Kuthimizira Maluso Athu Mu Utumiki—Kupereka Umboni Mu Pisa Pyamalonda
Thangwi Yanji Mphyakufunika: Nakuti anthu azinji asaphata basa ndzidzi uzinji, kazinji kene njira yadidi toera kuamwazira mphangwa za Umambo ndi kupereka umboni m’mbuto zawo za basa. Kupereka umboni mu pisa pyamalonda kusatsandzayisa na kusabweresa maphindu thangwi nkhabe kusowa munthu, pontho anyamalonda asapangiza citsalakano kwa ale anaona iwo ninga anyakugula. Toera kugumana maphindu, amwazi mphangwa asafunika kuphatisira luso na acitsandzo cadidi m’mabvaliro na m’makhunganyikiro awo. (2 Akor. 6:3, Tradução do Novo Mundo) Natenepa, muyang’aniri wa basa ya m’munda asafunika kudziwa kuti pisa pyamalonda pikuphatwa tani, pontho na ani.
Tinacita Tani Pyenepi:
• Khunganyikani mafala acigwagwa. Tingakwata ndzidzi uzinji wa anyakuphata basa, panango nee tinadzapaswa mwai wa kulonga nawo ntsogolo.
• Sankhulani ndzidzi wakuti malonda nee asafamba kakamwe, ninga mu ndzidzi unatoma iwo kuphata basa.
• Wangisirani toera kulonga na nkulu wa malonda. Khalani waufuni na wauxamwali. Yeserani kulonga tenepa, “Tikucedza na anthu mwacigwagwa m’mbuto zawo za basa thangwi mphyakunentsa kuagumana m’mamidzi mwawo.” Longani mafala acigwagwa, mbamumpasa tratado, marevista peno ntundu unango wa bukhu. Natenepa, toera akhonde kutiona ninga anyamalonda, mphyadidi kucalira kuphemba cakupereka kusiyapo khala atibvundza kuti basa yathu isaphedzerwa tani.
• Khala nkulu wa malonda ndi wauxamwali, m’phembeni toera mukalonge mwacigwagwa na anyabasace. M’mbuto zinango pinakhala pyadidi kubvundzisa khala mphyakukwanisika kusiya mabukhu m’mbuto zinadya anyabasa.
• Phatisirani luso na citani pinthu mwakucimbiza. Mwacitsandzo, khala nyabasa akulonga na nyakugula peno aphatika na basa, dikhirani mpaka akhale wakusudzuka mbamudzati kunfendedzera cifupi.
Yeserani Kucita Ipi Nkati Mwa Nthanda:
• Nkati mwa Kulambira kwanu kwa Banja namaulo, khunganyikani mafala acigwagwa akuti munaaphatisira mungaphembwa toera kamwaza mphangwa mu pisa pyamalonda.