Tinaphatisira Tani Bruxura Mphangwa Zadidi Za Mulungu!
Bruxura ipswa Yacitwa Toera Kutiphedza Kucita Maulendo Akubwereza Na Kutomesa Mapfundziro A Bhibhlya
1. Ndi bruxura ipi ipswa idabuluswa pa Nsonkhano wa Gawo wakuti “Tsidzikizani Ntima Wanu!” idacitwa toera kutiphedza kucita maulendo akubwereza na kutomesa mapfundziro a Bhibhlya?
1 Nkati mwa Nsonkhano wa Gawo wakuti “Tsidzikizani Ntima Wanu!” tatsandzaya kutambira bruxura ipswa toera kutiphedza kucita maulendo akubwereza na kutomesa mapfundziro a Bhibhlya. Bruxura Mphangwa Zadidi Za Mulungu! ndi yakulandana na bruxura Mulungu Alikuphembanji, yakuti yapitirwa mbuto na bruxura Mphangwa Zadidi, iyo iri na misolo yacigwagwa. Pyenepi pinadzatiphedza toera kuiphatisira mwadidi pakutomesa mapfundziro a Bhibhlya. Ngakhale kuti bruxura Mulungu Alikuphembanji ikhafokotoza pinthu pinafunika kucita Akristu, pyakuti mbipidanentsa kuti anyakupfundza apswa apitawire, bruxura iyi ipswa isafokotoza pya mphangwa zadidi zinagumanika m’Bhibhlya.—Mach. 15:35.
2. Thangwi yanji yacitwa bruxura Mphangwa Zadidi?
2 Thangwi yanji yacitwa? Kuzungulira dziko yonsene abale akhaphemba feramentu inango yakukhonda nentsa, yakuti mbidatundusa anthu ku undimomwene na kuatsogolera ku bukhu Biblya Isapfunzisanji, feramentu yathu yakutoma toera kupfundzisa Bhibhlya. Anthu akuti anadzumatirwa na bukhu kazinji kene anadzafuna kupfundza Bhibhlya mu kuphatisira bruxura. Mwakuthimizira, bruxura iyi yathumburuzwa mwakukhonda nentsa mu pilongero pizinji.
3. Kodi bruxura iyi yasiyana tani na mabukhu anango a pfundziro?
3 Yakhala Tani: Mabukhu athu mazinji a pfundziro asalembwa mu njira yakuti munthu anakwanisa kuileri mbabvesesa undimomwene, ngakhale mwakusowa ciphedzo. Bruxura iyi ndi yakusiyana. Yalembwa toera mpfundzisi aiphatisire ninga citsogolero pakucitisa pfundziro ya Bhibhlya. Natenepa, pakuigawira kuna munthu, mphyadidi kudinga ndima ibodzi peno ziwiri. Ndima ndi zakubvira, natenepa munakwanisa kuzidinga pa nsuwo wa mwanaciro nyumba peno pa mbuto yace ya malonda. Ngakhale kuti mphyadidi kutoma na nsolo 1, tinakwanisa kutomesa pfundziro mu kuphatisira nsolo onsene m’bruxura.
4. Kodi bruxura iyi isatiphedza tani toera kupfundzisa kubulukira m’Bhibhlya?
4 M’mabukhu athu mazinji, matawiro a mibvundzo asagumanika mu ndima. Mbwenye m’bruxura iyi, kazinji kene matawiro asagumanika m’Bhibhlya. Anthu azinji asafuna kupfundza Bhibhlya mbuto mwa kupfundza mabukhu athu. Natenepa, malemba mazinji adaikhwa nkhabe mafala. Iwo asafunika kulerwi m’Bhibhlya. Pyenepi pisaphedza anyakupfundza kuona kuti pinapfundza iwo pisabuluka kwa Mulungu.—Iza. 54:13.
