Mwazani Mphangwa Kwa “Anthu Onsene”
1. Amwazi mphangwa akuphindulisa alandana tani na anthu a luso yakusema miti?
1 Munthu wa luso yakusema miti asakhala na maferamentu mazinji, mbwenye iye asadziwa ndi ndzidzi upi wakuthema toera kuphatisira feramentu ibodzi na ibodzi pontho kuti anaphatisira tani. Mu njira ibodzi ene, ife tiri na maferamentu akusiyana-siyana toera kutiphedza kukwanirisa basa yathu ninga amwazi mphangwa. Mwacitsandzo, mabruxura a misolo yakusiyana-siyana asacitwa toera kutiphedza kumwaza mphangwa kwa “anthu onsene.” (1 Akor. 9:22) N’thimiziro wa utumiki uno uli na ndandanda wa mabruxura mangasi anewa, usafokotoza kuti mabruxura anewa acitirwa ani, pontho usapangiza kuti anagawirwa tani.
2. Ndi ndzidzi upi usafunika ife kuphatisira mabruxura mu utumiki?
2 Ndi ndzidzi Upi Usafunika Ife Kuphatisira Mabruxura: Munthu wa luso yakusema miti asaphatisira feramentu ndzidzi onsene unakhala iyo yakuphindulisa. Mu njira ibodzi ene, tinakwanisa kugawira bruxura pa ndzidzi onsene unaona ife kuti munthu anakwanisa kuphindula nayo, tayu basi ene mu nthanda inagawirwa mabruxura. Mwacitsandzo, khala bukhu inafuna kugawirwa ndi Biblya Isapfunzisanji, pontho khala tikumwaza mphangwa mu cisa ca anthu akuti nee ndi Akristu, pontho ali na cifuno cakucepa ca m’Bhibhlya, pinakhala pyakuphindulisa kugawira pakutoma bruxura yakuthema, buluka penepo kupangiza Biblya Isapfunzisanji pakumala kucitisa munthu kukhala na cifuno.
3. Thangwi yanji tisafunika kukhala na luso yakuphatisira maferamentu athu autumiki?
3 Bhibhlya isasimba kakamwe anthu akuti ndi aluso m’basa yawo. (Mis. 22:29) Mwandimomwene, nkhabepo basa yakufunika kakamwe lero kupiringana ‘basa yakucena yakupfundzisa mphangwa zadidi.’ (Arom. 15:16) Toera kukhala “munthu wakulemedzeka, wakukhonda kwata manyadzo,” tinadzawangisira toera kukhala na luso yakuphatisira maferamentu athu.—2 Tim. 2:15.