NSOLO WA REVISTA | TINATHIMBANA TANI NA KUPSWIPA NTIMA
Kupswipa Ntima Kuli M’makhundu Onsene!
“Ndacita ulendo toera kagula cakudya mbwenye ndagumana basi ene mabulaxa akudhula kakamwe piringana ntengo wakale! M’mangwana mwace, m’maloja nee mukhalibve na cakudya.”—Paul, Zimbabwe.
“Mamunanga andidziwisa kuti akubuluka panyumba. Mbandidatsalakana tani kukhonda khulupirika kweneku? Ninji cikhafuna citikira ananga?”—Janet, Estados Unidos.
“Mudatoma kulira pingalingali, ndathamanga toera kuenda kabisala, mbwenye ndagwa mukhalira mafogeti. Manjanga apitiriza kutetemera m’midzidzi mingasi.”—Alona, Israel.
Ife tikukhala m’midzidzi yakupswipa ntima, “midzidzi yakugopswa.” (2 Timoti 3:1) Anthu azinji asathimbana na kusoweka kwa kobiri, kufudzika kwa mabanja, nkhondo, mautenda akupha mwakucimbiza na pidengwa pyacibaliro peno pyakucitiswa na anthu. Kusiyapo pyenepi, anthu azinji asadzudzumika: ‘Utenda udadzindikirwa m’manungo mwanga unadzakula mbukhala câncer?’ Kodi adzukulu anga anadzakula n’dziko ya makhaliro api?’
Si kupswipa ntima konsene tayu kwakuti ndi kwakuipa. Mwacibaliro, ife tisapswipa ntima mbatidzati kucita prova, mu pinthu pinacita ife, peno pakucitwa mibvundzo pakufuna pita basa. Kugopa ngozwi kunatiphedza kucalira pyakuipa. Mbwenye kupswipa ntima kakamwe peno ndzidzi onsene, nkhwakuphekesa. Kufufudza kudacitwa cincino na anthu akulu akupiringana 68.000 kwapangiza kuti ngakhale kupswipa ntima pang’ono kusathimizira ngozwi yakufa mwakucimbiza. Ndi thangwi yace Yezu abvundza: ‘Mbani mwa imwe anakwanisa kuthimizira umaso wace thangwi yakupswipa ntima?’ Mwandimomwene, kupswipa ntima nkhabe thimizira umaso. Natenepa Yezu acenjeza: ‘Lekani kupswipa ntima.’ (Mateo 6:25, 27, Tradução do Novo Mundo) Mphapo pyenepi pinakwanisika tani?
Ntawiro usaphataniza kuphatisira udziwisi wakuphindulisa, kukulisa cikhulupiro candimomwene kwa Mulungu na cidikhiro cakunyindirika ca ntsogolo. Ngakhale nee tisathimbana na makhaliro akunentsa cincino, panango tinathimbana nawo ntsogolo. Natenepa, tendeni tione kuti kucita pyenepi kwaphedza tani Paul, Janet na Alona toera kuthimbana na kupswipa ntima.