Koyani
Kodi Musaphatisira Mabruxura Awa?
A Bíblia — Qual É a sua Mensagem?
Yacitwa toera kutundusa anthu akuti ali na cidziwiso cakucepa ca Bhibhlya, makamaka ale akuti nee ali mu uphemberi Wacikristu
Tinaigawira tani: “Tisafuna kudziwa maonero anu thangwi ya pidalembwa m’Malemba (peno m’bukhu yakucena). [Lerini Masalmo 37:11, inagumanika pa khundu 11.] Musanyerezera kuti dziko yapantsi inadzakhala tani profesiya iyi ingakwanirisika? [Dikhirani ntawiro.] Ici ndi citsandzo cibodzi ca cidikhiro na ciwangiso cakuti anthu a makhaliro na a pikhulupiro pyonsene anakwanisa kutambira kubulukira m’Bhibhlya.” Lerini ndima yapadzulu pa tsamba 3, na gawirani bruxura.
Yeserani kucita ipi: Khala mukucitisa pfundziro ya Bhibhlya m’bukhu Biblya Isapfunzisanji kwa munthu wakuti nee ali mu uphemberi Wacikristu, phatisirani mphindi zingasi pakutoma peno pakumalisira kwa pfundziro toera kudinga khundu ibodzi ya bruxura toera kumpasa maonero a Bhibhlya.
Um Livro para Todas as Pessoas
Yacitwa toera kutundusa anthu akuti ali na cidziwiso cakucepa ca Bhibhlya
Tinaigawira tani: “Lerini 2 Timoti 3:16, 17. Buluka penepo longani: “Musatawira pyenepi kuti Bhibhlya ndi yakupumirwa na Mulungu? Peno musanyerezera kuti ndi bukhu yadidi basi? [Dikhirani ntawiro.] Anthu azinji ali na maonero pa mbvundzo unoyu, mbwenye tisaona kuti mwandimomwene ndi anthu akucepa asadinga Bhibhlya mwacidikhodikho. [Lerini cakugumana naco cinagumanika pantsi pa nsolo pa tsamba 3.] Bruxura iyi yadidi kakamwe isapangiza mathangwi akuthema kwa anthu a makhaliro na a pikhulupiro pyonsene kuti thangwi yanji asafunika kudinga pinthu pinagumanika m’Bhibhlya.”
Yeserani kucita ipi: Mwanaciro nyumba angatambira bruxura, longani: “Thangwi ibodzi inacitisa anthu kunyerezera kuti Bhibhlya nee iri na pinthu pyakufunika kakamwe toera kuileri ndi yakuti mauphemberi asaphatisira Bhibhlya mwakuipa pontho na pipfundziso pyayo. Ndingabwera pontho ndisafuna kukupangizani citsandzo cibodzi.” Paulendo wakubwereza, dingani mphangwa zingasi m’matsamba 4-5.
Munakwanisa Kukhala Xamwali Wa Mulungu!
Yacitwa toera kutundusa anthu akuti apfundza pang’ono peno nkhabe kwanisa kuleri mwadidi
Tinaigawira tani: “Musanyerezera kuti mphyakukwanisika kwa ife kukhala axamwali a Mulungu? [Dikhirani ntawiro. Buluka penepo lerini Tyago 2:23.] Bruxura iyi yacitwa toera kutiphedza kukhala xamwali wa Mulungu, ninga pidacita Abrahamu.”
Yeserani kucita ipi: Ngakhale paulendo wakutoma peno paulendo wakubwereza, pangizani kuti pfundziro ya Bhibhlya isacitwa tani mu kudinga pabodzi nsolo 1 onsene peno khundu ya nsolo unoyu.
