Phedzani Anthu Toera Kubvera Mulungu
1. Ndi mabruxura api adabuluswa pa Nsonkhano wa Gawo “Umambo wa Mulungu Mbudze!”, pontho ninji cinacitisa maferamentu anewa kukhala akuphindulisa kakamwe?
1 Pa Nsonkhano wa Gawo wakuti “Umambo Wa Mulungu Mbudze!”, kwabuluswa mabruxura mawiri, Bverani Mulungu toera Mukhale Kwenda na Kwenda na bruxura yakusowa mafala mazinji yakuti, Bverani Mulungu. Nakuti mabruxura anewa nee ali na mafala mazinji, iwo anakwaniswa kuthumburuzwa mwakucimbiza na mwakukhonda nentsa. Mwandimomwene, bruxura Bverani Mulungu toera Mukhale Kwenda na Kwenda pidamala iyo kubuluswa n’Cingerezi, yatawiriswa toera kuthumburuzwa mu pilongero pyakukwana 431.
2. Mbani anafuna kudzaphindula na mabruxura anewa?
2 Makamaka mbani anafuna kudzaphindula na mabruxura anewa? Tendeni tidinge pinacitika kazinji kene kuzungulira dziko yonsene yapantsi:
• M’mwazi mphangwa asacedza na mwanaciro nyumba, ngakhale pa ulendo wakutoma peno pa ulendo wakubwereza, asadzindikira kuti mwanaciro nyumba nkhabe kwanisa kuleri peno nee asaleri mwadidi.
• M’mwazi mphangwa akumwaza mphangwa kwa anthu analonga cilongero cakuti tiri na mabukhu akucepa adathumburuzwa peno nkhabe bukhu idathumburuzwa. Peno anthu azinji mu cisa nkhabe kwanisa kuleri mu cilongero cinalonga iwo mwakusudzuka.
• M’mwazi mphangwa asaphatisira cilongero cakulonga na manja toera kumwaza mphangwa mu cisa cace kwa anthu akuti nkhabe kubva.
• Nyakubala asafuna kupfundzisa undimomwene mwanace wang’ono wakuti adzati kwanisa kuleri.
3. Kodi bruxura Bverani Mulungu yakhala tani?
3 Mabruxura Anewa Akhala Tani: Bruxura Bverani Mulungu iri na mafala akucepa—kazinji kene nzera ubodzi wa mafala pabodzi na Lemba pantsi pa tsamba ibodzi na ibodzi yakuti isafokotoza ntsonga zikulu. Thangwi yanji? Nyerezerani kuti munthu akupasani bruxura yakuti yalembwa mu cilongero cinakhonda imwe dziwa kuleri, panango yalembwa na maletra akuti imwe nkhabe kuadziwa. Mbidakhala yakutsandzayisa kwa imwe, ngakhale kuti panango iri na pithundzithundzi pyakubalika kakamwe? Panango nkhabe. Mu njira ibodzi ene, anthu akuti nkhabe kwanisa kuleri kazinji kene asadzudzumika na mabukhu akuti ali na mafala mazinji. Na thangwi ineyi, pithundzithundzi pya pa tsamba ibodzi na ibodzi pyakhunganywa mu njira yadidi kakamwe, na cifuno cakutsogolera makani pa kufokotoza cithundzithundzi cibodzi na cibodzi.
4. Kodi bruxura Bverani Mulungu toera Mukhale Kwenda na Kwenda yakhala tani?
4 Bruxura Bverani Mulungu toera Mukhale Kwenda na Kwenda iri na pithundzithundzi pibodzi pyene na bruxura Bverani Mulungu. Yacitwa toera kupfundza na anthu akuti luso yawo yakuleri ndi yakucepa peno akupfundza kuleri. Bruxura ineyi inakwaniswambo kuphatisirwa ninga ciphedzo pakupfundza na munthu wakuti asapfundza bruxura Bverani Mulungu. Padzulu pa tsamba ya nkono wabzwere ya nsolo ubodzi na ubodzi wa matsamba mawiri pasagumanika mbvundzo wakuti usatawirwa nkati mwa matsamba mawiri anewa. Mu bruxura musagumanikambo pithundzithundzi, mafala, pabodzi na malemba. Duzi na pantsi pa matsamba mazinji pasagumanika bokosi yakuti iri na mafala na ntsonga zakuthimizirika na Malemba a Bhibhlya akuti anakwaniswa kudingwa, mwakubverana na luso ya nyakupfundza.
