Munacitanji Toera Mukhonde Kudzudzumika?

KUDZUDZUMIKA kunakwanisa kukhala ninga ntolo wakulemera kakamwe muntima mwathu. (Mis. 12:25) Kodi imwe mwatoma kale kukhala wakudzudzumika? Mwatoma kale kunyerezera kuti nee munakwanisabve kupirira? Khala ndi tenepo, nee muli mwekhene. Azinji a ife asadzudzumika peno asatsukwala na mathangwi akusiyana-siyana. Mwacitsandzo, anango asatsalakana wacibale wawo wakuti ali kubva kupha, anango aferwa na wacibale wawo, pontho anango athabuka thangwi ya cidengwa cacibaliro. Mphapo ninji pinafuna kutiphedza toera tikhonde kudzudzumika?a

Na citsandzo ca Mambo Dhavidhi, ife tinakwanisa kupfundza pinthu pizinji pyakuti pinatiphedza toera tikhonde kudzudzumika. Iye atamba nyatwa zizinji, pontho midzidzi inango umaso wace ukhali pangozwi. (1 Sam. 17:34, 35; 18:10, 11) Kodi Dhavidhi acitanji toera akhonde kudzudzumika? Ifembo tinatowezera tani citsandzo cace?

KODI DHAVIDHI ACITANJI TOERA AKHONDE KUDZUDZUMIKA?

Dhavidhi atamba nyatwa zizinji mu ndzidzi ubodzi ene. Mwacitsandzo, nyerezerani pidacitika mu ndzidzi ukhathawa iye Mambo Sauli, wakuti akhafuna kumupha. Dhavidhi na amuna akhali na iye pidabuluka iwo ku nkhondo, akhala akutsukwala kakamwe. Thangwi anyamalwa awo akhadaba pinthu pyawo, akhadapisa pinthu pyawo, pontho akhadakwata akazawo na anawo. Mphapo Dhavidhi acitanji? ‘Dhavidhi na amuna akhali na iye atoma kulira kakamwe mpaka kusowa mphambvu yakulira pontho.’ Kusiyapo pyenepi, amuna akhanyindira iye ‘akhafuna kumponyera miyala.’ (1 Sam. 30:1-6) Natenepa Dhavidhi akhathimbana na pinentso pitatu mu ndzidzi ubodzi ene: Banja yace ikhali pangozwi, amuna akhali na iye akhafuna kumupha, pontho Mambo Sauli akhansaka toera kumupha. Pyenepi pyacitisa Dhavidhi kukhala wakudzudzumika.

Mphapo ninji pidacita iye? Mwakukhonda dembuka, ‘Dhavidhi agumana cibalangazo kuna Yahova Mulungu wace.’ Kodi iye acita tani pyenepi? Dhavidhi akhali na nsambo wakucita phembero kuna Yahova toera am’phedze na kunyerezera pinthu pyadidi pidancitira Yahova. (1 Sam. 17:37; Masal. 18:2, 6) Dhavidhi aona kuti akhafunika kuphemba citsogolero ca Yahova, natenepa iye asaka kudziwa pinthu pikhafuna Yahova kuti iye acite. Dhavidhi pidadziwa iye pinthu pikhafuna Yahova, apicita mwakucimbiza. Na thangwi ineyi, iye na amuna akhali na iye apaswa nkhombo na Yahova. Pontho iwo akwanisa kukwatira anyamalwa awo pinthu pikhadakwata iwo, akazawo na anawo. (1 Sam. 30:7-9, 18, 19) Kodi mwakwanisa kuona pinthu pitatu pidacita Dhavidhi? Iye acita phembero toera Yahova am’phedze, anyerezera pinthu pidancitira Yahova, pontho abvera citsogolero cidampasa Yahova. Ifembo tinatowezera tani citsandzo ca Dhavidhi? Tendeni tione pinthu pitatu.

