Gulu Yakucita Cifuno Ca Yahova,

tsamba 92-102

NSOLO 9

Njira Za Kumwaza Mphangwa Zadidi

YEZU KRISTU akwanirisa mwaluso kakamwe basa yace ninga nyakutumwa wa Yahova. Ninga m’mwazi mphangwa zadidi za Umambo wa Mulungu wamphambvu, iye akhazikisa citsanzo kwa atowereri ace. Iye atoma kuenda kuna anthu, mbaapanga na kuapfunzisa n’zinyumba zawo na m’mbuto zapakweca. (Mat. 9:35; Luka 8:1) Yezu alonga na anthu, apfunzisa anyakupfunzace paokha, na alonga na mwinji ukulu wa anyakubvesera. (Mat. 13:36; Mko. 4:10-13; 6:35-44; Jwau 3:2-21) Iye abanza nzidzi onsene wakuthema towera kulonga mafala akuwangisa na acidikhiro. (Luka 4:16-18) Iye hadasiya nzidzi kuluzika tayu wa kucita utumiki, ngakhale mu nzidzi ukhafuna iye kupuma na kuwina mphambvu. (Mko. 6:30-34; Jwau 4:4-34) Munaleri ife pyakulembwa pyakupepeserwa pya utumiki wa Yezu, kodi ife nkhabe kulumizika kusangizira citsanzo cace? Mwandimomwene tisakulumizika, ninga pidacitikira apostolo.—Mat. 4:19, 20; Luka 5:27, 28; Jwau 1:43-45.

Dingani miyai idafungulwa kwa Akristu lero towera kucita khundu m’basa idatomeswa na Yezu Kristu cifupi na piaka 2.000 n’ndulimu.

Kumwaza Mphangwa Nyumba Na Nyumba

Mboni za Yahova za ntsiku zino zisadzindikira kufunika kwa kumwaza mphangwa zadidi mu njira ya kubverana ku nyumba na nyumba. Iwo asaphatisira njira ineyi kazinji kene towera kufikira anthu na mphangwa za Umambo na cadzakhala cidzindikiro cawo cakuoneka. Maphindu adidi anatambirwa asapangiza kutawirika na nkhombo za Yahova. Pontho, nzeru za kuphatisira njira yadidi ineyi towera kufikira pikwi na pikwi pya anthu nkati mwa nzidzi wakucepa kwabweresa maphindu akutsanzayisa. (Mat. 11:19; 24:14) Utumiki wa nyumba na nyumba wakhala njira yakuphata basa kwa ife towera kupangiza kufuna Yahova na anyakuendekana athu.—Mat. 22:34-40.

Kumwaza mphangwa nyumba na nyumba si cinthu cipswa kwa Mboni za Yahova tayu. Iko kwakhazikiswa mwakuwanga mu ntsiku za apostolo. Mwakutsanzayisa, mpostolo Paulu alemba thangwi ya kupfunzisa kwace n’zinyumba za anthu. Mu kufokotoza utumiki wace kwa ayang’aniri a ku Efeso, iye alonga kuti “tomera ntsiku idadza ine ku Azya . . . chipo na chipo ndakukhonderani na pinthu pyakukuphedzani, mbwenye ndalonga kuna imwe, mbandikupfundisani pa nsonkhano na mmidzimbo.” Mu njira ineyi na zinango iye “adembetera [acita utumiki kwa] ayuda na agrego kuti achinyuke kuna Mulungu, mbatawirambo Mbuyathu Yezu Kristu.” (Mach. 20:18, 20, 21) Mu nzidzi uneule, pakhali kufunika kukulu kwakucimbiza towera kufikira anthu onsene na mphangwa zadidi, ngakhale atongi Aciroma akhakulumiza anthu kulambira adzimunthu na anthu azinji ‘akhalemedza alungu pikulu pyene.’ Pakhali kufunika kwakucimbiza kakamwe towera kusaka “Mulungu adachita pantsi na pyonsene piri mwapyo,” Ule “anathusa [analonga na] anthu onsene a pa mbuto zonsene, towera achinyuke.”—Mach. 17:22-31.

