Bukhu Yakuti Biblya Isapfunzisanji—Ciphedzo Cathu Cakutoma Ca Pfunziro Ya Biblya

¹ Takhala akukomerwa tani m’kutambira bukhu yakuti Kodi Mwandimomwene Biblya Isapfunzisanji? pa Nsonkhano wa Gawo “Kubvera Mulungu”! Kunkhomo kwa ndandanda wa Nsabudu anyakugumanika onsene akomerwa m’kutambira bukhu ineyi. Kodi inaphatisirwa tani bukhu ineyi ipswa ya kupfunzisa? Iyo yacitwa towera kukhala ciphedzo cathu cakutoma ca pfunziro ya Biblya. Maseze bukhu ineyi ipswa pakutoma inadzagawirwa m’munda m’nthanda ya Murope, amwazi mphangwa asawangiswa kutoma kuiphatisira mwakucimbiza towera kutomesa na kucitisa mapfunziro a Biblya.

² Mapfunziro A Biblya Acincino: Amwazi mphangwa anacitisa mapfunziro a Biblya na bukhu ya Conhecimento peno bruxura yakuti Mulungu Alikuphembanji asafunika kuphatisira luso pa kusankhula nzidzi na macitiro a kutoma kuphatisira bukhu ipswa pa pfunziro. Khala pfunziro mwaitoma kwene cincino, mungakwanise kuicinja mbumuitomesa pa tsamba yakutoma ya bukhu ipswa. Khala mwapholosa na bukhu ya Conhecimento, mungakwanise kupitiriza na pfunziro pa nsolo wakulinganira m’bukhu yakuti Biblya Isapfunzisanji. Khala muli cifupi na kunkhomo kwa bukhu ya Conhecimento, mungafuna mungakwanise kuimalisa.

³ Mwakukhonda kupenula ife tonsene tisadziwa anthu azinji akuti angakwanise kuphindula m’kupfunza bukhu yakuti Biblya Isapfunzisanji. Thangwi yanji nkhabe pasa munthu mbodzi na mbodzi pfunziro ya Biblya m’kuphatisira bukhu ineyi yakuphedza inapereka undimomwene wa Biblya mwandondondo? Mwacitsanzo, ale adapfunza bruxura yakuti Mulungu Alikuphembanji peno bukhu ya Conhecimento akuti hadaenda tayu kutsogolo mpaka kuperekeka na kubatizwa panango angafune kutoma papswa pfunziro yawo m’kuphatisira bukhu ineyi ipswa. Anyakubala angakwanise kusankhula kuphatisira bukhu ineyi munapfunzisa iwo ana awo cidziwiso candimomwene ca cifuno ca Mulungu.—Akol. 1:9, 10.

⁴ Kupfunza Bukhu Yaciwiri: Kodi alipo masasanyiro akuti nyakupfunza wa Biblya apfunze bukhu yaciwiri angamala bukhu yakuti Kodi Mwandimomwene Biblya Isapfunzisanji? Inde. Nyakupfunza angapangiza kuti ali kuenda kutsogolo, ngakhale pang’ono-pang’ono, na asapangiza kupereka takhuta ku pinapfunza iye, pfunziro ya Biblya ingakwanise kupitiriza m’kuphatisira bukhu yakuti Adore o Único Deus Verdadeiro. Tina cibaso cakuti bukhu yakuti Biblya Isapfunzisanji inadzakhala ciphedzo camphambvu m’manja mwathu munacita ife basa ya kucita anyakupfunza.—Mat. 28:19, 20, Mphangwa Zadidi.