MIBVUNDZO INACITWA NA ANYAKULERI . . .

Kodi Paskwa Ndi Phwando Yacikristu?

Encyclopædia Britannica isalonga Paskwa ninga “phwando yakupambulika kakamwe kwa gereja Yacikristu yakukumbukira Kulamuswa kwa Yezu Kristu muli akufa.” Mphapo, iyo ndi phwandodi Yacikristu?

Toera kudziwa undimomwene wa cakucitika ca mbiri, pisafunika kudinga unyomonyomo wace. Kwa ifembo, toera kudziwa khala Paskwa ndi phwando Yacikristu, tisafunika kudinga unyomonyomo unalonga pya iyo.

Cakutoma, Yezu apanga atowereri ace toera kukumbukira kufa kwace, tayu kulamuswa kwace muli akufa. Mpostolo Paulu alonga pya cakucitika ceneci ‘Cakudya ca n’Cidodo ca Mbuya.’​—1 Akorinto 11:20; Luka 22:19, 20.

Encyclopædia ineyi yathimiza mukulonga kuti miyambo mizinji ya Paswa “nee isabverana kakamwe na kulamuswa kwa Yezu muli akufa, mbwenye yabulukira ku miyambo yakale.” Mwacitsandzo, mukulonga pya pidzindikiro pya Paskwa pyakudziwika kakamwe ninga dzai na sulo, Encyclopedia of Religion yalonga: “Dzai isaimirira umaso upswa na kulamuka muli akufa, pontho sulo kutomera kalene akhaphatisirwa ninga cidzindikiro ca mataka a ndimo na kutoma kwa ndzidzi wa malimwe.”

Philippe Walter, mpfundzisi wa mabukhu a medieval afokotoza kuti miyambo yadzacita tani khundu ya phwando ya Paskwa. Iye alemba kuti “mu ndzidzi ukhacinjwa mauphemberi acikunja toera kukhala Acikristu,” pikhali pyakukhonda nentsa kuphataniza phwando yacikunja “ninga kulamuswa muli akufa mu ndzidzi wa khoni mpaka kutoma kwa umaso mu ndzidzi wa malimwe” na kulamuswa muli akufa kwa Yezu. Walter athimiza kuti ineyi ikhali thanyo yakufunika toera kuikha “miyambo Yacikristu” pa kalendaryo wacikunja mbicitisa kuti anthu azinji aitowezere mwakukhonda nentsa.

Kucinja kweneku kwa mauphemberi acikunja toera kukhala Acikristu nee kwacitika apostolo mbaciri maso, thangwi iwo ‘akhakhondesa’ miyambo yacikunja. (2 Atesalonika 2:7) Mpostolo Paulu alonga kuti “pakuenda kwace” ‘anadzalamuka anthu akulonga pyakukhonda lungama, toera anyengerere anyakupfundza kuti aatowerere.’ (Machitiro 20:29, 30) Kunkhomo kwa pyaka dzana yakutoma, mpostolo Jwau alemba kuti anthu anango akhanyengerera Akristu. (1 Jwau 2:18, 26) Natenepa njira ikhadafunguka toera kucita miyambo yacikunja.

Anthu anango anakwanisa kulonga kuti kutowezera miyambo inango ya Paskwa si pyakudawika tayu thangwi ikhaphedza “anthu akunja” kubvesesa mwadidi mabvekero a kulamuswa kwa Yezu muli akufa. Mbwenye Paulu cipo atawira pyenepi. Ngakhale kuti akhaona miyambo mizinji yacikunja mukhacita iye ulendo wace mu Umambo Waciroma, iye nee aphatisira ubodzi mwa iyo toera kufokotozera mwadidi anthu pya Yezu. Mbuto mwace, iye acenjeza Akristu kuti: ‘Lekani kumangirwa pa goli ibodzi ene na anyakukhonda khulupira. Kutawira matongero kunabverana tani na kukhonda matongero? Ceza cinabverana tani na cidima?’ Yahova alonga: ‘Bulukani pa nsoka wa anyakukhonda khulupira, mbamupambulika pyanu, lekani kukhuya pinthu pyakupswipa.’​—2 Akorinto 6:14, 17.

Ninji pidagumana ife mu kudinga kwathu unyomonyomo unoyu? Tagumana kuti Paskwa nee ndi phwando Yacikristu.

[Ntsonga ikulu pa tsamba 8]

‘Lekani kumangirwa pa goli ibodzi ene na anyakukhonda khulupira.’​—2 Akorinto 6:14