Pfundzisani Mukuphatisira Bruxura Mphangwa Zadidi
1. Thangwi yanji yacitwa bruxura Mphangwa Zadidi?
1 Ninga pidadingwa mu Utumiki Wathu wa Umambo wa Maluwa, feramentu yathu ibodzi yakufunika toera kupfundzisa ndi bruxura Mphangwa Zadidi Za Mulungu! Malemba anagumanika mu ndima nee aikhwa mafalace, natenepa mwanaciro nyumba anatsandzaya kualeri bulukira m’Bhibhlya. Maseze mabukhu athu a pfundziro asalembwa munjira yakuti nyakuleri anakwanisa kuapfundza ekha, bruxura iyi yacitwa toera kudingwa pabodzi na mpfundzisi. Natenepa, tingaigawira tisafunika kupangiza kuti pfundziro isacitwa tani toera mwanaciro nyumba aone kuti ndi kwakutsandzayisa kupfundza mphangwa zadidi za m’Bhibhlya.—Mat. 13:44.
2. Tinaphatisira tani bruxura Mphangwa Zadidi paulendo wakutoma?
2 Paulendo Wakutoma: Yeserani kulonga: “Ndiri pano thangwi azinji asadzudzumika na tsogolo ya anthu. Musaona kuti makhaliro anadzacinja? [Dikhirani ntawiro.] Bhibhlya iri na mphangwa zadidi zakuti zisatipasa cidikhiro. Iyo isatawira mibvundzo ninga iyi.” Pasani bruxura mwanaciro nyumba, na m’phembeni toera asankhule mbvundzo unagumanika pa tsamba yakumalisa. Buluka penepo pangizani pfundziro mukuphatisira ndima yakutoma ya mbvundzo udasankhula iye. Njira inango ndi kusankhula mbvundzo unaona imwe kuti unacitisa mwanaciro nyumba kukhala na cifuno, buluka penepo mpangizeni kuti bruxura inam’phedza tani kugumana ntawiro wa Bhibhlya. Khala pyenepi pisabveranana na vidyu inagumanika mu jw.org, amwazi mphangwa anango asapangiza vidyu ineyi pakumwaza mphangwa.
3. Fokotozani kuti tinacitisa tani pfundziro mukuphatisira bruxura Mphangwa Zadidi.
3 Tinacitisa Tani Pfundziro: (1) Lerini mbvundzo wakuti uli na numero wa mafala akupswipirira toera kuphedza mwanaciro nyumba kubvesesa ntsonga yakufunika. (2) Lerini ndima inatowera mbvundzo. (3) Lerini malemba akupendamiswa, pontho citani mibvundzo mwaluso toera kuphedza mwanaciro nyumba kuona kuti malemba asatawira tani mbvundzo wa ndima. (4) Khala mbvundzo ubodzi uli na ndima zizinji, bwerezerani njira 2 na 3. Khala vidyu isabverana na mbvundzo, pontho khala mudzati kupangiza mwanayiro nyumba, citani pyenepi pa ndzidzi unacedza imwe. (5) Pakumalisira, phembani mwanaciro nyumba kuti atawire mbvundzo wa malemba akupswipirira toera kuona khala abvesesa mwadidi.
4. Ninji cinafuna kutiphedza toera kuphatisira mwaluso feramentu ineyi?
4 Idziweni mwadidi feramentu ineyi yakufunika. Iphatisireni m’midzidzi yonsene yakuthema. Mbamudzati kutoma pfundziro, nyerezerani pya nyakupfundza na njira yadidi toera kupfundza naye, mukuphatisira malemba anagumanika mu nsolo. (Mis. 15:28; Mach. 17:2, 3) Mu ndzidzi unapfundza imwe kuphatisira mwadidi bruxura ineyi pakupfundzisa, munadzaifuna kakamwe toera kupfundzisa anthu undimomwene!