Bokosi Ya Mabvunzo

◼ Kodi ndi mabukhu api mawiri anafunika kupfunzwa na anthu anapangiza cifuno?

Bukhu yakutoma inaphatisira ife kakamwe towera kutomesa na kucitisa mapfunziro a Biblya apanyumba ndi yakuti Biblya Isapfunzisanji. Maseze si pyakudawika tayu kuphatisira bukhu inango, ninga katsamba kakuthema, towera kutomesa pfunziro ya Biblya, mbwenye mwakukhonda dembuka, wangisirani towera mucinje mbumuphatisira bukhu yakuti Biblya Isapfunzisanji. Maphindu adidi kakamwe agumanywa thangwi ya kuphatisira bukhu yakuti Biblya Isapfunzisanji towera kutomesa mapfunziro.

Mungamala kupfunza bukhu yakuti Biblya Isapfunzisanji na nyakupfunza ali kuenda kutsogolo, bukhu yakuti Lambirani Mulungu isafunika kupfunzwa. (Akol. 2:7) Tsamba 2 isafokotoza cifuniro ca bukhu ineyi: “Biblya isadembetera onsene anafuna Mulungu ‘kubvesesa chengo na kuzika’ kwa undimomwene wace wakufunika kakamwe. (Aefesi 3:18) Bukhu ino yasasanywa towera kutiphedza kucita pyenepi. Tisadikhira kuti inadzakuphedzani kukula mwauzimu na kukhala akukhunganyika mwadidi towera kufamba m’nseu wakucepa unatsogolera ku umaso m’dziko ipswa yakulungama ya Mulungu.”

Khala nyakupfunza athema kubatizwa mbasati kumalisa mabukhu anewa mawiri, pfunziro isafunika kupitiriza mpaka kumalisa bukhu yaciwiri. Ngakhale nyakupfunza abatizwe, nyakucitisa pfunziro angakwanise kulemba basi ndzidzi, ulendo wakubwereza na pfunziro ya Biblya. M’mwazi mphangwa anaperekera nyakucitisa pfunziro na kucitambo khundu angakwanisembo kulemba ndzidzi.