‘Tikhale Dzololo Towera Kucita Mabasa Onsene Adidi’
1 Mudatoma Yezu basa ipswa ya kumwaza mphangwa, iye abvunga ndzidzi towera kukhunganya anyakupfunza ace. (Mat. 10:5-14) Maseze ife tonsene tiri na pyakucita pizinji, kubvunga kwathu ngakhale mphindi zingasi basi towera kukhunganyika mbatisati kuenda ku utumiki wa nyumba na nyumba kunadzaticitisa kukhala na maphindu adidi.—2 Akor. 9:6.
2 Tinakhunganyika Tani: Kukhunganyika kwadidi kusatoma na kudziwa mphangwa ziri m’mabukhu anafuna ife kugawira. Pontho tisafunika kunyerezera pya anthu ali mu cisa cathu. Kodi ndi pinthu pipi pinaadzudzumisa? Kodi ndi anthu a pikhulupiro pyauphemberi pya ntundu wanji akuti tingakwanise kuagumana? Ife tingakwanise kudinga maperekero umboni akukhonda nensa mu Utumiki Wathu Wa Umambo na m’bukhu ya Raciocínios à Base das Escrituras, towera kutiphedza.
3 Kubvesera mwacidikhodikho pitsanzo pinacitwa pa Nsonkhano Wa Basa kunadzakhalambo kwakuphedza. Munakhala ife a luso ya kuphatisira maperekero athu umboni, tinadzafuna ndzidzi wakucepa towera kukhunganyika. Mbwenye, ndzidzi onsene mbatisati kuenda ku utumiki, tinganyerezera pang’ono pinafuna kuenda kalonga ife na kusasanyira maperekero athu umboni, tinadzakhala na maphindu mazinji. Tisafunikambo kukoya ndzidzi towera kudinga cikhwama cathu khala ciri na mabukhu anafuna ife.
4 Kodi ndi ninji cinafuna kutiphedza kukumbuka maperekero athu umboni? Njira ibodzi towera kukhomera pinafuna kulonga ife ndi kuyesera mwakugaluza. Anango asatsanzaya mukukhala na makhundu a kuyesera nkati mwa pfunziro yawo ya banja. Anango asaona kukhala pyakuphindulisa kulemba pa katsamba ntsonga zacigwagwa za maperekero awo umboni na kuziona mbasati kufika pa nyumba.
5 Thangwi Yanji Ndi Pyakuphindulisa: Kukhunganyika mwadidi kusacitisa kuti tikhale na maphindi mazinji na citsanzayo mu utumiki. Kusatiphedza kuti tikhale akusudzuka na akukhonda kugopa tingafika pa nyumba. Ife tisakwanisa kupereka citsalakano cikulu kwa mwanaciro nyumba mbuto mwa kukhala akudzudzumika na pinafuna ife longa. Kusiyapo pyenepi, kudziwa mwadidi mabukhu anafuna ife kugawira kunadzaticitisa kulonga mwakugalamuka pa kuagawira.
6 Malemba asatidembetera kuti ‘tikhale dzololo towera kucita mabasa onsene adidi.’ (Tito 3:1) Kodi pana basa inango yadidi kupiringana ya kumwaza mphangwa zadidi? Mu kukhala akukhunganyika mwadidi, tisapangiza cilemedzo kwa mwanaciro nyumba wakuti asafuna kutibvesera, na kwa Yahova, Mulungu anaimirira ife.—Iza. 43:10.