KUCEDZA NA NYAKUENDEKANA

Thangwi Yanji Kudinga Bhibhlya?

Mafala anatowerera ndi kucedza kwakuti m’bodzi wa Mboni za Yahova anakwanisa kukhala nako na nyakuendekana wace. Tendeni tinyerezere kuti Mboni dzinace ndi Britu asacedza na mamuna anacemerwa Eriki.

BHIBHLYA​—MBIRI YAKUNYINDIRIKA

Eriki: Ine nee ndisafuna maka pya uphemberi. Natenepa ndisaona kuti nee tiri na pizinji toera kucedza.

Britu: Ndakomerwa kundipanga kwanu pyenepi. Mbwenye dzina yanga ndine Britu. Yanumbo?

Eriki: Eriki.

Britu: Ndakomerwa kukudziwani.

Eriki: Na inembo.

Britu: Ndiri na mbvundzo, kodi imwe mwakula m’banja yauphemberi?

Eriki: Inde. Mbwenye pidabuluka ine panyumba mbindienda ku universidade, ndasiya kuphembera.

Britu: Ndikuona. Ninji pinapfundza imwe ku universidade?

Eriki: Pya makhaliro na mbiri. Ndzidzi onsene ndisakomerwa na mbiri zenezi za uthambaruki wa anthu pa dziko.

Britu: Mbiri zinakwanisa kukhala zakutsandzayisa. Bhibhlya, ninga musadziwa, ndi bukhu ya mbiri. Kodi mwatoma kale kufufudza Bhibhlya pakupfundza kwanu?

Eriki: Nkhabe. Ndisadziwa kuti ndi bukhu yadidi, mbwenye cipo ndanyerezera Bhibhlya ninga bukhu ya mbiri.

Britu: Imwe musaoneka ninga munthu waudziwisi. Mungakhala na mphindi zingasi, ndinakupangizani pitsandzo pingasi pya mbiri zakunyindirika zinagumanika m’Bhibhlya.

Eriki: Nkhabe pinthu. Mbwenye ine nkhabe Bhibhlya.

Britu: Nkhabe nyatwa. Tinaphatisira Bhibhlya yanga. Citsandzo cakutoma cisagumanika pa 1 Pya dziko ya Israele kapitulu 29, vesi 26 na 27. Mavesi anewa asalonga: ‘Dhavidhi mwana wa Jese atonga mbumba yonsene ya ana a Israele; utongi wace wamala pyaka 40, ndiko kubveka, pyaka 7 mu Hebroni na pyaka 33 mu Yerusalemu.’

Eriki: Kodi citsandzo ceneci cakhala tani mbiri yakunyindirika?

Britu: Anyakupokanya mu ndzidzi unango alonga kuti Mambo Dhavidhi cipo akhalapo.

Eriki: Ndimomwene? Thangwi yanji asapokanya kukhalapo kwace?

Britu: Kusiyapo Bhibhlya, pakhali na pipangizo pyakucepa pyakuti iye akhali munthu wandimomwene. Natenepa, mu caka 1993, nsoka wa anyakusaka pinthu pyakale wagumana mwala udalembwa mafala akuti “Nyumba ya Dhavidhi.”

Eriki: Ayee!

Britu: Munthu unango analongwa m’Bhibhlya wakuti akhapenulwa kukhalapo kwace akhali Ponsyo Pilato wakuti akhatonga mu ntsiku za Yezu. Iye asalongwa apa pa Luka kapitulu 3, vesi 1, ninga m’bodzi wa akulu a utongi anango azinji a mu ndzidzi unoyu.

Eriki: Inde. Isalonga kuti ‘mukhali Ponsyo Pilato nyakutonga wa mu dziko ya Yudeya, Herode akhali ntongi wa ku Galileya.’

Britu: Takhuta. Kwa pyaka pizinji, anyaudziwisi akhapenula kuti Ponsyo Pilato akhali munthu wandimomwene. Natenepa, cifupi na pyaka 50 nduli, wagumanwa mwala ku Oriente Médio wakulembwa mwadidi dzinace.

Eriki: Hum. Cipo ndatoma kubva mphangwa zenezi.

