Yakobe na Izau Akhazikisa Ntendere

Yahova apikira Yakobe kuti mbadantsidzikiza ninga pidatsidzikiza iye Abhrahamu na Izaki. Yakobe aenda kakhala ku mbuto inacemerwa Harani. Kweneko iye amanga banja, akhala na ana azinji, pontho adzakhala wakupfuma kakamwe.

Mukupita kwa ndzidzi, Yahova ampanga: ‘Bwerera ku dziko idabalwa iwe.’ Natenepa, Yakobe na banja yace atoma kucita ulendo wakulapha toera kubwerera. Pikhali iwo n’njira anthu anango apanga Yakobe: ‘M’bale wanu Izau ali kubwera kudzaonana na imwe, pontho iye ali na amuna akukwana 400.’ Yakobe agopa kakamwe mbanyerezera kuti iye na banja yace mbadaphiwa na Izau. Natenepa iye acita phembero kuna Yahova mbalonga: ‘Ndaphata miyendo, ndipulumuseni m’manja mwa m’bale wanga.’ Mangwana mwace Yakobe atumiza miyoni kuna Izau ya mabira mazinji, mbuzi, ng’ombe, makamelo na maburu.

Ntsiku ineyi namasiku, pikakhala Yakobe ekhene, iye aona anju. Buluka penepo, anju unoyu atoma kumenyana na Yakobe. Iwo amenyana mpaka kunja kuca. Ngakhale Yakobe aphekeswa, iye nee asiya kuti anju aende. Anju alonga: ‘Ndisiye ndiende.’ Mbwenye Yakobe atawira: ‘Ine nkhabe kukusiya mpaka ungandipasa nkhombo.’

Pakumalisa, anju apasa nkhombo Yakobe. Natenepa Yakobe akhala na cinyindiro cakuti nee akhafunikabve kugopa Izau.

Ntsiku ineyi namacibese, Yakobe aona nakutali Izau mbakabwera na amuna 400. Pidafika iwo dhuzi, Yakobe agodama kanomwe pikhafendedzera iye m’bale wace. Izau athamangira Yakobe mban’khumbatira. Uwiri wawo atoma kulira mbakhazikisa ntendere. Mwandimomwene Yahova akomerwa kakamwe thangwi ya njira idatsalakana Yakobe kukhonda kwawo kubverana.

Buluka penepo, Izau abwerera kunyumba kwace, mbwenye Yakobe apitiriza na ulendo wace. Yakobe adzakhala na ana amuna 12. Madzina awo akhali Rubheni, Simeoni, Levi, Yuda, Dhani, Nafitali, Gadhi, Azeri, Isakari, Zebhuloni, Zuze na Bhenjamini. M’bodzi mwa ana anewa aphatisirwa na Yahova toera kupulumusa mbumba Yace. Mbani mwana unoyu? Iye acita tani pyenepi? Nsolo unatowera unatawira mibvundzo ineyi.