Kupereka Umboni Mu Nseu Ndi Kwakuphindulisa
1. Ndi njira ipi ibodzi yakuti tinakwanisa kusangizira Yezu?
1 Mu utumiki wace pa dziko yapantsi, Yezu nee anyinyirika toera kulonga na anthu akhagumana iye mu njira peno m’mbuto zinango zapakweca. (Luka 9:57-61; Jwau 4:7) Iye akhafuna kugawira mphangwa zace zakufunika kakamwe kwa anthu azinji. Lero, kupereka umboni mu nseu ndi njira yakuthema kakamwe toera kuphedza anthu kugumana udziwisi wa Mulungu. (Mis. 1:20) Kupembera kwathu kunadzathimizirika tingatoma ndife kufendedzera anthu, pontho tingaphatisira ndzeru.
2. Kutoma kulonga kusaphatanizanji pakupereka umboni mu nseu?
2 Tomani Ndimwe: Mphyadidi kufendedzera anthu mbuto mwa kulimira peno kukhala pantsi mbamudikhira kuti anthu anagwanda na njira akufendedzereni. Mwetulirani, yang’anani munthu pakulonga, khalani wakupfulika na pangizani makhaliro auxamwali. Khala mukuphata basa na amwazi mphangwa anango, kazinji kene mphyadidi kuti m’bodzi na m’bodzi afendedzere munthu paekha. Musafunikambo kuwangisira toera kusaka njira yakupitiriza kulonga na munthu adapangiza cifuno. Pingakwanisika, pakumala kucedza, mwakukoma ntima bvundzani kuti munakwanisa tani kupita n’cibverano na munthu unoyu. Amwazi mphangwa anango asapereka umboni mu nseu pa mbuto ibodzi ene, pyenepi pisaacitisa kulonga na anthu abodzi ene kazinji kene pontho mbakulisa cifuno ca anthu anewa.
3. Tinaphatisira tani ndzeru pakupereka umboni mu nseu?
3 Phatisirani Ndzeru: Phatisirani luso pakusankhula mbuto yakulimira mu nseu, onesesani mwadidi ale anafuna imwe kufendedzera. Nee ndi kwakufunika kumwaza mphangwa kwa anthu onsene anapita na njira. Pontho onesesani mwadidi, khala munthu ali na nkhasa mphyadidi kunsiya apite pyace. Pakupereka umboni pa mbuto za malonda, phatisirani ndzeru toera mukhonde kudodomesa mwanaciro malonda. Kazinji kene mphyadidi kupereka umboni kwa anthu mu ndzidzi unakotoka iwo pabasa mbuto mwa ndzidzi unafika iwo. Fendedzerani anthu mu njira yakukhonda kuatutumusa peno kuathusa. Pontho, phatisirani ndzeru pakugawira mabukhu. Khala munthu apangiza cifuno pang’ono, mphyadidi kumpasa katsamba mbuto mwa marevista.
4. Thangwi yanji kupereka umboni mu nseu ndi njira yakuphindulisa na yakutsandzayisa?
4 Kupereka umboni mu nseu kusatiphedza toera kubzwala mbeu zizinji za undimomwene mu ndzidzi wakucepa. (Koel. 11:6) Tinagumanikana na anthu anango akuti nee tinakwanisa kuagumana panyumba ngakhale pa ndzidzi unacita ife basa ya nyumba na nyumba. Thangwi yanji nkhabe kucita masasanyiro akupereka umboni mu nseu? Njira yakuphindulisa na yakutsandzayisa m’basa ya m’munda.