5. Thangwi yanji mphyadidi kuti mpfundzisi akhunganyike mwadidi toera kucitisa pfundziro ibodzi na ibodzi?
5 Bruxura nkhabe kufokotoza malemba onsene. Thangwi yanji? Yacitwa toera kuwangisa nyakupfundza toera kucita mibvundzo, pontho toera kuphedza mpfundzisi kuphatisira luso yace yakupfundzisa. Natenepa, mphyadidi kukhunganyika mwadidi toera kucitisa pfundziro ibodzi na ibodzi. Cenjezo: Lekani kulonga maningi. Tisakomerwa kufokotoza Malemba. Mbwenye kazinji kene tisaphedza kakamwe nyakupfundza tingamphemba toera afokotoze kubvesesa kwace lemba. Tingaphatisira mibvundzo mwaluso, tinakwanisa kumphedza toera kunyerezera mwacidikhodikho mabvekero a lemba ibodzi na ibodzi.—Mach. 17:2, 3.
6. Tinaphatisira tani bruxura iyi: (a) mu pisa pyakuti anthu asapenula Mulungu na Bhibhlya? (b) mu utumiki wa nyumba na nyumba? (c) pakucita mbvundzo toera kutomesa mapfundziro a Bhibhlya? (d) pakucita maulendo akubwereza?
6 Ninga mabukhu anango akucitisa nawo mapfundziro, bruxura iyi inakwaniswa kugawirwa pa ndzidzi onsene, mwakukhonda tsalakana mabukhu anagawirwa pa nthanda. Azinji anadzakomerwa kuiphatisira pakucita mbvundzo toera kutomesa pfundziro panyumba ya munthu. Mwakuthimizira, ninga pidalongwa pa nsonkhano wa gawo, tingaphatisira bruxura iyi pakucita ulendo wakubwereza kwa anthu adapangiza cifuno “mwandimomwene inacitisa ulendo wakubwereza kukhala wakutsandzayisa kakamwe!”—Onani mabokosi pa matsamba 5-7.
7. Munacitisa tani pfundziro ya Bhibhlya mu kuphatisira bruxura iyi?
7 Tinacitisa Tani Pfundziro: Tinakwanisa kutoma kucedza mu kucita mbvundzo wa malemba akupswipirira. Mungamala, lerini ndima na lemba peno malemba akupendamiswa. Mwaluso citani mibvundzo toera kuphedza mwanaciro nyumba kuti abvesese mabvekero a malemba. Buluka penepo, mbamudzati kudinga khundu inango, bvundzani mwanaciro nyumba toera kutawira mbvundzo wa malemba akupswipirira toera kuona khala abvesesa mwadidi. Pa maulendo mangasi akutoma, mphyadidi kudinga mbvundzo ubodzi basi wa malemba akupswipirira. Mu kupita kwa ndzidzi, tinakwanisa kuthimizira ndzidzi toera kudinga nsolo wonsene.
8. Tinalonga tani tingafuna kuleri malemba, pontho thangwi yanji?
8 Lemba idaphembwa kuti “lerini” makamaka ndiyo inatawira mbvundzo wa malemba akupswipirira. Mungafuna kuleri lemba, mphyadidi kucalira kulonga mafala ninga, “Mpostolo Paulu alonga” peno, “Onani profesiya ya Yeremiya.” Mwanaciro nyumba panango ananyerezera kuti tikuleri mafala a anthu. Mphyadidi kulonga, “Onani pinalonga Mafala a Mulungu” peno, “Onani pinalonga Bhibhlya.”
9. Kodi malemba onsene asafunika kulerwi pakucitisa pfundziro?
9 Tisafunika kuleri malemba onsene peno basi ene malemba adaphembwa kuti “lerini”? Pyenepi pinadzanyindira makhaliro. Malemba onsene aikhwa thangwi ndi akufunika. Lemba ibodzi na ibodzi iri na mphangwa zakuthema toera kudinga. Mbwenye m’midzidzi inango, nakuti nyakupfundza nkhabe ndzidzi, cifuno, peno nkhabe kwanisa kuleri mwadidi pinaticitisa kudinga basi ene malemba adaphembwa kuti “lerini.”