Lero cifuno ca kufikira anthu na mphangwa zadidi ndi cakucimbiza kakamwe. Kumala kwa makhaliro a pinthu ano akuipa kuli cifupi kakamwe. Umaso wa anthu onsene uli pa ngozwi. Natenepa pasafunika kuwangisira kakamwe kukhundu kwathu cincino, kumala mbukusati fika. Mu kudziwa pyenepi, tisakulumizwa kuthimizira mphambvu zathu mu utumiki wa nyumba na nyumba, mukudziwa kuti nkhabepo njira inango yadidi kupiringana ineyi ya kusaka ale ana njala na nyota ya undimomwene. Utumiki wa nyumba na nyumba ndi wadidi kakamwe lero ninga ukhalimbo wadidi mu ntsiku za Yezu na apostolo. Iyo ndi njira yakutsanzayisa kwa ife towera kucita khundu mu utumiki.—Mko. 13:10.

Mwakubverana na makhaliro anu, kodi mukucita khundu mwakukwana mu utumiki wa nyumba na nyumba? Khala mukuphindula na mwai onsene towera kucita pyenepi, tisadziwa kuti muli na maphindu akutsanzayisa na akukomeresa m’basa yanu kwa Mulungu. (Ezek. 9:11; Mach. 20:35) Utumiki wa nyumba na nyumba panango ndi wa kunensa kwa imwe. Panango muli na makhaliro akunenseka, peno mwapaswa basa mu cisa cakuti anthu azinji nkhabe kubvesera. Panango mukuthimbana na ukhondesi wa mautongi. Thangwi ya umunthu wanu, panango musaona kukhala kwakunensa kutomesa makani na anthu anakhonda imwe kudziwa na musafunika kukunda kupaluka ntima mu nzidzi onsene unacita imwe utumiki wa nyumba na nyumba. Lekani kufewa. (Eks. 4:10-12) Makhaliro anu ndi akulandana na makhaliro a abale anu m’mbuto zinango zizinji.

Yezu apikira anyakupfunzace kuti iye mbadakhala nawo “ntsiku zonsene mpaka kumala kwa pantsi [makhaliro a pinthu, Tradução do Novo Mundo]!” (Mat. 28:19 [28:20, NM]) Pikiro ineyi isapasa cibaso anyakupfunzace lero na isaawangisa m’basa yakucita anyakupfunza. Tisafunika kukhala acipapo na acinyindiro ninga cidafokotozwa na Paulu cinagumanika pa Afilipi 4:13. Iye alonga: “Ine ndinakwanisa pyonsene mwa uyu anandipasa mphambvu.” Phindulani kakamwe na masasanyiro a mpingo anacitwa sumana ibodzi na ibodzi towera kuenda ku utumiki wa nyumba na nyumba. Mungaphata basa pabodzi na anango, munadzatambira ciwangiso pabodzi na ciphedzo towera kulonga mwadidi na anthu na kugawira mabukhu akubuluswa m’Biblya. Phemberani towera kukhala na cikhulupiro cikulu towera kuthimbana na mipingizo, na kukhala wa mphambvu ninga m’mwazi mphangwa zadidi.—Luka 17:5.

Munalonga imwe na anango mphangwa zadidi, munadzakhala na miyai ya kupangiza thangwi ya cidikhiro canu, na ico cinadzakhala cakuwanga. (1 Ped. 3:15) Imwe munadzakhala wakudziwa kakamwe kusiyana kukulu pakati pa ale anacidikhiro ca Umambo na ale adasowa cidikhiro. Kugumana anthu akuthema kubva mphangwa za Umambo na kuona kutawira kwa anthu akukhonda kuthema pinadzakucitisani kutamba pidalonga Yezu kwa anyakupfunzace, ninga pidalembwa pa Mateo 10:11-14. Munadzakhala akutsanzaya mu kudziwa kuti mwabvera matongero a Yezu towera kusiya “cheza chanu chioneke,” na munakhala na mwai towera kuphedza anango kudziwa undimomwene unatsogolera ku umaso wakukhonda mala.—Mat. 5:16; Jwau 17:3; 1 Tim. 4:16.

Asacitwa masasanyiro a basa ya nyumba na nyumba pa kumala kwa sumana tenepa ninga nkati mwa sumana. M’mbuto zakunensa kugumana anthu panyumba namacibese peno na masikati, mipingo inango isacita masasanyiro akucita utumiki namaulo. Iwo asaona kuti anthu asakhala akufunisisa kutambira kakamwe alendo munakhupha dzuwa peno n’cidodo kupiringana na macibese. Pontho, pana makhundu anango a utumiki akuti panango anakhala adidi mu cisa canu.

