Amamphasa Akuti Akhali Akusiyana

APHALE awiri pano ali akusiyana kakamwe, kodi si tenepa tayu? Kodi musadziwa madzina awo? Nsodzi ndi Esau, na mphale anatsalakana mabira ndi Yakobo.

Esau na Yakobo akhali ana amamphasa a Isaki na Rebeka. Babawo, Isaki, akhafuna kakamwe Esau, thangwi iye akhali nsodzi wadidi na akhabweresa pyakudya panyumba towera banja idye. Mbwenye Rebeka akhafuna kakamwe Yakobo, thangwi iye akhali mphale wakupfulika na wakukhurudzika.

Mbuyawo Abrahamu akhali maso basi, natenepa tingakwanise kunyerezera kuti Yakobo akhafuna tani kumbvesera mbakalonga pya Yahova. Pakumalisira Abrahamu afa mbakhali na piaka 175 pyakubalwa, m’nzidzi unoyu amamphasa akhali na piaka 15 pyakubalwa.

Mukakhala Esau na piaka 40 pyakubalwa iye akwatira akazi awiri a dziko ya Kanani. Pyenepi pyatsukwalisa kakamwe Isaki na Rebeka, thangwi akazi aneale nee akhalambira Yahova.

Ntsiku inango kwacitika cinthu cidacitisa Esau kuipirwa kakamwe na mbale yace Yakobo. Ukhadafika nzidzi wakuti Isaki apase nkhombo mwanace wankulu. Nakuti Esau akhali wankulu kupiringana Yakobo, Esau akhadikhira kutambira nkhombo ineyi. Mbwenye Esau akhadamala gulisira kale Yakobo kuthema kwa kutambira nkhombo. Pontho, mudabalwa aphale anewa awiri Mulungu akhadalonga kuti Yakobo mbadadzatambira nkhombo. Ipi ndipyo pidacitika. Isaki apasa nkhombo mwanace Yakobo.

Patsogolo pace, mudadziwa Esau pyenepi iye aipirwa na Yakobo. Iye aipirwa kakamwe kwakuti alonga kuti mbadadzapha Yakobo. Mudabva Rebeka pyenepi, anenseka kakamwe. Natenepa apanga mamunace Isaki: ‘Pinadzaipa kakamwe Yakobo akakwatirambo mbodzi wa akazi a Kanani.’

Buluka penepo Isaki acemera mwanace Yakobo mbampanga: ‘Leka kwatira nkazi wa m’Kanani. Mbuto mwa pyenepi, ndoko kumudzi wa mbuyako Betueli ku Harani. Kwatira mwana mbodzi wankazi wa Labani, mwana wa Betueli.’

Yakobo abvesera babace, na m’nzidzi uneule atoma ulendo wace wakulapha mpaka Harani, kukakhala acibale ace.