Pinakhulupira Anango

Aindu

iwo asalonga kuti nyatwa zisaoneka thangwi ya pidacita munthu mu umaso uno peno mu umaso wakale. Cifuno cawo ndi cakufika pa moksa mbakhala na ufulu wakubalwa pontho ninga munthu unango peno cinyama. Toera pyenepi picitike, munthu asafunika kukhala na manyerezero akusiyana na a dziko ino.

Amwenye

iwo asalonga kuti asatcunyuswa thangwi ya madawo awo. Kuna iwo angathimbana na nyatwa ndi mayesero a cikhulupiro cawo. Dr. Sayyid Syeed, presidente da Sociedade Islâmica da América do Norte, alonga: Pidengwa pisatikumbusa kuti “ndzidzi onsene tisafunika kupereka takhuta kuna Mulungu thangwi ya nkhombo zathu, pontho pisatikumbusa kuti tisafunika kuphedza anango.”

Ayuda

iwo asakhulupira kuti nyatwa zisabwera thangwi ya pinacita munthu. Ayuda anango asakhulupira kuti kunadzaoneka kulamuswa muli akufa, pontho anthu akusowa mulando anathabuka anadzacitirwa ulungami. Ayuda místico, peno kabhala, asapfundzisa kuti asapasa mwai munthu toera atcunyuke madawo ace.

Abhudhista

iwo asalonga kuti munthu asathabuka mu ndzidzi wa kubalwa pontho mpaka angasiya macitiro ace, pifuno pyace na mabvero ace akuipa. Kubulukira mu udziwisi, macitiro adidi na ndzeru zadidi zisacitisa munthu kufika pa nirvana, umaso wakuti nkhabebve kuthabuka.

Makonfusionista

mwakubverana na bukhu inalonga pya uphemberi, makonfusionista asakhulupira kuti “anthu asaona nyatwa thangwi ya madodo awo.” Iwo asakhulupira kuti anthu anakwanisa kupungula nyatwa angacita pinthu pyadidi, mbwenye nakuti kazinji kene nyatwa zisaoneka thangwi ya aanju, nee tinakwanisa kuzikunda. Natenepa cinthu cibodzi cinafuna kucita munthu ndi kutawira pinafuna kuncitikira.

Mauphemberi a madzindza

anango mwa mauphemberi anewa asakhulupira kuti anthu asathabuka thangwi ya ufiti. Mwakubverana na pinakhulupira iwo, ufiti unakwanisa kubweresa pinthu pyadidi peno nyatwa, pontho munthu anakwanisa kuzicalira angacita miyambo yawo. Mwacitsandzo, munthu angabva kupha asaenda kwa ng’anga, pontho asakhulupira kuti iye anakwanisa kumalisa ufiti.

Akristu

asakhulupira kuti nyatwa zatoma pidadawa Adhamu na Eva, ninga pinalonga bukhu ya Genesi. Mbwenye, mauphemberi mazinji athimizira maonero awo thangwi ya cipfundziso ceneci. Mwacitsandzo, anthu anango anaphembera gereja ya katolika asalonga kuti nyatwa zinakwanisa ‘kuperekwa kuna Mulungu,’ pontho Mulungu anakwanisa kuphatisira nyatwa zenezi toera kupasa nkhombo gereja peno kupulumusa anthu anango.