tsenzo yakupangiza pinthu pizinji towera kusekesa anthu. Phatisirani pinthu pyacibaliro, ninga pipangizo pya munthu akuphata basa kudziko, kucedzera nyumba na nyumba, pfunziro ya Biblya yapanyumba, peno kuceza kwa banja. Pipangizo pisafunika kubverana na pinathimbana na anthu pacisa towera kuti amwazi mphangwa akwanise kupiphatisira.

Amwazi mphangwa akubatizwa a citsanzo cadidi na anapiana awo akupfunziswa mwadidi angakwanise kuphembwa towera kucita makhundu anango, ninga pitsanzo. Pantsi pa citsogolero ca abale akunyindirika, iwo angakwanise kubvunzwa peno kuphembwa towera kulonga pyakugumana napyo pyawo. Mungakhala na mwai wa kucita khundu, phedzani mwakukomerwa na ntima onsene, mbamudzindikira kuti ipi pisacita khundu ya basa yanu kwa Yahova.

Ceneci cisafunika kukhala cifuno ca m’ntima ca Nkristu m’bodzi na m’bodzi ca kukhala maso m’njira yakuti inakwanisa kuwangisa anango kutowerera Yezu Kristu ninga Mboni yakuperekeka kwa Yahova. Towera kukwanisa kucita pyenepi, ndandanda wa Nsonkhano Wa Basa usacitwa towera kufikira pyakufuna ninga ipi: (1) towera kutiwangisa kucita khundu ya utumiki wapakweca ninga munakwanisa ife—m’umboni wa nyumba na nyumba, m’miseu, peno konsene kunagumanika anthu—na kukulisa luso yathu ya kupereka umboni wa mphangwa zadidi; (2) towera kutipfunzisa macitiro a maulendo akubwerezera kwa anthu anapangiza kufuna peno anatambira mabukhu akubuluswa m’Biblya; (3) towera kutikulumiza kukoya nzidzi wa kucitisa mapfunziro a Biblya apanyumba mokhonda phonya na kutsogolera anyakupfunza ku gulu; (4) towera kutipangiza njira ya kupereka umboni mwantsusukano; (5) towera kutipangiza kuti tinaenda tani kutsogolo m’kuwangisira kwathu kuphedza anthu apswa, anapiana athu na aphale na atsikana anango kukhala anyakupfunza akuperekeka.

Imwe munadzaphindula mungadinga mwanyapantsi ndandanda unagumanika m’Utumiki Wathu Wa Umambo mbamudzati kuenda ku nsonkhano. M’midzidzi inango, mabukhu a Mboni za Yahova asadinga misolo yakusiyana-siyana. Kudinga mwanyapantsi nee kusaphindulisa kudziwa basi mphangwa tayu mbwenye iko kunadzakucitisanimbo kutawira nkhani za ndandanda zinaphemba anyakubvesera kucita pyenepi. Munapfunza imwe pizinji m’Nsonkhano Wa Basa, munadzakhala wakukwanisa kakamwe kupereka mphangwa m’utumiki wanu.

Munagumanika onsene m’mpingo pa Nsonkhano Wa Basa mwakukhonda phonya, phindu yace isakhala basa ya ubodzi. Nakuti Mboni yakubatizwa yonsene ndi ntumiki, kugumanika pa nsonkhano unoyu ndi kwakufunika towera kukwanirisa basa yathu. Ndi pyakufunikambo kwa munthu onsene anafuna kukhala ntumiki wa Mulungu wakuperekeka. Citani kuti kugumanika pa nsonkhano unoyu kukhale khundu ya ndandanda wanu wa basa pa sumana.

Misonkhano ya ntundu unoyu si yacilendo tayu. M’Malemba munapitsanzo pyadidi pya misonkhano ineyi. Mbasati kutuma anyakupfunza ace kamwaza mphangwa, Yezu aapasa pitsogolero pyakuthonyeka pya pikhafunika iwo kulonga na kucita. (Mat. 10:5–11:1; Luka 10:1-16) M’kupita kwa nzidzi anyakupfunza ace apitiriza kukhala na misonkhano ineyi mukhalonga iwo pyakugumana napyo pyawo m’utumiki, na pyenepi pyaawangisa kucita basa ya Umambo mwaphinga. (Mach. 4:23-31) Tisapitiriza kucita cibodzibodzi mpaka lero.

XIKOLA YA UTUMIKI WA MULUNGU

Xikola Ya Utumiki Wa Mulungu ndi masasanyiro akupitiriza kupfunzisa onsene m’mpingo. Mapfunziro ace asaphataniza kuleri Biblya, nkhani zakubuluswa m’Biblya, nkhani za anyakupfunza na mapfunziro anango a utumiki wa mmunda. Anyakupfunza asapaswa uphungu towera kuaphedza kuenda kutsogolo m’macitiro a nkhani zawo. Nzidzi ubodziene unapereka ife mphangwa zakusiyana-siyana zakuti ndi zakufunika na zakuphindulisa mpingo onsene, Xikola Ya Utumiki Wa Mulungu isapasambo anyakukamba nkhani pabodzi na anyakubvesera mwai towera kuenda kutsogolo m’njira zakusiyana-siyana za utumiki wawo. Kubwerezera pidapfunzwa nzidzi na nzidzi kusapasa mwai wa kudingika kwa kuthambaruka kwa munthu m’pipfunziso pya utumiki.

