Munakwanisa Kupereka Umboni Namasiku?
1. Mwakubverana na nyakudziwisa m’bodzi, ndi ndzidzi upi udamwaza mphangwa mpostolo Paulu mu utumiki wa nyumba na nyumba?
1 Mwakubverana na bukhu yakuti Vida Cotidiana nos Tempos Bíblicos, mpostolo Paulu acita khundu mu utumiki wa nyumba na nyumba “kutomera pa ndzidzi 4 wakumaulo mpaka namasiku.” Ife nkhabe dziwa khala unoyu ukhali ndandanda wa Paulu, mbwenye tisadziwa kuti Paulu akhafunisisa kuphata “mabasa onsene thangwi ya mphangwa zadidi.” (1 Akor. 9:19-23) Pyenepi mbipidacitisa Paulu kucita masasanyiro toera kuenda nyumba na nyumba pa ndzidzi wakuti mbadakwanisa kulonga na anthu azinji.
2. Thangwi yanji namasiku ndi ndzidzi wakuthema toera kuenda mu utumiki?
2 M’mbuto zizinji amwazi mphangwa adzolowera kuenda namacibese mu utumiki wa nyumba na nyumba pakati pa sumana. Kodi unoyu usapitiriza kukhala ndzidzi wakuthema mu cisa canu? Mpainiya m’bodzi alonga mwakubverana na cisa cace: “Mphyakunentsa kugumana munthu panyumba namasikati. Mbwenye anthu azinji asagumanika panyumba namasiku.” Kupereka umboni namasiku kunakwanisa kupereka mwai wadidi toera kulonga na amuna, makamaka toera kuamwazira mphangwa zadidi. Kazinji kene anaciro nyumba ali akusudzuka na akufunisisa toera kucedza. Khala ndi pyakuphedza kucita pyenepi, akulu a mpingo asafunika kucita masasanyiro a misonkhano toera kuenda m’basa ya m’munda namasiku.
3. Tinaphatisira tani ndzeru pakumwaza mphangwa namasiku?
3 Phatisirani Ndzeru: Pakumwaza mphangwa namasiku, kuphatisira ndzeru ndi kwakufunika kakamwe. Mwacitsandzo, mungaona kuti nee ndi ndzidzi wadidi toera kucedza na mwanaciro nyumba, ninga pa ndzidzi wakusiyali, mphyadidi kumpanga kuti munabwerera pontho pa ndzidzi unango. Khala kwadoka kakamwe, limirani pa mbuto yakuti mwanaciro nyumba anakwanisa kukuonani mwadidi, na mwakucimbiza longani dzina yanu na cifuniro ca ulendo wanu. Ndi kwandzeru kuphata basa anthu awiri peno mu nsoka, mbamukhala mu nseu peno njira yakuti iri na ceza cadidi, pontho lekani kukhala mwekhene. Lekani kucedzera anaciro nyumba namasiku kakamwe toera mukhonde kuadzudzumisa pa ndzidzi unakhunganyika iwo toera kuenda kagona. (2 Akor. 6:3) Khala pacisa nkhabe citsidzikizo namasiku, mwazani mphangwa ncidodo.—Mis. 22:3.
4. Ndi maphindu api anagumanika pakumwaza mphangwa namasiku?
4 Maphindu: Utumiki ndi wakutsandzayisa kakamwe tingagumana anthu toera kuamwazira mphangwa. Pontho tingalonga na anthu azinji tinadzakhalambo na miyai mizinji toera kuphedza anango kuti ‘apulumuke, adziwembo mapfundzisiro adidi.’ (1 Tim. 2:3, 4) Munakwanisa kucinja ndandanda yanu toera kupereka umboni namasiku?