Como Ter uma Vida Satisfatória
Yacitwa toera kutundusa anthu akuti nee asaphembera
Tinaigawira tani: “Tikucedza na anyakuendekana athu thangwi anthu azinji asafuna kukhala akutsandzaya kakamwe mu umaso. Tonsene tisathimbana na nyatwa zakuti zisacitisa kukhonda tsandzaya. Tingathimbana na nyatwa, tisasaka uphungu kwa acibale akunyindirika peno xamwali, panango kuphatisira mabukhu peno Interneti. Ndi kupi kunaona imwe kukhala phata yadidi ya uphungu? [Dikhirani ntawiro.] Anango adzadzuma pakuona kuti Bhibhlya isapereka uphungu wadidi kakamwe. Ici ndi citsandzo cibodzi. [Pangizani mwanaciro nyumba nsolo 2, na lerini ibodzi mwa malemba adaikhwa.] Bruxura iyi yacitwa toera kufokotoza kuti tinakwanisa tani kugumana umaso wakutsandzayisa kakamwe.”
Yeserani kucita ipi: Mwanaciro nyumba angatawira bruxura, longani: “Anthu azinji asabva kulonga kuti Bhibhlya iri na pinthu pizinji pyakuti nee ndi pyandimomwene. Ndingabwera pontho, ndisafuna kukupangizani citsandzo cibodzi ca undimomwene wakubverana kwa Bhibhlya na siyensiya wakuti unakudzumisani.” Paulendo wakubwereza dingani ndima 4 pa tsamba 12.
A Origem da Vida — Cinco Perguntas Que Merecem Resposta
Yacitirwa aphale na atsikana Acikristu akuti akupfundziswa pya kusanduka kwa pinthu kuxikola, pontho ndi yakuphedza kakamwe pakucedza na anthu anakhulupira pya kusanduka kwa pinthu, anapenula khala Mulungu alipodi, peno ale akuti nkhabe tawira kuti Mulungu alipo. (Bruxura iyi nee yacitwa toera kugawirwa m’basa ya nyumba na nyumba.)
Tinaiphatisira tani pakulonga na munthu anakukhulupira pya kusanduka kwa pinthu peno wakuti nkhabe tawira kuti Mulungu alipo: “Mwakukhonda penula, mabukhu onsene acisiyensiya lero asapfundzisa pya kusanduka kwa pinthu. Musatawira kuti cipfundziso ceneci ndi maonero, peno musanyerezera kuti ndi undimomwene wakutawirika lero? [Dikhirani ntawiro.] Toera kucita cisankhulo candzeru, ndisanyindira kuti munatawira kuti tisafunika kudinga makhundu mawiri a nkhani ineyi. Bruxura iyi isapereka pipangizo pingasi pyakuti pisacitisa anthu azinji kutawira kuti umaso wacitwa.”
Yeserani kulonga ipi: Mungaenda kuxikola, ikhani bruxura padzulu pa kartera. Onani khala andzanu akuxikola anabvundzisa pya bruxura.
A Vida — Teve um Criador?
Yacitwa toera kuphatisirwa ninga thanyo yakutoma pa pfundziro ya Bhibhlya. Inakhalambo yakuphedza pa kucedza na anthu anakhulupira pya kusanduka kwa pinthu, anapenula khala Mulungu alipodi, peno ale akuti nkhabe tawira kuti Mulungu alipo. Anyakubala anadzaona bruxura ineyi kukhala yadidi kakamwe mu kuphedza anawo ang’ono toera kusimba Mulungu wathu.
Munaiphatisira tani toera kutawira ale anakupangani kuti iwo asakhulupira pya kusanduka kwa pinthu peno nkhabe tawira kuti Mulungu alipo: “Ndikuciteni mbvundzo, ninji cidakucitisani kukhulupira maonero anewa? [Dikhirani ntawiro.] Mwakukhonda penula, imwe mwadinga nkhani ineyi mwacidikhodikho. Mbapidakhala pyadidi khala anthu azinji acita pibodzi pyene. Ndisanyindira kuti musatawira kuti nee ndi pyakuipa munthu kuleri mphangwa zinapangiza pakweca kuti umaso wacitwa. Mbidatsandzaya kudziwa maonero anu ku undimomwene unapangizwa m’bruxura iyi.”
Yeserani kulonga ipi: Khala munthu analonga na imwe atawira bruxura, mpangizeni mibvundzo inagumanika pa tsamba 31, buluka penepo mbvundzeni: “Ndi upi mwa mibvundzo iyi unafuna imwe kudziwa ntawiro?” Mpangizeni nsolo unalonga pyenepi m’bukhu Kodi Mwandimomwene Biblya Isapfunzisanji?