Britu: Mphyakutsandzayisa kulonga na imwe mphangwa zenezi.

Eriki: Kulonga mwandimomwene, ndzidzi onsene ndikhalemedza Bhibhlya ninga bukhu, mbwenye cipo ndanyerezera kuti ndi yakufunika mu ndzidzi uno. Iyo inakwanisa kukhala na mbiri yakunyindirika, mbwenye nee ndisaona kuti ndi yakufunika.

BHIBHLYA NDI YAKALE MBWENYE NDI YAKUFUNIKA MU NDZIDZI UNO

Britu: Anthu azinji mbadatawirambo mafala anewa. Mbwenye ine nee ndisapitawira. Ndisalonga tenepa thangwi yakuti kutomera kale pyakufuna pyathu pya umaso nee pyacinja. Mwacitsandzo, ife ndzidzi onsene tisafuna cakudya, cakubvala na nyumba. Ife ndzidzi onsene tisafuna kucedza na anango mbatikhala na banja yakutsandzaya. Simomwene tayu kuti tonsene tisakomerwa na pinthu pyenepi?

Eriki: Inde.

Britu: Bhibhlya inakwanisa kutiphedza mu pinthu pyenepi pyonsene. Ndi thangwi yace tisalonga kuti Bhibhlya ndi yakale mbwenye ndi yakufunika mu ndzidzi uno.

Eriki: Musafuna longanji?

Britu: Ndisafuna kulonga kuti, Bhibhlya iri na midida yakunyindirika yakuti ndi yakufunika ntsiku zino ninga mukhafunika iyo mu pyaka madzana nduli.

Eriki: Ndimomwene? M’makhundu api?

Britu: Tingalonga thangwi yakukhala na maonero akulinganira a kobiri peno umaso wa banja wakutsandzayisa peno kukhala xamwali wadidi, midida ya Bhibhlya inakwanisa kutitsogolera. Iyo inatiphedza toera kukhala akupembera. Mwacitsandzo, kodi nee musatawira kuti kupembera ninga nsolo wa banja peno kukhala mamuna wadidi ndi pyakunentsa mu ntsiku zino?

Eriki: Ndimomwene, ndisatawira maonero anu pa nkhani ineyi. Ine na nkazanga tiri pabodzi ninga banja cifupi na caka, mbwenye ndzidzi onsene mphyakunentsa kukhala na maonero mabodzi ene.

Britu: Pyenepi pisacitika kwa anthu azinji. Mbwenye Bhibhlya iri na midida yakukhonda nentsa yakuti isaphata basa. Mwacitsandzo fungulani Aefesi kapitulu 5. Tendeni tileri vesi 22, 23, na 28. Mungafuna, munakwanisa kuleri mavesi anewa.

Eriki: Inde. Asalonga tepa: ‘Akazi abvere amuna awo ninga Mbuya. Thangwi mamuna ndi nsolo wa nkazace sawasawa ninga Kristu ndi nsolo wa mpingo. Kristu ndiyembo mpulumusi wa anthu a m’mpingo.’ Vesi 28 isalonga: ‘Tenepa amuna afune akazi awo sawasawa ninga manungo awo ene. Uyu anafuna nkazace anafunika ekha.’

Britu: Takhuta. Simomwene tayu kuti, anyakumanga banja angayesera kuphatisira uphungu unoyu wakukhonda nentsa, umaso wa m’banja unakhala wadidi?

Eriki: Inde, panango pinakwanisika. Mbwenye ndi pyakukhonda nentsa kulonga kupiringana kucita.

Britu: Ndimomwene kuti nkhabepo munthu waungwiro. Mbwenye mu kapitulu ibodzi ene ya Bhibhlya muli na vesi inatiwangisa toera kukhala akulinganira.a Mu uxamwali wathu onsene tisafunika kukhala na maonero akulinganira, pontho anyakumanga banja onsene asafunika kukhala akulekererana. Ine na nkazanga taona kuti Bhibhlya inakwanisa kutiphedza kupangiza makhaliro anewa.

Eriki: Pyenepi ndimomwene.