Kusaka Anthu Akuthema

Yezu apanga anyakupfunzace towera ‘asake’ anthu akuthema. (Mat. 10:11) Kusaka kwace anthu anapangiza kufuna nee kukhali kwa mu utumiki wa nyumba na nyumba basi tayu. Mwandimomwene, iye apereka umboni m’midzidzi yonsene yakuthema, acita umboni wantsusukano na wakukhonda kukhala wantsusukano. (Luka 8:1; Jwau 4:7-15) Apostolo aperekambo umboni kwa anthu m’mbuto zakusiyana-siyana.—Mach. 17:17; 28:16, 23, 30, 31.

Mu njira ibodzibodzi lero, cifuno cathu ndi cakuti pingakwanisika tifikire anthu onsene na mphangwa za Umambo. Pyenepi pisabveka kusangizira njira idaphatisira Yezu na anyakupfunzace towera kucita anyakupfunza, tenepa ninga kupitiriza kudziwa makhaliro akusiyana-siyana a anthu na kucinja kwa midzidzi mu cisa cathu.—1 Akor. 7:31.

Kusiyapo kumwaza mphangwa nyumba na nyumba, tisafunika kusaka anthu konsene kwene kunagumanika iwo. Amwazi mphangwa asapembera mu kucedzera anthu m’mbuto zamalonda. Utumiki wa mu nseu usakhala wadidi kakamwe m’madziko mazinji, ninga kucita umboni m’maparki, mbuto ya kuikha miotokala, mbuto yakupakirira miotokala, peno konsene kwene kunagumanika anthu. Ninga phindu, anthu akuti nee akhagumanika panyumba mukhafika amwazi mphangwa panango anakwanisa kufikirwa na mphangwa zadidi.

Kugawira A Sentinela na Despertai! ndi njira yadidi ya kupereka umboni kwa anthu. Tinakwanisa kucita pyenepi mwakukoma ntima na mwaluso mu kufikira anthu na ntsonga ya nzidzi wakuthema inafokotozwa mu revista ibodzi na ibodzi. Mabukhu anango anagawirwambo kwa anthu anapangiza kufuna, na masasanyiro asafunika kucitwa towera kuacitira ulendo wakubwerezera ku nyumba zawo. Nzidzi na nzidzi, Utumiki Wathu Wa Umambo usapereka maonero akubverana na pyenepi, usatiwangisa kucita khundu mu njira zakusiyana-siyana za utumiki. Imwe munaona kuti kucita utumiki kwa anthu m’mbuto zapakweca kukhala njira yakutsanzayisa towera kuendesa kutsogolo utumiki wanu.

Natenepa, kupereka cenjezo na kumwaza mphangwa zadidi si basa yonsene idapaswa Akristu lero tayu. Khala musafuna kupembera mu kuphedza anango kutawira undimomwene unatsogolera ku umaso, musafunika kucita maulendo akubwerezera kwa anthu adapangiza kufuna towera akwanise kuenda kutsogolo na kukhala Akristu akukola.

Kucita Maulendo Akubwerezera

Yezu alonga kwa atowereri ace: ‘Munadzakhala amboni anga mpaka ku nkhomo kwa dziko yonsene.’ (Mach. 1:8) Mbwenye iye aapanga pontho: “Ndokoni kuna anthu a madziko onsene mbamuachita anyakupfundza anga. Apfundziseni kupichita pyonsene pidakupangani ine.” (Mat. 28:19, 20, Mphangwa Zadidi) Kucita maulendo akubwerezera kunakwanisa kukhala ncera wa utsanzayi m’basa ya Yahova. Anthu adapangiza kufuna mphangwa zadidi pa ulendo wakutoma panango anadzakhala akukomerwa towera kukutambirani pontho. Mu kugawana mphangwa zakuthimizirika za m’Biblya na iwo, munakwanisa kuwangisa cikhulupiro cawo kwa Mulungu na kuaphedza kudziwa pyakufuna pyawo pyauzimu. (Mat. 5:3) Khala mwacita masasanyiro a ulendo wakubwerezera mu nzidzi wakuthema na kukhunganyika mwadidi, panango munakwanisa kutomesa pfunziro ya Biblya ya panyumba. Mu kucita pyenepi nzidzi onsene cinadzakhala cifuno canu kucita maulendo akubwerezera. Ife nee ‘tisadzwala’ mbeu ya undimomwene basi tayu mbwenye ‘tisaithirira.’—1 Akor. 3:6.