Caka na caka gulu ya Yahova isapasa Ndandanda wa Xikola Ya Utumiki Wa Mulungu inandandalika pinafunika kutowererwa. Ndandanda unoyu usandandalika mphangwa zinafunika kuphatisirwa na macitiro a nkhani. M’piaka pizinji Xikola Ya Utumiki Wa Mulungu isapasa cipfunziso cakufunika kwa Mboni za Yahova towera kukhala anyakumwaza mphangwa adidi a Umambo. Onsene anagumanyikana na mpingo mokhonda phonya, kuphataniza anthu apswa anagumanika pa misonkhano, angakwanise kulembesa angaoneka kuti asatawira pipfunziso pya Biblya na umaso wawo ungakhala wakubverana na midida Yacikristu.

Munalembesa ife pa Xikola Ya Utumiki Wa Mulungu, tisapangiza kuti tisafuna kuenda kutsogolo mwauzimu. Pipfunziso pinakwanisa kutiphedza kupangiza ‘machitiro adidi’ ninga anyakukuza Yahova pakweca. (Mat. 5:16) Ipyo pinakwanisa kutikhunganya kubanza mwadidi nzidzi uli na ife towera kucita utumiki wa mmunda na kukulumiza anango kucita pinthu na matawiro athu adidi m’misonkhano ya mpingo. Kwa abale, pipfunziso pyenepi pinadzaaphedza kakamwe kukhala akuthema kuikhwa ninga atumiki akutumikira peno akulu a mpingo na panango m’kucita nkhani zikulu m’Misonkhano ya Basa na kucita nkhani zapakweca.

Ale adalembesa anadzapaswa mwanyapantsi kakamwe nkhani za nyakupfunza towera akwanise kukhunganya mwadidi. Tingakhala na nkhani pa xikola, mphyakufunika kakamwe kufika pa mpingo nsonkhano mbusati kutoma. Tisafunika kucita masasanyiro onsene towera kucita nkhani yathu. Natenepa, pangaoneka mpingizo mwakututumusa na kucimwana kucita nkhani yathu, tisafunika kudziwisa mwakucimbiza muyang’aniri wa xikola peno m’bale adaikhwa towera kumphedza kuti acite masasanyiro a kupasa munthu unango nkhani yanu.

Ninga khundu yokhonda phonya ya ndandanda wa cakudya cauzimu, Xikola Ya Utumiki Wa Mulungu isapasa maphindu mazinji. Mprofeta Izaiya alonga: “Mbuya wankulu kakamwe andipfundisa pinatongwa ine kulonga towera ndiwangise adaneta.” (Iza. 50:4) Mwakukhonda penula, xikola isakwanirisa khundu yakufunika ya kupfunzisa mamiliyau a anthu towera kukhala na lirimi ya munthu wakupfunziswa na Yahova. Nkati mwa piaka, ndandanda unoyu waphedza anthu adalembesa towera kukula mwauzimu na kupfunza kulonga mwadidi m’kupereka mphangwa zadidi za Umambo. M’kutsogolerwa na nzimu wakucena, cipfunziso ceneci cacitisa anthu a Mulungu kukwanisa kupereka ntawiro kwa munthu onsene anaphemba thangwi ya cikhulupiro cawo. Kupfunzisa kuphatisira Mafala a Mulungu m’njira ineyi ndi nkhombo.

Ale adalembesa pa Xikola Ya Utumiki Wa Mulungu anakwanisa kuphindula kakamwe m’kuphatisira bibliyoteka inagumanika m’Nyumba ya Umambo. Bibliyoteka ineyi isafunika kukhala na mabukhu a Mboni za Yahova, Índices das Publicações da Torre de Vigia, panango na Mabiblya akusiyana-siyana na mabukhu anango akuphedza. Tisafunika kukhala aufulu towera kuphatisira mabukhu onsene anagumanika m’Nyumba ya Umambo misonkhano mbisati kutoma peno ingamala.

PFUNZIRO YA BUKHU YA MPINGO

Piwalo pya mpingo na anango anagumanyikana na iwo asaphindula kakamwe na Pfunziro Ya Bukhu Ya Mpingo, nsonkhano wakuti kazinji kene usacitwa na nsoka ung’ono mwakusiyana na misonkhano inango. Mabanja akucepa na anthu anango angasi asagumanyikana pa pfunziro ibodzi na ibodzi. Misoka ya pfunziro isagumanyikana pa mbuto zakuthema zakumwazika m’cisa consene ca mpingo, kazinji kene m’nyumba za abale. Nyumba ya Umambo ingaphatisirwembo na cifuno ceneci.

