Pangizani Kutsalakana Kwanu Anango—M’kukhala Akukhunganyika

¹ Kukhunganyikira mwadidi utumiki kusatiphedza kupangiza kutsalakana kwathu anango. Kodi m’njira ipi? Tingakhala akukhunganyika mwadidi, nee tinadzadzudzumika na uperekero umboni wathu tayu mbwenye tinadzatsogolera manyerezero athu kwa mwanaciro nyumba. Mwakuthimizira, pyenepi pisatiphedza kukunda kudzadzamira na kuticitisa kulonga kubulukira m’ntima. Kodi tinakwanisa tani mphapo kukhunganya uperekero umboni wadidi?

² Phatisirani Uperekero Umboni Wakuthema: Sankhulani ubodzi wa maperekero umboni anagumanika m’Utumiki Wathu Wa Umambo wa nthanda ya Thongwe ya 2006 wakuti ndi wakuthema m’cisa canu, na onani kuti munakwanisa tani kuulonga m’mafala anu ene. Ucinjeni mwakubverana na cisa canu. Mwacitsanzo, khala kazinji kene musagumanikana na anthu a uphemberi peno a dzinza inango, nyerezerani kuti munakwanisa tani kuatundusa kubulukira ku uperekero umboni wanu. Kucinja uperekero umboni wanu towera ubverane na anaceza na imwe kusapangiza citsalakano canu ca m’ntima kwa iwo.—1 Akor. 9:22.

³ Kutomera padatoma imwe kuphatisira uperekero umboni unoyu, pitirizani kuusasanyira. Nakuti mafala akutoma ndi akufunika kakamwe, onani kuti anthu asaatawira tani. Kodi pinalonga imwe pisaaphata ntima? Kodi mabvunzo anacita imwe asatawirwa? Khala nkhabe, sakani njira ya kuasasanyira mpaka mufike pakuona kuti akuphata basa.

⁴ Piphedzo Pya Manyerezero: Azinji asaona kukhala kwakunensa kukumbukira uperekero umboni angafika pa nsuwo wa mwanaciro nyumba. Khala pyenepi pisacitikambo kwa imwe, kodi mwatoma kulesera kukhunganya uperekero umboni mwanyapantsi mwakugaluza na munthu unango? Pyenepi pingakwanise kukuphedzani kukhala na manyerezero m’nsolo na kualonga mwakukhonda nensa na mwakundondomera. Pyenepi pingakwanisembo kukuphedzani kuthimbana na matawiro akusiyana-siyana anaperekwa na anaciro nyumba.

⁵ Ciphedzo cinango ca manyerezero ndi kulemba uperekero umboni ung’ono pa katsamba na kuuona munafendedzera imwe pa nsuwo. Anango asaona kuti cikumbuso ceneci cing’ono cisaaphedza kukhala okhonda dzudzumika na cisaacitisa kuceza na anthu mwakusudzuka. M’njira zenezi, kukhunganyika kwadidi kungakwanise kutiphedza kupangiza kutsalakana kwathu anango na pyenepi pinadzathambarusa uperekero wathu umboni wa mphangwa zadidi.