Panango pingakwanise kukhala pyakunensa kwa anango kucita maulendo akubwerezera. Panango mwakhala wakupembera mu kucita upereki umboni wacigwagwa wa mphangwa zadidi ku nyumba na nyumba, na musatsanzaya na njira ineyi ya utumiki. Mbwenye munganyerezera kubwerera towera kupita n’cibverano na mwanaciro nyumba towera kudinga ntsonga zakuthimizirika za Biblya, panango musaona kukhala kwakunensa kakamwe. Imwe nee musafunika kupibva mu njira ineyi. Panango pa ulendo wanu wakutoma, mwasiya mabukhu akubuluswa m’Biblya mangasi na munthu adapangiza kufuna. Thangwi yanji nkhabe kulonga mphangwa zinagumanika m’mabukhu anewa? Munakwanisa kukhunganyika pyenepi mwanyapantsi. Khala musapibva wakukhonda kwanisa, citani masasanyiro akuphata basa ineyi pabodzi na m’mwazi mphangwa waluso towera akuphedzeni.

Gulu ya Yahova isapereka ciphedzo cinafuna imwe towera kucita mwadidi maulendo akubwerezera. Dingani khala mukuphindula kakamwe na miyai ineyi towera kuthimizira cidziwiso canu na kubvesesa Malemba. Nyindirani Yahova, na tawirani ciphedzo ca abale na alongo aluso. Mungacita pyenepi, munadzathimizira luso yanu ya kucita mwadidi maulendo akubwerezera, na kukomerwa kwanu m’basa kunadzathimizirika kakamwe.

Kucitisa Mapfunziro A Biblya A Panyumba

Mukhalonga iye na mamuna adapangiza kufuna mphangwa za Mafala a Mulungu, m’mwazi mphangwa Filipi ambvunza: “Muli kupibvesa pinawerenga imwe?” Mamuna atawira: “Ndingasowa munthu wakunditchululira, ndinakwanisa tani kupibvesa?” Cakulembwa ca m’Biblya m’bukhu ya Machitiro kapitulu 8 cisatipanga kuti mu kutoma pa lemba ikhaleri mamuna, Filipi “atoma kuntchulula mafala ale, mbamfotokozera pya Yezu.” (Mach. 8:26-36) Ife nkhabe dziwa nzidzi udamala Filipi na mamuna unoyu, mbwenye Filipi afokotoza mphangwa zadidi mu njira yakuti mamuna adzakhala wakukhulupira na aphemba kuti abatizwe m’madzi. Iye adzakhala nyakupfunza wa Yezu Kristu.

Anthu anapangiza kufuna anagumana ife lero panango asadziwa pang’ono basi pya Biblya, na thangwi ineyi pasafunika maulendo akubwerezera mazinji na pfunziro yakuphindulisa m’masumana, nthanda zizinji, peno ngakhale caka peno caka na pinango mpaka iye akwanise kupangiza cikhulupiro na kuthema kubatizwa. Kutsalakana kwanu kwakupirira na kwakufuna mu kuphedza anthu a ntima wadidi kukhala anyakupfunza kusabweresa maphindu, tenepa ninga Yezu alonga: “Kupasa kunakomeresa kupita kutambira.”—Mach. 20:35.

Mwakukhonda penula kunadzakhala kwakukhonda nensa kucitisa pfunziro ya Biblya ya panyumba mu kuphatisira bukhu ibodzi ya Mboni za Yahova yakuti yadindwa makamaka na cifuniro ceneci. Mungatowezera citsanzo ca munthu anapfunza na imwe peno mungatambira ciphedzo ca apfunzisi anango aluso m’mpingo, imwe munakwanisa kuthimizira luso yanu ya kucitisa mapfunziro akuphindulisa, pa kuphedza anango kukhala anyakupfunza a Yezu Kristu.