Britu: Mboni za Yahova ziri na Web site yakuti iri na mphangwa zadidi za umaso wa m’banja. Khala muli na mphindi zingasi, ndinakupangizani pinthu pingasi pinagumanika mwenemu.

Eriki: Nkhabe pinthu, ndipangizeni.

Britu: Takhuta. Web site yathu ndi www.jw.org. Ipi ndi pinapangizwa pa khundu yakutoma.

Eriki: Pana pithundzithundzi pyakubalika kakamwe.

Britu: Pyenepi ndi pitsandzo pya basa yakumwaza mphangwa inacita ife pa dziko yonsene. Ehee, tafikapo. Nkhundu iyi ndi ya nsolo wakuti “Ajuda para Casais e Pais.” Pantsi pa nsolo unoyu, pana misolo inango ming’ono mizinji inalonga pya makhaliro akusiyanasiyana. Ulipo udakomerwa na imwe?

Eriki: Inde. “Como resolver problemas em seu casamento.” Ndisaona kuti ndinaphatisira uyu!

Britu: Nsolo uyu usalonga pya njira zinai zakumalisa nyatwa. Onani ndima iyi. Munakwanisa kuileri?

Eriki: Inde. Isalonga tepa: “Ninga ntima pabodzi na mapapo pisaphedza ciropa kuti ciphate basa mwadidi m’manungo, ufuni na cilemedzo mphyakufunika kakamwe toera anthu akumanga banja acedze mwadidi m’banja.” Hum, ndi mphangwa zakufunika kakamwe.

Britu: Ndakhuta na kuleri kwanu. Pana vesi ya Bhibhlya idalembwa penepa. Munakwanisa kuifungula mukupfinya padzulu pace.

Eriki: Inde, ndaiona. Aefesi 5:33, isalonga: ‘Munthu afune nkazace ninga iye ene. Nkazi alemedze kakamwe mamunace.’

Britu: Musaona kuti pasagomezerwa kuti m’bodzi na m’bodzi asafunika kupasa pinadikhira iye kutambira?

Eriki: Nee ndisabvesesa pinalonga imwe.

Britu: Simomwene tayu kuti mamuna asafuna kulemedzwa na nkazace na nkazimbo asafuna kazinji kene kuona kuti asafuniwa kakamwe na mamunace?

Eriki: Inde. Ndisatawira pyenepi.

Britu: Mamuna angasaka kazinji kene njira zakupangiza ufuni wace kwa nkazace, kodi nee pinakhala pyakukhonda nentsa kwa nkazi kumulemedza?

Eriki: Pisaoneka ninga mbipidaphedza.

Britu: Natenepa, vesi ineyi basi ya Bhibhlya, maseze yalembwa mu pyaka 2.000 nduli, isalonga pya anthu awiri m’banja na kupereka uphungu wadidi, wakuti ungaphatisirwa usaphedza; ninga citsandzo cidaleri ife nduli ca “ntima na mapapo” pinacitisa kuti anyakumanga banja akhale mwadidi.

Eriki: Ndikutawira kuti m’Bhibhlya muli na pizinji pyakuti nee ndikhapinyerezera.

Britu: Ndiri wakutsandzaya kubva pyenepi, pai Eriki. Ndinakhala wakutsandzaya kukugumanani pontho pano na kudziwa maonero anu pa nsolo ung’ono wakuti “Quatro passos para resolver problemas” unagumanika mu nsolo unoyu mu Web site yathu.b

Eriki: Pinakhala pyadidi. Ine na nkazanga tinadzaudinga pabodzi.

Kodi musafuna kudziwa pyakuthimizirika thangwi ya Bhibhlya? Musafuna kudziwa misambo na pinakhulupira Mboni za Yahova? Khala ndi tenepo, khalani wakusudzuka toera kubvundza m’bodzi wa Mboni za Yahova. Iye anadzakhala wakutsandzaya kudinga pabodzi na imwe ntsonga zenezi.

[Pidzindikiro pyapantsi]

[Ntsonga ikulu pa tsamba 9]

Bhibhlya iri na midida yakunyindirika yakuti ndi yakufunika ntsiku zino ninga mukhafunika iyo mu pyaka madzana nduli