5. Ndi mu ndzidzi upi, pontho tinagawira tani mabruxura anewa?
5 Tinaaphatisira Tani: Munakwanisa kugawira mabruxura anewa mu utumiki wa nyumba na nyumba mungaona kuti ndi kwakuphindulisa kucita pyenepi ngakhale kuti nee tikugawira mabruxura anewa mu nthanda ineyi. (Onani bokosi “Anagawirwa Tani.”) Munakwanisa kupangiza bruxura pakucita ulendo wakubwereza mu kupanga munthu adapangiza cifuno kuti muli na cinthu cinafuna imwe kumpangiza, buluka penepo ntambizeni bruxura.
6. Tinadzacitisa tani pfundziro ya Bhibhlya mu kuphatisira mabruxura anewa?
6 Nakuti bruxura Bverani Mulungu nee iri na mibvundzo, kudinga bruxura ineyi nee kunadzakhala kwa mibvundzo na matawiro ninga pinacita imwe pakucitisa pfundziro m’bukhu Biblya Isapfunzisanji. Anthu a makhaliro akusiyana-siyana asakomerwa kubva mbiri ya pyakucitika. Natenepa phatisirani pithundzithundzi toera kulonga mbiri ya pyakucitika pyakupumirwa pidalembwa m’Bhibhlya. Fokotozani kuti ninji pinapangizwa mu pithundzithundzi. Khalani wakugalamuka. Phembani nyakupfundza Bhibhlya toera akupangeni pinaona iye na pinanyerezera iye. Lerini malemba anagumanika pantsi pa tsamba, nyerezerani mwacidikhodikho na iye thangwi ya pinalonga malemba anewa. Citani mibvundzo toera iye acite khundu m’makani anu, pontho toera kuonesesa kuti akubvesesa. Khala iye akuphatisira bruxura Bverani Mulungu toera Mukhale Kwenda na Kwenda, lerini pabodzi mafala na malemba pakudinga cithundzithundzi cibodzi na cibodzi.
7. Tinaphedza tani nyakupfundza Bhibhlya toera kuenda kutsogolo?
7 Phedzani Nyakupfundza Toera Kuenda Kutsogolo: Tisadikhira kuti makani anu anadzacitisa nyakupfundza Bhibhlya kukhala na cifuno cakufuna kupfundza kuleri toera mwa iye ekha akwanise kudziwa Yahova. (Mat. 5:3; Jwau 17:3) Mbwenye khala mukuphatisira bruxura Bverani Mulungu, mu kupita kwa ndzidzi panango munakwanisa kuperekeka toera kumpfundzisa kuti anakwanisa tani kuleri, buluka penepo munakwanisa kucinja pfundziro toera kuphatisira bruxura Bverani Mulungu toera Mukhale Kwenda na Kwenda. Mwakukhonda tsalakana bruxura inaphatisira imwe, nyakupfundza Bhibhlya nee anadzakhala wakuthema toera kubatizwa pakumala kupfundza naye bruxura ineyi. Musafunika kucinja pfundziro toera kupfundza bukhu Biblya Isapfunzisanji peno bukhu inango yakuthema yakuti inadzamphedza kubvesesa mwadidi Bhibhlya.
8. Thangwi yanji musapereka takhuta kakamwe thangwi ya maferamentu anewa mapswa toera kuaphatisira mu utumiki?
8 Anthu asafunika abvesere Ntongi Wankulu wakudzulu na pantsi khala asafuna kukhala maso kwenda na kwenda. (Iza. 55:3) Cifuno ca Yahova ndi cakuti “anthu onsene,” kuphatanizambo ale akuti nkhabe kwanisa kuleri, apfundze kuti anabvera tani Mulungu. (1 Tim. 2:3, 4) Tisapereka takhuta kakamwe thangwi ya maferamentu anewa mapswa akuti tinakwanisa kuaphatisira toera kupfundzisa anthu kuti anabvera tani Mulungu!
[Ntsonga ikulu pa tsamba 3]
Anagawirwa Tani
Pangizani mwanaciro nyumba matsamba 2-3, buluka penepo longani: “Musafuna kukhala mu dziko ninga inapangizwa apa? [Dikhirani ntawiro.] Malemba asapikira [peno, bukhu iyi yakucena isapikira] kuti mwakukhonda dembuka Mulungu anadzacitisa dziko yapantsi kukhala mbuto yakubalika, yantendere yakuti nee munthu m’bodzi anadzakhala wakutcerenga peno wakubva kupha. Onani kuti tisafunika kucitanji toera kukhala mu dziko ineyi. [Lerini Izaiya 55:3, yakuti isagumanika padzulu pa tsamba 3.] Lemba ineyi isatiphemba toera ‘kwenda’ kuna Mulungu na ‘kubvesera’ iye. Mphapo tinabvesera tani Mulungu?” Fungulani tsamba 4-5, na dingani ntawiro pabodzi na iye. Khala mwanaciro nyumba nee ali na ndzidzi, nsiyireni bruxura, na citani masasanyiro akubwerera toera kudinga ntawiro.