Tinaphatisira Tani Bruxura Mbani Anacita Cifuno Ca Yahova Lero?
Bruxura Ipswa Yacitwa Toera Kutsogolera Anyakupfundza Bhibhlya Ku Gulu Yathu
1. Longani mathangwi matatu adacitirwa bruxura Cifuno ca Yahova.
1 Kodi mwatoma kuphatisira bruxura ipswa Mbani Anacita Cifuno Ca Yahova Lero? Cifuniro ca bruxura ndi (1) toera kuphedza anyakupfundza kutidziwa mwadidi ninga mbumba, (2) toera kuaphedza kudziwa mabasa athu, na (3) toera kuapangiza maphatiro a gulu yathu. Bruxura Cifuno ca Yahova yakuti tsamba ibodzi ndi nsolo ubodzi, tinakwanisa kuiphatisira m’mphindi zixanu mpaka khumi pakumala kucitisa pfundziro ya Bhibhlya ibodzi na ibodzi.
2. Longani makhaliro na pyankati mwa bruxura iyi.
2 Yakhala Tani: Bruxura ineyi yagawiwa m’makhundu matatu, khundu ibodzi na ibodzi isalonga pinthu pyakusiyana pya gulu ya Yahova ninga pidapangizwa padzulu. Nsolo ubodzi na ubodzi mwa misolo 28 yalembwa ninga mbvundzo, pontho misolo ming’ono ya malemba akupswipirira isatawira mbvundzo unoyu. Iri na mafoto a anthu a madziko akupiringana 50 toera kupangiza kukula kwa basa yathu pa dziko yonsene. Misolo mizinji iri na mabokosi “Dziwani Pinango” akuti ali na maonero toera muwangise nyakupfundza wanu kuaphatisira.
3. Tinaphatisira tani bruxura Cifuno ca Yahova?
3 Munaiphatisira Tani: Tomani na kuapangiza mbvundzo wakuti ndi nsolo wa pfundziro. Buluka penepo, lerini pabodzi nsolo, gomezerani misolo ming’ono ya malemba akupswipirira. Pakumalisa, dingani mibvundzo yakubwerezera inagumanika pantsi pa tsamba. Munakwanisa kuleri nsolo onsene peno kuleri na kufokotoza khundu ibodzi na ibodzi. Phatisirani ndzeru zanu toera kuona kuti ndi malemba api anagumanika mu ndima anafuna imwe kuleri. Lekani kuduwala kudinga mafoto na mabokosi “Dziwani Pinango.” Kazinji kene, mphyadidi kutoma kudinga nsolo wakutoma kuenda kutsogolo. Mbwenye, khalani wakusudzuka kunumpha toera kudinga nsolo wakubverana na pinthu pinafunika. Mwacitsandzo, khala nsonkhano wa cisa, wakupambulika peno wa gawo uli cifupi, munakwanisa kunumpha toera kudinga nsolo 11.
4. Thangwi yanji muli akutsandzaya kukhala na bruxura iyi ipswa?
4 Tingapfundza Bhibhlya na munthu, tisamphedza toera kudziwa Babathu wakudzulu. Mbwenye, tisafunikambo kumpfundzisa thangwi ya gulu ya Yahova. (Mis. 6:20) Tiri akutsandzaya tani kukhala na bruxura iyi ipswa yakuti inatiphedza kucita pyenepi mwakukhonda nentsa!