Khala musafuna ciphedzo ca kutomesa na kucitisa pfunziro ya Biblya ya panyumba, khalani waufulu towera kulonga na m’bodzi wa akulu a mpingo peno na mboni zinango zinapembera mu kucitisa pfunziro ya Biblya. Munakwanisa kutambira ciphedzo towera kuphatisira maonero anagumanika mu Utumiki Wathu Wa Umambo na anapangizwa pa Nsonkhano Wa Basa. Kunyindira Yahova na kuphembera thangwi ya cifuno canu ca kukhala na pfunziro ya Biblya kunadzabweresa maphindu. (1 Jwau 3:22) Natenepa citani khundu m’basa yakucita anyakupfunza, na pingakwanisika, citani ceneci kukhala cifuno canu kucitisa pfunziro ibodzi ya Biblya ya panyumba yakukhonda phonya kusiyapo pfunziro yonsene inacitisa imwe pa banja panu. Mu kucitisa mapfunziro a Biblya, munadzathimizira kutsanzaya kwanu mu utumiki.

Kutsogolera Anthu Anapangiza Kufuna Ku Gulu Ya Yahova

Munacitisa ife mapfunziro a Biblya na kuphedza anthu kukhala anyakupfunza a Yezu Kristu, iwo asafika pakudziwa Yahova Mulungu na asabwera m’mpingo. Mipingo yapambwa mu njira yaumulungu towera kucita cifuniro ca Yahova. Anyakupfunza Biblya anakula mwauzimu na anathambaruka khala ife tisaaphedza kudziwa gulu ya Yahova na kuibvera. Mphyakufunika kakamwe kuapfunzisa kuti anabvera tani gulu ya Yahova.

Towera kukwanirisa pyenepi, munakwanisa kuphatisira mavidiyu na mabruxura akuti adindwa na cifuniro ceneci. Mphangwa zinango zinagumanika mu nsolo 4 wa bukhu ino zingakwanisembo kukhala zakuphedza.

Bulukira panatoma imwe kucedza na anthu adapangiza kufuna pya Biblya, aphedzeni kuona kuti Yahova asaphatisira gulu towera kukwanirisa basa yace pa dziko yapantsi lero. Fokotozani kufunika kwa mabukhu anaphatisirwa na Mboni za Yahova towera kupfunza Biblya, na fokotozani kuti asacitwa tani pabodzi na kugawirwa pa dziko yonsene yapantsi na anyabasa akufuna ale adaperekeka kwa Mulungu. Phembani anyakupfunza Biblya anu towera kuenda pabodzi na imwe ku Pfunziro ya Bukhu ya Mpingo. Apangiseni kwa abale na alongo, na afokotozereni kuti misonkhano isacitwa tani n’Nyumba za Umambo. Awangiseni towera kugumanika pa misonkhano. Aphedzeni kudziwana na Mboni zinango pa misonkhano ya cisa na ya gawo. M’midzidzi ineyi na inango, asiyeni anthu apswa kuona okhene kuti atumiki a Yahova asapangiza tani kufuna, cidzindikiro ca Akristu andimomwene. (Jwau 13:35) Anthu adapangiza kufuna angapereka takhuta wankulu ku gulu ya Yahova, iwo anadzafika pakudziwa kakamwe Yahova.

Kuphatisira Mabukhu Akubuluswa m’Biblya

Akristu akale akhali amwazi mphangwa a phinga a Mafala a Mulungu. Iwo acita makopya awo ene a Malemba na anango towera kuaphatisira pabodzi na mpingo. Iwo akhapanga anango kuti aleri Mafala aundimomwene a Mulungu. Makopya awo akulembwa na manja akhali akucepa na akufunika kakamwe. (Akol. 4:16; 2 Tim. 2:15; 3:14-17; 4:13; 1 Ped. 1:1) Mu kuphatisira njira ipswa ya kudinda mabukhu lero, Mboni za Yahova zisabulusa mamiliyau a Mabiblya na madzana a mamiliyau a mabukhu a kuphedzera pfunziro ya Biblya—ninga matsamba, mabruxura, mabukhu na marevista—mu pilongero pyakusiyana-siyana.