10. Ndi ndzidzi upi unafunika ife kucinja pfundziro toera kuphatisira bukhu Biblya Isapfunzisanji?
10 Pakucinja Toera Kuphatisira Bukhu Biblya Isapfunzisanji: Tingamala kucedza m’maulendo mazinji, pontho tingapfundza mwakukhonda phonya, tinakwanisa kucinja toera kupfundza bukhu Biblya Isapfunzisanji peno kupitiriza na bruxura Mphangwa Zadidi mpaka kumalisa bruxura. Amwazi mphangwa anakwanisa kuphatisira ndzeru zawo pakufuna kucinja. Mphapo tingacinja toera kuphatisira bukhu Biblya Isapfunzisanji, tisafunika kutoma na nsolo wakutoma? Nkhabe mwambo unalonga pyenepi. Anthu ndi akusiyana. Natenepa, anyakupfundza azinji anadzaphindula angadinga pontho mphangwa zibodzi zene m’bukhu Biblya Isapfunzisanji.
11. Thangwi yanji tisafunika kuphatisira mwadidi bruxura iyi ipswa?
11 Mu dziko yakuti mphangwa zadidi ndi zakucepa, tiri na mwai ukulu wakumwaza mphangwa zadidi kakamwe—zakuti Umambo wa Mulungu ukutonga, pontho kuti mwakukhonda dembuka unadzabweresa dziko ipswa yakuti munadzakhala ulungami! (Mat. 24:14; 2 Ped. 3:13) Tisanyindira kuti azinji anabva mphangwa zenezi anadzalonga mafala awa akupumirwa: “Mphyakukomadi kuona mwanankati wakubuluka ku mapiri mbadza na mphangwa zadidi, mphangwa za ntendere! Anabvekesa pyakukunda, mbalonga kuli Sioni: ‘Mulungu wako ndi mambo!’” (Iza. 52:7) Tendeni tiphatisire bruxura ipswa iyi toera kupereka mphangwa zadidi za Mulungu kwa anthu ana nyota mu cisa cathu!
[Bokosi pa tsamba 5]
Mu Pisa Pyakuti Anthu Asapenula Mulungu na Bhibhlya:
● M’mbuto zinango, amwazi mphangwa asaona kuti mafala ninga “Mulungu” na “Bhibhlya” asaacitisa kugwandirwa mafala. M’mbuto zenezi, paulendo wakutoma, mphyadidi kudinga pinthu pinadzudzumisa anthu mu cisa canu, ninga kufunika kwa utongi wadidi, tinagumana kupi ciphedzo toera kutsalakana banja, peno ninji pinadikhira ife ntsogolo. Panango tinakwanisa kupangiza bruxura Mphangwa Zadidi pakumala kucedza m’maulendo mazinji mbatikadinga kuti tisadziwa tani kuti Mulungu alipo, pontho thangwi yanji Bhibhlya ndi yakunyindirika.
[Bokosi pa tsamba 6]
Pakuenda Nyumba na Nyumba:
● “Ndisafuna kukupangizani kuti nkhabe nentsa kudziwa pidapikira Mulungu kwa anthu ntsogolo. Mwabvundzika kale khala Mulungu anadzamalisa nyatwa zathu? [Dikhirani ntawiro.] Bruxura iyi isapangiza kuti munagumana kupi ntawiro wa mbvundzo unoyu m’Bhibhlya. [Mpaseni bruxura, lerini ndima yakutoma ya nsolo 1, pontho lerini Yeremiya 29:11.] Mwakubverana na lemba iyi, musatawira kuti Mulungu asafuna tikhale na tsogolo yadidi? [Dikhirani ntawiro.] Mungafuna, salani na bruxura iyi, paulendo unango tinadzadinga ndima yaciwiri toera kugumana ntawiro wa Bhibhlya ku mbvundzo uyu, ‘Kodi Mulungu anadzasudzula tani anthu ku mathangwi anacitisa nyatwa?’” Khala mwanaciro nyumba asaoneka kuti ali na ndzidzi paulendo wakutoma, munakwanisa kuleri na kudinga ndima yaciwiri na Malemba matatu. Citani masasanyiro akubwerera toera kudinga mbvundzo waciwiri wa nsolo unoyu.
