Phatisirani Mwadidi Ndzidzi Wanu Mu Utumiki

Nkati mwa caka ca basa ca 2014, Mboni za Yahova zaphatisira midzidzi yakukwana 1.945.487.604 mu utumiki​—kupangiza pakweca kuti tiri akutonga kucita pizinji m’basa ya Yahova! (Sal. 110:3; 1 Akor. 15:58) Nakuti ‘ndzidzi udasala ndi ung’ono,’ kodi pinakwanisika kuphatisira mwadidi midzidzi yathu mu utumiki toera kumwazira mphangwa anthu azinji?​—1 Akor. 7:29.

Kuphatisira mwadidi ndzidzi wathu mu utumiki pisaphemba kucinja pinthu mwakucimbiza. Mwacitsandzo, khala kazinji kene musamala ndzidzi uzinji mu khundu inango ya utumiki nee kulonga na anthu, kodi munakwanisa kucinja khundu ineyi toera kulonga na azinji? Makhaliro a pisa ndi akusiyana. Natenepa, maonero anatowerera anakwanisa kukuphedzani kuphatisira mwadidi ndzidzi wanu toera kucalira ‘kumenya mphepo.’​—1 Akor. 9:26.

• Umboni Wa Nyumba-Na-Nyumba: Mu pyaka pizinji, amwazi mphangwa kazinji kene asatoma utumiki wawo mukumwaza mphangwa nyumba na nyumba. Nakuti azinji asaphata basa namacibese mpaka namaulo, ndiye tani kuyesera kumwaza mphangwa nyumba na nyumba namaulo peno n’cidodo, ndzidzi wakuti anthu azinji asagumanika panyumba? Natenepa, kumwaza mphangwa mu nseu peno mbuto za malonda mu ndzidzi wa basa mbapidaphindulisa kakamwe.

• Umboni Wapakweca: Meza peno karinya pisafunika kuikhwa m’mbuto zinafamba anthu azinji nkati mwa cisa ca mpingo. (Onani Utumiki Wathu wa Umambo wa 2013, tsa. 5.) Khala mbuto idasankhulwa toera kupereka umboni wapakweca nee ikupitwabve na anthu azinji, Komiti Yakuyang’anira Basa M’mpingo inakwanisa kudinga mwacidikhodikho mbuto inango inapita anthu azinji toera kuikha meza peno karinya ineyi.

• Maulendo Akubwereza Na Mapfundziro a Bhibhlya: Mphyakukwanisika kucinja ndandanda yanu ya maulendo akubwereza na mapfundziro a Bhibhlya m’midzidzi yakuti makhundu anango a utumiki nee asaphindulisa kakamwe? Mwacitsandzo, khala utumiki wa nyumba na nyumba usaphindulisa n’Sabudu namacibese, munakwanisa kucitisa pfundziro yanu ya Bhibhlya namaulo peno n’cidodo? Pakucita maulendo akubwereza, kodi amwazi mphangwa anakwanisa kugawana m’misoka ming’ono toera kucita pizinji mu utumiki?

Ndimomwene kuti tisalengesa midzidzi inamala ife mu utumiki, mbwenye kutsandzaya kwathu kusathimizirika tingagumana maphindu. Khala khundu inango ya utumiki nee isakuphindulisani mu ndzidzi udasankhula imwe, yeserani khundu inango. Phembani citsogolero ca Yahova, ‘Mwanaciro wa pinafuna kubvunwa’ toera mukwanise kuphatisira mwadidi ndzidzi wanu mu utumiki!​—Mat. 9:38.