Kodi Mungakwanise Kucinja Ndandanda Wanu?
1 Ninga Akristu andimomwene, tatawira ncemerero towera kukhala “anyakusodza a anthu.” (Mat. 4:19) Ninga anyakusodza andimomwene, tingakwanise kukhala na maphindu adidi m’basa ya kusodza anthu tingacita masasanyiro towera kumwaza mphangwa m’nzidzi wakuti anthu angakwanise kugumanika. M’madziko mazinji, nthanda zinafuna kudza zinadzakhala na ntsiku zakulapha. Dzuwa mbisati kubira peno pakutoma kwa cidodo, anthu azinji asagumanika pa nyumba. Kazinji kene, m’nzidzi unoyu manyerezero awo nkhabe dzudzumika na pinthu pinango na panango angatambire alendo. Kodi mungakwanise kucinja ndandanda wanu towera kumwaza mphangwa m’midzidzi ineyi?—1 Akor. 9:23.
2 Kupereka Umboni Ncidodo: Kucita masasanyiro mwanyapantsi towera kumwaza mphangwa ncidodo kungakwanise kuticitisa kugumana anthu azinji mbatigawana nawo mphangwa zadidi. (Mis. 21:5) Aphale na atsikana angakwanise kumwaza mphangwa angakotoka ku xikola. Anango angakwanise kumwaza mphangwa angakotoka ku basa. Misoka inango ya pfunziro ya bukhu ingakwanise kucita masasanyiro towera kumwaza mphangwa nzidzi ubodzi pfunziro ya sumana mbisati kutoma.
3 Kumwaza mphangwa nyumba na nyumba dzuwa mbisati kubira na pakutoma kwa cidodo kungakwanise kuticitisa kulonga na ale akuti kazinji kene nkhabe gumanika pa nyumba. M’pisa pizinji, mungakwaniswe kuphatiwa basa m’nseu peno kuphatisira njira zinango za kupereka umboni wa pakweca ncidodo. Azinji asaona midzidzi ya ncidodo ninga yadidi towera kucita maulendo akubwerezera na kutomesa mapfunziro a Biblya.
4 Luso Isafunika: Tisafunika kuphatisira luso yadidi pa kupereka umboni ncidodo. Kazinji kene mphyadidi kupereka umboni wa nyumba na nyumba m’midzidzi yakutoma ya cidodo basi, mbuto mwa kuenda nyumba na nyumba m’nzidzi wakuti anaciro nyumba ali kukhunganyika towera kugona. (Afil. 4:5) Munagogoda imwe nsuwo, limirani pa mbuto yakuti mungakwanise kuoniwa na pidziwikiseni mwadidi. Dziwisani mwakucimbiza pidakucitisani kuenda pa nyumba pawo. Mungafika pa nzidzi wakukhonda thema, ninga nzidzi wakuti banja iri kudya, phembani kubwerera m’nzidzi unango. Khalani na citsalakano na anango m’nzidzi onsene.—Mat. 7:12.
5 Tisafunikambo kucita mphole-mphole na makhaliro akuti angakwanise kutiikha pa ngobzi. Mungapereka umboni ncidodo, mphyadidi kufamba awiri-awiri peno ninga nsoka. Fambani m’miseu yakuti iri na ceza na mokhonda thawikirana na anango. Perekani umboni m’mbuto zinaona imwe kuti muli akutsidzikizika. Calirani mbuto zakuti zingakwanise kubweresa ngobzi m’cidodo.—Mis. 22:3.
6 Kupereka umboni dzuwa mbisati bira na pa kutoma kwa ncidodo kusaticitisakuphata basa na apainiya akuphedza peno a nzidzi onsene. (Arom. 1:12) Kodi mungakwanise kucinja ndandanda wanu towera kucita khundu m’ntundu unoyu wa basa?
[Study Questions]
1. Thangwi yanji tisafunika kucinja ndandanda wathu towera kumwaza mphangwa?
2. Kodi ndi njira zipi zingasi zakuti zinaticitisa kumwaza mphangwa zadidi kwa anthu azinji?
3. Kodi ndi njira zipi zinafuna kukuphedzani kumwaza mphangwa dzuwa mbisati kubira na pakutoma kwa cidodo m’cisa canu?
4. Thangwi yanji mphyakufunika kupangiza luso na kukhala na citsalakano na anango pa kupereka umboni ncidodo?
5. Kodi tinakwanisa tani kucalira ngobzi munamwaza ife mphangwa?
6. Kodi ndi maphindu api akuthimizirika anabwereswa m’kupereka umboni dzuwa mbisati bira na pa kutoma kwa cidodo?