TOWEZERANI CITSANDZO CA DHAVIDHI MUNGAKHALA WAKUDZUDZUMIKA

1. Kucita phembero. Ndzidzi onsene tingaona kuti tikutoma kukhala akudzudzumika tinakwanisa kucita phembero kuna Yahova toera atiphedze na kutipasa udziwisi. Tingacita phembero mbatipanga Yahova pyonsene pinatinentsa, pinatiphedza toera tikhonde kukhala akudzudzumika. Peno khala pa ndzidzi unoyu nee tinakwanisa kulonga pyonsene piri muntima mwathu, mwacigwagwa ife tinakwanisa kucita phembero ya muntima. Ndzidzi onsene unaphemba ife ciphedzo ca Yahova, tinapangiza kuti tisan’nyindira ninga pidacita Dhavidhi, wakuti alonga: ‘Yahova ndi mwala wanga, citsidzikizo canga na mpulumusi wanga. Mulungu ndi mwala wanga, kule kunathawira ine.’ (Masal. 18:2) Kodi phembero isaphedzadi? Mpainiya m’bodzi anacemerwa Kahlia alonga: “Pakumala kucita phembero ndisakhala na ntendere. Phembero isandiphedza toera kukhala na manyerezero ninga a Yahova mbandin’nyindira kakamwe.” Mwandimomwene, phembero ndi muoni wamphambvu kakamwe udatipasa Yahova toera utiphedze kuti tikhonde kukhala akudzudzumika.

2. Kunyerezera. Munganyerezera pinthu pidakucitikirani mu umaso wanu, musakwanisa kuona nyatwa zidapirira imwe na ciphedzo ca Yahova? Kunyerezera kuti Yahova atiphedza tani, pontho aphedzambo tani atumiki ace a mu ndzidzi wakale kunatiphedza toera tikhale na ntendere mbatin’nyindira kakamwe. (Masal. 18:17-19) Nkulu wa mpingo m’bodzi anacemerwa Joshua, alonga: “Ine ndisalemba maphembero anga onsene adatawira Yahova. Pyenepi pisandiphedza toera kukumbuka midzidzi idaphemba ine cinthu kuna Yahova, iye mbandipasa cinthu ceneci.” Mwakukhonda penula, tinganyerezera mwadidi njira zakusiyana-siyana zidatiphedza Yahova, tinakwanisa kukhala na mphambvu zakuti zinatiphedza toera tikhonde kudzudzumika.

3. Kubvera. Mbatidzati kucita pinthu, ife tinakwanisa kusaka citsogolero ca Mafala a Mulungu, akuti ndi akunyindirika kakamwe. (Masal. 19:7, 11) Azinji adzindikira kuti angafufudza vesi ibodzi, asakwanisa kubvesesa kuti anaphatisira tani vesi ineyi mu umaso wawo. Nkulu wa mpingo m’bodzi anacemerwa Jarrod, alonga: “Kufufudza kusandiphedza toera ndione pinthu pyonsene pinalongwa pa vesi mbandibvesesa pinandipanga Yahova. Pyenepi pisandiphedza toera kukhulupira pinthu pinaleri ine, mbandibvera citsogolero cace.” Tingasaka kudziwa citsogolero ca Yahova m’Bhibhlya mbatibvera citsogolero ceneci, pyenepi pinatiphedza toera tikhonde kukhala akudzudzumika.

YAHOVA ANAKUPHEDZANI TOERA MUKHONDE KUDZUDZUMIKA

Dhavidhi akhadziwa kuti toera akhonde kukhala wakudzudzumika, akhafuna ciphedzo ca Yahova. Iye apereka takhuta kakamwe thangwi ya ciphedzo cidampasa Yahova. Na thangwi ineyi, iye alonga: ‘Na mphambvu za Mulungu, ine ndinakwanisa kukwira mpanda. Mulungu wandimomwene ndi ule anandipasa mphambvu.’ (Masal. 18:29, 32) Panango tinaona kuti nyatwa zathu ndi zakunentsa kakamwe, pontho nee tinakwanisa kuzipirira. Mbwenye na ciphedzo ca Yahova, ife tinakwanisa kupirira nyatwa zonsene zakunentsa. Tingacita phembero kuna Yahova toera atiphedze, tinganyerezera pinthu pidaticitira iye na kubvera pitsogolero pyace, ife tinakwanisa kukhala na cinyindiro cakuti iye anatipasa mphambvu na udziwisi unafuna ife toera tikhonde kukhala akudzudzumika.