Munapanga imwe anthu mphangwa zadidi, khalani waufulu kuphatisira mwadidi mabukhu mazinji anaphedzera pfunziro ya Biblya anaperekwa na “mbandazi wakukhulupirika na wanzeru.” (Mat. 24:45, MZ) Utumiki Wathu Wa Umambo usadziwisa mabukhu anafunika kugawirwa mu utumiki wapakweca nkati mwa nthanda ibodzi na ibodzi. Imwembo muli na mwai wa kucita khundu mu kugawira marevista mwakukhonda phonya m’midzidzi yakusiyana-siyana pa nthanda ibodzi na ibodzi, kuphataniza ntsiku ya marevista.

Maseze cifuno cikulu ca “mbandazi wakukhulupirika” ndi kupereka cakudya cauzimu kwa anthu a banja ya Mulungu mu nzidzi wakuthema, “mbandazi” unoyu asapangiza kukoma ntima kwa Mulungu mu kupereka cakudya cauzimu cakuinjipa kwa onsene anafuna kudziwa Mulungu. Mu kudziwa phindu inatambira ife pa kuleri na kupfunza mabukhu a Mboni za Yahova, mwakukhonda penula imwe munadzafuna kugawana na anango pinthu pidapfunza imwe. (Aheb. 13:15, 16) Kuphatisira mabukhu anewa, ngakhale anthu apswa anakwanisa kukhala na maphindu mazinji adidi mu kumwaza mphangwa zadidi.

Utumiki Wantsusukano

Yezu alonga kwa ale akhabvesera mafalace: “Ndimwe cheza cha pantsi pano. . . . Tenepa cheza chanu chioneke pa maso pa anthu towera iwo na kuona machitiro anu adidi, asimbe Baba wanu ali kudzulu.” (Mat. 5:14-16) Anyakupfunza anewa akhafunika kupangiza njira za Mulungu mu kusangizira Yezu Kristu, ule adalongambo: “Ine ndine cheza cha anthu a pantsi pano.” Yezu akhazikisa citsanzo kwa Akristu mu kusiya “cheza chakukhalirathu [ca umaso]” kuyetimira towera kuphindulisa ale onsene anafuna kubvesera.— Jwau 8:12.

Mu njira ibodzibodzi mpostolo Paulu akhazikisa citsanzo kwa ife towera ticitowezere. (1 Akor. 4:16; 11:1) Pa nzidzi ukakhala iye ku Atena, akhapereka umboni ntsiku zonsene m’misika kwa ale akhagumanika penepo. (Mach. 17:17) Akristu ku Filipi atowezera citsanzo cace, na iye aalonga kuti ‘asayetima ninga nyenyezi za kudzulu, pakati pa anthu akuipa na akunyozeka [akupombonyoka].’ (Afil. 2:15) Ife lero tinakwanisambo kusiya undimomwene wa Umambo kuyetima kubulukira ku mafala na mabasa athu, nzidzi onsene pangaoneka mwai kwa ife towera kulonga na anango mphangwa zadidi. Ndimomwene kuti citsanzo cathu cadidi ninga anthu akucena ntima na akulungama cinacitisa anango kuona kuti ndife akusiyana na anthu azinji. Mbwenye, tingalonga mphangwa zadidi kwa ale anaona citsanzo cathu cadidi, iwo anadzadziwa thangwi yanji ndife akusiyana na anango.

Mboni za Yahova zizinji zisamwaza mphangwa zadidi kwa anthu anagumana iwo ntsiku zonsene ku basa yadziko, ku xikola, peno munacita iwo mabasa anango a umaso. Pa ulendo, panango tinakhala na mwai towera kulonga na anacita ulendo pabodzi na ife. Tekhene, tisafunika kusaka miyai towera kucinja makani kudza upereki umboni na kukhala akukhunganyika towera kulonga na anango mu nzidzi onsene wakuthema.

Tinadzakhala akuwangiswa kulonga mphangwa zadidi kwa anango tingakumbuka kuti mu kucita pyenepi, tisakuza Nciti wathu na kubweresa cilemedzo ku dzina yace. Mu nzidzi ubodzi ene, tisafunika kuphedza anthu a ntima wadidi kuti adziwe Yahova towera iwombo akwanise kuntumikira na kuwina cidikhiro ca umaso cakuti cisabwera mu kukhulupira Yezu Kristu. Pyonsene ipi ndi basa yakucena, na isakomeresa Mulungu.—Aheb. 12:28; Apok. 7:9, 10.