Dhanyeli Aponywa N’djenje ya Nkhalamu

Mambo unango wa ku Bhabhilonya akhali Dhariyo wa ku Medhya. Dhariyo aona kuti Dhanyeli akhali wakupambulika. Natenepa iye ansankhula toera atsogolere amuna onsene akhaphatira mambo. Amuna anewa akhala na bibvu mbafuna kupha Dhanyeli. Iwo akhadziwa kuti Dhanyeli akhacita phembero kuna Yahova katatu pa ntsiku. Natenepa, iwo aenda kalonga na Dhariyo: ‘Mambo, khazikisani mwambo wakuti anthu onsene asafunika kucita phembero kuna imwe basi. Munthu anakhonda kubvera mwambo anadzaponywa n’djenje ya nkhalamu.’ Dhariyo akomerwa na maonero anewa, mbakhazikisa mwambo unoyu.

Dhanyeli pidabva iye kuti wakhazikiswa mwambo upswa, iye aenda kunyumba kwace. Iye agodama kutsogolo kwa janela yakufunguka mbacita phembero kuna Yahova. Amuna akuipa ntima apita n’nyumba mwace mban’gumana akucita phembero. Mwakucimbiza iwo aenda kapanga Dhariyo: ‘Dhanyeli nee asakubverani. Iye asacita phembero kuna Mulungu wace katatu pa ntsiku.’ Dhariyo akhafuna Dhanyeli, pontho nee akhafuna kuti aphiwe. Ntsiku ineyi yonsene Dhariyo akhanyerezera kuti anapulumusa tani Dhanyeli. Mbwenye mambo nee mbadakwanisa kucinja mwambo udakhazikisa iye. Iye apanga anyabasa ace toera kuponya Dhanyeli n’djenje ya nkhalamu.

Namasiku anewa Dhariyo adzudzumika kakamwe na Dhanyeli mbacimwana kugona. Mangwana mwace namacibese, iye aenda pa djenje mbambvundza: ‘Dhanyeli, Mulungu wako akupulumusa?’

Dhanyeli atawira: ‘Anju wa Yahova afunga milomo ya nkhalamu. Izo nee zandiphekesa.’ Dhariyo akomerwa kakamwe! Iye apanga anthu toera abuluse Dhanyeli n’djenje. Dhanyeli nee akwarunywa na nkhalamu. Buluka penepo, mambo alonga: ‘Ponyani n’djenje amuna adapambizira Dhanyeli.’ Pidaponywa amuna anewa, iwo adyiwa na nkhalamu mbadzati fika n’djenje.

Dhariyo atumiza mphangwa kuna anthu ace onsene: ‘Anthu onsene asafunika kulemedza Mulungu wa Dhanyeli. Iye apulumusa Dhanyeli toera akhonde kudyiwa na nkhalamu.’

Kodi musacita phembero kuna Yahova ntsiku zonsene, ninga pikhacita Dhanyeli?