Ndzidzi Wa Cikumbuso Ndi Mwai Toera Kuthimizira Mabasa Athu!

1. Thangwi yanji tisafunika kunyerezera njira zakuthimizira mabasa athu nkati mwa nthanda ya Murope, Bwinja, na Gonkho?

¹ Kodi munakwanisa kuthimizira kucita kwanu khundu mu utumiki nkati mwa ndzidzi wa Cikumbuso cinafuna kudza? Madziko mazinji nkati mwa ndzidzi unoyu makhaliro akudambo ndi adidi na ntsiku ndi zakulapha. Amwazi mphangwa anango anadzakhala pa maferya a basa na a kuxikola akuti anakwanisa kuphatisira ndzidzi unoyu mu utumiki. Kutomera pa ntsiku 2 ya nthanda ya Bwinja, tinadzakhala na kampanya yakupambulika toera kucemera anthu adapangiza kufuna kuti agumanike pabodzi na ife pa Cikumbuso pa ntsiku 17 ya nthanda ya Bwinja. Pakumala Cikumbuso, tinadzawangisira toera kuthimizira cifuno ca ale adagumanika pa Cikumbuso na kuacemera pontho toera agumanike pa nkhani yakupambulika inafuna kudzacitwa nkati mwa sumana inatoma pa ntsiku 25 ya nthanda ya Bwinja. Mwandimomwene, pana mathangwi mazinji toera kunyerezera njira zakuthimizira mabasa athu nkati mwa nthanda ya Murope, Bwinja, na Gonkho.

2. Kodi ndi njira ipi yadidi kakamwe toera kuthimizira utumiki wathu?

² Basa ya Upainiya Wakuphedza: Njira ibodzi yadidi kakamwe toera kuthimizira mabasa athu ndi kutumikira ninga mpainiya wakuphedza. Nakuti tonsene tiri na mabasa mazinji, pyenepi pisaphemba kucita masasanyiro mwanyapantsi na kucita macinjo a ndandanda wathu. (Mis. 21:5) Panango munakwanisa kucinja mabasa anango akukhonda kufunika kakamwe mu pyakucita pyanu pya ntsiku na ntsiku. (Afil. 1:9-11) Thangwi yanji nkhabe kulonga cifuno canu cakukhala mpainiya kuna anango m’mpingo toera kuona khala asafunambo kutumikira ninga mpainiya wakuphedza?

3. Kodi mabanja anakwanisa kucita masasanyiro api toera kuthimizira utumiki?

³ Nkati mwa Kulambira kwanu Kwa Banja namaulo kunafuna kudza, pinadzakhala pyadidi kulonga pifuno pyanu na anango pa banja. (Mis. 15:22) Mwakubverana, panango anthu angasi pa banja anakwanisa kutumikira ninga mpainiya wakuphedza pa nthanda ibodzi peno zizinji. Ndiye tani khala imwe mwaona kuti nkhabe kwanisa kutumikira ninga mpainiya wakuphedza? Banja inakwanisa kupitiriza kucita masasanyiro toera kuthimizira mabasa awo mu kucita khundu mu utumiki namasiku peno mukuphatisira ndzidzi uzinji mu utumiki pa kumala kwa sumana.

4. Kodi tinadzakhala na nkhombo zipi tingathimizira mabasa athu mu utumiki mu ndzidzi wa Cikumbuso ca caka cino?

⁴ Yahova asaona pyonsene pinacita ife toera kuntumikira pontho iye asakomerwa na kuwangisira kwathu. (Aheb. 6:10) Kukomerwa kusabwera tingapasa Yahova na anango. (1 Pya dziko. 29:9; Mach. 20:35) Kodi munakwanisa kuthimizira mabasa anu mu ndzidzi wa Cikumbuso ca caka cino na kukolola kutsanzaya kwakuthimizirika pontho na nkhombo zace?