Njira Yadidi Na Yakutsandzayisa Toera Kupereka Umboni Wapakweca
1. Kodi mipingo yakuti iri na mbuto zinafamba anthu azinji na miyendo isawangiswa toera kucitanji?
1 Mipingo yakuti iri na mbuto zinafamba anthu azinji na miyendo isawangiswa toera kucita masasanyiro akupereka umboni wapakweca, mu kuphatisira meza peno makarinya akugawira mabukhu. Pakuphatisira meza, m’mwazi mphangwa m’bodzi anakwanisa kulimira peno kukhala kutali pang’ono na meza. Amwazi mphangwa anango awiri asafunika kukhala cifupi na meza. Ale ali cifupi na meza asafunika kuwangisira toera kukhala auxamwali, aufuni na kucitisa anthu kukhala akusudzuka. Munthu angapangiza cifuno ku mabukhu, m’mwazi mphangwa m’bodzi anakwanisa kutomesa makani, panango mu kulonga kuti, “Mwatoma kale kunyerezera pinalonga Bhibhlya thangwi ya nkhani ineyi?” M’mwazi mphangwa unango peno awiri anakwanisa kuyang’ana pa meza mu ndzidzi ubodzi ene mbapereka umboni wantsusukano.
2. Longani cakugumana naco cinapangiza maphindu akupereka umboni wapakweca mu kuphatisira meza ya mabukhu.
2 Masasanyiro anewa asaphedza toera kucitisa mapfundziro a Bhibhlya mazinji mapswa. Nyakupfundza unango wacitsikana asankhula kulemba mphangwa thangwi ya Mboni za Yahova, mbwenye nee akwanisa kugumana Nyumba ya Umambo. Pa sumana idatowerera, iye aona meza yakuti ikhali na mabukhu cifupi na xikola yace. Iye atoma kupfundza Bhibhlya, lero iye ndi m’mwazi mphangwa wakubatizwa, pontho asacitambo khundu mu ntundu unoyu wakupereka umboni.
3. Ndi api mabvero a anango thangwi ya njira ineyi yakupereka umboni?
3 Mulongo m’bodzi anakomerwa na njira ineyi yakupereka umboni alonga: “Anthu anango asalimira pa meza toera kuphemba marevista mapswa. Anango cipo abva kulonga pya Mboni za Yahova. Ndisaona kuti na njira ineyi yakupereka umboni, anthu azinji anakwanisa kumwazirwa mphangwa.” Mulongo unango alonga: “Ineyi ndi njira yadidi kakamwe na yakutsandzayisa toera kupereka umboni, thangwi anthu asabwera kuna iwe ngakhale kuti nee ali na cifuno kakamwe.”
4. Thangwi yanji mphyakuphindulisa kuikha meza ya mabukhu pa mbuto ibodzi ene na pa ndzidzi ubodzi ene pa sumana ibodzi na ibodzi?
4 Mphyadidi kakamwe kuikha meza ya mabukhu pa mbuto ibodzi ene, mu ntsiku zibodzi zene, na pa ndzidzi ubodzi ene pa sumana ibodzi na ibodzi. Natenepa, anthu anadzolowera kuona meza ya mabukhu mbakhala akusudzuka toera kufendedzera na kucita mibvundzo peno kuphemba mabukhu. Kodi mpingo wanu wacita kale masasanyiro akupereka umboni wapakweca? Khala wacita, panango munakwanisa kucita khundu mu njira ineyi yakutsandzayisa na yakuphindulisa toera ‘kumwaza mphangwa za Umambo wa Mulungu.’—Luka 9:60.