Mbani Anacita Cifuno Ca Yahova Lero?
1. Tinatoma lini kudinga bruxura Mbani Anacita Cifuno Ca Yahova Lero? na tinaphindula tani?
1 Kutomera sumana 28 ya Malandalupya, tinadzadinga bruxura Mbani Anacita Cifuno Ca Yahova Lero? pa Pfundziro ya Bhibhlya ya Mpingo. Bruxura ineyi ipswa yabuluswa pa Nsonkhano wa Gawo wa nsolo wakuti “Tsidzikizani Ntima Wanu!” yasasanywa toera kutsogolera anyakupfundza Bhibhlya ku gulu ya Yahova. Kudinga bruxura ineyi nee kunadzathimizira basi kupereka kwathu takhuta mu kucita khundu ya gulu ya Yahova, mbwenye kunadzatiphedzambo kudziwa mwadidi feramentu ineyi yakufunika mu utumiki.—Sal. 48:13.
2. Kodi bruxura ineyi inadzapfundzwa tani m’mpingo?
2 Inadzapfundzwa Tani: Nyakutsogolera pfundziro asafunika kugawa ndzidzi kuti nsolo ubodzi na ubodzi ucitwe mu ndzidzi wakuthema. Iye anadzatomesa nsolo ubodzi na ubodzi mu kuleri mbvundzo wakuti ndi nsolo wa pfundziro. Buluka penepo, anadzaphemba nyakuleri toera kuleri ndima yakutoma. Pakumala, nyakutsogolera pfundziro anadzabvundza anyakubvesera mbvundzo udakhunganyika iye. Natenepa, khundu ibodzi na ibodzi inatoma na mafala akupswipirira isafunika ilerwi na kufokotozwa payokha. Pakumala kuleri khundu, nyakutsogolera pfundziro anadzabvundza kuti khundu ineyi isatawira tani mbvundzo wakutoma wa pfundziro. M’bruxura musagumanikambo pithundzithundzi pizinji pyakuti pinakwaniswa kufokotozwa. Malemba akufunika asafunika kulerwi khala ndzidzi ulipo. Mbadzati kutoma nsolo unango, nyakutsogolera pfundziro anadzabwerezera pidapfundzwa mu kucita mibvundzo inagumanika pantsi pa tsamba. Khala pasagumanika bokosi “Dziwani Pinango,” iye anadzaphemba nyakuleri toera kuileri, buluka penepo anadzabvundza anyakubvesera kuti nyakupfundza Bhibhlya anadzaphindula tani mu kutowezera citsogolero ceneci. Khala ndzidzi ulipo pakumala kwa pfundziro, nyakutsogolera pfundziro anakwanisa kuphatisira misolo ya pfundziro ninga mibvundzo yakubwerezera. Dziwani kuti njira zenezi nee zisalonga kuti bruxura ineyi inaphatisirwa tani pa pfundziro ya Bhibhlya ya panyumba.
3. Tinaphindula tani mwakukwana pakupfundza bruxura ineyi?
3 Toera kuphindula kakamwe, khunganyikani mwadidi mbamusati gumanika pa misonkhano. Wangisirani toera kutawira. Nkati mwa pfundziro, nyerezerani kuti mphangwa zenezi zinaphindulisa tani anyakupfundza Bhibhlya. Kudinga kwathu bruxura ineyi ipswa kunatikhunganya toera kuphedza anango kuphatana na ife pakucita cifuno ca Mulungu. Natenepa iwombo anadzakhala na cidikhiro ca kukhala kwenda na kwenda.—1 Jwau 2:17.