● “Anthu azinji asacita phembero, makamaka angagwerwa na nyatwa. Musacita phembero m’midzidzi inango? [Dikhirani ntawiro.] Musanyerezera kuti Mulungu asabvesera maphembero onsene, peno kuti maphembero anango nee asakomerwa nawo? [Dikhirani ntawiro.] Ndiri na bruxura iyi inapangiza kuti tinagumana tani ntawiro wa Bhibhlya ku mibvundzo ineyi. [Mpaseni bruxura, dingani pabodzi ndima yakutoma ya nsolo 12, pontho lerini malemba adaphembwa kuti “lerini.”] Nee ndi pyakutsandzayisa kudziwa kuti Mulungu asafuna kakamwe kubvesera maphembero athu? Mbwenye toera kuphindula mwakukwana na phembero, tisafunika kudziwa mwadidi Mulungu. [Fungulani nsolo 2, mpangizeni misolo ming’ono.] Khala musafuna, ndinakusiyirani bruxura iyi, paulendo unango tinadzadinga matawiro a Bhibhlya ku mibvundzo ineyi.”
● “Anthu azinji asabvundza kuti ninji pinafuna kucitika na dziko ino. Musanyerezera kuti makhaliro anadzakhala adidi? [Dikhirani ntawiro.] Anthu azinji asadzuma angapfundza kuti Bhibhlya iri na mphangwa zadidi zakuti zisatipasa cidikhiro. Iyi ndi mibvundzo mingasi yakuti isatawirwa m’Bhibhlya.” Mpaseni bruxura, mphembeni toera asankhule mbvundzo ubodzi pa tsamba yakumalisa wakuti asafunisisa kudziwa ntawiro wace. Buluka penepo fungulani nsolo unoyu, pontho pangizani pfundziro. Citani masasanyiro akubwerera toera kudinga mbvundzo unango wa nsolo unoyu.
[Bokosi pa tsamba 7]
Yeserani Kubvundzisa:
● “Ndabwera pano toera kukupangizani macitiro mapswa a pfundziro ya Bhibhlya. Bruxura iyi iri na misolo 15 yakuti isapangiza kuti munagumana kupi matawiro a mibvundzo yakufunika m’Bhibhlya yanu. [Mpangizeni tsamba yakutoma na yakumalisa.] Mwatoma kale kuyesera kubvesesa Bhibhlya? [Dikhirani ntawiro.] Ndisafuna kukupangizani kuti misolo ya bruxura iyi ndi yakukhonda nentsa kakamwe. [Dingani ndima yakutoma ya mbvundzo 3 pa nsolo 3, pontho lerini Apokalipse 21:4, 5. Khala ndi kwakuthema, dingani ndima inatowerera na malemba adaphembwa kuti “lerini”.] Mungafuna, ndinakusiyirani bruxura iyi. Tisakuphembani kuti muyesere kupfundza Bhibhlya kabodzi mu kuphatisira njira ipswa ineyi. Mungakomerwa nayo, munakwanisa kupitiriza. Paulendo unango, tinadzadinga nsolo wakutoma. Onani kuti ndi tsamba ibodzi basi.”
[Bokosi pa tsamba 7]
Pangizani Bruxura Paulendo Wakubwereza:
● Paulendo wakubwereza toera kacedza na munthu adapangiza cifuno, tinakwanisa kulonga: “Mphyakutsandzayisa kukugumanani pontho. Ndakubwereserani bruxura iyi yakuti isatawira mibvundzo mizinji yakufunika kubulukira m’Bhibhlya. [Mpaseni bruxura, mphembeni toera kuona tsamba yakumalisa.] Ndi mbvundzo upi unafunisisa imwe kudziwa ntawiro wace? [Dikhirani ntawiro. Buluka penepo, fungulani nsolo udasankhula iye.] Ndisafuna kukupangizani kuti tinaphatisira tani bruxura iyi toera kugumana ntawiro wa Bhibhlya.” Pangizani pfundziro mu kudinga ndima ibodzi peno ziwiri na kuleri malemba adaphembwa kuti “lerini”. Kutomesa pfundziro ya Bhibhlya ndi kwakukhonda nentsa kakamwe! Siyani bruxura na mwanaciro nyumba, na citani masasanyiro toera kubwerera. Mungamala kupfundza nsolo unoyu, munakwanisa kudinga nsolo unango udasankhula mwanaciro nyumba peno tomani na nsolo wakutoma wa bruxura.