Yakobe Apaswa Nkhombo

Izaki akhali na pyaka 40 pidamanga iye banja na Rabheka. Izaki akhafuna kakamwe Rabheka. Mukupita kwa ndzidzi iwo adzakhala na ana awiri amamphasa.

Adatoma kubalwa ndi Izau, adamalisira ndi Yakobe. Izau akhakomerwa kakamwe kukhala ntsanga mbakasodza, mbwenye Yakobe akhakomerwa kuphedzera mabasa a panyumba.

Mu ntsiku zenezi, baba angafa, mwana wakutoma ndiye akhali na ufulu wakupaswa pinthu pizinji pya babace. Pyenepi pikhacemerwa unthaka. Kuna banja ya Izaki, unthaka unoyu ukhaphataniza pinthu pidapikira Yahova kuna Abhrahamu. Izau nee akhaona kuti mapikiro anewa akhali akufunika mu umaso wace, mbwenye Yakobe akhadziwa kuti mapikiro anewa akhali akufunika kakamwe.

Ntsiku inango, Izau aenda kasodza mbabwerera panyumba wakuneta kakamwe. Iye abva kununkhira kwa cakudya cikhaphika Yakobe, mbalonga: ‘Ndiri na njala! Ndipasembo pang’ono nyemba zako zakufuira!’ Yakobe antawira: ‘Ndinakupasa, mbwenye pakutoma ndigulisire ufulu wako ninga mwana wautombo.’ Izau alonga: ‘Ufulu ninga mwana wautombo uli na basa yanji kuna ine? Ukwate pyako. Pinafuna ine ndi kudya basi!’ Kodi cisankhulo cidacita Izau cikhali cadidi? Nkhabe. Izau apereka cinthu cakufunika kakamwe basi ene toera kupaswa cakudya.

Pidakalamba Izaki, iye aona kuti unoyu ukhali ndzidzi toera kupasa nkhombo mwanace wakutoma. Mbwenye Rabheka aphedza Yakobe wakuti akhali mwana wang’ono toera apaswe nkhombo. Izau pidadzindikira iye pyenepi, aipirwa kakamwe mbacita masasanyiro toera kupha m’bale wace. Izaki na Rabheka akhafuna kutsidzikiza Yakobe. Natenepa iwo ampanga toera aende ‘kunyumba kwa Labhau m’bale wace Rabheka, mpaka Izau akhurudzike.’ Yakobe abvera anyakubalace mbaenda toera kupulumusa umaso wace.