Njira Za Maperekero Aumboni

Toera Kutomesa Mapfundziro a Bhibhlya pa Sabudu Yakutoma mu Nthanda ya Madzalo

“Musanyerezera kuti Mulungu ali na gulu lero, peno musanyerezera kuti iye asatsalakana kwene anthu basi? [Dikhirani ntawiro.] Onani pinalongwa apa thangwi ya anthu akuti Mulungu aaikha mu gulu mu pyaka pya nduli kakamwe.” Fungulani tsamba 16 ya A Sentinela ya 1.° de Fevereiro, dingani pabodzi mphangwa zinagumanika mu ndima yakutoma ya nsolo ung’ono wakutoma na lerini lemba ibodzi mwa malemba anagumanika mu ndima. Perekani marevista, pontho citani masasanyiro akubwerera toera kudinga mbvundzo unatowerera.

A Sentinela de 1.° de Fevereiro

“Harmagedoni ndi nkhani inadingwa kazinji kene mu pyaka pya cincino. Musanyerezera kuti pana cinthu cakuti anthu anakwanisa kucicita toera Harmagedoni ikhonde kucitika? [Dikhirani ntawiro] Apa ndi padabuluswa fala yakuti ‘Harmagedoni’. [Lerini Apokalipse 16:16. Buluka penepo pangizani tsamba yakutoma ya revista.] Revista iyi isapereka ntawiro wa m’Bhibhlya wa mibvundzo ineyi.”

Despertai! de Fevereiro

Cincino, anthu azinji asakomerwa kupita n’cibverano mu kuphatisira Interneti. Musanyerezera kuti ntundu unoyu wakupita nawo n’cibverano uli na ngozwi? [Dikhirani ntawiro.] Bhibhlya iri na midida yakuti inakwanisa kutsidzikiza kupita kwathu n’cibverano mu kuphatisira Interneti. [Fungulani matsamba 6-9, pontho dingani ubodzi mwa mibvundzo na lerini lemba ibodzi mwa ale adaikhwa.] Revista iyi inadzakuphedzani toera kudzindikira na kucalira ngozwi za kupita n’cibverano mu kuphatisira Interneti.”