M’njira zinango, misoka ineyi ya mapfunziro isapasa maphindu akuti nkhabe kugumanika m’misonkhano inango ya mpingo. Thangwi yanji piri tenepa? Ndi thangwi yakuti masasanyiro anewa a Pfunziro Ya Bukhu Ya Mpingo nee asapasa basi mwai wa kupfunza mphangwa za m’Biblya mwacidikhodikho na mwakukwana tayu mbwenye asapasambo anthu citsalakano cikulu ca kuthambaruka kwauzimu kwa munthu m’bodzi na m’bodzi ali m’misoka ming’ono ineyi. Ciphedzo ceneci ca munthu pa ekha cingaphatanize uphungu wakuthema wa m’Malemba, kuwangiswa na citsogolero towera kukwanirisa utumiki, pabodzi na ciphedzo cauzimu cakufunika towera kukwanirisa pyakufuna pya munthu. Ciphedzo ceneci ndi cipangizo ca kufuna kwakukoma ntima kwa Yahova na kutsalakana kwace anthu ace.—Iza. 40:11.

Muyang’aniri wa Pfunziro Ya Bukhu Ya Mpingo ndi nyakupfunza wa Mafala a Mulungu na ndi wakuthema towera kuphedza anango kukulisa cidziwiso ca Biblya na kuciphatisira cidziwiso m’njira zakuphata basa. Kusiyapo kutsogolera pfunziro, iye asapangiza citsalakano kwa munthu onsene m’njira yakumanungo na yauzimu ku udidi wa anthu onsene a m’nsoka, asaaphedza m’basa ya kumwaza mphangwa na asaacezera m’maulendo aukumbizi. Ntumiki wakutumikira waluso anakwanisa kutsogolera pfunziro ya bukhu khala nkhabepo nkulu.

Nsonkhano unoyu ndi pfunziro ya nsoka isaphatisira Biblya na mabukhu anaperekwa na Mboni za Yahova. Makamaka, isatsogolerwa m’njira ibodziene ninga Pfunziro ya A Sentinela. Pfunziro ya bukhu isatoma na kumaliswa na phembero, ndima zisalerwi, mabvunzo a m’ndima asacitwa, matawiro asaperekwa na malemba asalerwi nzidzi ungakhalapo. Towera kukhomera ntsonga zikulu m’manyerezero mwa munthu m’bodzi na m’bodzi, nyakutsogolera angaphatanize kubwerezera pidapfunzwa kwa pamulomo kunkhomo kwa pfunziro. Munagumanika ife sumana na sumana pa pfunziro ya bukhu, tinadzakhala na cidziwiso pabodzi na kubvesesa. Tinadzapfunza mathangwi a mafala analongwa m’bukhu na tinadzaaphedza tani kubulukira ku Biblya pabodzi na tinadzalonga tani mphangwa zibodzi zene na anango anakwanisa ife kuphedza m’utumiki wathu wa mmunda. (2 Tim. 2:15) Nsonkhano unoyu unadzatiphedza kakamwe kukhala apfunzisi adidi a Mafala a Mulungu.

M’nsoka ung’ono ninga unoyu, pana miyai mizinji kwa ife towera kutawira. Natenepa, ife tonsene kuphataniza anthu apswa, tina mwai towera kudzoloera kulonga pakweca cikhulupiro cathu pamaso pa anango. (Aheb. 13:15) Mphyadidi kupfunza kutawira m’mafala anu ene kusiyapo kuleri m’bukhu.

Maseze munthu onsene angakwanise kucita khundu m’kuleri malemba, pasafunika kusankhulwa munthu m’bodzi basi towera kuleri ndima. Muyang’aniri wa Pfunziro Ya Bukhu Ya Mpingo mwanyapantsi anadzacita masasanyiro towera m’bale wakubatizwa wakuti ndi nyakuleri mwadidi aleri ndima. Pa sumana, m’bale wakuthema angakwanise kusankhulwa towera kuleri ndima. Khala nkhabepo m’bale wakukwanisa kucita pyenepi, muyang’aniri peno mulongo wakukwanisa angakwanise kuleri.

Kukhala na misoka ya pfunziro yakumwazika m’cisa consene ca mpingo kusaphedza ife na anyakufuna apswa akuendekana kugumanika pa nsoka. Tisafunika kuwangisira kuenda pa nsonkhano pabodzi na anango towera akalawire pipfunziso pyakuwangisa pyauzimu na kugumanyikana kwakukomeresa kunakhala na ife.

Kusiyapo kukhala mbuto ya pfunziro ya nsoka, mbuto ya Pfunziro Ya Bukhu Ya Mpingo ingakwanise kukhala mbuto ya kucitira nsonkhano wa utumiki wa mmunda. Nsoka ungakwanise kugumanyikana penepo m’nzidzi wakuthema mbusati kuenda mmunda. M’kubvera masasanyiro anewa onsene, misoka ya pfunziro ya bukhu isaphata basa pabodzi na pifuno pya kupfunza na kutumikira.