Kodi Imwe Musafunika Kucitanji?
50 Kodi musafuna kukhala maso kwenda na kwenda m’paradizu ineyi yakubalika?
Mphapo pfunzani pyakuinjipa pya pinalongwa na Mulungu. Leserani kupfunza kuleri Bibilya.—Juwau 17:3; Chidziwiso 1:3.
51 Pfunzani pyakubvirira pya Yezu.—Deuteronomi 18:18, 19; Juwau 3:16; Machitiro 3:19-23.
52 Leserani kucita pinthu pyadidi basi na kubvera Yahova.—Aroma 6:17, 18, 22.
53 Kumbukani kuti Yahova alonga kuti tileke kupha anthu.—Ekisodo 20:13; 1 Juwau 3:11, 12.
54 Tileke kukwata pinthu pya anthu anango.—Ekisodo 20:15; Aefesu 4:28.
55 Mamuna aleke kukhala peno kugonana na nkazi, basi ene ngakhala kuti ndi nkazace.—Ekisodo 20:14, 17; 1 Atesalonika 4:3.
56 Kodi musakumbuka kuti Mulungu asatawirisa mamuna kukhala na akazi angasi? Kodi mamuna asafunika kukhala na nkazace mpanka lini?—Genesi 2:22, 24; Mateyu 19:5, 6; 1 Akorintu 7:2, 10, 11.
57 Kumbukani pina kuti tisafunika kulambira Yahova basi ene.—Mateyu 4:10; 1 Akorintu 8:6.
58 Mafanikizo na adzimunthu nkhabe kwanisa kutipheza. Thangwi yanji nkhabe?—1 Akorintu 8:4.
Kodi mphyadidi kukhala na mafanikizo?—Deuteronomi 27:15; 1 Juwau 5:21.
59 Thangwi yanji mphyakuipa kukhala na pitumwa peno kulodza?—Deuteronomi 18:10-13; Chidziwiso 21:8.
60 Maanju akuipa peno madimoni asandukira Mulungu. Iwo asaphatisira basa anyakulotera towera kupambusa anthu.—Machitiro 16:16.
61 Tisafunika kuphembera kwa Mulungu. Phembero isabveka kulonga na Mulungu, kumpanga kuti tisafuna kumphatira basa na kuphemba phedzo ace.—Afilipi 4:6, 7.
62 Tisafunika kubvera Yezu na kunkhulupira.—Ayeberi 5:9; Juwau 3:16.
63 Kumbukani kuti iye afa towera kutipulumusa.—Aroma 5:8.
64 Kumbukani kuti Yezu ndi Mambo wathu wakukhonda kuoneka. Tisafunika kumbvera.—Afilipi 2:9-11; Chidziwiso 19:16.
65 Yezu alonga kuti musafunika kulonga kuna anango pya pinthu pyadidi pinapfunzemwe na kuti ale anafuna kuphatira basa Mulungu asafunika kubatizarwi.—Mateyu 28:19, 20; Juwau 4:7-15.
66 Na tenepa, imwe munakwanisa kulonga na axamwali anu pya pinthu pyadidi pyenepi.—Mateyu 10:32.
67 Mungapfunza kuleri mwadidi, munakwanisa kupfunza pinthu pinango pizinji na kupheza pyadidi anango.—2 Timoti 2:15.
68 Yezu apfunzisambo pina piana kuti pibvere Mulungu. Iye cipo na cipo akhali wakuphata basa mpaka kusowa nzidzi wakulonga napyo.—Mateyu 19:13-15.
69 Anyakubala midzidzi yonsene asafunika kupfunzisa ana awo kuti abvere Mulungu na kumfuna.—Deuteronomi 6:6, 7; Misanje 6:20-22; Aefesu 6:4.
70 Pana marelijiau mazinji akusianasiana. Mazinji a mapfunzisiro awo si a m’Bibilya tayu. Yahova asatipanga kuti tibuluke m’marelijiau okhonda pfunzisa undimo.—Chidziwiso 18:4; Juwau 4:23, 24.
71 Yahova ali na anthu pa dziko yapantsi akukwanisa kukupfunzisani pizinji pene pya iye. Kodi musadziwa kuti iwo mbani?—Machitiro 15:14; Aroma 10:14, 15.
72 Iwo asacemerwa Mboni za Yahova. Ali na ntendere pakati pawo. Kodi musadziwa thangwi yanji? Thangwi yakuti asafunana unango na nzace.—Yesaya 43:10-12; Juwau 13:34, 35.
73 Pina na thangwi yakuti asamfuna Yahova, iwo abatizarwi. Tenepa iwo asapangiza pakweca kuti asiya njira yawo yakuipa ya umaso nakuti asafuna kubvunga umaso wawo m’basa ya Mulungu.—Machitiro 2:41.
74 Mboni za Yahova zisadikhira kukhala maso m’paradizu ipswa yakubalika.—Masalimo 37:9-11, 29.
Kodi musafunika kucitanji towera mukhalembo mwenemo pabodzi nawo?—Yakobo 1:22, 25; 2:20-26.
75 Gumanyikani na anthu anewa towera mupfunze kuphatira basa Yahova. Iwo asabvera na kufuna Yahova pabodzi na Yezu Kristu. Kodi imwe mukuwafuna? Kodi musafuna kupheza anthu anango kudziwa Mulungu?—Juwau 6:45-47.
76 Yahova na Yezu Kristu asakufunani pina asafuna kuti mukhale maso kwenda na kwenda m’paradizu.—Juwau 3:16.
Pidapfunzemwe mwa kulang’ana pithunzithunzi pabodzi na cidziwiso ciri m’bruxura ino pyakupasanidi cifuno cakukhala maso kwenda na kwenda pa dziko yapantsi. Khala musafuna kudziwa pizinji pya pyenepi, tisakupasani nyerezero yakuti mulonge na Mboni ya Yahova ya pacisa canu. Peno mungakwanise kulemba tsamba, peno kuphemba munthu kuti akulembereni, yakwenda ku ofise yacifupi na kuna khalemwe, ninga pyapangizwa pa ndandanda wa mathonyezero a mbuto ziri pa tsamba yaciwiri ya bruxura ino.