Por Que Devemos Adorar a Deus com Amor e Verdade?
Yacitwa toera kutundusa Maindu
Tinaigawira tani: “Phembero yakudziwika kakamwe ya Aindiya isaphataniza phembo toera kugumana undimomwene pabodzi na ceza.” Musanyerezera kuti mphyakufunika kakamwe kulambira Mulungu mwaufuni na mwandimomwene? [Dikhirani ntawiro.] Onani ninji pidalonga Yezu thangwi ya pyenepi.” Lerini Jwau 4:24. Buluka penepo lerini ndima 4 pa tsamba 3, na gawirani bruxura.
Yeserani kucita ipi: Mwanaciro nyumba angatawira bruxura, longani: “Maindu anango acidziwiso kakamwe asalonga kuti undimomwene uli wakubisala m’mitima yathu. Anango asalonga kuti undimomwene usagumanika m’malemba akucena. Ulendo unafuna kudza, ndisafuna kucedza pya mbvundzo unagumanika pa mafala akumalisa a ndima 3 pa tsamba 4: ‘Ndi kupi kunafuna ife kusaka undimomwene wa Mulungu?’”
Our Problems—Who Will Help Us Solve Them?
Yacitwa toera kutundusa Maindu
Tinaigawira tani: “Anthu azinji anacedza na ife ali kutsukwala thangwi ya uipi unaona iwo mu dziko. Musanyerezera kuti ntsiku inango Mulungu anadzamalisa nyatwa za dziko ino? [Dikhirani ntawiro.] Profesiya iyi isatipasa cidikhiro. [Lerini Masalmo 37:11.] Pidamala ine kuleri pyabuluswa m’Bhibhlya, bukhu yakuti kazinji kene nee isabveseswa peno nee isaphatisirwa mwadidi. Munadzadzuma kudziwa kuti Bhibhlya nee yacitirwa anthu a ku Amerika peno a ku Europa basi tayu; Bhibhlya nkhabe kukulumiza ubitcu peno kupondererana, peno kuona dzindza inango kukhala yapadzulu kakamwe kupiringana inango. Mbwenye iyo isatipasa cidikhiro cakuti mwakukhonda dembuka Mulungu anadzamalisa nyatwa zathu. Pontho, Bhibhlya iri na midida yakuti inakwanisa kutiphedza kuthimbana na nyatwa zathu lero. Bruxura iyi isapereka mphangwa zakuthimizirika.”
Yeserani kucita ipi: Paulendo wakubwereza unafuna kudza, pakumala kucitisa mwanaciro nyumba kukhala na cifuno ca m’Bhibhlya, mpangizeni pithundzithundzi pinagumanika pa matsamba 4-5 a bukhu Biblya Isapfunzisanji. Lerini ibodzi mwa malemba adaikhwa, pontho gawirani bukhu.
Haverá Algum Dia um Mundo sem Guerra?
Yacitwa toera kutundusa Ayuda
Tinaigawira tani: “M’mbiri yonsene, anthu asatamba nyatwa zizinji thangwi ya nkhondo. Thangwi yanji musanyerezera kuti, tisapitiriza kuthabuka na nkhondo maseze anthu asalonga kuti asafuna ntendere? [Dikhirani ntawiro.] Profesiya iyi inagumanika pa Izaiya isatipasa cidikhiro. [Lerini Izaiya 2:4.] Ngakhale tenepo, pyenepi pisacitisa kuoneka mibvundzo mizinji: Profesiya ya Izaiya inakwanirisika tani, pontho lini? Thangwi yanji tinakwanisa kunyindira Malemba kukhala phata ya cidikhiro cakunyindirika? Bruxura iyi isatawira mibvundzo ineyi.”
Yeserani kucita ipi: Khala mwanaciro nyumba atawira bruxura, mpangizeni matsamba 16-17, pontho longani: Anthu azinji anganyerezera pyakucitika pyakugopswa ninga Nkhondo zikulu asabvundza, ‘Khala Mulungu alipo, thangwi yanji asatawirisa nyatwa?’ Tinadzacedza pyenepi ndingadzabwera pontho.”
As Orientações de Deus — O Caminho para o Paraíso
Yacitwa toera kutundusa Mamusulumano akuti ali m’makhaliro akusudzuka toera kupfundza Bhibhlya.
Tinaigawira tani: “Ndisadziwa kuti Mamusulumano asakhulupira Mulungu wandimomwene m’bodzi basi, na aprofeta onsene. Ndimodi? [Dikhirani ntawiro.] Ndisafuna kulonga na imwe thangwi ya profesiya ya kale inalonga pya kusanduza dziko yapantsi kudza paradizu. Ndikuleririni pidalemba mprofeta unoyu? [Lerini Izaiya 11:6-9.] Anthu azinji asabvundza kuti Mulungu anadzabweresa tani macinjo anewa pa dziko yapantsi. Bruxura iyi isapangiza kuti aprofeta asalonganji thangwi ya nkhani ineyi.”
Yeserani kucita ipi: Khala mwanaciro nyumba atambira bruxura, longani: “Bukhu iyi ya Mulungu isafokotoza kuti pakutoma munthu akhakhala mu paradizu. Tingadzacedza pontho, ndisafuna kutawira mbvundzo uyu, ‘Munthu athaukirana tani na citsogolero ca Mulungu, mbaluza paradizu?’” Mungabwera pontho, dingani mafala akutoma a nsolo wa pa tsamba 6.
Verdadeira Fé — O Segredo de uma Vida Feliz
Yacitwa toera kutundusa Mamusulumano akuti ali m’makhaliro akusudzuka toera kupfundza Bhibhlya
Tinaigawira tani: Pangizani cithundzithundzi pa matsamba 16-17 buluka penepo longani: “Makhaliro awa ndi akusiyana kakamwe na pinaona ife lero pa dziko yapantsi. Musanyerezera kuti mphyakukwanisika kuti ntsiku inango dziko inadzakhala na makhaliro ninga awa? [Dikhirani ntawiro.] Onani kuti bukhu iyi ya Mulungu isapikiranji. [Lerini m’Bhibhlya yanu ibodzi mwa malemba adaikhwa.] Bruxura iyi isatiphedza toera kukhala na cikhulupiro candimomwene cakuti mapikiro anewa anadzakwanirisikadi.”
Yeserani kucita ipi: Pakumalisira kwa ulendo wakutoma, bvundzani mwanaciro nyumba toera asankhule ubodzi mwa mibvundzo iri pa tsamba yakumalisa ya bruxura. Buluka penepo citani masasanyiro toera kudinga ntawiro wa mbvundzo unoyu m’bruxura paulendo wakubwereza.
Como Ter Verdadeira Paz e Felicidade
Yacitwa toera kutundusa Axina
Tinaigawira tani: “Lero umaso uli na nyatwa zizinji zakuti zisaticitisa kukhonda tsandzaya. Ninji cinakuphedzani toera kukhala wakutsandzaya maseze kuthimbana na nyatwa? [Dikhirani ntawiro.] Anthu azinji asakhala akutsandzaya mu kuphatisira uphungu wa Bhibhlya. [Lerini Masalmo 119:1, 2.] Anthu anango asaona Bhibhlya kukhala bukhu ya ku madziko a ku Amerika na a ku Europa. Mbwenye onani ipi. [Dingani ndima 16 pa tsamba 17.] Bruxura iyi isalonga kuti tinagumana tani ntendere na kutsandzaya kwa kwenda na kwenda.”
Yeserani kucita ipi: Khala mwanaciro nyumba atawira bruxura, lerini pabodzi mizera mitatu yakutoma pa ndima 18 pa tsamba 17, buluka penepo longani: “Ndingabwerera, ndisafuna kukupangizani ninji cinafunika ife kudikhira mwakubverana na Bhibhlya.” Mungabwerera, dingani ntsonga ibodzi mu ndima 6 pa tsamba 30.